Шонерлыко но гажась-жалясь Иегова Инмарлэсь адӟем каре

1, 2. а) Кызьы Иисус Инмарлэн Законэз шоры учке вал? б) Кызьы книга тодӥсьёс но фарисейёс Законзэ шонертэм быдэсъяло вал?

ИИСУС Моисейлэсь законзэ яратэ вал. Со паймымон ӧвӧл, малы ке шуоно Законэз сётӥз солэн инмысь Атаез, Иегова, кудӥныз кусыпъёсыз солы котьмалэсь но дуно вал. Иисус Инмарлэсь законзэ вань сюлмысьтыз яратоз шуыса, азьло ик верамын вал Псалтирьын 39:9. Отын гожтэмын: «Инмаре, мынам Тынэсьтыд эриктэ быдэсъяса улэме потэ, Тынад законэд мынам сюлмам». Аслаз кылъёсыныз но ужъёсыныз Иисус возьматӥз, Закон котьма ласянь шонер луэ, со адямиослы пайда ваён понна сётэмын но ваньмыз, мар отын гожтэмын, быдэстэмын луоз шуыса (Матф. 5:17—19).

² Иисуслэн сюлмыз туж вӧсь луэ вал, дыр, адӟыса, кызьы книга тодӥсьёс но фарисейёс Атаезлэсь Законзэ шонертэм быдэсъяло. Соос Законлэсь одӥг пичи люкетсэ но быдэстытэк уг кельто вал. Иисус сое адӟе вал, соин ик со вераз: «Бутниклэсь, анислэсь, калямперлэсь дасэтӥ люкетсэ сётӥськоды». Нош кыӵе янгышсы вал соослэн? Иисус валэктӥз: «Законлэсь туж бадӟымзэ — шонер судзэ, гажан-жалянэз но осконэз — палэнтӥды» (Матф. 23:23). Иисус, асьсэды умоен лыдъясь фарисейёс кадь ӧз улы, со Законлэсь пуштроссэ умой вала вал: со адӟе вал Законлэн котькуд курон-косонысьтыз, кыӵе сямъёсыз Инмарлэн.

3. Мае ми эскеромы та статьяын?

³ Христианъёслы Законлэн тупанкылызъя улоно ӧвӧл (Рим. 7:6). Озьы ке но, Иегова со Законэз аслаз Кылаз, Библие, гожтӥз. Со сое ӧз гожты, ми сое пыр-поч дышетонэ йырын валче мед выёмы шуыса. Солэн потэ вал, ми «туж бадӟымзэ» валаны мед тыршомы шуыса: вылӥ возетъёссэ валаломы, кудъёсыз Законлы инъет луизы, но соосъя мед уломы. Нош малы милемыз дышетыны быгатэ ватӥськон-пегӟон городъёс сярысь закон? Талэсь азьло статьяысь ми тодӥмы, мар кароно вал пегӟись адямилы, но вераськимы, малы со милемыз дышетэ. Озьы ик ватӥськон-пегӟон городъёс сярысь закон юрттэ милемлы троссэ тодыны Иегова сярысь но со сярысь, кызьы ми солэсь адӟем карыны быгатӥськомы. Таисьтыз статьяысь ми куинь юанъёслы валэктонъёс шедьтомы: малы ватӥськон-пегӟон городъёс сярысь закон Иеговалэн гажан-жалянэз сярысь вера? Мае ми отысь тодӥськомы со сярысь, кызьы Инмар улон шоры учке? Кызьы та законысь адӟиське, Иегова шонерлыко луэ шуыса? Котькуд юан вылын малпаське но тырше валаны, кыӵе удысын тӥ инмысь Атаймылэсь адӟем карысалды. (Лыдӟы Ефесъёслы 5:1.)

ВАТӤСЬКОН-ПЕГӞОН ГОРОДЪЁСЛЭН ИНТЫЯСЬКЕМЗЫ

4, 5. а) Малы Иеговалэн потэ вал, ватӥськон-пегӟон городъёсы вуыны капчи мед луоз шуыса? Мар каремын вал со понна? б) Мар вера со милемлы Иегова сярысь?

⁴ Ватӥськон-пегӟон городъёсы вуыны капчи вал. Иегова косӥз, Израильын куать сыӵе городъёс мед луозы шуыса — Иорданлэн сопалаз но тапалаз быдэн куинь. Малы? Котькуд адями, кудӥз янгышен мукетсэ вииз, ӝог но капчиен матысь ватӥськон-пегӟон городэз шедьтыны мед быгатоз шуыса (Лыд. 35:11—14). Со городъёсы нуись сюресъёсты котьку тупатъяса возизы (К. Зак. 19:3). Одӥг иудей справочник верамъя, ватӥськон-пегӟон городъёсы нуись сюрес кузя сюрес возьматӥсь знакъёс пуктылэмын вал. Ватӥськон-пегӟон городъёс ӧй луысалзы ке, янгышен адями виись муртлы мукет шаере пегӟоно луысал, кытын со осконэзлэсь куштӥськыны быгатысал.

