ЭСКЕРОН ПОННА СТАТЬЯ 47
Агайёсты но сузэръёсты яратонмы медаз сӥя
«Огмес огмы яратоме, уго яратон Инмар бордысь потэ» (1 ИОАНН 4:7).
109-ТӤ КЫРӞАН Ӟырдыт яратэ ог-огдэс
ТА СТАТЬЯЫНa
1, 2. а) Малы, оскон, оскиськон но яратон сярысь веракуз, Павел шуиз, яратон соос пӧлысь вылӥынгес шуыса? б) Кыӵе юанъёсты ми эскеромы?
ОСКОН, оскиськон но яратон сярысь веракуз, апостол Павел шуиз: «Яратон соос пӧлысь ваньмызлэсь вылӥынгес» (1 Кор. 13:13). Малы со озьы вераз? Азьланяз выль дунне сярысь Инмарлэн кылсётонэзлы милемлы осконо уз луы ини. Малы? Малы ке шуоно Инмарлэн вань кылсётонъёсыз быдэсмозы. Нош Иеговаез но адямиосты котьку но яратоно луоз. Со сяна, яратонмес пумен юнматоно луоз.
2 Яратон котьку но кулэ луоз бере, ойдолэ эскеромы куинь юанъёсты. Нырысетӥез, малы ог-огмес яратыны кулэ? Кыкетӥез, кызьы вын-агайёсмылы но сузэр-апайёсмылы яратонмес возьматоно? Куинетӥез, мар кароно, ог-огмес яратонмы медаз сӥя шуыса?
МАЛЫ ОГ-ОГМЕС ЯРАТЫНЫ КУЛЭ?
3. Малы милемлы ог-огмес яратыны кулэ?
3 Малы милемлы ог-огмес яратыны кулэ? Нырысетӥез муг — зэмос христианъёсты ог-огзэс яратэмзыя тодманы луэ. Иисус аслаз апостолъёсызлы шуиз: «Куспады яратонды луиз ке, тӥ Мынам дышетскисьёсы шуыса, тӥледыз ваньмыз тодмалозы» (Иоанн 13:35). Озьы ик яратон огкылысь улыны юрттэ. Павел вераз, яратон огазея шуыса (Кол. 3:14, ВД). Вань на эшшо одӥг муг, малы милемлы ог-огмес яратыны кулэ. Апостол Иоанн вын-агайёсызлы но сузэр-апайёсызлы гожтӥз: «Инмарез яратӥсь мурт агай-вынъёсты но мед яратоз» (1 Иоанн 4:21). Озьыен, ог-огмес яратыса, ми возьматӥськомы, Инмарез яратӥськомы шуыса.
4, 5. Кыӵе пример возьматэ, Инмарез яратон но огъя оскисьёсмес яратон герӟаськемын шуыса?
4 Малы вераны луэ, Инмарез яратон но огъя оскисьёсмес яратон герӟаськемын шуыса? Тае валан понна, малпаське, кызьы герӟаськемын сюлэм но мугорлэн мукет люкетъёсыз. Сюлэммылэсь жугиськемзэ эскерыса, эмъясь вала, кыӵе милям сюлэммы. Кызьы та примерез милям юанэнымы герӟаны луэ?
5 Куке эмъясь сюлэммылэсь жугиськемзэ эскере, со вала, сюлэммы висе-а, уг-а. Ӵапак озьы ик мукетъёсты яратэммыя валаны луэ, макем зол ми Инмарез яратӥськомы. Кылсярысь, ми шӧдӥськомы ке, вын-агайёсты но сузэр-апайёсты яратонмы сӥя шуыса, валаны луэ, Инмарез яратонмы но сӥя, дыр, шуыса. Нош ми огъя оскисьёсмылы яратонмес уж вылын возьматӥськомы ке, валаны луэ, Инмарез яратонмы но ӧз лябӟы шуыса.
6. Мае возьматэ огъя оскисьёсмес яратонмылэн сӥямез? (1 Иоанн 4:7—9, 11).
