Утчаськоды-а тӥ пегӟон инты Иегова дорысь?
«Аслаз ляльчиосызлэсь лулзэс Кузё-Инмар мозмытоз, Солы оскиськисьёс пӧлысь нокин но быдтэмын уз луы [«со дорысь пегӟон инты шедьтӥсьёс пӧлысь нокин но янгыше уськытэмын уз луы», ВД]» (ПС. 33:23).
1. Кыӵе шӧдонъёссы кылдыло Инмарлы оскымон ужась-тыршисьёслэн, тырбыдэстэм луэменызы сэрен?
«КУАНЕР мискинь адями мон!» (Рим. 7:24). Та кылъёсты апостол Павел ачиз сярысь вераз. Тросэзлэн Инмарлы оскымон ужась-тыршисьёслэн но сыӵе шӧдонъёссы кылдыло. Ми ваньмы тырбыдэстэмесь, но куке ми ас ужъёсынымы Иеговаез шумпоттыны ум быгатӥське, ми асьмеды номырлы ярасьтэм луиськомы шуыса малпаны быгатомы. Куд-ог христианъёс, секыт сьӧлыкамзы бере, куддыръя малпало, Инмар соосты ноку но простить уз кары шуыса.
2. а) Кызьы Псалтирь 33:23 возьматэ, Инмарлэн уг поты, солэн ужась-тыршисьёсыз асьсэды ялан янгыше мед уськытозы шуыса? б) Мае ми эскеромы таяз статьяын? (Учке озьы ик «Пайда вайись урокъёс яке пророческой образъёс?» рамкаез.)
2 Библиысь ми тодӥськомы, соослэн, кинъёс Иегова дорысь пегӟон инты шедьтӥзы, асьсэды ялан янгыше уськытыны мугзы ӧвӧл шуыса. (Лыдӟы Псалтирез 33:23.) Мар кароно, Иегова дорысь пегӟон инты шедьтон понна? Кыӵе вамышъёс лэсьтоно, Инмар милемыз мед гажалоз-жалялоз но простить мед кароз шуыса? Та юанъёслы валэктонъёс ми шедьтомы, ватӥськон-пегӟон городъёс сярысь законэз эскерыса, кудӥз израиль калыклы вашкала дыръя сётэмын вал. Тӥ малпалоды, дыр: «Ватӥськон-пегӟон городъёс сярысь косон Моисейлэн законэзлэн люкетэз вал. Нош Законлэн тупанкылыз а. э. 33-тӥ арын Витьтонэтӥ Нуналэ воштэмын вал ук!» Соку тодамы ваёно, Законэз Иегова сётӥз шуыса. Соин ик, ватӥськон-пегӟон городъёс сярысь верамез эскерыса, ми троссэ тодыны быгатомы со сярысь, кызьы Иегова учке сьӧлык шоры, сьӧлыкасьёс шоры но ӧпкелён шоры. Нырысь ойдолэ тодамы ваёмы, малы со городъёс кулэ вал.
«АСЬТЭ ДОРЫ ВАТӤСЬКОН-ПЕГӞОН ГОРОДЪЁС ЛЭСЬТЭ»
3. Мар кароно вал израиль калыклы, кин ке но адямиез юри вие вал ке?
3 Вашкала Израильын котькуд адями виёнэз Иегова туж секыт сьӧлыкен лыдъя вал. Кин ке но адямиез юри вие ке, соку «вир понна пунэм берыктӥсь» — вием муртлэн матысь ӵыжы-выжыез, пиосмурт,— виись муртэ ассэ виыны кулэ вал (Лыд. 35:19). Озьы, аслэсьтыз улонзэ сётыса, виись мурт виемез понна пунэмзэ берыктыны быгатэ вал. Ӝегатскытэк пунэмзэ берыктон Сӥзем музъемез саптанлэсь уте вал, малы ке шуоно Иегова косӥз: «Улоно музъемдэс эн сапталэ, уго [кисьтэм адями] вир сапта музъемез» (Лыд. 35:33, 34).
4. Мар кароно вал адямилы, кудӥз мукетсэ янгышен вииз?
