Куке милемлы визь-кенеш сёто...

1. Мар милемлы юрттоз визьмо ужпумъёс кутылыны но малпам ужъёсмес быдэстыны? (Мадёнъёс 13:10; 15:22).

МИЛЯМ ваньмылэн потэ визьмо ужпумъёс кутылэммы. Озьы ик милям потэ, малпам ужъёсмы мед быдэсмозы шуыса. Библия верамъя, со понна милемлы умой визь-кенеш кулэ. (Лыдӟе Мадёнъёсты 13:10; 15:22.)

2. Мар карыны кылзэ сётэ Иегова?

² Самой умой визь-кенеш сётыны быгатэ визьлыко инмысь Атаймы, Иегова. Со кылзэ сётэ: «Тонэн кивалто, синме тон пала берыкто» (Пс. 31:8). Та кылъёсысь адӟиське, Иегова милемлы умой визь-кенешъёс сётэ шуыса. Со сяна, со милемлы юрттэ соосты уже кутыны.

3. Мае ми эскеромы та статьяын?

³ Та статья милемлы малпаськыны юрттоз Библиысь возетъёс вылын но таӵе ньыль юанъёс вылын: 1) Кыӵе сям мыным юрттоз умой визь-кенешез уже кутыны? 2) Кин мыным умой визь-кенеш сётыны быгатэ? 3) Кызьы возьматоно, мон визь-кенешъёслэсь кылзӥськыны дась шуыса? 4) Малы мукетъёсты куроно ӧвӧл мон интые ужпум кутыны?

КЫӴЕ СЯМ ЮРТТОЗ УМОЙ ВИЗЬ-КЕНЕШЕЗ УЖЕ КУТЫНЫ?

4. Кыӵе сям кулэ, визь-кенеш милемлы пайда мед ваёз шуыса?

⁴ Визь-кенеш туж умой ке но, со милемлы пайда уз вайы, ми сое уже ӧм кутэ ке. Соин ик зӥбыт-востэмесь луоно. Куд-ог учыръёсын асьмелэн тодон-валанъёсмы но быгатонлыкъёсмы уг тырмо. Соин ик валано, милемлы юрттэт кулэ шуыса. Ми зӥбыт-востэмесь ӧм луэ ке, Иегова милемлы юрттыны уз быгаты но солэн Библиын гожтэм кылъёсыз милемлы нокыӵе пайда уз вае (Мих. 6:8; 1 Пётр 5:5). Нош ми зӥбыт-востэмесь луимы ке, Иеговалэсь верамзэ сак кылзомы но ӝегатскытэк сое уже кутомы.

5. Малы Давид вылтӥяськись луыны быгатэ вал?

⁵ Малпаськомы, малы милям дышетскеммы луэ Давид эксэйлэсь. Азинсконъёсыныз сэрен со вылтӥяськись луыны быгатэ вал. Эксэй луэмезлэсь азьвыл со тодмо крезьгурчи вал. Сое эксэй азьын но шудыны куризы (1 Экс. 16:18, 19). Нош куке Давид зырӟемын вал эксэй луыны, Иеговалэн духез солы кужым сётэ вал (1 Экс. 16:11—13). Калык сое данъя вал тушмонъёсты вормемез понна, кылсярысь, филистим калыкысь Голиафез виемез понна (1 Экс. 17:37, 50; 18:7). Давид интыын вылтӥяськись адями малпаны быгатысал, со сокем азинлыко бере, солы нокыӵе визь-кенешъёс кулэ ӧвӧл шуыса. Но Давид зӥбыт-востэм вал.

6. Кытысь ми тодӥськомы, Давид визь-кенешъёсты дунъя вал шуыса? (Озьы ик учке суредэз.)

⁶ Эксэй луэмез бере Давидлэн визьнод сётъясьёсыз вал (1 Пар. 27:32—34). Эксэй луэмезлэсь азьвыл но Давид умой визь-кенешъёсты дунъя вал. Со кылзэ вал пиосмуртъёсты но, кышномуртъёсты но, кылсярысь, Авигеяез. Со быземын вал Наваллы — лек, тау карисьтэм но ассэ гинэ яратӥсь адямилы. Давид зӥбыт-востэм луэмзэ возьматӥз но Авигеялэн визь-кенешезлэсь кылзӥськиз. Солы луыса со бадӟым янгыш ӧз лэсьты (1 Экс. 25:2, 3, 21—25, 32—34).

