Ужаськомы-тыршиськомы Иисус Христослэн кивалтэмез улсын

1. Кыӵе ужез туннэ Иеговалэн быдэстэмез потэ?

ИЕГОВАЛЭН потэ, туннэ Эксэйлык сярысь ӟеч ивор быдэс дунне вылын тодытэмын мед луоз шуыса (Марк 13:10; 1 Тим. 2:3, 4). Со Иеговалэн ужез. Та туж кулэ луись уж, соин ик та ужен кивалтыны со аслэсьтыз яратоно Пизэ косӥз. Ми оскиськомы, та дуннелы пум вуытозь, Иисуслэн кивалтэмез улсын тодытон уж быдэстэмын луоз шуыса (Матф. 24:14).

2. Мае ми эскеромы та статьяын?

² Та статьяын ми эскеромы, кызьы Иисус «оскиськымон, визьмо ляльчи» пыр кивалтэт сётэ (Матф. 24:45). Со сяна, ми эскеромы, кызьы Иисус быдэс дунне вылысь ужась-тыршисьёсызлы юрттэ тодытон ужез нуыны. Озьы ик ми тодомы, кызьы ми Иисуслы но «оскиськымон, визьмо ляльчилы» юрттыны быгатӥськомы.

ИИСУС ТОДЫТОН УЖЕН КИВАЛТЭ

3. Кыӵе кивалтэт сётэмын Иисуслы?

³ Кытысь ми тодӥськомы, Иисус тодытон ужен кивалтэ шуыса? Инме ӝутскон азяз со Галилеяын дышетскисьёсыныз пумиськиз но соослы вераз: «Инмын но, музъем вылын но Мыным котькыӵе кужым сётэмын». Та кылъёс бере Иисус вераз на: «Мынэлэ, вань калыкъёсты дышетэлэ» (Матф. 28:18, 19). Татысь адӟиське: Иисуслы туж бадӟым кивалтэт сётэмын. Кылсярысь, со тодытон ужен кивалтэ.

4. Малы ми оскиськомы, Иисус асьме нуналъёсы но тодытон ужен кивалтэ шуыса?

⁴ Иисус шуиз, тодытон но дышетскисьёсты дасян уж вань калыкъёс пӧлын ортчытӥськыны кулэ шуыса. Озьы ик со вераз, «вань нуналъёсы, дунне бырытозь», со дышетскисьёсыныз огазьын луоз шуыса (Матф. 28:20). Та кылъёс возьмато: Иисус асьме нуналъёсы но тодытон ужен кивалтэ.

5. Кызьы ми вылын быдэсмо Псалтирьысь 109:3 кылъёс?

⁵ Иисус ӧз сюлмаськы, аран вакытэ ужасьёсыз уз тырме шуыса. Со тодӥз, псаломъёсты гожъясьлэн азьпалзэ тодытыса верам кылъёсыз быдэсмозы шуыса: «Кужмыдлэн возьматскон нуналаз дун-сьӧлыктэм пиштыса улонын Тынад калыкед дась луоз» (Пс. 109:3). Тӥ Эксэйлык сярысь иворез шумпотыса тодытӥськоды ке, тӥ Иисуслы но оскиськымон ляльчилы юрттӥськоды. Озьы ик тӥ вылын та азьпалзэ ивортон быдэсме. Та ужез дугдытыны уг луы. Озьы ке но шуг-секытъёс но вань.

6. Мар люкетэ Эксэйлык сярысь иворез тодытыны?

⁶ Одӥгез, мар люкетыны быгатэ Эксэйлык сярысь иворез тодытыны,— со уйылон-уллянъёс. Зэмос йыбырттонлэсь палэнскемъёс, священникъёс но кивалтӥсьёс ми сярысь трос шонертэмзэ верало. Ӵыжы-выжыосмы, тодмоосмы но ӵош ужасьёсмы соослы оскизы ке, милесьтым мылкыдмес ӝутыны быгатозы Иеговаез кельтыны но тодытэмысь дугдыны. Куд-ог шаеръёсын Инмарлэсь калыксэ кышкато, уйыло-улляло но пытсэтъёсы куштыло. Но ми талы ум паймиське, малы ке шуоно Иисус вераз: «Мынам нимы понна тӥледыз вань калыкъёс адӟемпотостэм карозы» (Матф. 24:9). Милемыз адӟемпотостэм каремзы возьматэ, ми Иисуслэсь адӟем кариськомы но Иеговалы ярамон луиськомы шуыса (Матф. 5:11, 12). Ми тодӥськомы: уйылон-уллянъёсын Шайтан кивалтэ. Но Иисус Шайтанлэсь кужмогес! Солэн юрттэмезлы луыса ӟеч иворез пӧртэм калыкъёсысь адямиос кыло.

