«Визьлыкоослэсь верам кылзэс кылзы»

1. Малы милемлы визь-кенеш сётыны быгато но малы туж кулэ солэсь кылзӥськыны?

ДЫРЫН-ДЫРЫН ваньмылы милемлы визь-кенеш кулэ. Куддыръя ми сое асьмеос куриськомы солэсь, кинэ гажаськомы. Нош куддыръя агай яке сузэр адӟе, ми тани-тани янгыш лэсьтомы шуыса. Соин ик сюлмаськеменыз милемлы визь-кенеш сётэ (Гал. 6:1). Со сяна, визь-кенеш кулэ соослы но, кинъёс секыт сьӧлык лэсьтӥзы. Кыӵе муген гинэ милемлы визь-кенеш медам сётэ, милемлы туж кулэ солэсь кылзӥськыны. Со юрттоз милемлы умойгес луыны. Оло нош, улонмес но утёз! (Мад. 6:23).

2. Мадёнъёсын 12:15 гожтэмъя, малы милемлы визь-кенешъёслэсь кылзӥськыны кулэ?

² Та статьялэн валтӥсь кылбурез милесьтым мылкыдмес ӝутэ: «Пельдэ мыкырты но визьлыкоослэсь верам кылзэс кылзы» (Мад. 22:17). Нокин но ваньзэ уг тоды. Котьку но сюрозы соос, кинъёс милесьтым тросгес тодо яке мае ке умойгес лэсьтыны быгато. (Лыдӟе Мадёнъёсты 12:15.) Озьыен, визь-кенешъёслэсь кылзӥськыса, ми возьматӥськомы зӥбыт-востэм луэммес. Ми валаськомы, ваньзэ ум тодӥське но ваньзэ лэсьтыны ум быгатӥське шуыса. Соин ик милемлы юрттэт кулэ. Инмарлэн духез Соломон эксэйлэсь мылкыдзэ ӝутӥз таӵе визьмо кылъёсты гожтыны: «Визь-кенеш сётӥсьёс трос ке, со уж быдэсме» (Мад. 15:22).

3. Кызьы Иегова милемлы визь-кенешъёс сётъя?

³ Иегова кык амалэн визь-кенеш сётыны быгатэ. Куд-огъёссэ со сётэ вань христианъёслы, нош мукетъёссэ — милемлы гинэ. Кызьы Иегова вань христианъёслы визь-кенешъёс сётъя? Кылсярысь, Библиез но публикациосмес лыдӟыса, ми адӟыны быгатӥськомы, милемлы воштӥськоно шуыса (Евр. 4:12). Нош куддыръя мукет сямен луыны быгатэ. Шуом, тӧро яке юн осконэн христиан мурт вера, мае милемлы тупатыны кулэ. Вераны луоз, озьы Иегова милемлы гинэ визь-кенеш сётэ шуыса. Адями ми сярысь малпаськиз бере, Библиысь тупась возет утчаз бере но милемлы визь-кенеш сётыны дӥсьтӥз бере, со возьматэ, та адями милемыз яратэ шуыса. Милемлы умой луысал визь-кенеш понна тау карыны но сое улонамы пыртыны.

4. Екклесиастын 7:9 гожтэмъя, кыӵе мылкыдлэсь палэнсконо, куке милемлы визь-кенеш сёто?

⁴ Тужгес но секыт, куке визь-кенеш милемлы гинэ сёто. Милям кӧтмы но ӝож луыны быгатэ. Ми валаськомы, ваньмы тырбыдэстэмесь шуыса. Но куке милемлы янгышъёсмы сярысь верало, милям сюлэммы ик вӧсь луэ. (Лыдӟе Екклесиастэз 7:9.) Сыӵе учыръёсын куддыръя ми кутскиськомы асьмеды шонере поттыны, пыкылыны сое, кин визь-кенешез сётӥз, яке малпаны, сое мукет сямен верано вал шуыса. Милям таӵе малпанъёсмы кылдыны быгато: «Со мыным визь-кенеш сётӥз?! Ачиз шоры мед учкоз». Таӵе мылкыдмы луиз ке, сётэм визь-кенешез ми пелямы но ум понэ, дыр, яке вазиськомы солы, кин милемлы кельшымон визь-кенеш сётыны быгатоз.