4 Нош мар кароно вал, адями мукетсэ янгышен вие ке? Законъя, янгыштэм вирез кисьтэмез понна, со кыл кутыны кулэ вал (Ул.-выл. 9:5). Но гажась-жалясь луэменыз, Иегова солы луонлык сётӥз кисьтэм вир понна пунэмзэ берыктӥсьлэсь пегӟыны но куать ватӥськон-пегӟон городъёс пӧлысь одӥгаз ватскыны. Вир кисьтӥсьлы со городын, быдӟым священник кулытозь, улоно вал (Лыд. 35:15, 28).
5. Малы, ватӥськон-пегӟон городъёс сярысь законэз эскерыса, ми тросгес тодыны быгатомы Иегова сярысь?
5 Ватӥськон-пегӟон городъёс адямиосын малпамын ӧй вал. Иегова Иисус Навинэз косӥз: «Израиль пиослы тазьы шу: „Асьтэ доры ватӥськон-пегӟон городъёс лэсьтэ“». Со городъёсты Иегова ачиз висъяз (Иис. Н. 20:1, 2, 7, 8). Соосты Иегова ачиз бырйиз бере, ватӥськон-пегӟон городъёс сярысь законэз эскерыса, ми тросгес тодыны быгатомы Инмарлэн гажан-жалянэз сярысь. Озьы ик ми тодомы, кызьы туннэ Иегова дорысь пегӟон инты утчаны луэ.
ТӦРООСЛЫ «АСЛАЗ ТА УЖЕЗ СЯРЫСЬ КЫЛӤСЬКЫМОН МЕД ВЕРАЛОЗ»
6, 7. а) Кызьы тӧроос янгышен адями виён ужез чаклало-эскеро вал? (Учке статья кутсконысь суредэз.) б) Малы адями виисьлы тӧроослы вазиськоно вал?
6 Адями кинэ ке янгышен вие ке, солы ватӥськон-пегӟон городэ пегӟоно но «городлэн тӧроосызлы аслаз та ужез сярысь кылӥськымон» верано вал. Со бере виисьлы отын улон инты сёто вал (Иис. Н. 20:4). Кӧня ке дыр ортчыса, сое ысто вал городэ, кытын со адямиез вииз, но отысь тӧроос солэсь ужзэ чакланы-эскерыны кулэ вал. (Лыдӟы Лыдпусъёсты 35:24, 25.) Сьӧлык лэсьтэм мурт ватӥськон-пегӟон городэ берытскыны быгатэ вал соку гинэ, куке тӧроос ужпум куто вал, со адямиез янгышен вииз шуыса.
7 Малы солэсь ужзэ тӧроос чакланы-эскерыны кулэ вал? Соос Израиль калыклы Инмарлэн син азяз чылкыт луыны юртто вал. Со сяна, Иегова адями виисез гажаны-жаляны быгатэ вал соку гинэ, куке со тӧроосын вераськиз. Библиез эскерись одӥг тодосчи гожтӥз, адями виись тӧроослы уг вазиськы ке, солэн улонэзлы кышкытлык кылдэ вал шуыса. Со тодосчи ватсаз на: «Адями виисез ассэ виизы ке, со ачиз янгыш, малы ке шуоно ӧз утча пегӟон интыез, кудзэ сётэ Инмар». Адями, кудӥз янгышен кинэ ке вииз, утиськыны быгатэ вал. Но со понна солы юрттэт курыса вазиськоно но сётэм визь-кенешъёслэсь кылзӥськоно вал. Солы ватӥськон-пегӟон городэ ватсконо вал, малы ке шуоно вием муртлэн матысь ӵыжы-выжыез сое виыны быгатысал.
8, 9. Малы секыт сьӧлыкам христианъёслы тӧроослэсь юрттэт куроно?
8 Секыт сьӧлыкам христианъёслы но тӧроослы вазиськоно. Малы со кулэ? Нырысетӥез муг — Иегова ачиз косӥз тӧроосты та выллем учыръёсты эскерыны (Иак. 5:14—16). Кыкетӥез муг — тӧроос сьӧлыкамъёслы юртто Инмарен кусыпъёссэс тупатыны но лэсьтэм янгышъёссэс выльысь лэсьтытэк улыны (Гал. 6:1; Евр. 12:11). Куинетӥез муг — тӧроос со тодӥсь-валась но дышетэм вын-агайёс, кудъёсыз тодо, кызьы ӧпкелись адямилы юрттоно но солэсь сюлэмшугъяськонъёссэ капчиятоно. Иегова со пиосмуртъёсты «жобаськись куазьлэсь утись шобыретэн» ӵошатӥз (Ис. 32:1, 2). Зэмзэ ик, тӧроос — со гажась-жалясь Иегова Инмармылэн кузьымез!
