Эн лэзе яратондылы сӥяны

1, 2. а) Кинъёс вылын нырысь быдэсмизы Иисуслэн кылъёсыз, кудъёсыз гожтэмын Матфейлэн 24:12? б) Кызьы Апостолъёслэн ужъёссы книгаысь адӟиське, тросэз христианъёс яратонзэс возьматӥзы шуыса? (Учке статья кутсконысь суредэз.)

ИИСУС, музъем вылын улыкуз, азьло ик вераз, кызьы адямиос тодманы быгатозы сьӧлыклэсь кышкасьтэм дуннелэсь быронзэ. Одӥгез со тодметъёс сярысь Иисус вераз: «Тросэзлэн яратонэз сӥялоз» (Матф. 24:3, 12). Нырысь та кылъёс быдэсмизы нырысетӥ даурысь еврейёс вылын, кудъёсыз асьсэды Инмарлэн калыкеныз лыдъязы но лэзизы, Инмарез яратонзы мед сӥялоз шуыса.

² Нош тросэз христианъёс со дыръёсы мылысь-кыдысь «Иисус Христос сярысь Ӟеч Ивор тодытыса ветлӥзы» но Инмарез, ог-огзэс но мукет адямиосты яратӥзы (Ап. уж. 2:44—47; 5:42). Озьы ке но, Христослэн дышетскисьёсыз пӧлысь куд-огъёсыз яратонзылы сӥяны лэзизы.

3. Малы куд-ог христианъёслэн яратонзы сӥяз, вылды?

³ Ефесын улӥсь христианъёслы вазиськыса, Иисус шуиз: «Тыныд пумит Мынам таӵе веранэ вань: кутсконаз кыӵе тынад яратонэд вал, нош табере со тынад сӥяз» (Усьт. 2:4). Малы озьы луиз? Ефесын улӥсь христианъёс адӟем карыны кутскизы, вылды, котырысьтызы адямиослэсь, кудъёсыз лулмугорзылэн кулэяськонъёсызлы тэрытскыса улӥзы (Еф. 2:2, 3). Тросэз туала каръёс сямен, вашкала Ефес кар кырсь ужъёс пӧлы выйиз. Со узыр карын улӥсьёс понна валтӥсез вал узырлык, шутэтскон но каньыл улон. Тросэз азыса-калгыса улӥзы но Инмарлэсь законъёссэ ӧз гажалэ. Соос тросгес малпаськизы умой улон сярысь, нош Инмарез но мукетъёссэ яратон сярысь ӧз ик малпаське ни.

4. а) Кытысь адӟиське, асьме нуналъёсы адямиослэн яратонзы сӥяз шуыса? б) Кыӵе куинь удысъёсын милям яратонмы эскериськыны быгатэ?

⁴ Иисуслэн азьпалзэ ивортыса верам кылъёсыз, адямиослэн яратонзы сӥялоз шуыса, асьме нуналъёсы но быдэсмо. Туннэ туж шер пумиталод адямиез, кудӥз Инмарез зэмзэ ик яратэ. Инмарлы оскиськем интые, трос миллион адямиос оско, дунне вылысь шуг-секытъёсты адямиослэн организациоссы быдтыны быгатозы шуыса. Трос адямиослэн сюлмазы яратонзы сӥя. Кызьы адӟиське Ефесысь христианъёслэн учырысьтызы, Инмарлэн зэмос ужась-тыршисьёсыз но асьсэ сярысь гинэ малпаськыны кутскыны но асьсэлэсь яратонзэс сӥятыны быгато. Та статьяын вераськон мыноз со сярысь, кызьы эскериськыны быгатэ: 1) Иеговаез яратонмы, 2) Библиысь зэмлыкез яратонмы но 3) вын-агайёсмес яратонмы.

ИЕГОВАЕЗ ЯРАТОН

5. Малы милемлы Инмарез яратоно?

⁵ Адямиослэн яратонзы сӥялоз шуыса веран азяз, Иисус нимысьтыз висъяз, кинэ нырысь ик яратоно: «„Инмардэ Кузё-Инмарез вань сюлмыныд, вань лулыныд, вань визьмыныд яраты“. Та нырысетӥез но ваньмызлэсь бадӟымез курон-косон» (Матф. 22:37, 38). Со зэмзэ но озьы. Иеговаез вань сюлмынымы яратӥськомы ке, со юрттэ милемлы солэн курон-косонъёсызлэсь кылзӥськыны, юн луыны но уродэз-лекез адӟонтэм карыны. (Лыдӟы Псалтирез 96:10.) Нош Шайтан но солэн дуннеез милям сюлмысьтымы Иеговаез яратонмес быдтыны тыршо.

