Шумпотыса бадӟым куараен кырӟалэ!

1. Кыӵе луонлык сётэ милемлы кырӟан?

ОДӤГ тодмо кылбурчи, кудӥз кырӟанъёс гожъя, вераз: «Кылъёс малпаськыто. Крезьгур шӧдыны юрттэ. Нош кырӟан сюлэмез бугыртэ». Кырӟанъёсмес кырӟаса, ми возьматыны быгатӥськомы инмысь Атаймылы, Иеговалы, ми сое яратӥськомы но данъяськомы шуыса. Кырӟанъёс юртто милемлы соин кусыпъёсмес юнматыны. Соин ик валамон луэ, малы кырӟан сокем бадӟым инты басьтэ зэмос йыбырттонын, ми огнамы-а кырӟаськомы яке бадӟым кенешын-а.

2, 3. а) Малы куд-огъёсыз кенешлэн пумиськонъёсаз кырӟаны возьдасько? б) Кыӵе юанъёслы ми валэктонъёс шедьтомы?

² Яратӥськоды-а тӥ кенешын кырӟаны? Яке тӥ ӧжыт возьдаськиськоды-а? Куд-ог шаеръёсын пиосмуртъёс мукет адямиос азьын кырӟаны возьдасько. Сыӵе сям быдэс кенешлы паланы быгатэ, тужгес но соку, куке кенешын кыл кутӥсь вын-агайёс муг утчало, мукетъёсыныз ӵош кырӟантэм понна (Пс. 29:13).

³ Ми валаськомы ке, кырӟан Иеговалы йыбырттонын бадӟым инты басьтэ шуыса, кырӟан дыръя юри залысь ум потэ но пумиськонъёсы кырӟан кутскытозь лыктыны тыршомы. Соин котькудмылы юано асьмелэсь: «Кызьы мон учкисько христиан пумиськонъёсамы кырӟан шоры? Кызьы возьдаськон сямме вормоно, кудӥз люкетэ мыным шумпотыса кырӟаны? Мар кароно мыным, кырӟанъёсмес вань сюлмысьтым кырӟаны мед быгато шуыса?»

КЫРӞАНЪЁС ИНМАРЛЫ ЙЫБЫРТТОНЫН БАДӞЫМ ИНТЫ БАСЬТО

4, 5. Кыӵе инты басьтэ вал крезьгур вашкала дыръёсы Иеговалы йыбырттонын?

⁴ Вашкала дырысен Иеговалэн ужась-тыршисьёсыз Инмарзэс кырӟанъёсын данъязы. Со вакытэ, куке вашкала израиль калык Инмарлы оскымон ужаз-тыршиз, со кырӟанлы бадӟым саклык висъяз. Кылсярысь, храмын ужан-тыршонэз радъякуз, Давид 4 000 левитъёсты висъяз, соос данъян гуръёсты мед шудозы шуыса. Соос пӧлысь 288 адямиос «Кузё-Инмар азьын кырӟаны дышетэмъёс, ваньзы та ужез тодӥсьёс» вал (1 Пар. 23:5; 25:7).

⁵ Кырӟанлы но крезьгурлы бадӟым саклык висъязы храмез пуктон ужъёсты йылпумъяса шулдыръяськонын но. Библиын верамын: «Одӥг ымысь кадь пеллязы, кырӟазы, Кузё-Инмарез данъясь, ушъясь гуръёс поттӥзы. Нош куке гудыртӥзы гумы, кимвал но мукет шудон арбериослэн куаразы, Кузё-Инмарез ушъязы... Кузё-Инмарлэсь корказэ... пилем пачылмытӥз». Веранэз ӧвӧл, та нимысьтыз шулдыръяськон туж юнматӥз осконзэс соослэсь, кинъёс отын вал (2 Пар. 5:13, 14; 7:6).

6. Кыӵе нимысьтыз программаез дасяз Неемия, Иерусалимысь борддоръёсты пуктыса быдтонэз пусъён понна?