9 Тросэз Инмарлэн ужась-тыршисьёсыз буйгатскизы, куке тӧроослы юрттэт курыса вазиськизы. Тани мар луиз Дэниел нимо вын-агаен. Со секыт сьӧлыказ но кӧня ке толэзь ӵоже сьӧлыкез сярысь тӧроослы вераны кышкаса улӥз. «Сомында дыр ортчиз бере,— шуэ Дэниел,— мон малпасько ни вал, тӧроос мыным номырин но юрттыны уз быгатэ шуыса. Озьы ке но, мынам нокызьы буйгатскеме ӧз луы. Мон ялан малпаськисько вал: ку меда мыным лэсьтэм янгыше понна кыл кутоно луоз. Вӧсяськыкум мон котьку нырысь Иеговалэсь прощенизэ курисько вал». Дыр ортчыса, Дэниел мынӥз тӧроос доры но ваньзэ вераз. «Зэмзэ верано ке, соос доры мыныны но сьӧлыкаме сярысь вераны капчи ӧй вал,— шуэ со.— Но соосын вераськеме бере пельпумысьтым секыт из усиз кадь! Табере мон возьдаськытэк Иеговалы вӧсяськыны быгатӥсько». Али Дэниеллэн возьытлыкез чылкыт, но кемалась ӧвӧл сое кенешлы юрттӥсь каризы.
СОЛЫ «ОДӤГАЗ ТА ГОРОДЪЁС ПӦЛЫ» ПЕГӞЫНЫ КУЛЭ
10. Мар кароно вал адямилы, кудӥз мукет адямиез янгышен вииз, солэн потэ вал ке, сое мед гажалозы-жалялозы шуыса?
10 Адямилы, кудӥз мукет адямиез янгышен вииз, соку ик мар ке но кароно вал. Солы бызьыса кошконо вал матысяз ватӥськон-пегӟон городэ. Соку гинэ со оскыны быгатэ вал, сое гажалозы-жалялозы шуыса. (Лыдӟы Иисус Навинлэсь 20:4.) Сыӵе югдуре шедем мурт тэк уз пукы: солэн улонэзлы кышкытлык кылдӥз ук! Солы ӝоггес ватӥськон-пегӟон городэ вуоно но отын улоно вал. Утиськыны тыршыса, со адямилы троссэ кельтоно вал: корказэ, ужъёссэ, пӧртэм интыостӥ ветлыны луонлыксэ — ваньмыз со, быдӟым священник кулытозь (Лыд. 35:25)a. Но сое сокем бадӟым дун шуыны уз луы. Ватӥськон-пегӟон городысь кошкыса, адями виись возьматысал, вир кисьтэмез понна со уг куректы шуыса. Сыӵе учыре со аслаз улонэзлы кышкытлык вайысал.
11. Мар кароно ӧпкелись христиан муртлы, солэн возьматэмез потэ ке, со Инмарлэсь гажам-жалямзэ дунъя шуыса?
11 Озьы ик туннэ но: адями янгышаз, собере ӧпкелиз, но солэн потэ ке, Инмар сое мед гажалоз-жалялоз шуыса, солы одно ик мар ке но кароно. Солы кельтоно сьӧлыко сюрессэ, яке «пегӟоно» секыт сьӧлыкъёслэсь но ваньмызлэсь, мар сьӧлыке вуттыны быгатоз. Апостол Павел гожтӥз со сярысь, мар каризы Коринфысь христианъёс, кудъёсыз азьвыл лэсьтэм янгышъёсынызы сэрен туж ӧпкелизы. Тани солэн кылъёсыз: «Инмар понна ӝоже усёнды тӥ пушкын кыӵе тыршон, кыӵе шонере потон, кыӵе вожпотон, кыӵе кышкан, кыӵе мӧзмон, кыӵе сюлмаськон, урод ужъёс понна кыӵе кылзэс юан вордӥськытӥз!» (2 Кор. 7:10, 11). Ми лэсьтӥськомы ке ваньзэ, мае быгатӥськомы, выльысь сыӵе ик янгышъёс медам лэсьтэ ни шуыса, ми Иеговалы возьматӥськомы, сюлмысь ӧпкелиськомы но ум возьмаське, со милемыз ялан прощать кароз шуыса.
