Та дуннелэсь малпанъёссэ палэнтэ

1. Кыӵе визь-кенеш сётӥз Павел Колоссы карын улӥсь христианъёслы? (Учке статья кутсконысь суредэз.)

АПОСТОЛ Павел Колоссыосысь христианъёслы гожтэтсэ, Римын пытсэтын пукыкуз, гожтӥз, вылды, а. э. 60—61-тӥ аръёс котырын. Отын со вераз, «Святой Дух бордысь потӥсь... тодон-валанэз» будэтоно шуыса (Кол. 1:9). Со гожтэтаз ик Павел пусйиз: «Тае мон соин верасько, нокин но тӥледыз кескич кылъёсын ӧрекчаны медаз быгаты вал шуыса. Чаклаське, агай-вынъёс, нокин но тӥледыз Христос бордысь потымтэ ӧрекчи дышетонъёс пала медаз кыскы вал. Соос луо та дуннелэн, адямиослэн мадён-веранэнызы герӟаськем дышетонъёс» (Кол. 2:4, 8). Собере Павел куд-ог вӧлмем малпанъёслэн шонертэм луэмзы сярысь вераз но валэктӥз, малы соос сокем тунсыко потыны быгато. Кылсярысь, со вераз, озьы малпаськыса, адямиос асьсэды мукетъёсызлэсь визьмогес но умойгес карыны кутско шуыса. Павеллэн Колоссыослы гожтэтэз юрттыны кулэ вал вын-агайёслы та дуннеын вӧлмем малпанъёсты но ужъёсты палэнтыны (Кол. 2:16, 17, 23).

2. Малы пайдаё луоз та дуннеысь малпанъёсты эскерыны?

² Со адямиос, кудъёсыз та дунне сямен малпасько, Иеговалэсь возетъёссэ уг дунъяло но соосты лыдэ ик уг басьто. Ми но озьы ик малпаськыны кутскимы ке, дыр ортчемъя осконмы лябӟыны быгатоз. Та дуннеын вӧлмем малпанъёслэсь пегӟыны секыт, малы ке шуоно ми соосты телевизорысь но интернетысь адӟиськомы, пумиськиськомы соосын школаын но уж дорын. Та статьяын ми вераськомы со сярысь, мар кароно, соос милемлы изъян медаз вае шуыса. Ми эскеромы та дуннеын вӧлмем малпанъёс пӧлысь витьсэ но вераськомы, мар кароно, соос милемлы медаз пыӵалэ шуыса.

ОДНО ИК-А ИНМАРЛЫ ОСКОНО?

3. Кыӵе малпанэн уло тросэз адямиос но малы?

³ «Инмарлы оскытэк но, мон умой адями луыны быгатӥсько». Трос шаеръёсын адямиос ӵемгес но ӵемгес верало, соос Инмарлы уг оско шуыса. Соос ӧз но малпаськылэ, вылды, вань-а Инмар, ӧвӧл-а, но соослы кельше малпаны, соос быгато шуыса лэсьтыны сое, мар каремзы потэ. (Лыдӟы Псалтирез 9:25.) Мукетъёсыз, асьсэды визьмо карыса, верало: «Инмарлы оскытэк но, вылӥ эсэпъёсъя улыны луэ».

4. Мар луоз вераны адямилы, кудӥз Кылдытӥсь ӧвӧл шуэ?

⁴ Визьмо луоз-а вераны, Кылдытӥсь ӧвӧл шуыса? «Кызьы улон кылдӥз?» юанлы тодосчиос пыр-поч но валамон валэктон уг сёто. Нош зэмзэ верано ке, валэктонэз туж капчи. Юрт гинэ но ас понназ кылдыны уг быгаты бере, мар веранэз ини улон сярысь. Милям мугормы котькыӵе юртлэсь трослы шуггес кылдытэмын. Кылсярысь, корка борддорлэн пилиськемез ас понназ уг тупа, нош киысьтымы яра, дыр ортчыса, ас понназ бурме. Кин меда сое озьы тупатӥз? Библиын гожтэмын: «Котькуд коркаез кин ке но пуктэ; нош ваньзэ пуктӥсь-лэсьтӥсь луэ — Инмар» (Евр. 3:4).