6. Мар луэ, куке адямиос Инмарез яратэмысь дугдо?

⁶ Та дуннеысь адямиослэн яратон сярысь шонертэм валанзы. Соос Кылдытӥсез уг ярато, нош асьсэды гинэ ярато (2 Тим. 3:2). Дунне, кудӥныз Шайтан кивалтэ, тырше, адямиос «лулмугорлэн ортчыт кужмо кулэ каронъёсызлы, синъёслэн уродлы синмаськонзылы» саклыксэс тросгес мед висъялозы но «вылтӥяськыса улонэз» мед яратозы шуыса (1 Иоанн 2:16). Апостол Павел ӧтиз христианъёсты, соос лулмугорзылэн кулэяськонъёсызъя медаз улэ шуыса. Со вераз: «Лулмугорлэн кулэяськонъёсызъя улон кулонэ-быронэ нуэ... Лулмугорлэн кулэяськонъёсыз сярысь сюлмаськись адями Инмарлы пумит тушмонъяськыса улэ» (Рим. 8:6, 7). Зэм но, адями ваньбур яке лулмугорлэсь мыл потонъёссэ быдэсъян сярысь гинэ малпаськыса улӥз ке, со умое уз вутты (1 Кор. 6:18; 1 Тим. 6:9, 10).

7. Кыӵе мылкыд паланы быгатоз христианъёслы?

⁷ Тросэз атеистъёс, эволюционистъёс но агностикъёс тыршо адямиослэсь Инмарез яратонзэс но солы осконзэс быдтыны. Соос троссэ оскытӥзы ини, ваньмызлы оскись но ӧжыт тодон-валанэн адямиос гинэ Кылдытӥсьлы оско шуыса. Ватсаны кулэ на, тросэз адямиос, Кылдытӥсьлэсь сярысь, тодосчиослэсь тросгес кылзӥсько шуыса (Рим. 1:25). Ми но сыӵе мылкыдлы сётскимы ке, Иегова дорысь палэнскыны быгатомы но сое яратонмы сӥялоз (Евр. 3:12).

8. а) Кыӵе шуг-секытъёсын пумисько Инмарлэн ужась-тыршисьёсыз? б) Малы оскытэ милемыз 135-тӥ псалом?

⁸ Ми улӥськомы бере дуннеын, кудӥныз Шайтан кивалтэ, ми трос шуг-секытъёсын пумиськиськомы но мылкыдмы куашканы быгатэ (1 Иоанн 5:19). Нош куашкам мылкыдмылы милемыз зӥбыны лэзимы ке, милям осконмы лябӟыны но Инмарез яратонмы сӥяны быгатоз. Кылсярысь, ми быгатомы пумиськыны шуг-секытъёсын, трос арлыд тырмемен, тазалыкмы лябӟемен яке коньдон тырмымтэен. Озьы ик мылкыдмы куашканы быгатэ, малы ке шуоно ми ум быгатӥське мае ке лэсьтыны озьы, кызьы потэ, яке ужъёс уг мыно озьы, кызьы ми возьмаськомы. Кыӵе гинэ шуг-секытъёсын ми медам пумиське, кулэ ӧвӧл малпаны, Иегова милемыз кельтӥз шуыса. Малпаське Псалтирьысь 135:23 таӵе юнматӥсь кылъёс вылын: «Ултӥяса возьыкузы, милемыз тодаз вайылӥз, пумтэм вапумъёс улэ Солэн гажан-жалянэз». Зэм, Иегова оскымон ужась-тыршисьёссэ яратэмысь ноку уз дугды. Соин ик ми оскыны быгатӥськомы, со юрттэт курыса вӧсяськеммес кылэ но милемлы юрттэ шуыса (Пс. 114:1; 135:24—26).

9. Мар юрттӥз Павеллы Инмарез яратонзэ утьыны?

⁹ Псаломъёсты гожъясь сямен ик, Павел малпаськиз со вылын, кызьы Иегова солы юрттэ. Со сярысь малпаськон юрттэ вал Павеллы юн кыльыны. Со гожтӥз: «Уг кышка, Кузё-Инмар мон палан: адями мыным мар кароз?» (Евр. 13:6). Иеговалы сыӵе юн оскон юрттӥз Павеллы улонысьтыз шуг-секытъёссэ вормыны но умой мылкыдзэ утьыны. Кылсярысь, пытсэт сьӧрын пукыкуз, Павел христианъёсты, буйгатӥсь гожтэтъёс гожтыса, буйгатыны быгатӥз (Еф. 4:1; Флп. 1:7; Флм. 1). Туж секыт дыръёсы но Павел Инмарез яратонзэ ӧз ышты. Мар солы юрттӥз? Со оскиськиз «котькыӵе буйгатсконлэн Инмарезлы», кудӥз «котькыӵе куректон-кайгуосмы дыръя» асьмеды буйгатэ (2 Кор. 1:3, 4). Кызьы ми Павеллэсь адӟем карыны быгатӥськомы, Иеговаез яратонмы медаз сӥя шуыса?