6 Вын-агайёсмес но сузэр-апайёсмес яратонмы сӥя ке, ӝегатскытэк мар ке но карыны кулэ. Малы? Малы ке шуоно со возьматэ, Иеговаен кусыпъёсмы сӧриськыны кутскизы шуыса. Апостол Иоанн та сярысь тазьы гожтӥз: «Агай-вынзэ адӟыса вылысь сое яратӥсьтэм мурт кызьы быгатоз Инмарез яратыны, Кудзэ со уг адӟы?» (1 Иоанн 4:20). Малы та милемыз дышетэ? Ог-огмес яратыса гинэ, ми Инмарлы ярамонэсь луомы. (Лыдӟе 1 Иоаннлэсь 4:7—9, 11.)
КЫЗЬЫ АГАЙЁСМЫЛЫ НО СУЗЭРЪЁСМЫЛЫ ЯРАТОНМЕС ВОЗЬМАТОНО?
7, 8. Кызьы агайёсмылы но сузэръёсмылы яратонмес возьматыны луэ?
7 Инмарлэн Кылыз трос пол ӧте милемыз ог-огмес яратыны (Иоанн 15:12, 17; 1 Пётр 1:22; 1 Иоанн 4:11; Рим. 13:8; 1 Фес. 4:9). Яратон сюлмын улэ. Нош адямиос уг адӟо, мар сюлэм пушкын вань. Соку кызьы вын-агайёсмы но сузэр-апайёсмы яратонмес адӟозы? Милям сое кылъёсынымы но ужъёсынымы возьматэммы луэ.
8 Тани куд-ог амалъёс. «Ог-огеныды ӧрекчаськытэк вераське» (Зах. 8:16). «Куспады тупаса улэлэ» (Марк 9:50). «Мукетъёссэ асьтэ сярысь умоесьгес луо шуыса лыдъялэ» (Рим. 12:10). «[Вӧсяськисьёслы] юрттӥське» (Рим. 12:13). «Ог-огдылы простить каре» (Кол. 3:13). «Ог-огдылэсь секытлыкъёстэс нуллыны юрттӥське» (Гал. 6:2). «Куректон-кайгуэ сюремъёсты... буйгатыны мед быгатомы» (2 Кор. 1:4). «Ог-огдэс юнматэ» (1 Фес. 5:11). «Огды понна огды вӧсяськелэ» (Иак. 5:16).
Кызьы ми юрттыны быгатӥськомы соослы, кинъёслы секыт? (Учке 7—9-тӥ абзацъёсты.)
9. Малы буйгатон — со туж умой амал мукетъёсызлы яратонмес возьматыны? (Озьы ик учке суредэз.)
9 Кылем абзацын вераськиз, кызьы ми ог-огмылы яратонмес возьматыны быгатӥськомы. Ойдолэ эскеромы со амалъёс пӧлысь одӥгзэ. Павел шуиз: «Куректон-кайгуэ сюремъёсты... буйгатыны мед быгатомы». Малы буйгатон — со умой амал мукетъёсызлы яратонмес возьматыны? Одӥг библейской справочникъя, кыл, кудӥз татын «буйгатон» шуыса берыктэмын, возьматэ куректӥсь мурт вӧзын луэмез. Озьыен, куке ми куректӥсь вын-агайёсмес буйгатӥськомы, ми соослы юрттӥськомы азьланяз но Инмарлы оскымон ужаны-тыршыны. Вын-агайёсмес буйгатыса, ми соослы яратонмес возьматӥськомы (2 Кор. 7:6, 7, 13).
10. Кызьы герӟаськемын гажан-жалян но буйгатон?
10 Буйгатон юн герӟаськемын гажан-жалянэн. Гажась-жалясь адями мукетъёссэ буйгатыны тырше, сюлэм вӧсь луэмзэс капчиятон понна. Озьыен, куке ми адямиосты гажаськомы-жаляськомы, милям соосты буйгатэммы потэ. Эскеромы тае Иеговалэн примерез вылын. Апостол Павел Иеговаез «гажан-жалянлэн Атаеныз» нима. Та возьматэ, Иегова адямиосты туж гажа-жаля шуыса. Соин ик «котькыӵе куректон-кайгуосмы дыръя Со асьмеды буйгатэ» (2 Кор. 1:3, 4). Иеговалэсь адӟем карыса, милемлы но мукетъёсты гажано-жаляно но буйгатоно. Нош асьмеды озьы возён понна, мукет сямъёсты будэтоно на. Кыӵе сямъёс сярысь татын вераське?