5. Мае ми эскеромы та статьяын?

⁵ Та статьяын ми тодамы ваёмы куд-ог адямиосты, кудъёсыз вашкала дыръя улӥзы. Одӥгъёсыз визь-кенешъёслэсь кылзӥськизы, мукетъёсыз ӧз. Озьы ик ми эскеромы, мар милемлы юрттоз визь-кенешъёслэсь кылзӥськыны.

СООС ВИЗЬ-КЕНЕШЕЗ ПАЛЭНТӤЗЫ

6. Малы дышетэ милемыз Ровоамлэн учырез?

⁶ Тодамы ваёмы Ровоам эксэез. Иерусалимын эксэй луэмез бере со доры калык вазиськиз. Калык куриз сое ужзэ капчиятыны, малы ке шуоно солэсь азьвыл Соломон атаез соосты туж зол ужатыса возиз. Ровоам малпаз арлыдо тӧроосын кенешыны. Соос солы визь-кенеш сётӥзы калыклэсь кылзӥськыны но солэсь ужзэ капчиятыны. Соку калык Ровоамлэсь шумпотыса кылзӥськысал (3 Экс. 12:3—7). Но Ровоамлы та визь-кенеш ӧз кельшы. Соин ик со малпаз вазиськыны ӵош будэм эшъёсызлы. Соослы 40 арес котыр вал, дыр. Соос улонэз адӟемын вал ини, соин ик быгато вал умой визь-кенеш сётыны (2 Пар. 12:13). Но та учырын соос умойтэм визь-кенеш сётӥзы. Эшъёсыз Ровоамлы ӵектӥзы калыкез эшшо но золгес ужатыны (3 Экс. 12:8—11). Ровоамлы кык туж пӧртэм визь-кенешъёс сётӥзы. Умойзэ быръён понна, со быгатэ вал Иеговалы вӧсяськыны. Но озьы лэсьтэм интые, Ровоам кылзӥськиз эшъёсызлэсь, кудъёсызлэн визь-кенешсы солы кельшиз. Соин сэрен Ровоам ачиз но, израиль калык но кышкыт бервылъёсын пумиськизы. Малы милемыз дышетыны быгатэ та учыр? Куддыръя визь-кенеш милемлы уг кельшы. Но со Библия вылэ пыкиськыса сётэмын ке, умой луысал солэсь кылзӥськыны.

7. Малы дышетэ милемыз Озиялэн учырез?

⁷ Озия эксэй визь-кенешез палэнтӥз. Со пыриз храмлэн со люкетаз, кытчы священникъёс гинэ пырыны быгато вал. Отын со фимиамез ӵындытыны малпаз. Священникъёс сое дугдытыны турттӥзы. Соос солы веразы: «Озия, тыныд уг яра Кузё-Инмарлы ӵындытон ортчытыны, со... священникъёслэн, ужзы». Озия соослэсь кылзӥськысал ке, Иегова сое простить карысал, дыр. Но со соослэсь ӧз кылзӥськы. Озия священникъёслы йыркуръяськыны кутскиз но малпаз, дыр: «Кызьы тӥ мыным, эксэйлы, визь-кенеш сётыны дӥсьтӥськоды?» Нош Иегова та учыр шоры мукет сямен учкиз. Со адӟиз: Озия вылтӥяськыны кутскиз но лэсьтӥз сое, мае солы лэсьтыны уг яра вал. Соин ик Инмар сое кылкутытӥз — солэн «кулытозяз гижлочерез ӧз быры» (2 Пар. 26:16—21). Малы милемыз дышетыны быгатэ та учыр? Кыӵе гинэ инты ми медам басьтэ, милемлы визь-кенеш Библия вылэ пыкиськыса сёто ке, милемлы тупатскыны кулэ. Озьы ӧм лэсьтэ ке, ми Инмарлэн эшез луыны ум быгатэ.