7. Мар возьматэ, Усьтӥськонысь 14:6, 7 кылъёс быдэсмо шуыса?

⁷ Эшшо одӥгез шуг-секыт, кудӥз милемлы люкетыны быгатэ,— пӧртэм кылъёсын вераськон. Иисус Христос апостол Иоаннлы возьматӥз, берпум нуналъёсы пӧртэм кылъёс ӟеч иворез вераны уз люкетэ шуыса. (Лыдӟе Усьтӥськонэз 14:6, 7.) Кызьы быдэсме та адӟытон? Ми вань адямиосты тодматӥськомы Эксэйлык сярысь иворен. Милям сайтамы Библия вылэ пыкиськыса гожтэм туж трос публикациос вань. Соосты быдэс дунне вылын лыдӟыны луэ, малы ке шуоно соос 1 000-лэсь но тросгес кылъёсы берыктэмын. Озьы ик милям вань «Пумтэм вапумъёс ӵоже шумпотыса улэ!» книгамы, Библиез дышетонъя валтӥсь тӥрлыкмы. Кивалтӥсь кенеш лэзиз сое 700-лэсь но тросгес кылъёсы берыктыны. Со сяна, ми синтэмъёслы Брайль шрифтэн публикациос печатласькомы, нош пельтэмъёслы видеороликъёс поттӥськомы. Ми ас синъёсынымы адӟиськомы, кызьы быдэсмо та азьпалзэ ивортонъёс. «Вань кылъёсын вераськись калыкъёс пӧлысь» адямиос дышетско «чылкыт кылын-ымын вераськыны» (Зах. 8:23; Соф. 3:9). Та ужен Иисус Христос кивалтэ.

8. Кыӵе пайда вае тодытон уж?

⁸ Туннэ Иеговалэн организацияз 240 шаеръёсысь 8 000 000-лэсь тросгес адямиос пыро. Котькуд ар 100 000-лэсь тросгес выль дышетскисьёс пылатӥсько. Нош тужгес но валтӥсез, соос «выль адями» луо, яке христиан сямъёссэс будэто (Кол. 3:8—10). Соос вылын быдэсмо Исаиялэн 2:4 кылъёс: «Азьланяз ожмаськыны уз ни дышетске». Соос пӧлысь тросэз дугдӥзы азыса-калгыса улэмысь, лек ужъёсын выремысь но мукетъёсты адӟемпотостэм каремысь. Милесьтым умой ужъёсмес адӟыса, соослэн мылкыдзы ӝутске Иеговалэн организациеныз тодматскыны. Озьы ик умой ужъёсмы возьмато, ми Иисус Христос Кивалтӥсьмы сьӧры мынӥськомы шуыса (Иоанн 13:35; 1 Пётр 2:12). Ваньмыз та луыны быгатэ Иисуслэн юрттэмезлы луыса.

ИИСУС «ОСКИСЬКЫМОН, ВИЗЬМО ЛЯЛЬЧИЕЗ» ПУКТӤЗ

9. Мар азьло ик верамын вал берпум нуналъёс сярысь Матфейлэсь 24:45—47?

⁹ Лыдӟе Матфейлэсь 24:45—47. Иисус азьло ик вераз, берпум нуналъёсы «оскиськымон, визьмо ляльчиез» пуктоз шуыса, Инмарлэн калыкезлы кивалтэт сётон понна. Ми адӟиськомы, туннэ та ляльчи туж тырше шуыса. Та пиосмуртъёс пыр Кивалтӥсьмы Инмарлэн ужась-тыршисьёсызлы но зэмлыкен тунсыкъяськисьёслы «ас дыраз сиён» сётъя. Та зырӟем христианъёс мукетъёсызлэн осконэнызы кузёяськыса уг уло (2 Кор. 1:24). Соос Иисус Христосэз Инмарлэн калыкезлэн Азьветлӥсеныз лыдъяло (Ис. 55:4).