10. Мар юрттоз милемлы Иеговаез яратонмес утьыны?

¹⁰ Павел валэктӥз, мар нырысь ик юрттоз милемлы Инмарез яратонмес утьыны. Со вераз христианъёслы: «Дугдылытэк вӧсяське»; «Дугдылытэк вӧсяськыса улэ» (1 Фес. 5:17; Рим. 12:12). Инмарен матысь кусыпъёсмы мед луозы шуыса, вӧсяськоно солы (Пс. 85:3). Ми юри дыр висъяськомы ке, Инмарлы вӧсяськонын сюлэммес усьтон понна, ми эшшо но матэгес кариськиськомы инмысь Атаенымы, кудӥз сярысь Библиын верамын: «Тон вӧсяськемез кылӥськод» (Пс. 64:3). Со сяна, ми адӟиськомы ке, кызьы Иегова, вӧсяськонъёсмес кылыса, куронъёсмес быдэстэ, милям сое яратонмы будэ. Ми эшшо но юнгес оскыны кутскиськомы, «ваньмызлы вӧсяськисьёслы... Кузё-Инмар матын улэ» шуыса (Пс. 144:18). Сыӵе оскон юрттоз милемлы шуг-секытъёсты вормыны али но азьланяз.

БИБЛИЫСЬ ЗЭМЛЫКЕЗ ЯРАТОН

11, 12. Мар юрттоз Библиысь зэмлыкез яратонмес будэтыны?

¹¹ Ми, христианъёс, зэмлыкез яратӥськомы. Зэмлык Инмарлэн Кылаз гожтэмын. Атаезлы вӧсяськыкуз, Иисус вераз: «Тынад кылыд — зэмлык» (Иоанн 17:17). Библиысь зэмлыкез яратон понна, милемлы шонер тодон-валан басьтыны кулэ со сярысь, мар гожтэмын Библиын (Кол. 1:10). Нош тодон-валан басьтыны гинэ тырмыт ӧвӧл. 119-тӥ псаломез гожъясь вера милемлы, мар эшшо карыны кулэ на. (Лыдӟы Псалтирез 118:97—100.) Нунал куспын шедьтӥськомы-а ми дыр, малпаськон понна со сярысь, мае ми Библиысь лыдӟимы? Малпаськимы ке, кыӵе пайда вае милемлы Библиысь курон-косонъёсъя улон, Библиысь зэмлык понна тау каронмы будоз.

¹² Псаломъёсты гожъясь ватса на: «Макем ческытэсь мон понна Тынад кылъёсыд! Чечылэсь но ческытгес мынам ымылы» (Пс. 118:103). Библия вылэ пыкиськыса гожтэм публикациос, кудъёссэ Инмарлэн организациез дася, ческыт сиён выллем луо. Кызьы ческыт сиёнэз дыртытэк сииськомы но шумпотон басьтӥськомы, озьы ик со публикациосты, дыртытэк лыдӟыса, шумпотон басьтэммы потэ. Соку ми «чебересь кылан-буранъёсты» тодамы вайыны но мукетъёсызлы юрттыны быгатомы (Екк. 12:10).

13. Мар юрттӥз Иеремиялы Библиысь зэмлыкез яратыны? Мар карыны зэмлык солэсь мылкыдзэ ӝутӥз?

¹³ Иеремия пророк Библиысь зэмлыкез яратэ вал. Тани мар вераз со Инмарлэн кылъёсыз сярысь: «Тынад кылъёсыд шедьтэмын, мон соосты сии; Тынад кылыд монэ шумпоттӥз, сюлэмме шулдыр кариз; уго Тынад нимыд монэ утьыны сётэмын, Кузё-Инмаре Саваоф Инмар» (Иер. 15:16). Иеремия мур малпаськиз Инмарлэн дуно кылъёсыз вылын но яратӥз соосты. Со вань сюлмысьтыз Иеговалы тау кариз, солэсь нимзэ нуллыны но со сярысь вераны быгатэ шуыса. Ми Инмарлэсь зэмлыксэ яратӥськомы ке, валаськомы-а ми, Инмарлэсь нимзэ нуллыны но берпум нуналъёсы Эксэйлык сярысь иворез вераны — со туж бадӟым дан шуыса?

14. Мар юрттоз милемлы Библиысь зэмлыкез юнгес яратыны?