⁵ Малпалэ гинэ: Иегова, кудӥз адямиез юри виись муртэ виыны косэ вал, сюлмаськиз соос сярысь, кинъёс янгышен адямиез виизы! Соос оскыны быгато вал, соосты гажалозы-жалялозы но утёзы шуыса. «Ваньмыз лэсьтэмын вал сокем валамон, огшоры но капчи, макем луэ вал лэсьтыны,— гожтӥз Библиез эскерись одӥг тодосчи.— Со зэмзэ ик Инмарлэн гажан-жалянэз». Иегова сюлэмтэм судья ӧвӧл, кудӥз аслэсьтыз ужась-тыршисьёссэ кыл кутытон дырез возьмаса гинэ улэ. Со «гажан-жалянэн узыр Инмар» (Еф. 2:4).

6. Луоз-а вераны, фарисейёс гажась-жалясь Иегова Инмарлэсь адӟем каризы шуыса? Валэктэ.

⁶ Фарисейёс гажаны-жаляны ӧз дыртэ. Кылсярысь, одӥг иудей сямъя, соос простить уг каро вал адямиез, кудӥз одӥг янгышез куинь поллэсь тросгес лэсьтӥз. Иисус соослэн янгышсы шоры возьматӥз, фарисей но выт бичась сярысь мадён вераса. Фарисей вӧсяськиз: «Инмаре! Тыныд тау карисько мон сыӵе ӧвӧлысь, кыӵеесь луо мукет муртъёс — адями таласьёс, ултӥясьёс, азыса-калгыса улӥсьёс яке тани та выт бичась кадь». Нош со дыре выт бичась, синзэ но инме ӝутыны дӥсьтытэк, Инмарез сое гажаны-жаляны куриз. Малы фарисейёслэн гажан-жалян сямзы ӧй вал? Малы ке шуоно, Библия верамъя, соос «мукетъёссэ ултӥяса» улӥзы (Лука 18:9—14).

7, 8. а) Кызьы Иеговалэсь адӟем карыны луоз, куке кин ке милемлы пумит сьӧлыка? б) Малы вераны луоз, милесьтым прощение курыкузы, милям зӥбыт-востэм сяммы эскериське шуыса?

⁷ Фарисейёслэсь адӟем эн каре, Иеговалэсь адӟем каре. Ог-огдэс жалялэ. (Лыдӟы Ефесъёслы 4:32.) Кылсярысь, малпаське соос сярысь, кинъёс тӥлесьтыд прощение курыны малпало (Лука 17:3, 4). Юалэ асьтэлэсь: «Мукетъёссэ капчиен но мылы потыса простить карисько-а, соос монэ трос пол ӝоже уськытъязы ини ке но? Мылысь-кыдысь-а мон кусыпъёсме тупатӥсько монэ ӝоже уськытӥсь адямиосын?»

⁸ Милесьтым прощение курыкузы, милям зӥбыт-востэм сяммы эскериське, шуыны луоз. Фарисейёс сыӵе эскеронэз ӧз чидалэ, малы ке шуоно асьсэды мукетъёсызлэсь умоесьгес луо шуыса лыдъязы. Нош христианъёслы зӥбыт-востэм луоно, мукетъёсыз соослэсь умойгес луо шуыса лыдъяно но мылысь-кыдысь соосты прощать кароно (Флп. 2:3). Умой луоз юаны аслэсьтыд: «Мон Иеговалэсь адӟем карисько-а? Возьматӥсько-а мон зӥбыт-востэм луэмме?» Ми зӥбыт-востэмесь ке, соку капчи луоз мукетъёсызлы милесьтым прощение курыны, нош милемлы соосты прощать карыны. Кӧттэс ӝож карыны эн дыртэ но ӝоггес кусыпъёстэс тупатыны тырше (Екк. 7:8, 9).

ДУНЪЯЛЭ АДЯМИЛЭСЬ УЛОНЗЭ

9. Кызьы Иегова израиль пиослы валаны юрттэ вал, макем святой луэ адямилэн улонэз?