СООС ВИЗЬ-КЕНЕШЛЭСЬ КЫЛЗӤСЬКИЗЫ

8. Кызьы ассэ возиз Иов, куке солы визь-кенеш сётӥзы?

⁸ Озьы ик Библиын гожтэмын адямиос сярысь, кудъёсыз визь-кенешлэсь кылзӥськизы. Иегова сыӵе адямиосты бакель кариз. Тодамы ваёмы Иовез. Со Иеговаез яратӥз, ассэ шонер возьыны тыршиз, озьы ке но со янгышъёс но лэсьтылӥз. Туж бадӟым шуг-секытъёсын пумиськыса, со Инмар сярысь шонертэмзэ вераны кутскиз. Иегова но Елиуй веразы Иовлы, солы тупатскыны кулэ шуыса. Иов зӥбыт-востэм сямзэ возьматӥз но визь-кенешлэсь кылзӥськиз. Со шуиз: «Мон вералляй мон понна валантэм... ужъёс сярысь. [...] ...Соин ик мон, сюй-тузон, пень пӧлы султыса, вань ярантэм вераськем кылъёсылэсь куштӥськисько, соос понна ӧкынӥсько». Иегова Иовез зӥбыт-востэм сямыз понна но кылзӥськемез понна бакель кариз (Иов 42:3—6, 12—17).

9. Кызьы ми Моисейлэсь адӟем карыны быгатӥськомы?

⁹ Эскеромы Моисейлэсь учырзэ. Огпол со янгышаз, соин ик Иегова солы визь-кенеш сётӥз. Моисей калыклы вожзэ поттӥз но Иеговаез ӧз данъя. Соин ик Инмар ӧз лэзьы солы Сӥзем музъеме пырыны (Лыд. 20:1—13). Моисейлэн мылкыдыз туж куашказ. Со куриз Иеговаез лэзьыны солы Сӥзем музъеме пырыны. Но Инмар вераз солы: «Азьланяз та сярысь Мыным номыр но эн ни вера» (К. Зак. 3:23—27). Озьы ке но Моисей йыркуръяськыса ӧз улы. Соин ик Иегова лэзиз солы азьланяз но израиль калыкез нуыны (К. Зак. 4:1). Малы ми дышетскыны быгатӥськомы Иовлэсь но Моисейлэсь? Куке Иовлы веразы, солы тупатскыны кулэ шуыса, со ассэ шонере ӧз потты но кылзӥськиз. Моисейлы визь-кенеш сётэмын вал ке но, озьы ик со Сӥзем музъеме пырыны луонлыксэ ыштӥз ке но, со Инмарлы оскымон кыльыны быгатӥз.

10. а) Мадёнъёсты 4:10—13 лыдэ басьтыса, малы визь-кенешлэсь кылзӥськыны кулэ? б) Кыӵе пайда милемлы вайыны быгато Эммануэльлэн, Меганлэн но Марколэн кылъёссы?

¹⁰ Иовлэсь но Моисейлэсь адӟем каримы ке, ми трос пайда басьтомы. (Лыдӟе Мадёнъёсты 4:10—13.) Тае ас вылазы трос вын-агайёс но сузэр-апайёс шӧдӥзы. Тани мар вера Конгоысь Эммануэльb нимо тӧро: «Юн осконэн агайёс шӧдӥзы, мон тани-тани янгышало шуыса. Соин ик мыным визь-кенеш сётӥзы. Соослэсь кылзӥськыса, мон трос шуг-секытъёслэсь палэнски». Нош тани мар вераз Канадаысь Меган нимо сузэр, кудӥз пионер луыса ужа-тырше: «Визь-кенеш котьку ик уг кельшы ке но, со бадӟым пайда вайыны быгатэ». Озьы ик Хорватиысь Марко агай вера: «Кенешын дано ужъёсты быдэсъяны агайёс монэ ӧз лэзе ни. Но али мон валасько: соослэн визь-кенешсы юрттӥз мыным Иеговаен кусыпъёсме юнматыны».

