Одӥг пол но пыраклы кыле вужмем адями луондылэсь «дӥськутсэ»

1, 2. Мар верало мукет адямиос Иеговалэн Адӟись-Ивортӥсьёсыз сярысь?

ТРОСЭЗ адямиос верало, Иеговалэн ужась-тыршисьёсызлэн сямъёссы туж умоесь шуыса. Тани мар гожтӥз гожъяськись Антон Джилл Германиын нацистъёс кивалтон дыръя улӥсь вын-агайёсмы но сузэр-апайёсмы сярысь: «...Нацистъёс тужгес но адӟемпотостэм каро вал Иеговалэсь Адӟись-Ивортӥсьёссэ. [...] 1939-тӥ арын 6 000 соос пӧлысь... [концлагерьёсын] пуке вал ини». Со гожъясьлэн верамезъя, Адӟись-Ивортӥсьёс туж лек уйылон-уллянъёсын пумиськизы ке но, соос оскымон адямиос шуыса тодмо вал, кудъёсыз зӥбемлы ӧз сётске, Инмарлы оскымон кылизы но ог-огенызы тупаса улӥзы.

² Нош туж кемалась ӧвӧл Лымшор Африкаын Иеговалэн Адӟись-Ивортӥсьёсызлэн нимысьтыз пумиськонзы ортчиз, кудӥз трос адямиослы тунсыко потӥз. Тросэз пусйизы, Инмарлэн ужась-тыршисьёсыз туж умой сямо шуыса. Вал сыӵе дыр, куке Лымшор Африкаысь катъёс уг лэзё вал пӧртэм куо адямиослы огазе люкаськыны. Соин ик Иеговалэн Адӟись-Ивортӥсьёсыз, кудъёсыз пӧртэм куо вал, огазе люкаськыны ӧз быгатэ. Нош макем паймымон вал, куке 2011-тӥ арын 18-тӥ толсуре Йоханнесбурглэн самой бадӟым стадионаз Лымшор Африкаысь но мукет шаеръёсысь 78 000 тросгес пӧртэм куо вын-агайёсмы люкаськизы. Тани мар вераз стадионлэн кивалтӥсьёсыз пӧлысь одӥгез: «Та стадионысь мон сокем лякыт адямиосты ӧй адӟылы на. Ваньзы ӝикыт дӥсяськемын. Нош стадионэз тӥ макем чылкыт кариды! Но тужгес но паймымонэз — тӥ пӧлын трос пӧртэм куо адямиос».

3. Маин пӧртэм луо вын-агайёсмы но сузэр-апайёсмы мукет адямиослэсь?

³ Кызьы адӟиське адямиослэн верамъёсысьтызы, быдэс дунне вылысь вын-агайёсмы но сузэр-апайёсмы туж пӧртэм луо мукет адямиослэсь (1 Пётр 5:9). Нош маин ми мукет организациослэсь пӧртэм луиськомы? Ми туж тыршиськомы кылзӥськыны таӵе визь-кенешлэсь: «Вужмем адями луондылэсь „дӥськутсэ“ кылиды ни [«кыле», ВД], табере солэсь ужъёссэ эн ни лэсьтэ... выль адями луонэн тӥ дӥсяськиды ни [«дӥсяське», ВД]» (Кол. 3:9, 10). Солэсь кылзӥськыны милемлы юрттэ Библия но Инмарлэн святой духез.

4. Мае ми эскеромы та статьяын но малы со туж кулэ луэ?

⁴ Вужмем адями луонлэсь «дӥськутсэ» кыльыны — со одӥг уж, нош сое выльысь дӥсятэк улыны — со чылкак мукет. Та статьяын ми эскеромы, кызьы вужмем адями луонлэсь «дӥськутсэ» кылёно но малы со туж кулэ. Озьы ик ми вераськомы, малы адями воштӥськыны быгатэ, со трос сьӧлыкаса улыны дышемын ке но. Ми эскеромы на сое, мар юрттоз соослы, кинъёс трос аръёс ини Инмарлы ужало-тыршо, азьло куштэм ужъёссэс выльысь лэсьтытэк улыны. Малы милемлы та выллем тодэ вайытонъёс кулэ луо? Жаляса верано луэ: Иеговалэн куд-ог ужась-тыршисьёсыз саклыксэс ыштӥзы но азьвыл куштэм ужъёссы доры берытскизы. Соин милемлы ваньмылы туж сак кылзоно алыса верам кылъёсты, кудъёсыз гожтэмын 1 Коринфъёслы 10:12: «Соин ик, кин ке но мон йыг-йыг сылӥсько шуыса малпа ке, чакласькы: медад усьы».