⁹ Ватӥськон-пегӟон городъёс нырысь ик тупатэмын вал, Израиль калыклы валаны юрттон понна, улон святой луэ шуыса (К. Зак. 19:10). Иегова туж дунъя улонэз но адӟемпотостэм каре киосты, кудъёсыз «янгыштэм вирез кисьто» (Мад. 6:16, 17). Со шонерлыко но святой Инмар, соин ик янгышен виён шоры но со синзэ уг ворса вал. Шӧдтэк шорысь адями виись луэм муртэ гажало-жаляло вал ке но, луэмез сярысь солы тӧроослы верано вал. Тӧроос ужпум куто вал ке, со адями мукетсэ янгышен вииз шуыса, солы ватӥськон-пегӟон городын улоно вал, быдӟым священник кулытозь, куддыръя ачиз кулытозь но. Ваньмыз со израиль пиослы валаны юрттэ вал, макем святой луэ адямилэн улонэз. Соослэн данъямзы потэ вал ке Инмарез, кудӥз ваньмызлы улон кузьмаз, соослы чаклано вал, мар ке каремзы яке номыр карытэк улэмзы матысь адямиоссылы кышкытлык медаз кылдыты шуыса.

10. Кызьы Иисус возьматӥз, книга тодӥсьёс но фарисейёс мукет адямиослэн улонзы сярысь чик ӧз сюлмаське шуыса?

¹⁰ Иеговаен ӵошатоно ке, книга тодӥсьёс но фарисейёс мукет адямиослэсь улонзэс чик ӧз дунъялэ. Кытысь со адӟиське? Иисус соослы шуиз: «Тодон-валанлэсь усьтонзэ тӥ басьтӥды: асьтэос но ӧд пыре, пырисьёслы но люкетӥды» (Лука 11:52). Со адямиос мукетъёсызлы Инмарлэсь Кылзэ валэктыны кулэ вал но юрттыны соослы пырак улонэ нуись сюрестӥ мыныны. Со интые, соос адямиосты Иисус дорысь, Кузёйыр дорысь, палэнэ нуо вал (Ап. уж. 5:31). Соосын возьматэм сюрес пыраклы быдтонэ нуись сюрес вал. Вылтӥяськись книга тодӥсьёс но фарисейёс асьсэ сярысь гинэ малпаськизы, нош мукетъёсызлэн улонзы соослы нокыӵе ик ӧз поты. Макем жалясьтэм но сюлэмтэм луэмзэс соос возьматӥзы!

11. а) Кызьы апостол Павел Иеговалэсь адӟем кариз, кудӥз улонэз дунъя? б) Мар юрттоз милемлы Павел кадь мылысь-кыдысь тодытыны?

¹¹ Кызьы милемлы Иеговалэсь адӟем кароно но книга тодӥсьёс но фарисейёс кадь луоно ӧвӧл? Адямилэсь улонзэ дунъяно но апостол Павеллэсь адӟем кароно, кудӥз мылысь-кыдысь ӟеч иворез вераса ветлӥз. Со чылкыт сюлмын вераны быгатэ вал: «Быронэ мынӥсьёслэн азьпал адӟонзы понна мон янгыш ӧвӧл». (Лыдӟы Апостолъёслэсь ужъёссэс 20:26, 27.) Но Павел, возьытлыкез но Иегова косэмен гинэ, ӧз тодыты. Со адямиосты яратӥз но соослэсь улонзэс дунъяз (1 Кор. 9:19—23). Милемлы но адямилэн улонэз шоры Иегова кадь учконо, кудӥзлэн потэ, «ваньмыз ӧпкельыса сьӧлыкъёсызлэсь мед куштӥськоз шуыса» (2 Пётр 3:9). Нош тӥляд потэ-а? Тырше гажаны-жаляны соосты, кинъёслы ӟеч иворез вераськоды. Соку тӥляд ӟеч иворез эшшо но мылысь-кыдысь верамды потоз, дыр, нош со тӥлесьтыд сюлэмдэс шумпотонэн тыр кароз.

12. Малы Инмарлэн ужась-тыршисьёсызлы туж кылзӥськоно визь-кенешъёслэсь, кудъёсыз улонэз утён понна сётэмын?

