Куке ми визь-кенеш сётӥськомы...

1. Кин визь-кенешъёс сётъяны кулэ? Валэктэ.

КЕЛЬШЕ-А тӥледлы визь-кенешъёс сётъяны? Куд-огъёсызлы кельше. Нош куд-огъёсызлы уг кельшы яке кышкыт но. Кызьы гинэ медаз луы, ми ваньмы куддыръя ог-огмылы визь-кенешъёс сётъяны кулэ. Малы? Иисус вераз, зэмос дышетскисьёсыз ог-огзэс яратозы шуыса (Иоанн 13:35). Одӥгез амал ог-огмылы яратонмес возьматыны — агайлы яке сузэрлы дырыз дыръя кулэ луись визь-кенеш сётыны. Библиын вераське, мукетъёсызлы сюлмысьтымы визь-кенеш сётыса, ми соосын кусыпъёсмес юнматӥськомы шуыса (Мад. 27:9).

2. Мар карыны быгатоно тӧроослы но малы? (Озьы ик учке «Ужан нуналъёсы пумиськонын сётэм визь-кенешъёс» рамкаез.)

² Кин нырысь ик тодыны кулэ, кызьы умой визь-кенешъёс сётъяно? Тӧроос. Малы ке шуоно Иегова но Иисус соосты куризы кенеш сярысь сюлмаськыны (1 Пётр 5:2, 3). Кытысь адӟиське тӧроослэн ми сярысь сюлмаськемзы? Соос быдэс кенешлы речьёс верало, кудъёсысьтыз Библиысь визь-кенешъёс кылыны луэ. Озьы ик соос агайлы яке сузэрлы нимысьтыз визь-кенеш сётыны быгато. Нош кин ке но кенешлэсь палэнскиз ке, тӧроос солы берытскыны юртто. Мар юрттоз тӧроослы, озьы ик милемлы но, умой визь-кенешъёс сётъяны?

3. а) Кызьы дышетсконо умой визь-кенешъёс сётъяны? (Исаия 9:6; озьы ик учке «Визь-кенеш сётыкуды, Иисуслэсь адӟем каре» рамкаез). б) Мае ми эскеромы та статьяын?

³ Библиын гожтэмын адямиос сярысь, кудъёсыз мукетъёсызлы умой визь-кенешъёс сётъязы. Ми соослэсь тросэзлы дышетскыны быгатӥськомы. Самой умой визь-кенешъёс сётъяз Иисус. Со нимаське «Визь-нод Сётӥсь» шуыса. (Лыдӟе Исаиялэсь 9:6.) Та статьяысь ми тодомы, мар кароно, куке милесьтым визь-кенеш куро но куке милесьтым визь-кенеш уг куро, но ми валаськомы, сое сётыны кулэ шуыса. Озьы ик ми тодомы, малы чаклано, ку ми визь-кенеш сётӥськомы но кызьы.

КУКЕ МИЛЕСЬТЫМ ВИЗЬ-КЕНЕШ КУРО

4, 5. Мар сярысь асьмеды юано, куке кин ке но милесьтым визь-кенеш куре? Вералэ пример.

⁴ Куке кин ке но милесьтым визь-кенеш куре, мар милемлы нырысь ик кароно? Ми шумпотӥськомы, дыр, милемлы оско шуыса, но милям соку ик юрттэммы потэ. Но нырысь ик аслэсьтыд юано: «Быгатӥсько-а мон та удысын умой визь-кенеш сётыны?» Куддыръя умой луоз, ми нокыӵе визь-кенеш ӧм сётэ ке, нош ыстӥмы ке сое адями доры, кудӥз солэсь юанзэ умой вала.

⁵ Учкомы тае пример вылын. Шуом, матысь эшты секыт висьыны усиз. Со вера, кӧня ке эмъяськон амалъёс шедьтӥз шуыса, но тӥлесьтыд юрттэт куре кудзэ ке но бырйыны. Тӥледлы кудӥз ке но эмъяськон амал кельше ке но, тӥ эмъясь ӧвӧл. Соин ик эштылэсь висёнзэ эмъяны уд быгатӥське. Умойгес луоз, тӥ эштылы юрттӥды ке тупась эмъясез шедьтыны.

6. Мар умой луысал лэсьтыны визь-кенеш сётэмлэсь азьло?

⁶ Ми умой визь-кенеш сётыны быгатӥськомы ке но, умой луоз, ми ӧм дыртэ ке. Малы? Мадёнъёсын 15:28 гожтэмын: «Шонер улӥсь сюлмыныз малпаськыса вераське». Соин ик, ми тодӥськомы ке но, мар вераны, умой луысал нырысь эскерон ортчытыны, вӧсяськыны но ваньзэ умой-умой малпаны. Соку ми умойгес валаломы, милям визь-кенешмы Иеговалэн малпанъёсызлы тупа-а, уг-а шуыса. Эскеромы тае Нафанлэн учырез вылын.

