Кызьы вераськон амалъёсты уже кутоно

2018-тӥ арын толшорысен кутскыса, «Христиан улонмы но ужан-тыршонмы» ужан тетрадьлэн нырысетӥ бамаз вераськон амалъёс сётӥсько. Кызьы соосты уже кутоно?

Дышетскон ужез возьматыку. Вераськон амалъёсысь уже кутыны кулэ юанэз, Библиысь кылбурез но юанэз, кудзэ ми кельтӥськомы, адямиен выльысь пумиськыку вераськон понна. Видеороликын возьматэм вераськон амалэз аслад кылъёсыныд вераны луоз. Тон быгатӥськод бырйыны мукет югдурез, мукет кутскон кылъёсты но вераськонэз мукет сямен нуыны. Озьы ик адямилы ӵектыны луоз валтӥсь дышетон тӥрлыкъёсысь публикациез, со сярысь тыныд сётэм ужын верамын ӧвӧл ке но.

Ужан-тыршонын. Вераськон амалъёс юри дасямын, тыныд адямиен вераськыны юрттон понна. Адями кылзэ но солэн тросгес тодэмез потэ ке, луоз вераськонэз азьланьтыны но эскерыны, кылсярысь, юанэз но кылбурез «Кыкетӥ вераськонысь». Нош адямиослы тунсыкогес потэ ке мукет кылбур яке азьвыл потэм ужан тетрадьысь юан? Яке тон палан улӥсь адямиослы тросгес кельше вераськыны иворъёс сярысь яке алигес луэм учыръёс сярысь? Соку тынад ужан тетрадьын сётэм вераськон амалэз воштэмед яке чылкак мукет мар ке сярысь верамед потоз, дыр. Зэм, вераськон амалъёсты пӧртэм сямен кутыны луоз. Валтӥсез — кароно ваньзэ, мае быгатӥськомы, «Ӟеч Иворез вӧлмытон понна» (1Кр 9:22, 23).