5. Мар сярысь малпано солы, кинлы потэ, адями Инмартэк но ужпум кутыны быгатэ шуыса со пумысен, мар ӟечез, нош мар уродэз луэ?

⁵ Нош мар кароно, кин ке вера ке, Инмарлы оскытэк но, ӟеч ужъёс лэсьтыны луэ шуыса? Инмарлэн Кылаз верамын, оскисьтэм адямиос шонерлыко эсэпъёсъя улыны быгато шуыса (Рим. 2:14, 15). Кылсярысь, соос ярато но гажало асьсэлэсь анайзэс но атайзэс. Нош адями соглаш уг кариськы ке, Кылдытӥсь ужпум кутыны кулэ шуыса со пумысен, мар ӟечез, нош мар уродэз луэ, луоз-а вераны, со адями умой лэсьтэ шуыса? (Ис. 33:22). Тросэз малпаськись адямиос соглаш луо, музъем вылын югдурлэн уродмемез возьматэ, адямиос ваньзэ сое Инмартэк тупатыны уз быгатэ шуыса. (Лыдӟы Иеремиялэсь 10:23.) Соин ик малпано ӧвӧл, Инмарлы оскытэк но солэсь законъёссэ лыдэ басьтытэк, ужпум кутыны луэ шуыса со пумысен, мар ӟечез, нош мар уродэз луэ (Пс. 145:3).

КУЛЭ-А МИЛЕМЛЫ РЕЛИГИЯ?

6. Кызьы тросэз адямиос религия шоры учко?

⁶ «Шудо луон понна, религия кулэ ӧвӧл». Туннэ тросэз адямиос озьы малпало, малы ке шуоно религиез кулэтэм макеен лыдъяло но со соослы тунсыко уг поты. Со сяна, тросэз религилэсь палэнско, малы ке шуоно соослы уг кельшы ӝуась ад сярысь дышетон, дасэтӥ люкетэз бичан но священникъёслэн политика ужъёсы пыриськемзы. Соин ик тросгес но тросгес адямиос лыдъяло, нокыӵе религие пыриськытэк но, соос шудо луыны быгато шуыса. Соос вераны быгато: «Инмар сярысь тодыны мыным тунсыко, но мынам нокыӵе религиозной организацие пыреме уг поты».

7. Кызьы зэмос луись религия адямиослы шудо луыны юрттэ?

⁷ Религие пыриськытэк, адями шудо луыны быгатоз-а? Быгатоз, вераськон мынэ ке зэмос луисьтэм религия сярысь. Адями зэмзэ ик шудо уз луы, солэн ӧвӧл ке матысь кусыпъёсыз Иеговаен, «шудо Инмарен» (1 Тим. 1:11, ВД). Ваньмыз, мар каре Инмар, мукетъёсызлы пайда вае. Солэн ужась-тыршисьёсыз шудоесь, малы ке шуоно соос вань саклыксэс висъяло солы, кызьы матысь адямиоссылы юрттоно (Ап. уж. 20:35). Малпаське, кылсярысь, кызьы Иеговалы ужан-тыршон семьяез шудо каре. Кузпалъёс дышетско ог-огзэс гажаны но яратыны, кузпалъяськыку сётэм кылзэс святой шуыса лыдъяны, ог-огзылы оскымон кыльыны но нылпиоссэс умой будэтыны. Иеговалы ужан-тыршон солэсь калыксэ огазея, соин ик быдэс дунне вылысь кенешъёсын христианъёс тупаса но ог-огзэс яратыса уло. (Лыдӟы Исаиялэсь 65:13, 14.)

8. Кызьы Лукалэсь 11:28 валэктыны юрттэ, мар адямиез зэмзэ ик шудо каре?