7. Малы милемыз дышетэ Нафанлэн учырез?

⁷ Давид эксэй Нафан пророклы вераз, Иеговалы храм пуктэмез потэ шуыса. Нафан соку ик шуиз: «Тынад сюлмад мар вань, лэсьты». Но Иеговалэн уг поты вал, Давид храмез мед пуктоз шуыса. Давидлы визь-кенеш сётэмлэсь азьло Нафанлы Иеговалэсь малпанзэ тодоно вал (1 Пар. 17:1—4). Та учыр возьматэ: куке милесьтым визь-кенеш куро, визьмо луысал «кыл вераны дыртӥсьтэм» луыны (Иак. 1:19).

8. Малы эшшо визь-кенеш сётыны дыртоно ӧвӧл?

⁸ Учкомы, малы эшшо умой малпаськоно кинлы ке визь-кенеш сётэмлэсь азьло. Пуктэ син азяды: адями тӥляд визь-кенештылэсь кылзӥськиз но ужпум кутӥз, кудӥз урод бервылъёсы вуттӥз. Соку тӥ но янгыш луоды. Соин ик визь-кенеш сётыны дыртоно ӧвӧл.

КУКЕ МИЛЕСЬТЫМ ВИЗЬ-КЕНЕШ УГ КУРО

9. Мае валано тӧроослы визь-кенеш сётэмлэсь азьло? (Галатъёслы 6:1).

⁹ Куддыръя тӧроос визь-кенеш сётыны кулэ агайлы яке сузэрлы, кудӥз шонертэм ужпум кутӥз яке пичи сьӧлык лэсьтӥз. (Лыдӟе Галатъёслы 6:1.) Оло нош, адями бадӟым сьӧлык ӧз лэсьты на, но со ассэ визьмо уг возьы, соин ик шонер сюрес вылысь кожыны быгатэ. Тӧроослэн ужпумзы — солы юрттыны пырак улонэ нуись сюрес вылтӥ мыныны (Иак. 5:19, 20). Но визь-кенеш сётэмлэсь азьло тӧроослы валаны кулэ, зэм ик-а адями шонертэм вамыш лэсьтӥз. Тӧроослы тодазы возёно: соос адямилэн кутэм ужпуменыз соглаш ӧвӧл ке, со уг возьматы, Иегова но сое шонертэмен лыдъя шуыса (Рим. 14:1—4). Нош мар кароно тӧроослы, агай яке сузэр аслаз ужъёсыныз зэмзэ ик Инмарен кусыпъёссэ тӥя ке?

10—12. Мар кароно тӧролы, куке со визь-кенеш сётэ, кудзэ солэсь ӧз куре? (Озьы ик учке суредъёсты.)

¹⁰ Визь-кенеш сётыны, кудзэ милесьтым ӧз куре, туж секыт. Малы? Апостол Павеллэн верамезъя, сыӵе христиан мурт уг вала на, дыр, ассэ шонертэм возе шуыса. Соин ик тӧроослы адямиез нырысь дасяно, солы визь-кенешлэсь кылзӥськыны капчигес мед луоз шуыса.

¹¹ Визь-кенеш сётыны, кудзэ милесьтым уг куро,— чурыт музъемын мае ке будэтыны тыршем кадь. Музъем бордын ужась нырысь музъемез гудӟе, со небытгес мед луоз шуыса. Собере со кидыс кизе но со вылэ ву киська. Тӧролы но та выллем вамышъёсты лэсьтоно. Нырысь, вераны луоз, со музъем дася. Тупась дыре тӧро агайлы вера, со сярысь сюлмаське но соин вераськемез потэ шуыса. Тӧроез ӟеч но яратӥсь адямиез кадь тодо ке, солэн визь-кенешезлэсь кылзӥськыны капчигес луоз.

¹² Агаен пумиськыса, тӧро азьланьтоз музъемез небӟытыны. Кылсярысь, со вералоз, ваньмы дырын-дырын янгышаськомы но ваньмылы визь-кенешъёс кулэ шуыса (Рим. 3:23). Тӧро агаен лякытэн но мур гажаса вераськоз но, Библиез кутыса, солы валэктоз, кыӵе шонертэм вамыш со лэсьтӥз. Куке агай аслэсьтыз янгышсэ валалоз, тӧро «кидыс кизёз» — со агайлы валамон валэктоз, мар солы кароно, югдурез тупатон понна. Собере тӧро «кидыс вылэ ву киськалоз» — со агаез вань сюлмысьтыз ушъялоз но соин ӵош вӧсяськоз (Иак. 5:15).