11. Кыӵе сямъёс юрттозы милемлы мукетъёссэ буйгатыны? (Колоссыослы 3:12; 1 Пётр 3:8).
11 Нуналысь нуналэ ог-огмес буйгатон понна, милемлы ӟеч сямоесь луыны кулэ. (Лыдӟе Колоссыослы 3:12; 1 Пётрлэсь 3:8.) Гажан-жалянмес но ӟеч сямъёсмес возьматӥмы ке, соку милям юн мылкыдмы луоз куректӥсьёсты буйгатыны. Иисус шуиз: «Сюлэм пачылмыку, кыл вера. Ӟеч адями ӟеч шыкысысьтыз ӟечсэ поттэ» (Матф. 12:34, 35). Секыт югдуре шедем вын-агайёсмес но сузэр-апайёсмес буйгатӥмы ке, соку соос шӧдозы, ми соосты яратӥськомы шуыса.
МАР КАРОНО, ОГ-ОГМЕС ЯРАТОНМЫ МЕДАЗ СӤЯ ШУЫСА?
12. а) Малы милемлы чакласькыны кулэ? б) Мае ми тодомы азьланяз?
12 Милям ог-огмес яратэммы потэ (1 Иоанн 4:7). Озьы ке но милемлы тодамы возёно Иисуслэсь алонзэ, «тросэзлэн яратонэз сӥялоз» шуыса (Матф. 24:12). Тае веракуз, Иисус аслаз дышетскисьёсыз сярысь ӧз вера ке но, милемлы чакласьконо, та дуннеысь асьсэды гинэ яратӥсь адямиос кадь асьмеды медам возе шуыса. Ваньзэ тае лыдэ басьтыса, ойдолэ тодомы, луэ-а кызьы ке эскерыны, макем юн ми яратӥськомы вын-агайёсмес но сузэр-апайёсмес?
13. Кызьы эскероно, макем юн ми агайёсмес но сузэръёсмес яратӥськомы?
13 Валан понна, макем юн милям яратонмы, чакланы кулэ, кызьы ми асьмеды пӧртэм учыръёсын возиськомы (2 Кор. 8:8). Кылсярысь, апостол Пётр гожтӥз: «Уката ик огдэс огды сюлмысь яратыса улэ, малы ке шуоно яратон трос сьӧлыкъёсты шобыртэ» (1 Пётр 4:8). Куддыръя вын-агайёсмы но сузэр-апайёсмы янгышаны яке милемыз вӧсь карыны быгато. Со, кызьы ми асьмеды сыӵе дыръя возиськомы, возьматэ, макем юн ми соосты яратӥськомы.
14. Кызьы милемлы агайёсмес но сузэръёсмес яратоно, 1 Пётрлэн 4:8 лыдэ басьтыса? Вералэ пример.
14 Ойдолэ пыр-почгес эскеромы Пётрлэсь та кылъёссэ. 8-тӥ кылбурлэн кутсконаз вераське, милемлы ог-огмес сюлмысь яратоно шуыса. Кыл, кудӥз татын «сюлмысь» шуыса берыктэмын, возьматэ «паськытатыны» шуэмез. Та кылбурлэн кыкетӥ люкетаз вераське, кыӵе пайда ваёз сыӵе яратон. Со вын-агайёсмылэсь но сузэр-апайёсмылэсь сьӧлыкъёссэс шобыртоз. Пуктэ син азяды, кызьы ми яратонэз кык киынымы басьтӥськомы но, кыстӥськись басмаез кадь, кыскиськомы, со бадӟымгес мед луоз но трос сьӧлыкъёсты мед шобыртоз шуыса. Басмаен кыӵе ке пасез шобыртыны луэ, нош яратонэн — мукетъёсызлэсь тырмымтэоссэс но янгышъёссэс.
15. Мар карыны мылкыдмес ӝутэ юн яратон? (Ефесъёслы 4:32).
15 Юн яратон мылкыдмес ӝутэ вын-агайёслэсь но сузэр-апайёслэсь тырмымтэоссэс простить карыны, со капчи ӧвӧл ке но. (Лыдӟе Ефесъёслы 4:32.) Мукетъёссэ простить карыса, ми возьматӥськомы, яратонмы юн но милям Иеговаез шумпоттэммы потэ шуыса. Мар эшшо милемлы юрттоз на мукетъёсызлэсь янгышъёссэс простить карыны но милемлы кельшисьтэм сямъёссылы саклыкмес висъятэк улыны?