7. Малы ми дышетскиськомы Давидлэсь? (Екклесиаст 4:13). (Озьы ик учке суредъёсты.)

⁷ Озьыен, малы ми дышетскиськомы Давидлэсь? Соку но, куке ми мае ке умой валаськомы яке милям кыӵе ке кивалтэтмы вань, малпано ӧвӧл, ми ваньзэ тодӥськомы ини но милемлы нокыӵе визь-кенеш кулэ ӧвӧл шуыса. Кин гинэ милемлы визь-кенеш медаз сёты, визь-кенеш умой ке, солэсь кылзӥськыны кулэ. (Лыдӟе Екклесиастэз 4:13.) Соку ми палэнскомы, вылды, бадӟым янгышъёслэсь, кудъёсыз милемлы яке мукетъёсызлы изъян вайысалзы.

КИН МЫНЫМ УМОЙ ВИЗЬ-КЕНЕШ СЁТЫНЫ БЫГАТЭ?

8. Малы Ионафан Давидлы умой визь-кенеш сётыны быгатэ вал?

⁸ Тани малы эшшо милям дышетскеммы луэ Давидлэсь. Давид кылзэ вал соосты, кинъёслэн Иеговаен юн кусыпъёссы вал, но учке вал, со адямиос валало-а шуыса шуг-секытэз, кудӥныз со пумиськиз. Кылсярысь, куке Давидлэн Саулэн кусыпъёссэ тупатэмез потэ вал, со юрттэт куриз Сауллэн пиезлэсь, Ионафанлэсь. Малы Давид Ионафанлы вазиськиз? Малы ке шуоно солэн Иеговаен матысь кусыпъёсыз вал но со Саулэз умой тодэ вал (1 Экс. 20:9—13). Кызьы милям Давидлэсь адӟем кареммы луэ?

9. Кин милемлы умой визь-кенеш сётыны быгатэ? Вералэ пример (Мадёнъёс 13:21).

⁹ Милемлы визь-кенеш кулэ ке, визьмо луысал вераськыны соин, кинлэн Иеговаен матысь кусыпъёсыз вань но кин милесьтым юанмес умой валаa. (Лыдӟе Мадёнъёсты 13:21.) Шуом, егит агайлэн кышно шедьтэмез потэ. Кин солы умой визь-кенеш сётыны быгатоз? Кылсярысь, кузпалъяськымтэ адями, солэн кылъёсыз Библия вылэ пыкиськемын ке. Озьы ик агай вераськыны быгатэ кузпалъёсын, кудъёсызлэн Иеговаен кусыпъёссы юн, соос огкылысь уло но агаез умой тодо. Соос солы пайдаёгес визь-кенеш сётозы, вылды.

10. Мае ми эскеромы азьланяз?

¹⁰ Озьыен, ми эскеримы, кыӵе сям милемлы кулэ но кинэн визьмо луоз кенешыны. Нош табере ойдолэ тодомы, малы дась луоно визь-кенешъёслэсь кылзӥськыны но куроно-а мукетъёсты ми интые ужпум кутыны.

КЫЗЬЫ ВОЗЬМАТОНО, МОН ВИЗЬ-КЕНЕШЪЁСЛЭСЬ КЫЛЗӤСЬКЫНЫ ДАСЬ ШУЫСА?

11, 12. а) Малэсь милемлы палэнсконо? б) Кинлэсь кылзӥськиз Ровоам, куке солы кулэ луись ужпум кутоно вал?

¹¹ Куддыръя адями визь-кенеш утча кадь, нош ачиз ужпум кутӥз ини но табере кылэмез потэ, со шонер ужпум кутӥз шуыса. Солэн уг поты кылзӥськемез визь-кенешъёслэсь, кудъёсыз солы уг кельшо. Сыӵе учырын адямилы саклыксэ висъяно солы, мар луиз Ровоам эксэен.