13. Кызьы тӧроос валаны быгато, адями соослэсь визь-кенешсэс шонер валаз шуыса?

¹³ Куддыръя адямилы одӥгзэ верало, нош со воксё мукетсэ кылэ. Соин ик тӧроослы валаны тыршоно, адями соослэсь визь-кенешсэс шонер валаз шуыса. Со понна соослы лякытэн юанъёс сётъяно (Екк. 12:11). Адямилэн кылъёсыз возьматозы, вала-а со, мае солы тупатоно но малы.

ЧАКЛАНО, КУ МИ ВИЗЬ-КЕНЕШ СЁТӤСЬКОМЫ НО КЫЗЬЫ

14. Малы вожмы потыку визь-кенеш сётоно ӧвӧл?

¹⁴ Тырбыдэстэм луэменымы сэрен, куддыръя ваньмылэн кылъёсмы яке ужъёсмы мукетъёсты ӝоже уськыто (Кол. 3:13). Библия вера, куддыръя ми ог-огмы вылэ йыркуръяськиськомы но шуыса (Еф. 4:26). Вожмы потыку визь-кенеш сётоно ӧвӧл. Малы? Малы ке шуоно «адямилэн вожпотонэз Инмарлэн шонерлыкезъя улыны люкетэ» (Иак. 1:20). Вожпотыку сётэм визь-кенеш, пайда ваем интые, изъян ваёз, дыр. Возьматэ-а та, вожмес поттӥсь адямилы малпанъёсмы яке шӧдонъёсмы сярысь вераны уг яра шуыса? Уг, уг возьматы. Но адямиен вераськемлэсь азьло милемлы буйгатскыны кулэ. Та пумысен умой адӟем карон возьматӥз Елиуй, кудӥз Иовлы умой визь-кенеш сётӥз.

15. Малы ми дышетскиськомы Елиуйлэсь? (Озьы ик учке суредэз.)

¹⁵ Елиуй кӧня ке нунал кылзӥз, мар вера Иов аслаз «буйгатӥсьёсызлы». Иов Елиуйлы жаль потэ вал. Со дыре ик солэн солы вожез потэ вал. Елиуйлы туж ӧз кельшы, Иов аслыз саклык висъяз но вераз, со Инмарлэсь шонерлыкогес шуыса. Но Елиуй Иовлэн кыл куспаз ӧз пыры. Нош куке дыр вуиз солы мар ке но вераны, со Иовен лякытэн но гажаса вераськиз. Соин ик Елиуй быгатӥз Иовлы умой визь-кенеш сётыны (Иов 32:2; 33:1—7). Та учыр милемыз дышетэ, визь-кенешез тупась дыре, озьы ик яратыса но гажаса сётоно шуыса (Екк. 3:1, 7).

ОЙДОЛЭ АЗЬЛАНЯЗ НО ТЫРШОМЫ ВИЗЬ-КЕНЕШ СЁТЫНЫ НО СОЛЭСЬ КЫЛЗӤСЬКЫНЫ

16. Малы милемыз дышето кылъёс, кудъёсыз гожтэмын Псалтирьын 31:8?

¹⁶ Та статьялы валтӥсь кылбурын Иегова кылзэ сётэ: «Тонэн кивалто, синме тон пала берыкто». (Лыдӟе Псалтирез 31:8.) Та кылъёс оскыто, Иегова милемыз котьку дышетоз шуыса. Со милемлы визь-кенешъёс сётэ, озьы ик соосты уже кутыны юрттэ. Иеговалэсь адӟем карыса, куке ми кинлы ке визь-кенеш сётӥськомы, ми азьланяз но солы юрттӥськомы, со визьмо ужпум кутыны мед быгатоз шуыса.

17. Мар ми шӧдӥськомы, куке тӧроос милемлы, Библия вылэ пыкиськыса, визь-кенешъёс сётъяло? (Исаия 32:1, 2).

¹⁷ Туннэ умой визь-кенешъёс милемлы туж кулэ (2 Тим. 3:1). Библиын вераське, тӧроос «кыр дуннеын ошмес кадь» шуыса. (Лыдӟе Исаиялэсь 32:1, 2.) Малы? Малы ке шуоно соослэн Библия вылэ пыкиськыса сётэм визь-кенешъёссы милемлы кужым сёто Иеговалы ужаны-тыршыны. Эшъёс, кудъёсыз тодо, мае милям кылэммы потэ, озьы ке но верало сое, мае милемлы кылыны кулэ,— зэмос кузьым. Соослэн кылъёссы зарни улмоос кадь, кудъёсыз азвесьлэсь лэсьтэм сосудъёсын возисько (Мад. 25:11). Соин ик милемлы дышетсконо умой визь-кенешъёс сётъяны но кылзӥськыны визь-кенешъёслэсь, кудъёссэ милемлы сётъяло.