⁸ Инмарлы ужатэк-тыршытэк, адями зэмзэ ик шудо луыны быгатоз-а? Нош мар адямиез шудо каре? Куд-ог адямиос уж доразы, спорт удысын азинлыко луон понна яке яратоно ужзы понна уло. Мукетъёсыз — семьязы но эшъёссы понна. Зэм, ваньмыз со улонэз шудо каре, но адями мукет ужпумен кылдытэмын, кудзэ быдэстыса со зэмзэ ик шудо луыны быгатэ. Адями пудо-животъёслэсь пӧртэм луэ: со быгатэ Кылдытӥсен эшъяськыны но солы оскымон ужаны-тыршыны. Со милемыз зэмзэ ик шудо каре, малы ке шуоно ми озьы кылдытэмын. (Лыдӟы Лукалэсь 11:28.) Кылсярысь, Иеговалы йыбырттон понна, ӵош люкаськиськомы ке, со милемлы шумпотон вае (Пс. 132:1). Ми туж шумпотӥськомы, быдэс дунне вылысь вынлыклэн люкетэз луиськомы, Инмарлэн син азяз чылкыт улӥськомы но милям вуоноезлы осконмы вань шуыса.

КУЛЭ-А МИЛЕМЛЫ ВЫЛӤ ЭСЭПЪЁС?

9. а) Мар малпало тросэз адямиос кузпалъяськытэк ӵош кӧлан сярысь? б) Малы Инмарлэн Кылыз кузпалъяськытэк ӵош кӧланэз тэрга?

⁹ «Мар умойтэмез, адямиос кузпалъяськытэк ӵош кӧлало ке?» Адямиос верало милемлы: «Улоно озьы, улон шумпотон мед ваёз шуыса. Мар умойтэмез, адями кӧла ке соин, кинэн кӧламез потэ?» Нош христианъёслы азон-калгон шоры синзэс ворсаны кулэ ӧвӧл. Малы? Малы ке шуоно Инмарлэн Кылыз сое тэргаa. (Лыдӟы 1 Фессалоникаослы 4:3—8.) Иеговалэн правоез вань милемлы законъёс пуктыны, малы ке шуоно со милям Кылдытӥсьмы. Инмарлэн законэзъя, пиосмурт но кышномурт кузпалъяськемын ке, соку гинэ соослы ӵош кӧланы яра. Инмар милемлы законъёс сётӥз, малы ке шуоно со милемыз яратэ. Ми солэн законъёсызъя улӥськомы ке, со милемлы пайда вае. Инмарлэн законъёсызъя улӥсь семьяосын ог-огзэс гажало но ярато. Отын асьсэды кышкыттэм интыын кадь шӧдо. Инмар кыл кутытоз соосты, кинъёс юри солэсь законъёссэ тӥяло (Евр. 13:4).

10. Мар кароно христиан муртлы, азон-калгон сьӧлтэтэ медаз сюры шуыса?

¹⁰ Инмарлэн Кылыз дышетэ милемыз, мар кароно азон-калгон сьӧлтэтэ медам сюре шуыса. Со понна туж чаклано сое, мар шоры милям синъёсмы учко. Иисус вераз: «Котькудӥз, кин кышномурт шоры ӝуатскем мылкыдын учкиз ке, со аслаз сюлмаз азон-калгон сьӧлыкез лэсьтэ ни. Бур синмыд тонэ сьӧлыке пыртэ ке, ишкалты сое но ас бордысьтыд кушты» (Матф. 5:28, 29). Соин ик христианъёслы кулэ ӧвӧл порнографиез учкыны но кырсь кылъёсын кырӟанъёсты кылзыны. Апостол Павел гожтӥз: «Музъем вылысьсэ, мар вань пушкады, ваньзэ быдтэ: азыса-калгыса улонэз» (Кол. 3:5). Со сяна, милемлы чаклано сое, мар сярысь ми малпаськиськомы но вераськиськомы (Еф. 5:3—5).

ТА ДУННЕЫСЬ УЖЫН АЗИНЛЫКО ЛУЫНЫ КУЛЭ-А?

11. Малы тросэзлэн та дуннеысь ужын азинлыко луэмзы потэ?

¹¹ «Та дуннеысь ужын азинлыко луон шумпотон вае». Тросэз адямиос, та дуннеысь ужын азинлыко луон понна, уло. Соос малпало, азинлыко луизы ке, соосты гажалозы, данъялозы но соос узыр луозы шуыса. Тросэз адямиос сыӵе малпанэн уло бере, со христианъёслы но паланы быгатоз.

12. Та дуннеысь ужын азинлыко луон адямиез зэмзэ ик шудо карыны быгатэ-а?

