6-ТӤ ЛЮКЕТ
Мар луэ адямиен кулэм бераз?
1—3. Кулон сярысь кыӵе юанъёссы кылдо адямиослэн но кыӵе валэктонъёс сёто пӧртэм религиос?
БИБЛИЫН верамын, сыӵе дыр вуоз шуыса, куке «кулон уз ни луы» (Усьтӥськон 21:4). Кызьы ми тодӥмы 5-тӥ люкетысь, ми понна дун тыремын вал, соин милям пумтэм вапумъёсы улыны луонлыкмы вань. Но али адямиос куло на (Екклесиаст 9:5). Озьыен, юан но кыле: мар луэ адямиен кулэм бераз?
2 Та юан тужгес но сюлмаськытэ соосты, кинъёслэн матысь адямизы кулӥз. Соос малпаськыны быгато: «Кытын со али? Адӟе-а со монэ? Быгатэ-а со мыным юрттыны? Куке но мон сое адӟо на-а?»
3 Пӧртэм религиосын та юанъёслы пӧртэм валэктонъёс сёто. Одӥгъёсыз дышето, умой адями кулэм бераз инме тубе, нош урод адями адын курадӟе шуыса. Мукетъёсыз верало, кулэм бераз адями сопал дуннее кошке но отын мукет кулэм ӵыжы-выжыосыныз ӵош улэ шуыса. Нош куинетӥосыз малпало, адями кулэ ке, нырысь сое судъяло, нош собере со выльысь вордӥське но мукет адями яке пудо-живот луэ шуыса.
4. Мар огкадезлы дышето пӧртэм религиос кулон сярысь?
4 Кулон сярысь пӧртэм религиос пӧртэм сямен малпало ке но, одӥгезлы соос огкадь дышето: адями кулэм бере солэн кыӵе ке но люкетэз уг кулы, нош кытын ке но улэ на. Озьы-а со?
МАР ЛУЭ АДЯМИЕН КУЛЭМ БЕРАЗ?
5, 6. Мар луэ адямиен кулэм бераз?
5 Со сярысь, мар луэ адямиен кулэм бераз, тодэ Иегова. Со вераз милемлы, куке адями кулэ, солэн улонэз дугдэ шуыса. Адями кулэм бере солэн малпанъёсыз но тодэ ваёнъёсыз соин ӵош кулоa. Кулэмез бере адями адӟыны но, кылыны но, малпаськыны но уг быгаты ни.
6 Библиын верамын: «Кулэмъёс номыр но уг тодо». Кулэмъёс яратыны но, синазькыль карыны но уг быгато. Кулэм бере «уж но ӧвӧл, малпаськон но, тодон-валан но, визьлык но ӧвӧл». (Лыдӟе Екклесиастэз 9:5, 6, 10.) Псалтирьын 145:4 верамын, адямиен ӵош солэн малпанъёсыз но ышо-быро шуыса.
МАР ВЕРАЗ ИИСУС ХРИСТОС КУЛОН СЯРЫСЬ
Иегова адямиосты кылдытӥз, соос музъем вылын пумтэм вапумъёсы мед улозы шуыса
7. Мар вераз Иисус Христос кулон сярысь?
7 Куке Иисуслэн матысь эшез Лазарь кулӥз, Иисус вераз аслаз дышетскисьёсызлы: «Асьмелэн эшмы Лазарь умме усиз». Иисуслэн дышетскисьёсыз малпазы, со изьыса шутэтскон сярысь вера шуыса. Соин Иисус ватсаз: «Лазарь кулӥз» (Иоанн 11:11—14). Кызьы адӟиське, Иисус кулонэз изёнэн ӵошатӥз. Со ӧз вера, Лазарь инме тубиз яке сопал дуннеын аслаз кулэм ӵыжы-выжыосыныз ӵош улэ шуыса. Озьы ик со ӧз вера, Лазарь адын курадӟе яке выльысь вордскиз но мукет адями яке пудо-живот луиз шуыса. Ӧз, Иисус вераз, кулэмез бере Лазарь умме усем кадь луиз шуыса. Библиын мукет кылбуръёсын но кулон изёнэн ӵошатэмын. Кылсярысь, Иаирлэсь нылзэ улӟытыкуз, Иисус шуиз: «Со кулэмын ӧвӧл, со изе гинэ» (Лука 8:52).
8. Кытысь ми тодӥськомы, Иеговалэн уг поты, адямиос мед кулозы шуыса?
8 Кылдытӥз вал-а Инмар Адамез но Еваез озьы, соос куке но мед кулозы шуыса? Ӧз! Иегова соосты кылдытӥз, соос пумтэм вапумъёсы мед улозы но ноку но медаз висе шуыса. Иегова адямиез кылдытӥз озьы, солэн пырак улэмез мед потоз шуыса. Малпалэ ай, анайлэн но атайлэн нылпиоссылэсь пересьмемзэс но кулэмзэс адӟемзы потысал-а? Веранэз ӧвӧл, ӧй потысал. Милям Кылдытӥсьмылэн но уг поты, ми мед куломы шуыса. Соку малы адямиос куло?