11. Кызьы Карл Клейн агай валэктӥз, малы визь-кенешъёслэсь кылзӥськоно?

¹¹ Со сярысь, кыӵе пайда вайыны быгато визь-кенешъёс, вераз Карл Клейн агай, кудӥз Кивалтӥсь кенешын ужаз-тыршиз. Егит дыръяз со эшъяськиз Джозеф Рутерфорд агаен. Огпол Рутерфорд агай Клейн агайлы визь-кенеш сётӥз. Нош Клейн агайлы со ӧз кельшы. Тани мар луиз собере. Клейн агай вера: «Куке ми мукет дыръя Рутерфорд агаен пумиськимы, со лякытэн монэн ӟечбуръяськиз: „Чырткем, Карл!“ Нош мынам солы кӧтӝоже вал на, соин ик мон мылы потытэк соин ӟечбуръяськи. Рутерфорд агай тае шӧдӥз но вераз мыным: „Карл, чакласькы! Шайтан тонэ кутыны тырше!“ Нош мон солы верай: „Ваньмыз умой, эн сюлмаськы, Рутерфорд агай“. Нош со мыным вераз: „Ярам, чакласькы гинэ. Шайтанлэн тонэ кутэмез потэ“. Рутерфорд агай туж умой вераз. Милям агайёслы кӧтӝожмы вань ке, уката но куке соос милемлы визь-кенеш сёто, Шайтан милемыз капчиен кутыны быгатоз»c (Еф. 4:25—27). Клейн агай Рутерфорд агайлэн визь-кенешезлэсь кылзӥськиз но, соос азьланяз но умой эшъёс вал.

МАР ЮРТТОЗ МИЛЕМЛЫ ВИЗЬ-КЕНЕШЪЁСЛЭСЬ КЫЛЗӤСЬКЫНЫ?

12. Кызьы зӥбыт-востэм сям юрттоз милемлы визь-кенешлэсь кылзӥськыны? (Псалтирь 140:5).

¹² Мар юрттоз визь-кенешъёслэсь кылзӥськыны? Нырысь ик, милемлы зӥбыт-востэмесь луоно. Милемлы вунэтоно ӧвӧл: ми ваньмы тырбыдэстэмесь но янгышаськомы. Кызьы вераськиз ини та статьяын, Иовлэн но янгышъёсыз вал, но со тупатскыны быгатӥз. Мар солы юрттӥз? Зӥбыт-востэм сям. Со адӟиськиз, куке со кылзӥськиз Елиуйлэн визь-кенешезлэсь, кудӥз солэсь трослы егитгес вал (Иов 32:6, 7). Иегова зӥбыт-востэм луэмез понна Иовез бакель кариз. Милемлы но зӥбыт-востэм сям кулэ, куке милемлы визь-кенеш сёто. Тужгес но со кулэ соку, куке янгышмы сярысь вера со, кин милесьтым трослы егитгес, яке ми малпаськомы, та визь-кенеш мыным уг тупа шуыса. Тани мар вера Канадаысь тӧро: «Визь-кенешъёстэк умойгес луыны уз пӧрмы». Нош ми валаськомы: милемлы ваньмылы тыршоно умой сямъёсты будэтыны, озьы ик эшшо но быгатыса тодытыны но дышетыны. (Лыдӟе Псалтирез 140:5.)

13. Мае милемлы тодамы возёно?