ВАНЬ АЗОН-КАЛГОН МЫЛ ПОТОНЪЁСЛЭСЬ КУШТӤСЬКЕ

5. а) Вералэ пример вылын, малы милемлы ӝегатскытэк куштӥськоно сямъёслэсь, кудъёссэ Инмар адӟемпотостэм каре. (Учке статья кутсконысь туспуктэмез.) б) Колоссыослы 3:5—9а но Ефесъёслы 4:22 верамъя, кыӵе тодметъёсыз вужмем адями луонлэн?

⁵ Мар тӥ кариськоды, куке тӥляд дӥськутты кырсь луиз яке со бордысь зын потэ? Веранэз ӧвӧл, тӥ сое ӝоггес кыльыны тыршиськоды. Озьы ик, ми валаськомы ке, милям сямъёсмы вань шуыса, кудъёссэ Инмар адӟемпотостэм каре, милемлы ӝегатскытэк воштӥськоно. Милям кылзӥськеммы потэ Павеллэн визь-кенешезлэсь, кудзэ со христианъёслы сётӥз. Со гожтӥз, христианъёслы куштӥськоно шуыса ваньмызлэсь, мар Инмарлы уг яра, озьы ик, азыса-калгыса улонлэсь но кырсь ужлэсь-малпанлэсь. Ойдолэ со сярысь пыр-почгес вераськомы. (Лыдӟы Колоссыослы 3:5—9а; Ефесъёслы 4:22.)

6, 7. а) Кызьы Павеллэн кылъёсыз возьмато, милям юн мылкыдмы луыны кулэ шуыса вужмем адями луонлэсь «дӥськутсэ» кыльыны? б) Кызьы улӥз Сакура но мар юрттӥз солы воштӥськыны?

⁶ Азыса-калгыса улон. Библиын «азон-калгон» кыл кутӥське, куке вераськон мынэ кузпалъяськымтэ адямиос вискын сексуальной кусыпъёс сярысь но гомосексуализм сярысь. Павел христианъёслы гожтӥз, соос музъем вылысьсэ, мар вань пушказы, ваньзэ мед быдтозы шуыса, азыса-калгыса улонэз но. Со возьматэ, соослы куштӥськоно вал шуыса азон-калгонэн герӟаськем вань мыл потонъёссылэсь. Павеллэн кылъёсысьтыз адӟиське, макем юн мылкыдмы луыны кулэ сьӧлыко мыл потонъёслэсь куштӥськыны. Со капчи ӧвӧл, но та нюръяськонын вормыны луэ.

⁷ Эскеромы Япониысь Сакураa нимо сузэрлэсь примерзэ. Егит дыръяз со ассэ огназ кельтэмын кадь шуыса шӧдэ вал но ялан куашкам мылкыдын улэ вал. Мӧзмонэныз нюръяськыны тыршыса, Сакура 15 аресысен пӧртэм пиосмуртъёсын кӧланы кутскиз. Сюлмыз вӧсь луыса, со вера: «Озьы улэменым, мон куинь пол нылпи куштоно луи». Сакура ватса на: «Азыса-калгыса улыны кутскеме бере мыным сыӵе кышкыт ӧй вал ни, мыным потэ вал, мон огнам ӧвӧл но монэ ярато шуыса. Нош макем тросгес пиосмуртъёсын мон кӧлай, сокем кышкытгес луэ вал мыным». Сакура 23 аресозь озьы улӥз. Собере со Иеговалэн Адӟись-Ивортӥсьёсыныз Библия дышетыны кутскиз. Солы туж кельшиз со, мае со тодӥз, но, Иеговалэн юрттэменыз, со ассэ янгыше уськытэмысь но азыса-калгыса улэмысь дугдӥз. Али Сакура пионер луыса ужа-тырше но ассэ огназ кельтэмын кадь уг шӧды ни. Со вера: «Мон туж шумпотӥсько, малы ке шуоно котькуд нунал адӟисько, макем Иегова монэ яратэ!»