МАЛЫ АДЯМИОС КУЛО?
9. Малы Иегова Адамлы но Евалы косон сётӥз но секыт-а вал солэсь кылзӥськыны?
9 Адамез но Еваез Едем садэ улыны интыямез бере Иегова Адамлы вераз: «Садысь вань писпуослэсь емышсэс сиыса улод, нош ӟечез но уродэз тодон писпулэсь емышсэ эн сиы, уго со писпулэсь емышсэ сиён нуналад кулонэн кулод» (Улон-вылон 2:9, 16, 17). Та косонэз сётыса, Иегова возьматӥз, со гинэ вераны быгатэ шуыса, мар ӟечез, нош мар уродэз луэ. Со косонлэсь кылзӥськыны секыт ӧй вал. Адямиос кылзӥськысалзы ке, озьы соос возьматысалзы, Иеговалэсь кивалтэтсэ гажало шуыса. Озьы ик, соослэн кылзӥськемзы возьматысал, соос дунъяло шуыса ваньзэ, мае Иегова соослы сётӥз.
10, 11. а) Кызьы Шайтан Адамез но Еваез пӧяз? б) Малы Адамез но Еваез шонере поттыны уг луы?
10 Жаляса верано луэ, Адам но Ева Иеговалэсь ӧз кылзӥське. Куке Шайтан юаз Евалэсь: «Инмар зэмзэ ик-а вераз: „Райысь нокыӵе но писпулэсь емышсэ эн сие?“»,— Ева шуиз: «Писпуосысь емышъёсты сиыны ми быгатӥськомы, рай шорын будӥсь писпулэсь емышсэ гинэ эн сие, шуиз Инмар, соос борды эн йӧтӥське, медад кулэ» (Улон-вылон 3:1—3).
11 Собере Шайтан вераз: «Уд, уд кулэ; нош Инмар тодэ, кудаз нуналэ емышез оскалтоды, со нуналэ тӥляд синъёсты усьтӥськозы, соку тӥ ӟечез но уродэз тодӥсь инмаръёс кадесь луоды» (Улон-вылон 3:4—6). Шайтанлэн Еваез оскытэмез потэ вал, со ачиз ужпум кутыны быгатэ шуыса, мар уродэз, нош мар ӟечез луэ. Но со пӧяз: со вераз, Ева Инмарлэсь ӧз кылзӥськы ке, уз кулы шуыса. Ева басьтӥз емышез но сииз сое, собере картэзлы но сётӥз, со но сииз. Адам но Ева тодо вал, со писпуысь емышъёсты сиыны уг яра шуыса. Но соос ӧз кылзӥське. Со емышез сиыса, соос возьматӥзы, яратӥсь Атайзэс чик уг гажало шуыса. Озьы соос валаса вылысь ӧз кылзӥське косонлэсь, кудӥз туж валамон вал но кудӥзлэсь кылзӥськыны секыт ӧй вал. Со понна соосты нокызьы но шонере поттыны уг луы!
12. Кыӵе шӧдонъёсыз вал Иеговалэн, куке Адам но Ева солэсь ӧз кылзӥське?
12 Туж жаль, нырысетӥ адямиос Кылдытӥсьсэс чик ӧз гажалэ шуыса. Кыӵе тӥляд шӧдонъёсты луысалзы, пиды но нылды, кудъёсызлы тӥ сомында лэсьтӥды, кылзӥськемысь дугдысалзы но юри тӥледлы пумит лэсьтысалзы ке? Веранэз ӧвӧл, тӥляд сюлэмды вӧсь луысал.
Адам сюй-тузонлэсь кылдытэмын вал, сюе ик со берытскиз
13. Мае верамез потэ вал Иеговалэн Адамлы «сюе ик берытскод» кылъёсын?
13 Кылзӥськымтэенызы Адам но Ева пумтэм вапумъёсы улыны луонлыксэс ыштӥзы. Иегова вераз Адамлы: «Уго тон сюй, сюе ик берытскод». (Лыдӟе Улон-вылонэз 3:19.) Со возьматэ вал, Адам ышоз-быроз, яке кылдытэмлэсь азьвыл кадь ик сюй-тузон луоз, шуыса (Улон-вылон 2:7). Озьыен, сьӧлыкамез бере Адам кулӥз. Со нокытын но ӧз улы ни.
14. Малы адямиос куло?
14 Адам но Ева Инмарлэсь кылзӥськысалзы ке, соос али ке но улысалзы на. Но соос ӧз кылзӥське. Соос сьӧлыказы но кулӥзы. Сьӧлыкез кышкыт висёнэн ӵошатыны луоз, кудӥз милемлы Адамлэсь но Евалэсь, вашкала атаймылэсь но анаймылэсь, выжиз. Вань адямиос сьӧлыко вордӥсько, соин ик куло (Римъёслы 5:12). Но Инмарлэн сыӵе малпанэз ӧй вал. Инмарлэн ноку но уг поты вал, адямиос мед кулозы шуыса. Библия сьӧлыкез тушмон шуыса нима (1 Коринфъёслы 15:26).
