Мар кароно, Инмарлэн эшез луон понна?

1, 2. Адямиос пӧлысь кинэ Иегова аслаз эшъёсыныз лыдъяз?

КИНЭН тӥ эшъяськысалды? Соин, дыр, кин тӥледлы кельше, кинэн тӥледлы капчи. Соин, кин лякыт но кинлэн мукет умой сямъёсыз вань.

² Иеговалэн адямиос пӧлын но эшъёсыз вань. Кылсярысь, одӥгез солэн эшез Авраам вал (Исаия 41:8; Иаков 2:23). Озьы ик со Давидэз но яратӥз но со сярысь «аслам сюлмылы кельшись пиосмурт» шуыса вераз (Апостолъёслэн ужъёссы 13:22). Нош Даниил пророкез Иегова «Инмарлы яратыны ярамон муртэн» нимаз (Даниил 9:23).

3. Малы Иегова Авраамез, Давидэз но Даниилэз аслаз эшъёсыныз лыдъяз?

³ Малы Иегова Авраамез, Давидэз но Даниилэз аслаз эшъёсыныз лыдъяз? Малы ке шуоно соос зӥбыт-востэмесь но кылзӥськисесь вал. Кылсярысь, тани мар вераз Иегова Авраамлы: «Мынэсьтым верам кылъёсме кабыл басьтэмед понна Тынад кидысэд-выжыед пыр дунне вылысь вань калыкъёс бакель каремын луозы» (Улон-вылон 22:18). Быдэс калык но Инмарлэн эшез луыны быгатэ. Иегова вераз Израиль калыклы: «Кылзэлэ Мынэсьтым верамме, Мон тӥляд Инмарды луо, нош тӥ Мынам калыке луоды» (Иеремия 7:23). Тӥляд Иеговалэн эшез луэмды потэ ке, тӥледлы но солэсь кылзӥськыны кулэ.

ИЕГОВА АСЛЭСЬТЫЗ ЭШЪЁССЭ УТЕ

4, 5. Кызьы Иегова аслэсьтыз эшъёссэ уте?

⁴ Библиын верамын, Иегова «Солы сюлмынызы оскиськымонэсь луисьёсты ӟечкын возён понна» луонлык утча шуыса (2 Паралипоменон 16:9). Псалтирьын 31:8 гожтэмын со сярысь, мар карыны кылзэ сётэ Иегова аслаз эшъёсызлы: «Тонэ визьмало, кудтӥз сюрес вылтӥ мыныны тонэ дышето; тонэн кивалто, синме тон пала берыкто».

⁵ Инмарлэн тушмонэз вань, кудӥз вань кужмысьтыз тырше, ми Инмарен эшъяськемысь мед дугдомы шуыса. Иегова милемыз солэсь утьыны тырше. (Лыдӟе Псалтирез 54:23.) Ми Иеговалэн эшъёсыз бере, тыршиськомы сюлмысь солы ужаны-тыршыны. Шуг-секытъёс дыръя но ми солы оскымон кылиськомы. Библиез гожъясьёс пӧлысь одӥгез вераз: «Со [Иегова] мынам бурпалам — уг куалекты» (Псалтирь 15:8; 62:9). Ми но оскиськомы, Иегова милемыз юнматоз шуыса. Но Шайтан Инмарен кусыпъёсмес сӧрыны тырше. Кызьы?

ШАЙТАНЛЭН ПӦЯСЬКЕМЕЗ

6. Мар вераз Шайтан адямиос сярысь?

⁶ Та книгалэн 11-тӥ люкетысьтыз ми тодӥмы: Шайтан Иеговалы пумит султӥз, сое пӧяськисен нимаз но янгыше уськытӥз, со шонерлыктэм ужъёс лэсьтэ шуыса. Шайтан вераз, Иегова Адамлы но Евалы эрик сётыны кулэ вал шуыса, асьсэлы ужпум кутыны, мар ӟечез, нош мар уродэз луэ. Библиысь Иов книгаын верамын, Инмарез сяна, Шайтан Инмарлэсь вань эшъёссэ но янгыше уськытӥз шуыса. Со вераз, адямиос Инмарез уг ярато, нош асьсэлы пайда басьтон понна гинэ соин эшъясько шуыса. Со сяна, Шайтан вераз на, со котькинэ Инмар дорысь палэнтыны быгатоз шуыса. Ойдолэ тодомы, кин вал Иов но малы ми солэсь дышетскыны быгатӥськомы.