⁶ Иерусалимлэсь борддоръёссэ пуктонэн кивалтӥсь Неемия левитъёсты люказ, соос, оркестр шудыку, Инмарез данъяса мед кырӟалозы шуыса. Иерусалимысь борддоръёсты пуктыса быдтонэз пусъён понна, крезьгурен нимысьтыз программа дасямын вал. «Кык бадӟым хоръёс», храм вадьсын пумиськытозязы, карлэн борддорез йылтӥ ваче пумит мынӥзы. Соос сокем бадӟым куараен кырӟазы, кырӟамзы туж кыдёке кылӥськиз (Неем. 12:27, 28, 31, 38, 40, 43). Веранэз ӧвӧл, Иегова туж шумпотыса кылзӥз, кызьы солэн ужась-тыршисьёсыз вань сюлмысьтызы сое данъяса кырӟазы.

7. Кызьы Иисус возьматӥз, Инмарлы йыбырттонын кырӟанъёс бадӟым инты басьто шуыса?

⁷ Христиан кенеш кылдэм бере но крезьгур озьы ик нимысьтыз инты басьтэ зэмос Инмарлы йыбырттонын. Кылсярысь, вань адямиос понна туж кулэ луись нунал азьын ӝытэ Иисус но солэн дышетскисьёсыз, Ӝытанэз пусъемзы бере, Иеговаез данъяса, кырӟанъёс кырӟазы. (Лыдӟы Матфейлэсь 26:30.)

8. Кызьы нырысетӥ христианъёс Инмарлы йыбырттонын кырӟанъёсты уже кутӥзы?

⁸ Нырысетӥ христианъёс пример возьматӥзы, кызьы Инмарез данъяно, ӵош кырӟанъёс кырӟаса. Ӵемысь соос огзы доры огзы люкаськылӥзы. Коркаоссы храм кадь бадӟым но чебер ӧй вал ке но, со уг люкеты вал соослы Инмарез вань сюлмысьтызы кырӟаса данъяны. Святой духлэн кивалтэмез улсын апостол Павел гожтӥз христианъёслы: «Огдэс огды псаломъёсын, кылбуранъёсын, духовной кырӟанъёсын дышетэ, визьмалэ, сюлмысьтыды Кузё-Инмарлы тау карыса кырӟалэ» (Кол. 3:16). Кырӟанъёсын книгаысьтымы кырӟанъёсты «духовной кырӟанъёс» шуыны луоз, кудъёссэ сюлмысьтымы тау карыса кырӟано. Соос но духовной сиён пӧлы пыро, кудзэ «оскиськымон, визьмо ляльчи» сётэ (Матф. 24:45).

КЫЗЬЫ ВОЗЬДАСЬКОН СЯМЕЗ ВОРМОНО

9. а) Малы куд-огъёсыз кенешлэн пумиськонъёсаз но конгрессъёсын кырӟаны возьдасько? б) Кыӵе визь-кенешъёс юрттозы Иеговаез сюлмысь данъяны но кин со пумысен милемлы пример возьматыны кулэ? (Учке статья кутсконысь туспуктэмез.)

⁹ Мар кароно, тӥляд семьяяды, эшъёсты пӧлын яке шаерады кырӟаны дышемын ӧвӧл ке? Куддыръя туж паймоно, макем быгатыса кырӟало кырӟаны дышетскем адямиос. Оло нош, тӥляд мылкыдды куашка, асьтэлэсь кырӟамдэс тодмо кырӟасьёслэн кырӟаменызы ӵошатӥськоды ке. Но со тӥледыз Иегова Инмармес кырӟаса данъямлэсь кутыны кулэ ӧвӧл. Умой кырӟан понна, йырдэс вылӥе ӝутэ, кырӟанъёсын книгадэс азяды кутэ но кырӟан сюлмысьтыды мед кисьтӥськоз! (Езд. 3:11; лыдӟы Псалтирез 146:1). Туннэ тросаз Эксэйлык юртъёсын кырӟанъёслэсь кылъёссэс экранэ потто. Со кырӟаны юрттэ. Вераны кулэ, тӧроослэн Эксэйлыклы ужан-тыршон школаязы дышетскон программае пыртэмын кырӟанъёсты кырӟан но, малы ке шуоно тӧроослы со пумысен быдэс кенешлы умой пример возьматоно.

10. Мае тодамы возёно, мукет адямиос азьын кырӟаны кышкаськомы ке?