¹² Соломон эксэй кулэм бере эксэй луиз солэн пиез, Ровоам. Соломонлэн кивалтэмез улсын адямиос узыр улӥзы. Но, соос малпамъя, эксэй соосты укыр секыт ужатэ вал. Соин ик калык Ровоам доры лыктӥз но куриз ужзэ капчиятыны. Ровоам вераз, малпаськоз но берлогес ответ сётоз шуыса. Нырысь со кенешиз пересь визьнодчиосын, кудъёсыз солэн атаезлы ужазы-тыршизы. Со шонер вамыш вал (3 Экс. 12:2—7). Но Ровоам соослэсь ӧз кылзӥськы. Малы? Оло нош, со ужпум кутӥз вал ини но малпа вал, пересь визьнодчиос соин соглаш кариськозы шуыса. Озьы ӧз луы бере, Ровоам мынӥз ӵош будэм эшъёсыз доры. Соослэн визь-кенешсы Ровоамлы кельшиз, малы ке шуоно со кутэм ужпумезлы тупа вал (3 Экс. 12:8—14). Ровоам калыклы вераз сое, мае солы веразы эшъёсыз. Соин ик калык люкиськиз. Со дырысен Ровоам ялан шуг-секытъёсын пумиськылӥз (3 Экс. 12:16—19).

13. Кызьы валано, ми мукетъёсызлэн визь-кенешъёссылэсь кылзӥськыны дась шуыса?

¹³ Малы ми дышетскиськомы Ровоамлэсь? Ми мукетъёсызлэсь визь-кенеш куриськомы ке, соку дась луоно сое уже кутыны. Соин ик солэсь азьвыл ужпум кутоно ӧвӧл. Кызьы валано, ми мукетъёсызлэн визь-кенешъёссылэсь кылзӥськыны дась шуыса? Со понна юалэ асьтэлэсь: «Луыло-а мынам сыӵе учыръёсы, куке мон мукетъёсызлэсь визь-кенеш курисько, нош со мыным уг кельшы ке, соку ик сое палэнтӥсько?»

14. Мар сярысь милемлы тодамы возёно, куке милемлы визь-кенеш сёто? Вералэ пример. (Озьы ик учке суредэз.)

¹⁴ Пуктэ син азяды, агайлы умой уж ӵекто шуыса. Соглаш кариськемезлэсь азьло со тӧроен кенеше. Агай тӧролы вера, со уже интыяськиз ке, солы кемалы командировкаосы ветлоно луоз шуыса. Тӧро агайлы тодаз вайытэ: Библия верамъя, солэн валтӥсь ужез — семьяезлы юрттыны Иеговаен матысь кусыпъёс возьыны (Еф. 6:4; 1 Тим. 5:8). Агай тӧролэсь уг кылзӥськы но кенеше мукет агайёсын но сузэръёсын, аслыз кельшымон визь-кенеш кылытозь. Зэм ик-а агай визь-кенеш утча яке солэн кылэмез потэ, со шонер ужпум кутӥз шуыса? Милемлы вунэтоно ӧвӧл, сюлэммы кескич шуыса (Иер. 17:9). Куддыръя милемлы сёто сыӵе визь-кенеш, кудӥз милемлы уг кельшы, но ӵапак со визь-кенеш милемлы туж кулэ луэ.

КУРОНО-А МУКЕТЪЁСТЫ МОН ИНТЫЕ УЖПУМ КУТЫНЫ?

15. Кызьы асьмеды возёно ӧвӧл но малы?

¹⁵ Иегова возьма, ми пӧлысь котькудӥз ачиз ужпум кутылоз шуыса. Со понна ми асьмеос кыл кутӥськомы (Гал. 6:4, 5). Милям кыӵе ке юанмы кылдэ ке, визьмо луоз эскерыны, мар со сярысь вера Библия, озьы ик юн осконэн христианъёсын кенешыны. Но соосты куроно ӧвӧл ми интые ужпум кутыны. Кызьы сыӵе учыр кылдыны быгатэ? Куд-огъёсыз агайлэсь яке сузэрлэсь юало: «Мар тон карысалыд мон интыын?» Нош куд-огъёсызлэн малпаськыны мылзы уг поты, соин ик соос лэсьто озьы, кызьы мукетъёсыз лэсьто.