КЫРСЬ СЯМЪЁСЛЭСЬ КУШТӤСЬКЕ

8. Кыӵе ужъёс милемыз Инмарлэн син азяз кырсь карыны быгато?

⁸ Кырсь ужъёс но малпанъёс. Библиын кырсь ужъёс но малпанъёс пӧлы азон-калгон сьӧлык гинэ пыртэмын ӧвӧл. Отчы озьы ик пыре тамак кыскон но юрӟым кылъёсын серекъян-мактан (2 Кор. 7:1; Еф. 5:3, 4). Со сяна отчы пыро на кырсь ужъёс, кудъёссэ адями лушкемен лэсьтэ, кылсярысь, азон-калгон мылкыдэз пуромытӥсь публикациосты лыдӟе яке порнографиез учке, маин сэрен адями дышыны быгатэ мастурбациен вырыны (Кол. 3:5)b.

9. Кыӵе бервылъёсы вуттэ порнография учкон сям?

⁹ Адями, кудӥз ялан порнография учке, аслэсьтыз азон-калгон мылкыдзэ пуромытэ, соин сэрен куддыръя солэн секстэк улэмез уг луы ни. Эскеронъёс возьматэмъя, адямиос, кудъёсызлэн ялан порнография учкемзы потэ, алкоголик яке наркоман кадь луо, кудъёсыз юонтэк яке наркотиктэк улыны уг быгато ни. Соин ик паймонэз ӧвӧл, порнографиез учкон сям туж урод бервылъёсы вуттыны быгатэ шуыса. Кылсярысь, адямилы туж возьыт луэ, ужаны уг быгаты, семьяеныз кусыпъёсыз сӧрисько, кузпалэныз люкиське, нош куддыръя, порнография учкыны дышеменыз сэрен, адями ассэ ачиз но быдтэ. Одӥг пиосмурт, кудӥз порнография учкон сямзэ вормиз но быдэс ар сое ӧз учкы ни, гожтӥз: «Мон выльысь асме гажаны кутски».

10. Мар юрттӥз Рибейролы порнографиез учкыны мылкыдзэ вормыны?

¹⁰ Тросэзлы порнографилэсь палэнын возиськыны туж секыт. Но Бразилиысь Рибейро нимо вын-агайлэн учырез возьматэ, сыӵе нюръяськонын вормыны луэ шуыса. Куке Рибейро быдэ вуэмын ӧй вал на, со дорысьтыз кошкиз но, кӧня ке улыса, ужаны интыяськиз заводэ, кытчы макулатура нулло вал. Отын солэн син шораз йӧтӥзы порнографиен журналъёс. Со вера: «Пумен мон порнография учкыны дыши. Мон чидатэк возьмасько вал, ку кышномурт, кудӥныз мон улӥсько, дорысь кошкоз, но мон порнофильмъёсты учкыны быгато». Но тани одӥг пол Рибейро уж дорысьтыз макулатура пӧлысь «Кызьы семьяын шудо луоно» книгаез адӟиз. Со сое басьтӥз но лыдӟыны кутскиз. Со книгаысь тодэмез солэсь мылкыдзэ ӝутӥз Иеговалэн Адӟись-Ивортӥсьёсызлы вазиськыны но курыны соин Библиез дышетыны. Рибейролы туж трос дыр кулэ луиз, аслэсьтыз урод сямзэ вормон понна. Мар юрттӥз солы? Со валэктэ: «Вӧсяськон, Библиез дышетон но тодэме вылын малпаськон Инмарлэн сямъёсыз понна тау каронме будэтӥзы. Озьы Иеговаез яратонэ порнографиез учкыны мылкыдылэсь пумен юнгес луиз». Инмарлэн Кылызлы но святой духезлы луыса, Рибейро вужмем адями луонэзлэсь «дӥськутсэ» кылиз, пылатӥськиз но али тӧро луыса ужа-тырше.

11. Мар кароно, порнографиез учкыны мылкыдэз вормон понна?