¹⁴ Мар эшшо юрттоз на милемлы Библиысь зэмлыкез юнгес яратыны? Милемлы ялан кенешлэн пумиськонъёсаз ветлоно, кытын ми Иеговалэсь дышетскиськомы. Котькуд арняе Библиез дышетыны юрттӥсь статьяосты эскерон — со одӥгез валтӥсь амал, кызьы Иегова милемыз дышетэ. Эскериськись темаез умой валан понна, милемлы котькуд эскеронлы умой-умой дасяськоно. Кылсярысь, луоз усьяны ваньзэ кылбуръёсты, кудъёсыз статьяын пумисько. Эскерон понна брошюраосты пӧртэм кылъёсын шедьтыны луоз организацимылэн интернет-ресурсъёсысьтыз. Куд-ог электронной форматъёс луонлык сёто ӝог усьяны эскерон понна статьяосын пумиськись вань кылбуръёсты. Нош кыӵе гинэ амалэз ми медам быръе, со кылбуръёсты туж сак лыдӟыса но соос вылын малпаськыса, ми эшшо но юнгес яратомы Библиысь зэмлыкез. (Лыдӟы Псалтирез 1:2.)

ОГЪЯ ОСКИСЬЁСМЕС ЯРАТОН

15, 16. а) Мар милемлы кароно, Иоаннлэн 13:34, 35 косэмъя? б) Кызьы огъя оскисьёсмес яратон герӟаськемын Инмарез но Библиез яратонэн?

¹⁵ Кулон азяз уе Иисус аслаз дышетскисьёсызлы вераз: «Тӥледлы выль курон-косон сётӥсько: огдэс огды яратэ; кызьы Мон тӥледыз яратӥ, озьы ик тӥ но огдэс огды мед яратоды. Куспады яратонды луиз ке, тӥ Мынам дышетскисьёсы шуыса, тӥледыз ваньмыз тодмалозы» (Иоанн 13:34, 35).

¹⁶ Вын-агайёсмес но сузэр-апайёсмес яратон юн герӟаськемын Иеговаез яратонэн. Ми ӧм яратэ ке вын-агайёсмес, Инмарез но яратыны ум быгатэ. Апостол Иоанн гожтӥз: «Агай-вынзэ адӟыса вылысь сое яратӥсьтэм мурт кызьы быгатоз Инмарез яратыны, Кудзэ со уг адӟы?» (1 Иоанн 4:20). Иеговаез но огъя оскисьёсмес яратон озьы ик герӟаськемын Библиез яратонэн но. Малы озьы вераны луоз? Малы ке шуоно Библиысь зэмлыкез яратон милесьтым мылкыдмес ӝутэ вань сюлмысьтымы кылзӥськыны курон-косонлэсь, кудӥз косэ Инмарез но огъя оскисьёсмес яратыны (1 Пётр 1:22; 1 Иоанн 4:21).

17. Кызьы ми яратэммес возьматыны быгатысалмы?

¹⁷ Лыдӟы 1 Фессалоникаослы 4:9, 10. Кызьы уж вылын возьматыны быгатомы, огъя оскисьёсмес яратӥськомы шуыса? Кылсярысь, луоз арлыдоослы юрттыны кенеше ветлыны яке огназ кылем сузэрлы дорысьтыз мае ке тупатыны (Иак. 1:27). Егитъёслы но, арлыдоослы но, кудъёсыз ӝоже усемын яке шуг-секытъёсын пумиськемын, саклык висъяно но соосты буйгатоно (Мад. 12:25; Кол. 4:11). «Асьме осконысь агай-вынъёсмылы» кылъёсын но ужъёсын возьматӥськомы ке, соос сярысь сюлмаськиськомы шуыса, озьы ми соосты яратэммес возьматӥськомы (Гал. 6:10).

18. Мар юрттоз милемлы кенешын кусыпъёсмес тупатъяны?

¹⁸ Библиын азьло ик верамын вал ини, сьӧлыклэсь кышкасьтэм дуннелэн «берпум аръёсаз» адямиос асьсэды асьсэос гинэ яратӥсесь но тырмостэмесь луозы шуыса (2 Тим. 3:1, 2). Соин ик христианъёслы туж тыршоно луэ, Инмарез, Библиысь зэмлыкез но ог-огзэс яратон понна. Зэмзэ но, куддыръя вын-агайёсын но сузэр-апайёсын кылмы уг тупа. Но ми соосты яратӥськомы, соин ик тыршомы ӝоггес кусыпъёсмес тупатыны (Еф. 4:32; Кол. 3:14). Ойдолэ ум сётэ яратонмылы сӥяны — азьланяз но ӟырдыт яратомы Иеговаез, солэсь Кылзэ но огъя оскисьёсмес!