12. Малэсь куштӥськоно луоз, вылды, христиан муртлы, Иегова сое азьланяз но мед гажалоз-жалялоз шуыса?
12 Малэсь куштӥськоно луоз, вылды, христиан муртлы, Инмар сое азьланяз но мед гажалоз-жалялоз шуыса? Солы дась луоно куштӥськыны ваньмызлэсь, мар сое сьӧлыке кыскыны быгатоз, со солы туж дуно потэ ке но (Матф. 18:8, 9). Кылсярысь, кин ке но эшъёсты пӧлысь ӵектэ тӥледлы лэсьтыны сое, мар Иеговалы уг яра, дугдоды-а тӥ соин эшъяськемысь? Яке вина юонын эсэпсэ ке уд валаське, палэнскоды-а тӥ югдуръёслэсь, кудъёсаз трос юэмды потоз? Нош азон-калгон мылкыдын нюръяськиськоды ке, тыршоды-а тӥ палэнскыны фильмъёслэсь, сайтъёслэсь яке ужъёслэсь, кудъёсызлы луыса шонертэм малпанъёс кылдыны быгато? Тодады возе: Инмарлы оскымон кылён понна, малэсь ке куштӥськиськомы ке, со юнме ӧвӧл. Самой кышкытэз — со валаны, Иегова тынэсьтыд берытскиз шуыса. Но со дыре ик самой шумпотымонэз — со пырак дауръёс ӵоже Иеговалэсь гажам-жалямзэ, яке оскиськымон яратонзэ, шӧдыны (Ис. 54:7, 8).
«ТА ГОРОДЪЁС ТӤЛЕДЛЫ ВАТӤСЬКОН-ПЕГӞОН ИНТЫ МЕД ЛУОЗЫ»
13. Малы ватӥськон-пегӟон городын кышкатэк но шумпотыса улыны луэ вал?
13 Ватӥськон-пегӟон городэ пегӟем мурт ассэ кышкыттэм интыын кадь шӧдыны быгатэ вал, малы ке шуоно Иегова вераз: «Та городъёс тӥледлы ватӥськон-пегӟон инты мед луозы» (Иис. Н. 20:2, 3). Иеговалэн уг поты вал, адями виисез со йыружез понна ик выльысь мед судъялозы шуыса. Озьы ик со ӧз лэзьы вир понна пунэм берыктӥсьлы со городэ пырыны но адями виись муртэ ассэ виыны. Соин ик адями виись со городын кышкатэк улыны быгатӥз. Отын со Иеговалэн бурд улаз кадь улӥз. Ватӥськон-пегӟон город тюрьма ӧй вал. Отын адями, нокинлэсь кышкатэк, быгатэ вал ужаны, мукетъёсызлы юрттыны но Иеговалы ужаны-тыршыны. Ватӥськон-пегӟон городын шумпотыса но шудо улыны луэ вал!
Оске, Иегова мылысь-кыдысь прощать каре шуыса (Учке 14—16-тӥ абзацъёсты.)
14. Малы оскыны быгато соос, кинъёс секыт сьӧлыказы, нош собере ӧпкелизы?
14 Куддыръя христианъёс, кудъёсыз секыт сьӧлыказы, нош собере ӧпкелизы, асьсэды ялан янгыше уськыто. Соос малпаны быгато, Иеговалэн син азяз соос котьку сьӧлыкоесь луозы шуыса. Тӥ но озьы ик малпаськоды ке, тодады возе: Иегова мылысь-кыдысь тӥледыз простить кариз, соин ик тӥледлы номырлэсь кышканы. Сое ас вылаз шӧдӥз Дэниел, кудӥз сярысь азьлогес вераськон мынӥз. Тӧроос юрттӥзы солы тупатскыны но Инмарлэн син азяз чылкыт луыны. Дэниел вера: «Мон нырысьсэ капчиен шокчи. Куке мон лэсьтӥ ваньзэ, мае куре Инмар, возьытлыке монэ ӧз йырйы ни. Мынам сьӧлыке быдэсак куштэмын. Кызьы Иегова вераз вал, со секыт ныпъетмес басьтэ но сокем кыдёке нуэ, ми сое ноку но ум адӟе ни». Ватӥськон-пегӟон городэ пегӟем мурт вир понна пунэм берыктӥсьлэсь кышкатэк улыны быгатэ вал. Озьы ик ми сярысь но вераны луоз: Иегова сьӧлыкмес куштӥз ке, кышкано ӧвӧл, милемыз кыл кутытон понна яке сьӧлыкмес тодамы вайытон понна, со тупась учырез возьма шуыса. (Лыдӟы Псалтирез 102:8—12.)