16. Кыӵе ужпум кутоно вал Коринфысь христианъёслы сульдэръёслы сётэм сӥль пумысен но кин ужпум кутэ вал, яра-а сыӵе сӥлез сиыны? (1 Коринфъёслы 8:7; 10:25, 26).

¹⁶ Ойдолэ тодамы ваёмы, кыӵе югдур кылдӥз асьме вакытысь I даурын Коринф карын. Со карысь котькуд христиан муртлы ужпум кутоно вал, яра-а сиыны сӥлез, кудӥз сульдэръёслы сётэмын вал. Павел со христианъёслы гожтӥз: «Ми тодӥськомы: дунне вылысь сульдэр — со ӧвӧлтэм маке. Одӥг Инмар сяна, мукет инмар ӧвӧл» (1 Кор. 8:4). Куд-ог христианъёс сыӵе сӥлез сиё вал. Нош мукетъёсызлы возьытлыксы озьы лэсьтыны уг лэзьы вал. (Лыдӟе 1 Коринфъёслы 8:7; 10:25, 26.) Котькудӥз ачиз ужпум кутэ вал. Павеллэн уг поты вал, Коринфысь христианъёс мукетъёсыз понна ужпум мед кутозы шуыса. Озьы ик солэн уг поты вал, соос малпаськытэк мукетъёсыз кадь мед лэсьтозы шуыса. Малы ке шуоно «котькудӥз адями ачиз понна Инмар азьын кыл кутоз» (Рим. 14:10—12).

17. Мар луыны быгатэ, ми малпаськытэк лэсьтӥмы ке озьы, кызьы мукетъёсыз лэсьто? Вералэ пример. (Озьы ик учке суредъёсты.)

¹⁷ Туннэ но сыӵе югдур кылдыны быгатэ-а? Быгатэ. Кылсярысь, котькуд христиан муртлы ужпум кутоно, соглаш-а со, ӧвӧл-а вирлэсь фракциоссэ кутыса эмъяськыныb. Та юан туж секыт потэ ке но, сое валаны кулэ. Малы ке шуоно эмъяськон пумысен котькудӥз ачиз ужпум кутэ (Рим. 14:4). Ми малпаськытэк лэсьтӥськомы ке озьы, кызьы мукетъёсыз лэсьто, ми ноку но визьлыкоесь ум луэ. Нош ми асьмеос ужпум кутӥмы ке но Библиысь возетъёсты лыдэ басьтӥмы ке, соку визьлыкоесь луомы (Евр. 5:14). Нош мар кароно, пыр-поч эскерон ортчытыса но, христиан мурт уг вала ке, кызьы Библиысь возетъёсты аслаз югдураз уже кутоно? Соку солы юн осконэн агайлэсь яке сузэрлэсь юрттэт куроно.

АЗЬЛАНЯЗ НО ВИЗЬ-КЕНЕШ УТЧАЛЭ

18. Кызьы Иегова ми сярысь сюлмаське?

¹⁸ Иегова котькудӥзлы лэзе аслыз ужпумъёс кутыны. Озьы Иегова милемлы оскемзэ возьматэ. Со милемлы кузьмаз аслэсьтыз Кылзэ, Библиез. Озьы ик со милемлы сётэ визьлыко эшъёсты, кудъёсыз милемлы Библиысь возетъёсты валаны юртто. Адӟиське, Иегова, милям Атаймы, яратыса ми сярысь сюлмаське шуыса (Мад. 3:21—23). Кызьы милям солы тау кареммес возьматэммы луэ?

19. Кызьы ми Иеговаез шумпоттыны быгатӥськомы?

¹⁹ Малпаське таӵе пример вылын. Анай-атайёс туж шумпото, куке адӟо, кызьы нылпиоссы будо, Инмарлэн визьлыко ужась-тыршисьёсыз луо но шумпотыса мукетъёсыз сярысь сюлмасько. Ӵапак озьы ик Иегова но туж шумпотэ, куке адӟе, кызьы ми осконмес юнматӥськомы, мукетъёсыныз кенешиськомы но ужпумъёс кутӥськомы, кудъёсыз сое яратэммес возьмато.