¹² Кылсярысь, кин ке но та дуннеысь ужын азинлыко луиз, но сое гажаны но данъяны кутскизы. Луоз-а вераны, со адями зэмзэ ик шудо шуыса? Уз. Тодады вае, мар луиз Шайтанэн. Солэн но кузёяськемез потэ вал но потэ вал, сое мед данъялозы шуыса. Но шудо-а со? Ӧвӧл. Со вожпотонэн пачылмемын (Матф. 4:8, 9; Усьт. 12:12). Нош табере малпалэ, макем тӥ шумпотӥськоды, куке юрттӥськоды мукетъёсызлы тодыны Инмар сярысь но паймымон вуоно улон сярысь, кудзэ милемлы Инмар сётоз. Та дуннеысь ужын нокыӵе азинлык милемлы сое уз сёты. Со сяна, та дунне нокинэ жалятэк вожвылъяськыны мылкыдэз ӝутэ, адямиосты ог-огенызы тушмонъяськыса но ог-огзылы вожъяськыса улыны косэ. Но со «юнме дыр быдтон» гинэ луэ (Екк. 4:4).

13. а) Кызьы милемлы та дуннеысь уж шоры учконо? б) Павеллэн Фессалоникаослы нырысетӥ гожтэтэз верамъя, мар солы бадӟым шумпотон вайиз?

¹³ Веранэз ӧвӧл, улон понна, милемлы кытысь ке коньдон поттоно. Милемлы ужмы кельше ке, отын номыр уродэз ӧвӧл. Но лэзёно ӧвӧл, ужмы улонамы нырысетӥ интые мед пуксёз шуыса. Иисус вераз: «Нокинлэн но кык кузёлы служить каремез уг луы: уго одӥгзэ адӟемпотостэм кароз, нош мукетсэ яратоз; яке огезлы сюлмысьтыз тыршоз, нош мукетыз сярысь уз сюлмаськы. Уд быгатӥське Инмарлы но, маммоналы но огдыре служить карыны» (Матф. 6:24, сноска). Куке ми вань саклыкмес висъяськомы Иеговалы ужан-тыршонлы но юрттӥськомы мукет адямиослы Инмарлэн Кылыныз тодматскыны, милям сюлэммы шумпотонэн пачылме. Ӵапак сыӵе шӧдонъёсыз вал апостол Павеллэн но. Егит дыръяз солэн религия удысын азинлыко луэмез потэ вал. Но Павел зэмзэ ик шудо луиз соку гинэ, куке мукетъёссэ Инмарлэн Кылыныз тодматыны кутскиз но адӟиз, макем со соослэсь улонзэс воштэ. (Лыдӟы 1 Фессалоникаослы 2:13, 19, 20.) Та дуннеысь нокыӵе удысын азинлык тросгес шумпотон вайыны уз быгаты.

БЫГАТОЗЫ-А АДЯМИОС АСЬСЭОС ШУГ-СЕКЫТЪЁССЭС СЭРТТЫНЫ-ПЕРТЧЫНЫ?

14. Малы тросэз оско, адямиос асьсэос шуг-секытъёссэс сэрттыны-пертчыны быгато шуыса?

¹⁴ «Адямиос асьсэос шуг-секытъёссэс сэрттыны-пертчыны быгатозы». Трос адямиослы та малпан кельше, малы ке шуоно со озьы луысал ке, адямиос Инмартэк но улыны быгатысалзы но карысалзы сое, мае мылзы потэ. Куд-ог эскеронъёс возьматэмъя, дунне вылын ожмаськонъёс, йыружъёс, висёнъёс но куанер улон ӧжытгес но ӧжытгес луо. Соин но та малпан шонер кадь потыны быгатэ. Одӥг статьяын верамын вал: «Югдур тупатске, малы ке шуоно адямиос улонэз умой пала воштыны ужпум кутӥзы». Нош быгатозы-а адямиос асьсэос шуг-секытъёссэс сэрттыны-пертчыны? Валэктон шедьтон понна, со шуг-секытъёсты пыр-почгес эскеромы.

15. Мар верало эскеронъёс адямиослэн шуг-секытъёссы сярысь?