¹³ Тодамы возёно, визь-кенешъёс Иеговалэсь яратэмзэ возьмато шуыса. Иеговалэн потэ, милям ваньмыз умой мед луоз шуыса (Мад. 4:20—22). Аслаз Кылыз пыр, Библия вылэ пыкиськыса гожтэм публикациос пыр но агайёс пыр визь-кенешъёс сётыса, Инмар милемлы яратэмзэ возьматэ. Кызьы гожтэмын Еврейёслы 12:9, 10, Иегова милемыз тупатэ, «асьмелы пайда ваён понна».

14. Мае валаны тыршоно, куке милемлы визь-кенеш сёто?

¹⁴ Валаны тыршоно, мар сярысь верамез потэ вал визь-кенеш сётӥсьлэн. Ми тыршиськомы визь-кенешъёсты лякытэн вераны, но куддыръя со уг пӧрмы (Гал. 6:1)d. Ми малпаськомы ке, визь-кенешез мукет сямен сётоно вал шуыса, саклыкмес висъяно визь-кенешлэн пуштросэзлы. Малпаське: «Мыным ӧз кельшы ке, кызьы визь-кенеш сётэмын вал, вань-а та визь-кенешын визьмо малпанэз? Мон малпасько ке, визь-кенеш сётӥсьлэн аслаз но янгышъёсыз вань шуыса, быгатэ-а солэн визь-кенешез мыным пайда вайыны?» Кызьы гинэ визь-кенеш сётэмын медаз луы, тырше валаны, малы со милемыз дышетыны быгатэ (Мад. 15:31).

ВИЗЬ-КЕНЕШ АСЬТЭОС КУРЕ

15. Малы мукетъёсызлэсь визь-кенеш куроно?

¹⁵ Библия милесьтым мылкыдмес ӝутэ мукетъёсыныз кенешыны. Мадёнъёсын 20:18 умой верамын: «Малпам ужрадъёс юнмало, соосты кенешыса лэсьтӥськод ке». Адямиос, кудъёсыз мукетъёсызлэсь юало, мае соослы тупатыны умой луысал, ӵем дыръя визьмогес ужпумъёс кутыны быгато. Соин ик эн возьмалэ, куке тӥледлы визь-кенеш сётозы,— асьтэос сое куре.

16. Кыӵе учыръёсы умой луысал вын-агайёсын но сузэр-апайёсын кенешыны?

¹⁶ Ку умой луысал мукет вын-агайёсын но сузэр-апайёсын кенешыны? Малпаськомы куд-ог учыръёс сярысь. 1) Сузэр Библия дышетоназ мукет ивортӥсез ӧте но дышетэмзы бере юа солэсь, мае тупатыны луэ, эшшо но умойгес дышетӥсь луон понна. 2) Бызьымтэ сузэр выль дэрем басьтыны малпа но мукет сузэрлэсь юа, мар со малпа та дэрем сярысь. 3) Агаез нырысетӥзэ кенешын речь вераны куризы. Со визь-кенеш куре мукет агайлэсь, кудӥз быгатыса речьёс вера. Со агайёс но, кудъёсыз речьёс кемалась верало ини, мукет агайёслэсь юаны быгато, мае тупатыны умой луысал.

17. Малы визь-кенешъёслэсь кылзӥськоно?

¹⁷ Ми адӟимы: Иегова дышетэ быдэс калыксэ, озьы ик котькудзэ нимаз но. Куке милемлы визь-кенеш сётозы, ойдолэ тодамы возёмы та статьяысь валтӥсь малпанъёсты. Зӥбыт-востэмесь луомы. Валаны тыршомы, мар сярысь верамез потэ вал визь-кенеш сётӥсьлэн. Визь-кенешез улонамы пыртомы. Визьлык ас понназ уг лыкты. Соин ик Мадёнъёсын 19:20 гожтэмын: «Визь-кенешез кабыл басьты, сьӧлыктэ-шектэ шарае поттэмез санэ пон азьланяз визьлыкогес луон понна».