ХРИСТИАН УЛОН
Кызьы тодытоно интыосын, кытын пӧртэм кылъёсын верасько
Адямиос Эксэйлык сярысь иворез умойгес кылзо, куке сое анай кылынызы верало. Со понна, вылды, Иегова лэсьтӥз, а. в. 33-тӥ арын Витьтонэтӥ Нуналэ «вань калыкъёс пӧлын мур осконэн вӧсяськыса улӥсь иудейёс» ӟеч иворез асьсэлэн вордскем кылынызы мед кылозы шуыса, соос ваньзы еврей яке грек кылэз валало вал ке но (Ап 2:5, 8). Туннэ шаеръёсын, кытын трос кылъёсын верасько, пӧртэм кылын вераськись кенешъёсысь вын-агайёс но сузэр-апайёс ӵем дыръя одӥг участокъёсын тодыто. Кызьы со кенешъёсысь ивортӥсьёс быгато соос палан улӥсь котькуд адямилы ӟеч иворез вераны но со дыре ик палэнскыны солэсь, мар адямиосты керӟегъяськытыны быгатэ?
Визь-кенеш утча (Мд 15:22). Интыосын, кытын пӧртэм кылъёсын верасько, тодытон ужез чакласьёслы ӵош малпано, мар юрттоз кенешъёссылы азинлыко тодытыны. Кылсярысь, мукет кылын вераськись кенешъёслэн тодытон понна участокъёссы трос ӧвӧл ке, тӥледыз курыны быгатозы пыратэк кельтыны коркаосты яке квартираосты, кытын мукет кылын вераськись адямиос уло. Нош со кенешъёс арлы быдэ вань участокъёссэс ортчыны уг вуо ке, соос тӥледыз курыны быгатозы вань коркаосы но квартираосы пыраны но тунсыкъяськись адямиос сярысь вераны (od-U 93 б., 37 абз.). Яке соос тӥлесьтыд кенештэс курыны быгатозы мукет кылын вераськись адямиосты утчаны но соослэсь адресъёссэс вераны (km-U 7/12 5 б., рамка). Лыдэ басьтоно, куддыръя одӥг коркан яке квартираын пӧртэм кылын вераськись адямиос уло шуыса. Вунэтоно ӧвӧл, адями сярысь информациез утёнъя катъёсты тӥяны уг яра шуыса.
Огкылысь ужа (Еф 4:16). Тодытон ужез чакласьлэсь куронъёссэ быдэсъя. Мар кароно, тон дышетӥськод ке адямиен, кудӥз, кенешедлэн кылыз сярысь, мукет кылэз умойгес вала? Солэн осконэз ӝоггес будоз, куке соин дышетоз ивортӥсь, кудӥз солэн кылыныз вераське.
Дасяськы (Мд 15:28; 16:1). Коркась корка тодытыкуд, тон мукет кылын вераськись адямиез пумитаськод ке, лэсьты ваньзэ, солы ӟеч иворез веран понна. Со понна дасяськыкуд малпаськы, кыӵе кылъёсын тон палан улӥсь адямиос верасько, но со кылъёсын Библиез но видеороликъёсты скачать кар. Со сяна, JW Language приложениез уже кутыса, тон дышетыны быгатӥськод, кызьы со кылъёсын ӟечбуръяськоно.