15, 16. Малы Иисуслэн сьӧлыклэсь Мозмытӥсь но Быдӟым священник луэмез оскытэ, Иегова милемыз гажалоз-жалялоз шуыса?
15 Вашкала израиль калыкен ӵошатоно ке, милям тросгес мугъёсмы вань оскыны, Иегова гажась-жалясь луэ шуыса. Иеговалэсь котьма ласянь кылзӥськыны быгатымтэеныз сэрен, апостол Павел, кӧтыз куректыса, вераз: «Инмарелы тау карисько — сое Со Кузё-Инмармы Иисус Христос пыр лэсьтӥз» (Рим. 7:25). Павел нюръяськиз ке но сьӧлыко мыл потонъёсыныз но ӧпкелем сьӧлыкъёсыз понна ассэ янгыше уськытонэн, со оске вал, Инмар сое «Иисус Христос пыр» простить кариз шуыса. Иисуслы, сьӧлыклэсь Мозмытӥсьмылы, луыса, милям возьытлыкмы чылкыт луэ но сюлэммы буйгатске (Евр. 9:13, 14). Нош Христос милям Быдӟым священникмы луэ бере, «Со Ачиз пыр Инмар доры лыктӥсьёсты котьку но утьыны быгатэ. Со котьку но улэп бере, соос понна Со дурбасьтэ» (Евр. 7:24, 25). Вашкала Израильын быдӟым священниклэн ужамез-тыршемез оскытэ вал калыкез, со простить каремын луыны быгатэ шуыса. Нош Быдӟым священниклэн, Иисус Христослэн, ужамезлы-тыршемезлы луыса, милям эшшо но трос мугъёсмы вань оскыны, Иегова милемыз гажалоз-жалялоз но ӟечлыксэ возьматоз шуыса (Евр. 4:15, 16).
16 Соин ик, Иегова дорысь пегӟон инты шедьтон понна, Христослэн мозмытӥсь курбонэзлы осконо. Но со курбон туж трос адямиос понна сётэмын вал шуыса тодыны гинэ, тырмыт ӧвӧл. Оске, Иисус тӥ понна кулӥз шуыса (Гал. 2:19б—21). Оске, мозмытӥсь курбон сётэмын вал бере, Инмар тӥлесьтыд но сьӧлыкъёстэс куштыны быгатоз шуыса. Оске, дун сётонлы луыса, тӥляд пырак улыны осконды кылдӥз шуыса. Христослэн курбонэз — со Иеговалэн кузьымез, кудзэ со тӥледлы кузьмаз.
17. Малы Иегова дорысь пегӟон инты утчанлэсь номыр умоез ӧвӧл ни?
17 Ватӥськон-пегӟон городъёс сярысь закон туж умой возьматэ, Инмар гажась-жалясь луэ шуыса. Та закон возьматэ, Инмарлэн син азяз улон святой луэ шуыса. Озьы ик со законысь ми тодӥськомы, кызьы тӧроос милемлы юрттыны быгато но мар со сыӵе сюлмысь ӧпкелён. Со сяна, со закон оскытэ милемыз, Иегова мылысь-кыдысь прощать каре шуыса. Утчаськоды-а тӥ пегӟон инты Иегова дорысь? Солэн бурд улаз улонлэсь номыр но умоез ӧвӧл ни! (Пс. 90:1, 2). Мукетаз статьяын ми эскеромы, кызьы ватӥськон-пегӟон городъёс сярысь закон юрттэ милемлы Иеговалэсь адӟем карыны но шонерлыко но гажась-жалясь луыны.
a Кызьы гожтэмын иудаизмъя куд-ог справочникъёсын, янгышен адями виись муртлэн ӵыжы-выжыосыз но со доры ватӥськон-пегӟон городэ улыны интыясько вал, вылды.