¹⁰ Куддыръя бадӟым куараен кырӟаны милемлы люкетэ кышкан. Ми кышканы быгатомы, милям куарамы туж висъяськоз яке кырӟаммы мукетъёсызлы уз кельшы шуыса. Нош малпаське ай: ми ум быгатӥське котьку вераны сое гинэ, мар кулэ, малы ке шуоно «ваньмы асьмеос трос сьӧлыкаськомы» (Иак. 3:2). Соин сэрен ми вераськытэк ум улӥське ук! Озьыен, чебер кырӟаны ум ке быгатӥське, со люкетыны кулэ ӧвӧл Иеговаез данъяса кырӟаны.

11, 12. Кыӵе визь-кенешъёс милемлы умойгес кырӟаны юрттозы?

¹¹ Куддыръя ми кырӟаны возьдаськиськомы, малы ке шуоно ум тодӥське, кызьы кырӟано. Нош, капчи но пайдаё визь-кенешъёсты уже кутыса, луоз дышетскыны умойгес кырӟаныa.

¹² Куарамы бадӟым но кужмо кылӥське, куке ми шонер шокаськомы. Кызьы лампочка электротыллэсь ӝуатске, озьы ик милям куарамы но омырлы луыса чузъяське. Кырӟакумы, вераськыкумы кадь ик, куарамы бадӟым луыны кулэ, яке солэсь но бадӟымгес. Шонер шоканы дышетскон понна, тани мар карыны луоз. Шонер султэ, пельпумъёстэс вӧлъялэ, пушкады омырез кыске, со тыостылэсь улӥ люкетсэ мед тырмытоз шуыса. Нош собере пушкысьтыды омырез каллен поттэ. Пушкысьтыды омырез поттыкуды, каллен лыдъялэ. Тросгес лыдъяды ке, умойгес луоз. Озьы ик каллен шоканы тырше кырӟакуды но. Вераны кулэ, ачиз Библия ӧте шуыса Иеговалэсь ужась-тыршисьёссэ мылкыдзэс сётыса кырӟаны, яке бадӟым куараен (Пс. 32:1—3).

13. Кызьы кышкатэк кырӟаны дышетсконо?

¹³ Семьяен йыбырттонады яке вӧзады нокин ӧвӧлтэм дыръя тазьы карыса утчалэ. Быръе кырӟанъёсын книгаысь яратоно кырӟандэс. Сое бадӟым но юн куараен лыдӟе. Собере сыӵе ик бадӟым куараен но огшокчемен кырӟанлэсь чурзэ вералэ. Нош собере, сыӵе ик бадӟым куарадэс поттыса, верам чурдэс кырӟалэ (Ис. 24:14). Соку тӥ шӧдоды, куарады жингрес луиз шуыса. Солэсь кышкано но, возьдаськоно но ӧвӧл!

14. а) Мар карыны луэ на, кырӟакумы куарамы бадӟымгес мед потоз шуыса? (Учке «Кызьы умойгес кырӟаны дышетсконо» рамкаез.) б) Вералэ визь-кенешъёсты, кудъёсыз, тӥ малпамъя, тужгес но юртто бадӟым куараен кырӟаны.

¹⁴ Куарады бадӟым уз поты, тӥ ымдэс паськыт ӧд усьтэ ке. Соин ик эшшо одӥг визь-кенеш: вераськыкуды сярысь, ымдэс паськытгес усьялэ. Нош мар кароно, куарады туж ляб яке туж векчи кадь потэ ке? Тырше сӥльбыгытъёстэс лябӟытыны но дышетске ворсам ымын кырӟаны. Со понна тӥледлы ымдэс ворсано (ымдуръёстэс туж юн золтыны кулэ ӧвӧл) но «ммм-ммм-ммм...» куараез верано. Со куараез веракуды, тӥ йыр пушкады но гадь пушкады дырекъямез шӧдыны кулэ. Озьы ик мур шоканы вунэтоно ӧвӧл.

ИЕГОВАЕЗ ДАНЪЯСА ВАНЬ СЮЛМЫСЬТЫДЫ КЫРӞАЛЭ

15. а) Мар сярысь ялэмын вал 2016-тӥ арын нимысьтыз пумиськонын? б) Вералэ куд-ог мугъёсты, малы поттэмын вал кырӟанъёсын выль книга.