¹¹ Висъялэ саклыктэс: умойтэм сямзэ вормон понна, Рибейролы, Библиез дышетэм сяна, эшшо мар ке но кароно вал. Солы кужым пононо вал, Библиысь ивор солэн сюлмаз мед пыроз шуыса. Нош со понна дыр кулэ вал. Со вӧсяськылӥз но тодэмез вылын малпаськылӥз, соин ик Инмарез яратонэз юнгес луиз но порнографиез учкыны мылкыдзэ вормиз. Кызьы адӟиське, адями Иеговаез яратонзэ юнматэ, нош уродэз-лекез адӟонтэм карыны дышетске ке, со котьмалэсь умой юрттэ солы порнографиез учкыны мылкыдзэ вормыны. (Лыдӟы Псалтирез 96:10.)

ПАЛЭНТЭ ЛЕКЪЯСЬКОНЭЗ, УРОД-ЛЕК КЫЛЫН ВЕРАСЬКОНЭЗ НО ӦРЕКЧАСЬКОНЭЗ

12. Мар юрттӥз Стивенлы лекъяськонзэ но керетон сямзэ вормыны?

¹² Ӝог пурӟись адямиос ӵемысь вожпотонзэс мукет адямиос вылэ кисьто, соосты ултӥяса. Веранэз ӧвӧл, со семьяез шудо уз кары. Тани мар вераз Австралиысь Стивен, кудӥзлэн кышноез но нылпиосыз вань: «Азьло мон туж ӵем керетӥсько вал, но пурӟон понна мыным трос ик кулэ ӧй вал. Ми кышноеным куинь пол нимаз карылӥськимы но люкиськон калэ вуимы». Нош собере соосын Библиез дышетыны кутскизы Иеговалэн Адӟись-Ивортӥсьёсыз. Стивен Библиысь визь-кенешъёсты улоназ пыртыны кутскиз. Кыӵе емышъёс со вайиз? Со вера: «Милям кусыпъёсмы чутрак воштӥськизы. Азьло мон йыркуръяськонэн но вожпотонэн пачылмемын вал но котьку пурӟыны дась вал. Нош табере, Иеговалэн юрттэменыз, мынам сюлмам каньыллык». Али Стивен — кенешлы юрттӥсь, нош солэн кышноез кӧня ке аръёс ини пионер луыса ужа-тырше. Соослэн кенешысьтызы тӧроос верало: «Стивен — лякыт, ужез яратӥсь вын-агай, но солэн зӥбыт-востэм мылкыдыз». Соос озьы ик верало, солэсь лекъяськемзэ ноку но ӧз адӟе шуыса. Стивен уг лыдъя, со ас кожаз воштӥськыны быгатӥз шуыса. Со пусъе: «Мынам улонам нокудӥз но та бакель каронъёс пӧлысь ӧй луысал, Иегова мыным ӧй ке юрттысал. Солэн юрттэменыз, мон быдэсак воштӥськи».

13. Малы вожпоттыса улон туж кышкыт луэ? Кыӵе алон гожтэмын Библиын?

¹³ Библия ӧте милемыз вожпоттыса, лек кылъёсын керетыса улонлэсь палэнскыны, малы ке шуоно ваньмыз со ултӥянэ но курадӟытонэ вуттэ (Еф. 4:31). Та дуннеын адямиос дышемын асьсэды лек возьыны, но сыӵе сям Кылдытӥсьмес сантэма. Тросэзлы, выль адями луыны мед быгатозы шуыса, нырысь бадӟым воштӥськонъёс лэсьтоно луиз. (Лыдӟы Псалтирез 36:8—11.)

14. Быгатэ-а керӟег адями воштӥськыны но зӥбыт-востэм луыны?