7, 8. а) Кызьы Иегова Иов шоры учке вал? б) Мар вераз Шайтан Иов сярысь?

⁷ Иов умой адями вал. Со улӥз ог 3 600 ар талэсь азьло. Со сярысь Иегова вераз, музъем вылын со кадез адями ӧвӧл ни шуыса. Иов Инмарез туж гажа но уродзэ-лексэ адӟемпотостэм каре вал (Иов 1:8). Иегова сое аслаз эшеныз лыдъяз.

⁸ Шайтан вераз, Иов Инмарен аслыз пайда басьтон понна гинэ эшъяське шуыса. Со шуиз Иеговалы: «Тон сое котыр ласянь ӧд кенера-а, солэсь корказэ но ваньзэ, маиз солэн вань, ӧд кенера-а? Солэн киыныз лэсьтэм ужъёсты Тон бакель карид но, солэн пудо уллёосыз быдэс музъем вылэ вӧлдӥсько; нош Тон, кидэ ӝутыса, ваньмыз борды, маиз солэн вань, йӧтӥськы,— данъялоз на-а со Тонэ?» (Иов 1:10, 11).

9. Мар карыны Иегова лэзиз Шайтанлы?

⁹ Озьыен, Шайтан вераз, Иов Иеговалы аслыз пайда басьтон понна гинэ ужа-тырше шуыса. Озьы ик со вераз на, со Иовез Инмарлы ужамысь-тыршемысь дугдытыны быгатоз шуыса. Иегова Иовлы оске вал. Озьы ке но со лэзиз Шайтанлы Иовез эскерыны, малы со Иеговалы ужа-тырше: яратэменыз яке ӧвӧл.

ШАЙТАН ИОВЕЗ ЭСКЕРЕ

10. Кыӵе шуг-секытъёсын пумиськиз Иов но мар со кариз?

¹⁰ Нырысь Шайтан Иовез пудотэк кельтэ: куд-огъёссэ лушкало, мукетъёсыз куло. Собере Шайтан Иовлэсь ляльчиоссэ вие. Иов ваньзэ кадь ыштэ. Но Шайтан таин гинэ уг дугды: со Иовлэсь дас нылпиоссэ но быдтэ. Озьы ке но Иов Иеговалы оскымон кыле. Библиын верамын: «Вань та учыръёсы Иов ӧз сьӧлыка но номыр ик умойтэмзэ Инмар сярысь ӧз куареты» (Иов 1:12—19, 22).

11. а) Мар эшшо Шайтан Иовлы кариз на? б) Кызьы Иов ассэ возиз?

¹¹ Шайтанлы со но ӧжыт потӥз. Со Иеговаен ченгешыны кутскиз. Со вераз: «Солэн лы бордаз, солэн мугорыз борды йӧтӥськы — данъялоз на-а со Тонэ?» Шайтан Иов вылэ кышкыт висён лэзиз (Иов 2:5, 7). Нош Иов азьвыл сямен ик Иеговалы оскымон кылиз. Со вераз: «Кулытозям мон аслэсьтым дун-шектэм луонме ватыса уг возьы [яке дун-шектэм луонэлэсь уг куштӥськы]» (Иов 27:5).

12. Кызьы Иов возьматӥз, Шайтан пӧяз шуыса?

¹² Иов номыр но уг тоды вал Шайтанлэн янгыше уськытонъёсыз сярысь но со сярысь, малы со сокем курадӟе. Со малпа вал, курадӟемезлэн мугез Иегова бордын шуыса (Иов 6:4; 16:11—14). Озьы ке но Иов Иеговалы оскымон кылиз. Табере валамон луиз, Иов аслыз пайда ӧз утча шуыса. Со Инмарен эшъяськиз, малы ке шуоно со Инмарез яратэ вал. Ваньмыз, мае Шайтан Иов сярысь вераз, пӧяськон вал.

13. Кыӵе емышъёс вайиз Иовлэн оскымон кылемез?

¹³ Иов Инмарлэсь но Шайтанлэсь со сярысь вераськемзэс ӧз тоды ке но, со Инмарлы оскымон кылиз. Озьы со возьматӥз, Шайтан пӧяськись шуыса. Инмар Иовез оскымон кылемез понна бакель кариз (Иов 42:12—17).

КЫЗЬЫ ШАЙТАН МИЛЕМЫЗ ЯНГЫШЕ УСЬКЫТЭ

14, 15. Кызьы Шайтан милемыз котькудмес янгыше уськытэ?