¹⁵ Ожъёс. Эскеронъёс возьматэмъя, кык Дунневыл ожъёсын 60 миллион пала адямиос быризы. Озьы ке но, адямиослэн ожмаськонъёсты дугдытэмзы уг луы. 2015-тӥ арлэн кутсконаз ожъёсын но уйылон-уллянъёсын сэрен беженец луэмъёслэн лыдзы 65 миллион пала вуэмын вал ини. Нош 2015-тӥ арын гинэ 12 миллион 400 сюрс пала адями вордскем палъёсысьтызы кошконо луиз. Йыружъёс. Куд-ог шаеръёсын со яке та йыружъёс ӧжытгес лэсьтӥсько ини ке но, терроризмлэсь, семья пушкын вӧсь каронлэсь но ултӥянлэсь но интернет пыр йыруж лэсьтонлэсь йылэмзэс дугдытыны уг луы. Озьы ик троссэ сюлэмшугъяськытэ кивалтӥсьёслэн ортчыт трос кузьымъёс октэмзы. Адямиос йыружъёсты быдтыны уг быгато. Висёнъёс. Куд-ог висёнъёсты эмъян амалъёс шедьтэмын ини. Но 2013-тӥ арын отчётъя, сюлэм висёнъёслэсь, инсультлэсь, раклэсь, респираторной висёнъёслэсь но диабетлэсь котькуд аре 9 миллион пала адями кулэ, кудъёсызлы 60 арес тырмемын ӧвӧл на. Куанер улон. Дунневыл банк верамъя, Африкаын гинэ туж куанер улӥсьёслэн лыдӟы 1990-тӥ арын 280 миллионысен 2012-тӥ арын 330 миллионозь вуиз.

16. а) Малы Инмарлэн Эксэйлыкез гинэ адямиослэсь вань шуг-секытъёссэс быдтыны быгатоз? б) Мар вераз Исаия но псаломъёсты гожъясь со сярысь, мар кароз Инмарлэн Эксэйлыкез?

¹⁶ Экономика но политика удысын ӵемысь астэ гинэ яратон валтэ. Соин ик паймонэз ӧвӧл, адямиос ожъёсты, йыружъёсты, висёнъёсты но куанер улонэз быдтыны уг быгато шуыса. Сое Инмарлэн Эксэйлыкез гинэ быдтыны быгатоз. Малпалэ ай, мар кароз Иегова. Ожъёс. Инмарлэн Эксэйлыкез быдтоз сое, мар ожъёсты кенжытэ — астэ гинэ яратонэз, коррупциез, адямиосты ултӥянэз, зэмос луисьтэм религиез но Шайтанэз (Пс. 45:9, 10). Йыружъёс. Инмарлэн Эксэйлыкез трос миллион адямиосты дышетӥз ог-огзэс яратыны но ог-огзылы оскыны. Музъем вылысь кивалтӥсьёс сое ӧй быгатысалзы (Ис. 11:9). Висёнъёс. Иегова ужась-тыршисьёсызлы юн тазалык кузьмалоз (Ис. 35:5, 6). Куанер улон. Иегова куанер улонэз быдтоз. Адямиослэн луоз ваньмыз, мар кулэ шудо луон понна. Но самой валтӥсез — соос эшъяськозы Инмарен. Нош со котьмалэсь но дуногес луэ (Пс. 71:12, 13).

«ТОДЭ КЫЗЬЫ КУЛЭ КОТЬКУДӤЗЛЫ АДЯМИЛЫ ОТВЕТ СЁТЫНЫ»

17. Мар юрттоз милемлы та дуннеын вӧлмем малпанъёслэсь утиськыны?

¹⁷ Та дуннеын вӧлмем малпан пумит луэ ке солы, малы тӥ оскиськоды, пыр-поч эскере, мар со пумысен вераське Библиын, но вераське со сярысь вын-агаен яке сузэр-апаен, кудӥзлэн Инмарен матысь кусыпъёсыз. Малпаське, малы со малпан тӥледлы кельшиз, малы со шонертэм луэ но кызьы возьматоно солэсь шонертэм луэмзэ. Ми асьмеды та дуннеын вӧлмем малпанъёслэсь утьыны быгатомы, кылзӥськимы ке визь-кенешлэсь, кудзэ сётӥз Павел Колоссыослы гожтэтаз: «Оскисьтэм калыкен асьтэдыз визьмо возе... тодэ кызьы кулэ котькудӥзлы адямилы ответ сётыны» (Кол. 4:5, 6).