¹² Со сяна, ми Иегова кадь улонэз дунъяськомы ке, палэнскомы ваньмызлэсь, мар улонмылы кышкытлык вайыны быгатэ. Милемлы машинаез туж чакласькыса нуллоно но улонмес утён понна сётэм визь-кенешъёслэсь кылзӥськоно. Сое тодамы возёно христиан пумиськонэ мыныкумы но, Инмарлы йыбырттон понна юртъёсты пуктонэ но соосты эскерон-тупатъянэ пыриськыкумы но. Тросгес уж лэсьтон понна, ӧжытгес коньдон быдтон понна но дырыз дыръя ужез быдэстон понна, тазалыкмы сярысь вунэтоно ӧвӧл. Инмармы котьку лэсьтэ сое, мар шонер луэ. Милям солэсь адӟем кареммы потэ. Асьсэлэн улонзылы но котырысьтызы адямиослэн улонзылы номыр кышкытлык медаз вайы шуыса, тужгес но тӧроослы тодазы возёно (Мад. 22:3). Тӧро тодады вайытэ ке визь-кенешъёсты, кудъёсыз улонэз утьыны юртто, одно ик кылзӥське солэсь (Гал. 6:1). Учке адямилэн улонэз шоры Иегова сямен, вир кисьтонын янгыш медад луэ шуыса.

«ТА ПУКТОН-КОСОНЪЁС ВЫЛЭ ПЫКИСЬКЫСА... ЧАКЛАНЫ-ЭСКЕРЫНЫ КУЛЭ»

13, 14. Кызьы израиль тӧроос шонерлыко Иегова Инмарлэсь адӟем карыны быгато вал?

¹³ Иегова израиль тӧроосты калыкез шонерлыко судъяны косӥз, аслаз вылӥ эсэпъёсызъя. Нырысь соослы ваньзэ пыр-поч чаклано-эскероно вал. Собере соослы умой-умой валаны тыршоно вал, малы со адями вииз, валаны солэсь мылкыдзэ, лыдэ басьтыны сое, кызьы со адями азьвыл улӥз, но ужпум кутыны, луоз-а сое гажаны-жаляны шуыса. Инмарлэсь шонерлыко эсэпъёссэ лыдэ басьтыса, соослы ужпум кутоно вал, адями виись «синазькыль карыса» яке «урод малпаса» вииз-а, яке ӧз-а. (Лыдӟы Лыдпусъёсты 35:20—24.) Со ужез адӟисьёс вал ке, кык яке солэсь тросгес адями вераны кулэ, адями янгышен виемын ӧй вал шуыса (Лыд. 35:30).

¹⁴ Ваньзэ пыр-поч эскерыса, тӧроослы малпаськоно ӧй вал адямилэн лэсьтэм ужез сярысь гинэ, нош малпаськоно вал ачиз адями сярысь. Соослы шӧдӥсь-валась луоно вал, яке валаны быгатоно вал, мар зэмзэ ик луиз. Инмарлэсь шӧдись-валась, гажась-жалясь но шонерлыко луэмзэ адӟем карон понна, соослы святой дух кулэ вал (Пот. 34:6, 7).

15. Вералэ, макем пӧртэм сямен учкизы фарисейёс но Иисус сьӧлыкасьёс шоры.

¹⁵ Фарисейёс адямилэн янгышезлы бадӟым саклык висъязы, нош лыдэ ӧз басьтэ сое, кыӵе со адями. Иисуслэсь Матфей доры сиськыны лыктэмзэ адӟыса, соос юазы дышетскисьёсызлэсь: «Малы тӥляд Дышетӥсьты выт бичасьёсын, сьӧлыкоосын огазьын сие-юэ?» Иисус валэктӥз: «Висисьтэмъёслы эмъясь кулэ ӧвӧл, висисьёслы кулэ. Мынэлэ, дышетскелэ, мар шуэм со: „Курбонэз кулэ уг кариськы, гажан-жалянэз кулэ карисько“? Уго Мон шонер улӥсьёсты ӧтьыны ӧй лыкты, сьӧлыкоосты ӧпкельыса сьӧлыкъёссылэсь куштӥськонэ ӧтьыны лыктӥ» (Матф. 9:9—13). Луоз-а вераны, Иисус секыт сьӧлыкъёсты шонере поттэ вал шуыса? Уз. Иисуслэн ивораз бадӟым инты басьтэ вал ӧпкельыса сьӧлыкъёслэсь куштӥськыны ӧтён (Матф. 4:17). Иисус валаз, выт бичасьёс но сьӧлыкасьёс пӧлысь куд-огезлэн воштӥськемзы потэ шуыса. Соос Матфей доры сиськыны гинэ ӧз лыктэ. Библия верамъя, отын люкаськемъёс пӧлысь тросэз Иисус сьӧры ветлӥсьёс вал (Марк 2:15). Жаляса верано луэ, тросэз фарисейёс озьы ик ӧз валалэ, мае умойзэ шедьтӥз Иисус со адямиослэсь. Фарисейёс лыдъяло вал, адямиос воштӥськыны уз быгатэ но сьӧлыкъёссылэсь уз куштӥське шуыса. Макем соос пӧртэмесь вал шонерлыко но гажась-жалясь Иеговалэсь!