¹⁴ Малы ми дышетскыны быгатӥськомы Иовен луэм учырысь? Шайтан вера, ваньмы асьмеос, Иеговалы ужась-тыршисьёс, асьмелы пайда басьтон понна гинэ Иеговалы ужаськомы-тыршиськомы шуыса. Со вераз: «Аслаз улонэз понна адями сётоз ваньзэ, маиз солэн вань» (Иов 2:4). «Адями» кылэз кутыса, Шайтанлэн верамез потэ вал, Иов гинэ ӧвӧл, нош ваньмыз Иеговалы ужась-тыршисьёс Иеговалы ужало-тыршо, малы ке шуоно асьсэлы пайда утчало. Иов кулэм бере трос аръёс ортчыса но Шайтан Иеговаез азьвыл сямен ик янгыше уськытэ но вера, солэн ужась-тыршисьёсыз асьсэды гинэ ярато шуыса. Тӥни малы Иегова вераз: «Пие, визьлыко лу, сюлэмме шумпотты,— соку мон тодо мон сярысь урод кылъёс верась муртлы ответ сётыны» (Мадёнъёс 27:11).

¹⁵ Тӥ Инмарлэн эшез луыны но солэсь кылзӥськыны ужпум кутӥды ке, тӥ но возьматыны быгатоды, Шайтан пӧяськись шуыса. Улонады троссэ воштоно луиз ке но, тӥ ноку но уд жалялэ, Иеговаен эшъяськыны ужпум кутӥды шуыса! Со туж кулэ луись ужпум. Малы? Малы ке шуоно Шайтан тӥ сярысь вераз, тӥ Инмарлэсь уд кылзӥське шуыса, куке шуг-секытъёсын пумиськоды. Шайтан милемыз пӧяны тырше, ми Инмарлы оскымон луэмысь мед дугдомы шуыса. Кызьы со пӧя?

16. а) Кызьы Шайтан адямиослы люкетыны тырше Иеговалы ужаны-тыршыны? б) Мар со карыны быгатоз, тӥледлы люкетон понна?

¹⁶ Шайтан пӧртэм амалъёсын милесьтым Иеговаен кусыпъёсмес сӧрыны тырше. Кылсярысь, Библия верамъя, со «бурсӥсь лев кадь» урдске но «кинэ ке но ньылыны утчаса ветлэ» (1 Пётр 5:8). Кызьы солэсь урдскемзэ тодманы быгатомы? Кылсярысь, со урдске эшъёсмы, ӵыжы-выжыосмы яке кин ке но мукетыз пыр, куке соос милемлы люкетыны тыршо Библиез дышетыны яке лэсьтыны сое, мар Иеговалы яра (Иоанн 15:19, 20)a. Эшшо одӥгез сьӧлтэт, кудзэ уже кутэ Шайтан,— со пӧяськон. Шайтан «югытлэн Кылчинэз тусъем кариськыны быгатэ» (2 Коринфъёслы 11:14). Мукетыз амал, кызьы Шайтан милесьтым Иеговаен кусыпъёсмес сӧрыны тырше,— со тырше оскытыны милемыз, ми Иеговалы ужаны-тыршыны ум яраське шуыса (Мадёнъёс 24:10).

КЫЛЗӤСЬКЕ ИЕГОВАЛЭСЬ

17. Малы ми Иеговалэсь кылзӥськиськомы?

¹⁷ Ми возьматӥськомы, Шайтан пӧяськись шуыса, куке Иеговалэсь кылзӥськиськомы. Мар юрттоз милемлы Инмарлэсь кылзӥськыны? Библиын гожтэмын: «Инмардэ Кузё-Инмарез вань сюлмыныд, вань лулыныд, вань кужмыныд яраты» (Кыкетӥ Закон 6:5). Ми Иеговалэсь кылзӥськиськомы, малы ке шуоно яратӥськомы сое. Макем юнгес ми Иеговаез яратыны кутскиськомы, сокем тросгес милям солэсь кылзӥськеммы потэ. Апостол Иоанн гожъяз: «Инмарлэсь курон-косонъёссэ быдэсъяса улонмы возьматэ Инмарез яратэммес. Солэн курон-косонъёсыз секытэсь ӧвӧл» (1 Иоанн 5:3).

18, 19. а) Вералэ ужъёсты, кудъёссэ Иегова шонертэмен лыдъя. б) Кытысь ми тодӥськомы, Иегова уг косы шуыса лэсьтыны сое, мае ми ум быгатӥське?