Ми умой туспуктэмъёсты гинэ кельтӥськомы. Ӵапак озьы ик ми тодамы возиськомы агайёсын но сузэръёсын герӟаськем умой учыръёсты, нош умойтэмъёссэ вунэтыны тыршиськомы. (Учке 16-тӥ но 17-тӥ абзацъёсты.)
16, 17. Мар эшшо милемлы юрттоз на мукетъёсызлэн пичи янгышъёссылы саклыкмес висъятэк улыны? Вералэ пример. (Озьы ик учке суредэз.)
16 Вын-агайёслэн но сузэр-апайёслэн тырмымтэоссылы саклыктэс эн висъялэ. Тырше соослэсь умой сямъёссэс адӟыны. Пуктэ син азяды, тӥ эшъёсыныды ӵош люкаськиды шуыса. Кошкон азяды тӥ малпады ваньды ӵош туспуктэм лэсьтыны. Ваньзы чебер мед пуксёзы шуыса, тӥ куинь туспуктэм лэсьтӥськоды. Тӥ адӟиды ке, одӥгаз туспуктэмын одӥг агай умой ӧз пуксьы шуыса, мар тӥ кароды? Тӥ сое ӵушоды, малы ке шуоно мукет туспуктэмын ваньзы, со агай но, чебер пуксемын.
17 Туспуктэмъёсты ӵошатыны луэ милям тодэ ваёнъёсынымы. Милемлы кельше вын-агайёсынымы но сузэр-апайёсынымы дырмес ортчытъяны. Нош мар кароно, куке огъя оскисьмы вераз яке лэсьтӥз сое, мар милемлы туж ик ӧз кельшы? Умой луоз со учырез вунэтыны, ӵапак озьы ик, кызьы ми пӧрмымтэ туспуктэмез ӵушысалмы (Мад. 19:11). Вын-агайлэсь яке сузэр-апайлэсь пичи янгышсэ тодамы возёно ӧвӧл, малы ке шуоно ми тодӥськомы трос умой учыръёсты, кудъёсыз со адямиен герӟаськемын. Милям соосты тодамы воземмы потэ!
МАЛЫ ТУННЭ ЯРАТОН ТУЖ КУЛЭ
18. Мае ми тодӥмы та статьяысь яратон сярысь?
18 Малы ог-огмес яратыны кулэ? Кызьы ми тодӥмы, вын-агайёсмес но сузэр-апайёсмес яратыса, ми возьматӥськомы, Иеговаез яратӥськомы шуыса. Кызьы яратонэз уж вылын возьматыны луэ? Кылсярысь, вын-агайёсты но сузэр-апайёсты буйгатыса. Ог-огмес буйгатон понна, милям гажан-жалянмы луыны кулэ. Нош мар кароно, мукетъёсты яратонмы медаз сӥя шуыса? Со понна мукетъёсызлэсь янгышъёссэс простить кароно, со капчи ӧвӧл ке но.
19. Малы туннэ туж кулэ ог-огмес яратыса улыны?
19 Малы туннэ туж кулэ ог-огмес яратыса улыны? Учке, мар со сярысь вераз апостол Пётр: «Котьмарлы но пум вуэ ини». Соин ик со христианъёсты ӧтиз: «Огдэс огды сюлмысь яратыса улэ» (1 Пётр 4:7, 8). Ӝоген та лек дуннелы пум вуоз. Кыӵе югдур соку луоз? Иисус шуиз: «Мынам нимы понна тӥледыз вань калыкъёс адӟемпотостэм карозы» (Матф. 24:9). Шайтан милемыз люкыны медаз быгаты шуыса, милемлы огкылысь но ог-огмес яратыса улоно (Флп. 2:1, 2; Кол. 3:14).
130-ТӤ КЫРӞАН Ог-огдэс простить каре
a Асьме нуналъёсы туж кулэ вын-агайёсмылы но сузэр-апайёсмылы яратонмес возьматыны. Малы со туж кулэ но кызьы ми ог-огмылы яратонмес возьматыны быгатӥськомы?