МАЛЫ КУЛОН СЯРЫСЬ ЗЭМЛЫКЕЗ ТОДОНО
15. Малы кулон сярысь зэмлыкез тодыны кулэ?
15 Кулон сярысь зэмлыкез тодӥськомы ке, ми капчиен валаны быгатомы, кулэмъёс сярысь кыӵе веранъёс шонертэм луо. Библия дышетэ, кулэмъёс номыре но уг шӧдо шуыса, соослы вӧсь но уг луы, соос шум но уг пото, уг но кайгыро. Ми ум быгатӥське соосын вераськыны, нош соос — милемын. Ми соослы юрттыны ум быгатӥське, нош соос милемлы юрттыны уг быгато. Соос милемлы уродзэ но лэсьтыны уг быгато, соин ик соослэсь кышкано но ӧвӧл. Нош тросэз религиос дышето, кулэмъёс кытын ке но уло но соослы юрттыны луэ шуыса, кылсярысь, священниклы коньдон тырыса. Но ми кулон сярысь зэмлыкез тодӥськомы ке, милемыз уз пӧялэ.
16. Мар верало кулэмъёс сярысь пӧртэм религиосын?
16 Шайтан зэмос луисьтэм религиос пыр адямиосты пӧя но малпаны косэ, кулэмзы бере адямиос кытын ке уло на шуыса. Кылсярысь, куд-ог религиосын дышето, адями кулэм бере солэн лулыз кытын ке но улэ на шуыса. Нош мар верало кулэмъёс сярысь тӥляд черкады: сое ик, мар гожтэмын Библиын, яке мае ке мукетсэ? Эн вунэтэ, адямиосты Иегова дорысь палэнтон понна, Шайтан соосты ӵем пӧя шуыса.
17. Малы адямиос адын ӝуало шуыса дышетон Иеговаез сантэма?
17 Со, мар верало тросэз религиос кулэмъёс сярысь, туж кышкыт. Кылсярысь, куд-огъёсыз верало, кулэмзы бере урод адямиос пумтэм вапумъёсы адын ӝуало шуыса. Таӵе пӧяськон Иеговаез сантэма. Со ноку но адямиосты озьы ӧй курадӟытысал! (Лыдӟе 1 Иоаннлэсь 4:8.) Мар тӥ малпасалды адями сярысь, кудӥз аслэсьтыз пиналзэ кылзӥськымтэез понна, киоссэ тыл вылын возьыса, кыл кутытэ? «Макем со лек! Мынам со адямиез тодэме но уг поты». Ӵапак сое ик возьма Шайтан! Солэн потэ, ми мед оскомы, Иегова адямиосты пумтэм вапумъёсы курадӟытэ шуыса.
18. Малы кулэмъёслэсь кышкано ӧвӧл?
18 Мукет религиос дышето, кулэм бераз адями сопал дуннее кошке но отын мукет кулэм ӵыжы-выжыосыныз ӵош улэ шуыса. Соос верало, кулэмъёсты гажано но соослэсь сюлэмзэс небӟытоно шуыса, малы ке шуоно соос милемлы яке эшъёс, яке тушмонъёс луыны быгато. Жаляса верано луэ, таӵе пӧяськонлы тросэз оско но кулэмъёслы Инмарлы кадь йыбыртъяло. Нош кызьы ми тодӥмы ини, кулэмъёс номыре но уг шӧдо, соин ик кулэ ӧвӧл кышканы, ми соосты ӝоже уськытомы шуыса. Иегова — милям Кылдытӥсьмы. Со зэмос Инмар, но ми солы гинэ йыбыртъяны кулэ (Усьтӥськон 4:11).
19. Малы тодоно кулон сярысь зэмлыкез?
19 Кулон сярысь зэмлыкез тодӥськомы ке, ми ум оске пӧяськонлы, кудзэ вӧлмыто зэмос луисьтэм религиос. Со сяна, ми эшшо но юнгес дунъяны кутскомы Иеговалэсь вуоно улон сярысь кыл сётонъёссэ.
20. Мар сярысь ми тодомы вуоно люкетысь?
20 Трос дауръёс талэсь азьло Инмарлэн Исаия нимо ужась-тыршисез вераз: «Тынад кулэмъёсыд улӟозы, султозы кулэм мугоръёс!» (Исаия 26:19). Нош кулэмъёс выльысь улозы-а? Со, мар вера Библия, тӥледыз паймытыны быгатоз. Та юанлы валэктон тӥ шедьтоды вуоно люкетысь.
a Куд-ог адямиос оско, адями кулэм бере солэн лулыз уг кулы, нош кытын ке но улэ на шуыса. Но Библия солы уг дышеты. Учке 17-тӥ но 18-тӥ ватсам валэктонъёсты.