16. Кыӵе ужпумез правовой комитетлэн?

¹⁶ Христиан тӧроослы адӟем кароно Иеговалэсь, кудӥз «шонерлыкез яратэ» (Пс. 36:28). Нырысь, сьӧлык лэсьтэмын вал-а, ӧй вал-а шуыса валан понна, соослы ваньзэ пыр-поч чаклано-эскероно. Сьӧлык лэсьтэмын вал ке, тӧроос со ужез, Библиысь возетъёсты санэ поныса, эскерыны кулэ (К. Зак. 13:12—14). Правовой комитетлы, со ужез сэрттыкуз-пертчыкуз, валаны тыршоно, ӧпкеле-а секыт сьӧлык лэсьтэм мурт, уг-а. Адями ӧпкеле-а, уг-а шуыса валаны котьку капчи ӧвӧл. Со понна лыдэ басьтоно сьӧлык лэсьтэм муртлэсь мылкыдзэ но сое, кызьы со лэсьтэм сьӧлыкез шоры учке, но мар солэн сюлмаз (Усьт. 3:3). Сьӧлыкам муртлы, сое мед гажалозы-жалялозы шуыса, ӧпкелёноa.

17, 18. Мар юрттоз тӧроослы сюлмысь ӧпкелемез адӟыны?

¹⁷ Иегова но Иисус адямилэсь сюлэмзэ адӟыны быгато. Нош тӧроос — уг. Тӥ тӧро ке, мар юрттоз тӥледлы валаны, зэмзэ-а адями ӧпкеле? Нырысь ик, Иеговалы вӧсяське но куре, со тӥледлы визьлыко но шӧдӥсь-валась луыны мед юрттоз шуыса (3 Экс. 3:9). Озьы ик, малпаське Инмарлэн Кылыз вылын но оскиськымон ляльчилэн визь-кенешъёсыз вылын, «Инмар понна ӝоже усёнэз», яке сюлмысь ӧпкелёнэз, «та дунне понна ӝоже усёнлэсь» висъян понна (2 Кор. 7:10, 11). Эскере, мар Библиын верамын соос сярысь, кинъёс ӧпкелизы, нош кинъёс — ӧз: кыӵе шӧдонъёссы вал соослэн? Кыӵе соослэн мылкыдзы вал? Нош ужъёссы?

¹⁸ Со сяна, адямилэн янгышез сярысь гинэ эн малпаське, малпаське адями сярысь но. Лыдэ басьтэ сое, кызьы со будэмын вал, солэсь малпанъёссэ но сое, кыӵе шуг-секытъёсын солы пумиськоно луэ. Тани мар Библиын азьло ик верамын вал Иисус сярысь, христиан кенешлэн Йырыз сярысь: «Аслаз синъёсыныз адӟыса гинэ, Со судить уз кары, пельёсыныз кылыса гинэ, Со ужъёсты уз быдэсъя. Куанеръёсты шонерлыко судить кароз, музъем вылысь курадӟыса улӥсьёслэсь ужъёссэс шонер эскероз-быдэсъялоз» (Ис. 11:3, 4). Тӧроос, тӥ — Иисуслэн кивалтэмез улсын тыршись возьмасьёс. Со юрттоз тӥледлы шонерлыко но гажаса-жаляса судъяны (Матф. 18:18—20). Макем ми тау кариськомы, милям сюлмаськись тӧроосмы вань шуыса! Соослэн юрттэмзылы луыса, ми но ог-огмылы шонерлыко ужъёс лэсьтыны но ог-огмес гажаны-жаляны быгатӥськомы.

19. Кыӵе пайда вайись урокъёс тӥ шедьтӥды асьтэлы ватӥськон-пегӟон городъёс сярысь законысь?

¹⁹ Моисейлэн законаз Иегова но солэн шонерлыко эсэпъёсыз сярысь «тырмыт тодон-валан, зэмлык» вань (Рим. 2:20). Озьы, ватӥськон-пегӟон городъёс сярысь закон тӧроосты шонер судить карыны дышетэ, нош асьмеды — гажан-жалянмес возьматыны но ог-огмес жаляны (Зах. 7:9). Ми али Моисейлэн законэзъя ум улӥське ни, но Иегова ӧз воштӥськы. Со азьло кадь ик бадӟым саклык висъя шонерлыклы но гажан-жалянлы. Макем со бадӟым дан — Иегова Инмармылы ужаны-тыршыны! Ойдолэ солэсь паймымон сямъёссэ адӟем каромы. Со милям пегӟон интымы мед луоз!