47-ТӤ УРОК

Дась-а тӥ пылатӥськыны?

Печатлам вариант

Библиез дышетыса, тӥ трос тодӥды ини Иегова сярысь. Тодэмды пӧлысь мае ке улонады но пыртӥськоды, дыр, ини, нош улондэс Иеговалы сӥзьыны но пылатӥськыны кышкаськоды на. Та урокысь ми тодомы, мар ӵем дыръя люкетэ адямиослы пылатӥськыны но мар кароно пылатӥськон понна.

1. Кӧня тодыны кулэ пылатӥськон понна?

Пылатӥськемлэсь азьло зэмлыкез тодоно (1 Тимофейлы 2:4). Но со уг возьматы, тӥледлы ваньзэ тодыны кулэ но адямиослэн Библия сярысь котькуд сётэм юанзылы валэктон сётыны быгатоно шуыса. Кылсярысь, со христианъёс но, кудъёсыз кемалась пылатӥськизы ини, пылатӥськемзы бере тодон-валан басьтэмысь уг дугдо (Колоссыослы 1:9, 10). Пылатӥськемлэсь азьло умой валаны кулэ Библиысь валтӥсь дышетонъёсты. Кенешысь тӧроос юрттозы тӥледлы валаны, тырмыт-а ини тӥляд тодон-валанды.

2. Мар карыны кулэ пылатӥськемлэсь азьло?

Пылатӥськемлэсь азьло кык кулэ луись вамыш лэсьтоно. Библия вера: «Ӧпкельыса сьӧлыкъёстылэсь куштӥське но Кузё-Инмар пала берытске». (Лыдӟе Апостолъёслэсь ужъёссэс 3:19.) Со возьматэ, милемлы сьӧлыкмес валано, жаляно, азьвыл сьӧлыкаса улӥмы шуыса, но Иеговалэсь куроно, со милемыз простить мед кароз шуыса. Со сяна, милям юн мылкыдмы луыны кулэ Иеговалэн куронъёсызъя улыны но палэнскыны ваньмызлэсь, мае со сьӧлыкен лыдъя. Озьы ик кулэ кенешлэн пумиськонъёсаз ветлыны но вын-агайёсын но сузэр-апайёсын ӵош ӟеч иворез вераны.

3. Малы кышкано ӧвӧл пылатӥськыны?

Куд-огъёсыз кышкало пылатӥськыны, малы ке шуоно соос кышкало, Иеговалы сётэм кылзэс быдэстыны уз быгатэ шуыса. Зэм, котькуд адями янгыша. Янгышало вал Иеговалы оскымон пиосмуртъёс но, кышномуртъёс но, кудъёсыз сярысь Библиын гожтэмын. Иегова вала, ми янгышаны быгатӥськомы шуыса. (Лыдӟе Псалтирез 102:13, 14.) Но со туж шумпотэ, куке адӟе милесьтым кылзӥськыса улыны тыршеммес. Соин ик, мармы ке ӧз пӧрмы ке, ӝоже усёно ӧвӧл, Иегова одно ик юрттоз. Солэн потэ, ми котьку тодамы мед возёмы, милемыз номыр но Инмарлэн яратонэзлэсь люкыны уз быгаты шуыса. (Лыдӟе Римъёслы 8:38, 39.)

МУРГЕС ЭСКЕРЕ

Ойдолэ тросгес тодомы, кызьы Иегова сярысь басьтэм тодон-валан но ачиз Иегова юрттозы тӥледлы вормыны сое, мар пылатӥськыны люкетэ.

Суредъёс «Егит ныл пылатӥськон азяз шуг-секытъёсын нюръяське».

4. Иеговаез умойгес тодэ

Егит ныл Иеговалэн Адӟись-Ивортӥсьёсыныз Библиез дышетэ.

Макем умой тодоно Иеговаез пылатӥськемлэсь азьло? Иеговаез умой тодыны кулэ, со сярысь тодэмды мылкыддэс мед ӝутоз сое яратыны но солэсь кылзӥськыса улыны. Учке ВИДЕОРОЛИКЕЗ но тодэ, кызьы пӧртэм шаеръёсысь адямиос пылатӥськонлы дасяськизы. Собере юанлы валэктон сётэ.

ВИДЕОРОЛИК: «Пылатӥськон доры сюрес» (3:56)

Мар юрттӥз та адямиослы пылатӥськонлы дасяськыны?

Лыдӟе Римъёслы 12:2 но та юанъёслы валэктонъёс сётэ:

Соглаш-а тӥ ваньмыныз, малы дышетэ Библия? Соглаш-а тӥ, Иеговалэн Адӟись-Ивортӥсьёсыз зэмлыклы дышето шуыса?
Соглаш ӧвӧл ке, мар тӥ карыны быгатоды, оскондэс будэтон понна?

5. Номырлы но эн лэзе люкетыны тӥледлы пылатӥськыны

Таиз ик ныл сумкаяз Библия понэ, нош анаез сое тышкаське, со Иеговалэн Адӟись-Ивортӥсьёсыныз кусып возе шуыса.

Куке адями улонзэ Иеговалы сӥзьыны но пылатӥськыны малпа, со шуг-секытъёсын пумиське. Тани маин пумиськоно луиз одӥг кышномурт. Учке ВИДЕОРОЛИКЕЗ но юанъёслы валэктонъёс сётэ.

ВИДЕОРОЛИК: «Иеговаез яратон ваньзэ ворме» (5:22)

Мар люкетэ вал та кышномуртлы пылатӥськыны?
Кызьы Иеговаез яратон юрттӥз солы ваньзэ вормыны?

Лыдӟе Мадёнъёсты 29:25 но 2 Тимофейлы 1:7 но та юанлы валэктон сётэ:

Мар милемлы кужым сётоз но кышканмес вормыны юрттоз?

6. Иегова тӥледлы одно ик юрттоз

Таиз ик ныл кышномуртлы ӟеч иворез вера. Вӧзаз сылэ сузэр, кудӥз та нылэн Библиез дышетэ.

Иегова юрттоз тӥледлы куронъёсызъя улыны. Учке ВИДЕОРОЛИКЕЗ но юанъёслы валэктонъёс сётэ.

ВИДЕОРОЛИК: «Иегова Инмар юрттоз тыныд» (2:50)

Малы та пиосмурт кышка вал пылатӥськыны?
Мар юрттӥз солы Иеговалы оскиськыны?

Лыдӟе Исаиялэсь 41:10, 13 но та юанлы валэктон сётэ:

Мар тӥледыз оскытэ, Иеговалы сӥзиськыкуды сётэм кылдэс быдэстыны быгатоды шуыса?

7. Дунъялэ Иеговалэсь яратэмзэ

Макем тросгес тӥ малпаськоды Иеговалэн яратэмез сярысь, сокем юнгес тӥляд солы тау каремды но солы ужамды-тыршемды потоз. Лыдӟе Псалтирез 39:6 но та юанлы валэктон сётэ:

Мар понна тӥляд Иеговалы тау каремды потэ?

Иеремия пророк туж яратэ вал Иеговаез но солэсь котькуд верам кылзэ. Иеговалы ужан-тыршонэз со данэн лыдъя вал. Со вераз: «Тынад кылыд монэ шумпоттӥз, сюлэмме шулдыр кариз; уго Тынад нимыд монэ утьыны сётэмын» (Иеремия 15:16). Та юанъёслы валэктонъёс сётэ: