Раав Иеговалы оске вал

Ойдо син азямы пуктомы, асьмеос вашкала Иерихо́н карын шуыса, кудӥз Ханаа́н музъемын интыяськемын. Отын улӥсьёс Иеговалы уг оско вал. Со карын Раа́в нимо кышномурт улӥз.

Куке Раав пичи вал ай, солы вераллязы со сярысь, кызьы Моисе́й Горд зарезьлэсь вуоссэ люкиз но Израиль калыкез Египетысь поттӥз. Со сяна, со кылӥз на, кызьы Иегова Израиль калыклы тушмонъёссэ вормыны юрттӥз. Но тани со тодӥз, израиль ожгарчиос Иерихон котыре интыяськизы шуыса.

Одӥг ӝытэ кык израиль пиос Иерихонэз учкыны-эскерыны мынӥзы. Куке соос Раав доры лыктӥзы, со соосыз пырыны ӧтиз но уйлы кельтӥз. Уйин Иерихонлэн эксэезлы веразы, карын чакласькись-утчаськись муртъёс вань но соос Раав дорын шуыса. Соку эксэй соосыз кутыны аслэсьтыз адямиоссэ ыстӥз. Раав кык чакласькись-утчаськисьёсыз коркаезлэн липет вылаз ватӥз (нош липетъёс со улосын ӵошкытэсь вал) но эксэен ыстэм адямиослы вераз: «Зэм ик, мон доры вуылӥзы адямиос, но соос карысь кошкизы ини. Ӝоггес уйиське сьӧразы, тӥ соосты сутоды на!» Тодӥськод-а, малы Раав чакласькись-утчаськисьёсыз ватӥз?~ Со Иеговалы оске вал но тодэ вал, Иегова Израиль калыклы Ханаан музъемез сётоз шуыса.

Раав дорысь кошкемзылэсь азьло, чакласькись-утчаськисьёс солы кыл сётӥзы, со но солэн семьяез Иерихон куашкан дыръя утемын луозы шуыса. Нош мар карыны косӥзы соос Раавез?~ Соос веразы: «Басьты горд гозы но сое укно бордад дум. Озьы лэсьтӥд ке, соку ваньмыз, кинъёс тынад коркад луизы, утиськозы». Раав ваньзэ лэсьтӥз озьы, кызьы солы чакласькись-утчаськисьёс веразы. Нош мар луиз собере?~

Кӧня ке нунал ортчыса израиль ожгарчиос куара поттытэк кар котыртӥ ортчылыны кутскизы. Куать нунал ӵоже, нуналаз одӥг пол, соос карез котыртылӥзы. Нош сизьыметӥ нуналаз соос озьы сизьым пол лэсьтӥзы но бадӟым, кужмо куараен кеськизы. Соку Иегова карез котыртӥсь борддоръёсыз куашкатӥз. Нош корка, кудӥзлэн укно бордаз горд гозы думемын вал, ӧз куашка! Адӟиськод-а сое суред вылысь?~ Раав но солэн семьяез утиськизы!

Малы тон Раавлэсь дышетскыны быгатӥськод?~ Раав Иеговалы оске вал, малы ке шуоно со солэн паймымон ужъёсыз сярысь тодэ вал. Тон но Иеговалэн паймымон ужъёсыз сярысь тодыны быгатӥськод. Оскиськод-а тон Иеговалы, Раав сямен ик?~ Ми тодӥськомы, оскиськод шуыса!