¹⁴ Тани Ханс вын-агайлэн примерез. Со Австриысь одӥг кенешын тӧро луыса ужа-тырше. Кенешысьтыз тӧроослэн кенешсылэсь ужзэ радъясь агай вера: «Со туж зӥбыт-востэм агай». Но Ханс котьку сыӵе ӧй вал. Быдэ вуэмезлэсь азьло ик со трос юыны кутскиз но туж керӟег луиз. Одӥг пол, куке Ханс туж кудӟемын вал, со вожомыса аслэсьтыз туганзэ вииз. Со понна сое 20 арлы тюрьмае пуктӥзы. Но тюрьма сое умой пала ӧз вошты. Кӧня ке дыр ортчыса, Ханслэн анаез одӥг тӧроез Ханс доры тюрьмае ветлыны куриз. Озьы Ханс Библиез дышетыны кутскиз. Со вера: «Вужмем адями луонлэсь „дӥськутсэ“ кыльыны туж секыт вал. Но мыным туж юрттӥз Исаиялэн 55:7 кылбур. Отын таӵе кылъёс вань: „Сьӧлыклэсь кышкасьтэм шонертэм сюрессэ мед кельтоз“. Озьы ик юрттӥз 1 Коринфъёслы 6:11 кылбур, кытын шонертэм улыны кутскем адямиос сярысь гожтэмын: „Тӥ пӧлын но куд-огез сыӵеесь ик вал“. Трос аръёс ӵоже Иегова чидаса юрттӥз мыным аслаз святой духеныз, но мон выль адями луыны быгатӥ». 17 но ӝыны ар пукемез бере Ханс тюрьмаысь потӥз. Соку со пылатӥськем христиан мурт вал ини. Со вера: «Мон туж тау карисько Иеговалы, гажась-жалясь но простить карыны дась луэмез понна!»

15. Кыӵе эшшо тодметъёсыз вань на вужмем адями луонлэн? Мар со пумысен верамын Библиын?

¹⁵ Вужмем адями луонлэн «дӥськутэныз» дӥсяськем адями юрӟым кылъёсын вераське, нош озьы ик ӧрекчаське но. Кылсярысь, та дуннеын, налогъя декларация гожтыкузы, адямиос дышемын мае ке ватыны яке ӧрекчаськыны, асьсэ янгышъёссы понна кыл кутонтэм вылысь. Нош Иегова — «зэмлыклэн Инмарез» (Пс. 30:6). Со куре, солэн котькуд ужась-тыршисез матысезлы зэмзэ гинэ мед вералоз но медаз ӧрекчаськы шуыса (Еф. 4:25; Кол. 3:9). Соин ик котьку зэмзэ гинэ верано, милемлы секыт яке возьыт ке но (Мад. 6:16—19).

МАР СООСЛЫ ВОРМЫНЫ ЮРТТӤЗ?

16. Мар юрттоз вылысьтымы вужмем адями луонлэсь «дӥськутсэ» кыльыны?

¹⁶ Ас кужымен вужмем адями луонлэсь «дӥськутсэ» кыльыны уг луы. Христианъёслы, кудъёсыз сярысь та статьяын верамын вал,— Сакуралы, Рибейролы, Стивенлы но Ханслы — туж тыршоно луиз, сьӧлыко сюрес вылысьтызы палэнскон понна. Малы луыса, соос вормыны быгатӥзы? Соос лэзизы, Инмарлэн Кылыз но святой духез соослы воштӥськыны мед юрттозы шуыса (Лука 11:13; Евр. 4:12). Милям но потэ ке, Инмарлэн Кылыз но святой духез милемлы мед юрттозы шуыса, котькуд нунал Библиез лыдӟоно, со вылын малпаськоно но ялан вӧсяськоно визьлык но кужым курыса, кудъёсыз туж кулэ луо Библиысь визь-кенешъёсты улонамы кутон понна (Иис. Н. 1:8; Пс. 118:97; 1 Фес. 5:17). Инмарлэн Кылызлэсь но святой духезлэсь юрттэмзэ ми озьы ик шӧдӥськомы, куке кенешлэн пумиськонъёсызлы дасяськиськомы но отчы ветлӥськомы (Евр. 10:24, 25). Со сяна, милемлы вунэтоно ӧвӧл пӧртэм амалъёс сярысь, кудъёссэ Иегова уже кутэ, быдэс дунне вылысь калыкезлы духовной сиён сётон понна (Лука 12:42).

17. Мае ми эскеромы мукетаз статьяын?

¹⁷ Ми эскеримы куд-ог примеръёсты, мае Инмар адӟемпотостэм каре но малэсь христианъёслы одно ик куштӥськоно. Нош Инмарлы ярамон луон понна со гинэ тырмыт луоз-а? Уз. Милемлы кулэ на «выль адями» луыны но солэсь сямъёссэ возьматыны. Мукетаз статьяын ми эскеромы, мар кароно со понна.