¹⁵ 2016-тӥ арын Иеговалэн Адӟись-Ивортӥсьёсызлэн нимысьтыз пумиськоназы, кудӥз котькуд ар коньывуон толэзе ортчытӥське, тунсыко ялон лэсьтэмын вал. Стивен Летт вын-агай ялӥз, ӝоген христиан пумиськонъёсамы кырӟанъёсын выль книгаез уже кутомы шуыса, кудӥз нимаське «Иеговалы шумпотыса кырӟалэ». Летт вын-агай верамъя, одӥгез муг, малы кырӟанъёсын выль книга поттэмын вал,— со англи кылын выльысь эскерыса поттэм «Выль дуннелэн берыктэмез». Кырӟанъёслэсь кылъёссэс выльысь эскероно вал но куштоно вал со кылъёсты, кудъёсыз 2013-тӥ арын поттэм Библиын уг пумисько ни. Кырӟанъёсын выль книгае озьы ик пыризы тодытон уж сярысь но дун сётон понна тау каронмы сярысь выль кырӟанъёс. Со сяна, Иеговалы йыбырттонын кырӟанлы бадӟым саклык висъяське бере, Кивалтӥсь кенеш малпаз поттыны кырӟанъёсын книгаез, кудӥзлэн вылбамыз выльысь эскерыса поттэм Библиослэн кадь юн луысал.

16, 17. Мар воштэмын вал кырӟанъёсын книгаын?

¹⁶ Ӝоггес шедьтон понна, кырӟанъёс «Иеговалы шумпотыса кырӟалэ» кырӟанъёсын книгаын темаосъя радъямын. Кылсярысь, нырысетӥ 12 кырӟанъёс Иеговалы сӥземын, мукетъёсыз 8 кырӟанъёс — Иисуслы но дун сётонлы. Соин вын-агайёс, кылсярысь, речьсылы капчиен кырӟан бырйыны быгато.

¹⁷ Кырӟанъёс сюлме мед пыӵалозы шуыса, соослэн кылъёссы воштэмын вал. Солы луыса кырӟанъёслэн пуштроссы валамонгес луиз. Озьы ик вужмем кылъёсты но воштоно вал. Малы? Малы ке шуоно пумиськонъёсамы трос выль адямиос лыктыло, озьы ик соос, кинъёс алигес Библиез дышетыны кутскизы, кудъёсызлы со кылъёс валантэм луысалзы.

18. Малы кырӟанъёсмес кырӟаны дышетсконо? (Озьы ик сноскаез но учке.)

¹⁸ «Иеговалы шумпотыса кырӟалэ» кырӟанъёсын книгаысь тросэз кырӟанъёс со вӧсяськонъёс, шуыны луоз. Соос Иеговалы сюлэммес кисьтыны луонлык сёто. Мукетъёсыз кырӟанъёс «яратыса, ӟеч ужъёс лэсьтыса улыны» мылкыдмес ӝуто (Евр. 10:24). Кырӟанъёсмылэсь гуръёссэс но кылъёссэс умой тодыны кулэ. Дорады кырӟанъёсты кырӟаны дышетске. Озьы тӥ дышоды соосты кырӟаны но вань сюлмысьтыды кырӟаны быгатоды!b

19. Кыӵе нимысьтыз инты басьтэ кырӟан Иеговалы йыбырттонын?

¹⁹ Зэм но, кырӟан Инмарлы йыбырттонамы нимысьтыз инты басьтэ. Со туж умой луонлык Иеговалы яратэммес но тау кареммес возьматыны. (Лыдӟы Исаиялэсь 12:5.) Со сяна, милям сюлмысь кырӟаммы мукетъёсызлы но возьдаськемзэс вормыны но мылысь-кыдысь кырӟаны юрттоз. Кенешын кырӟан кырӟакумы, ваньзы — егитъёс но, арлыдоос но, алигес Библиез дышетыны кутскемъёс гинэ но,— Иеговаез данъяны быгато. Соин ик сюлэммес кырӟанын кисьтыны милемлы номыр медаз люкеты. Святой духлэн кивалтэмез улсын псаломъёсты гожъясь гожтӥз: «Кузё-Инмарлы кырӟалэ!» (Пс. 95:1). Ойдолэ та ӧтёнлэсь кылзӥськомы но Инмармылы шумпотыса бадӟым куараен кырӟаломы!