¹⁸ Вань ужъёс, кудъёссэ Иегова шонертэмен лыдъя. Куд-ог сыӵе ужъёс сярысь тӥ лыдӟыны быгатоды «Адӟемпотостэм каре сое, мае Иегова адӟемпотостэм каре» рамкаысь. Со ужъёс пӧлысь куд-огъёсыз тӥледлы сокем уродэсь но уз потэ, дыр. Нош рамкаын гожтэм Библиысь кылбуръёс вылын малпаськиды ке, адӟоды, малы визьмо луэ Иеговалэсь кылзӥськыны. Оло нош, тӥ малпалоды, улонады мае ке воштоно шуыса. Но со капчи ӧвӧл. Нош тӥ улонады воштӥськонъёс лэсьтӥды ке, тӥляд сюлэмды каньыл луоз но тӥ шумпотоды, малы ке шуоно тӥ Инмарлэн зэмос эшез кадь лэсьтӥды (Исаия 48:17, 18). Кытысь ми тодӥськомы, улонамы воштӥськонъёс лэсьтыны луэ шуыса?

¹⁹ Иегова ноку но уг куры милемыз лэсьтыны сое, мае ми ум быгатӥське (Кыкетӥ Закон 30:11—14). Со милям эшмы. Со милемыз, асьмеос сярысь но, умойгес тодэ. Со тодэ милесьтым кужмо но ляб палъёсмес (Псалтирь 102:14). Апостол Павел вераз: «Оскиськымон Инмар. Со тӥледлы чиданы луонтэм визь сынаськон уз лэзьы» (1 Коринфъёслы 10:13). Ми оскыны быгатӥськомы, Иегова котьку милемлы шонер ужъёс лэсьтыны юрттоз шуыса. Со милемлы «мертантэм бадӟым кужым» сётоз, ми котькыӵе шуг-секытэз вормыны мед быгатомы шуыса (2 Коринфъёслы 4:7).

ЯРАТЭ СОЕ, МАЕ ИЕГОВА ЯРАТЭ

20. Иеговалэсь кыӵе сямъёссэ ми адӟем карыны кулэ но малы?

²⁰ Иеговалы эш луон понна, милемлы дугдоно лэсьтэмысь сое, мае со умойтэмен лыдъя. Со сяна, милемлы яратыны кулэ сое, мае со яратэ (Римъёслы 12:9). Со сярысь, кыӵе адямиосты Иегова аслыз эшлы быръе, гожтэмын Псалтирьын 14:1—5. (Лыдӟе.) Инмарлэн эшъёсыз солэсь умой сямъёссэ адӟем каро. Соос шоры учкыса, адӟиське, соослэн «яратон, шумпотон, тупаса улон, чидась луон, лякытлык, гажась-жалясь луон, ог-огедлы оскиськымон луон, зӥбыт-востэм луон, возиськыны быгатон» сямзы вань шуыса (Галатъёслы 5:22, 23).

21. Мар юрттоз тӥледлы со сямъёсты возьматыны, кудъёсыз Инмарлы ярало?

²¹ Мар юрттоз тӥледлы со сямъёсты возьматыны? Тӥледлы ялан Библиез лыдӟоно но сое дышетоно. Озьы тӥ тододы со сярысь, мае Иегова яратэ (Исаия 30:20, 21). Соку тӥляд Иеговаез яратонды будоз но тӥляд солэсь кылзӥськемды потоз.

22. Малы Иеговалэсь кылзӥськоно?

²² Улонамы воштӥськонъёс лэсьтыса, ми вылысьтымы вуж дӥськутмес кылиськомы но выльзэ дӥсяськомы кадь. Библиын верамын, вылысьтымы «вужмем адями... [луонлэсь] „дӥськутсэ“» кылёно но «выль адями луонэн» дӥсяськоно шуыса (Колоссыослы 3:9, 10). Но со котьку ик капчи ӧвӧл. Нош ми Иеговалэсь кылзӥськиськомы ке, улонмес но сямъёсмес воштӥськомы ке, Иегова милемлы бадӟым мед-кузьым сётоз (Псалтирь 18:12). Озьыен, кылзӥське Иеговалэсь. Сое яратэменыды, ужалэ-тырше солы, нош вуонояз бакель каронъёс басьтон понна гинэ эн. Возьматэ, Шайтан — пӧяськись шуыса. Соку тӥ Иеговалэн зэмос эшез луоды!