Со аслэсьтыз атайзэ но Иеговаез шумпоттэ вал

Адӟиськод-а суред вылысь пичи нылашез?~ Со Иеффа́й нимо пиосмуртлэн нылыз. Библиын верамын ӧвӧл, кызьы солэн нимыз, но ми тодӥськомы, со аслэсьтыз атайзэ но Иегова Инмарез шумпоттэ вал шуыса. Ойдо тодматскомы соин но солэн атаеныз, Иеффаен.

Иеффай умой адями вал, но со нылызлы трос вералляз Иегова сярысь. Озьы ик со кужмо пиосмурт но ожгарчиослэн быгатӥсь азьветлӥсьсы вал. Соин ик израиль пиослэн потӥз, со, тушмонъёсынызы ожмаськыку, соослэн йырзы мед луоз шуыса.

Иеффай Инмарез куриз, со калыкезлы вормыны мед юрттоз шуыса. Со кыл сётӥз, вормонэн берытскиз ке, кин нырысь ик солэн дорысьтыз потоз, сое Иеговалы сётоз шуыса. Но со адямилы быдэс улонзэ скинияын ужаны-тыршыны кулэ луоз. Скиния — со инты, кытын адямиос со нуналъёсы Инмарлы йыбыртто вал. Но ма́лпа гинэ, Иеффай зэмзэ ик вормиз! Тодӥськод-а, кин нырысь ик солэн пумитаз потӥз, куке со дораз бертӥз?~

Солэн нылыз! Со солэн одӥг гинэ нылыз вал, но табере, бадӟым будыса, солы атайзэ кельтоно луиз. Иеффайлы туж секыт вал. Но эн вунэты, со Инмарлы кыл сётӥз шуыса. Солэн нылыз солы соку ик шуиз: «Атае, тон Иеговалы кыл сётӥд ке, быдэсты ук сое».

Иеффайлэн нылызлы но секыт вал, малы ке шуоно, скинияын ужам-тыршеменыз, со бызьыны но нылпи вайыны уг быгаты вал. Но солэн туж потэ вал атаезлэсь сётэм кылзэ быдэстэмез но Иеговаез шумпоттэмез. Сое, семья кылдытон сярысь, со кулэенгес лыдъяз. Соин ик со атай юртсэ кельтӥз но быдэс улонзэ скинияын улӥз.

Кызьы тон малпаськод, со Иеговаез но аслэсьтыз атайзэ шумпоттэ вал-а?~ Одно ик! Иеффайлэн нылыз сямен ик, Иеговалэсь кылзӥськид но сое яратӥд ке, тон но Инмарез но аслэсьтыд анай-атайдэ шумпоттод.