10. Кыӵе книга юрттӥз тыныд зэмлыкен тодматскыны? (Озьы ик учке суредъёсты.)

¹⁰ Оскиськымон ляльчи 1919-тӥ арын пуктэмын вал. Со дырысен со поттӥз трос книгаосты, кудъёсыз зӥбыт-востэм адямиослы зэмлыкен тодматскыны юрттӥзы. Адямиосты Библиысь валтӥсь дышетонъёсын тодматон понна, 1921-тӥ арын ляльчи «Инмарлэн арфаез» книгаез поттӥз. Дыр ортчыса, потӥзы выль публикациос. Кыӵе книга юрттӥз тӥледлы инмысь Атаенымы тодматскыны но сое яратыны? «Инмар оскиськымон», «Зэмлык, кудӥз пырак улонэ нуэ» яке «Тон быгатӥськод рай музъем вылын пырак улыны»? Оло нош «Тодон-валан, кудӥз пырак улонэ нуэ», «Малы зэмзэ ик дышетэ Библия?», «Малы дышетэ милемыз Библия?» яке берпуметӥез тӥрлыкмы — «Пумтэм вапумъёс ӵоже шумпотыса улэ!»? Та книгаос юртто Христослэсь дышетскисьёссэ дасяны. Соос пӧлысь котькудӥз самой тупась дыре поттэмын вал.

11. Малы ваньмылы милемлы Иегова но Библия сярысь мур тодон-валан басьтоно?

¹¹ Зэмлыкен тунсыкъяськисьёслы гинэ ӧвӧл, милемлы ваньмылы Иегова но Библия сярысь мур тодон-валан басьтоно. Апостол Павел гожтӥз: «Быдэ вуэмъёс понна чурыт сиён вань». Солы луыса ми «ӟечез но, уродэз но висъяны» быгатӥськомы (Евр. 5:14). Адӟиське, туннэ тросэз кырсь ужъёс пӧлы выемын шуыса. Соин ик милемлы Иеговалэсь кылзӥськыны секыт луэ. Но Иисус сётэ милемлы ваньзэ, осконмы юн мед луоз шуыса. «Оскиськымон, визьмо ляльчи» пыр со милемлы кивалтэт сётэ.

12. Малы вераны луоз, Иисус сямен, ми Инмарлэсь нимзэ туж гажаськомы шуыса?

¹² Иисус сямен, ми Инмарлэсь нимзэ туж гажаськомы (Иоанн 17:6, 26). Кылсярысь, 1931-тӥ арын ми нимаськыны кутскимы Иеговалэн Адӟись-Ивортӥсьёсыз шуыса. Та ним Библия вылэ пыкиськыса быръемын. Озьы ик со возьматэ, инмысь Атаенымы матысь кусыпъёсмы вань шуыса (Ис. 43:10—12). Со арын ик коньывуон толэзьысен Инмарлэсь нимзэ котькуд «Возьмаськон башнялэн» вылбамаз гожъяны кутскизы. Со сяна, та ним Библилэн «Выль дунне» берыктэмаз кутӥське котькытын, кытын со луыны кулэ. Таин ми пӧртэм луиськомы христиан черкъёслэсь, кудъёсыз Инмарлэсь нимзэ Библиосазы уг гожъяло!

ИИСУС ИНМАРЛЭСЬ КАЛЫКСЭ ВАЛТЭ

13. Малы тӥ оскиськоды, «оскиськымон, визьмо ляльчи» пыр Иисус кивалтэ шуыса? (Иоанн 6:68).

¹³ «Оскиськымон, визьмо ляльчи» пыр Иисус дышетскисьёссэ Инмар доры вае. Кызьы тӥ учкиськоды Иеговалэн организациез шоры? Тӥ шӧдӥськоды, дыр, сое ик, мае шӧдӥз апостол Пётр, кудӥз Иисуслы вераз: «Кин доры милемлы мыноно? Тынад быронтэм улонлэн кылъёсыз вань» (Иоанн 6:68). Кытын ми али луысалмы, Иеговалэн Адӟись-Ивортӥсьёсыныз ӧм тодматскысалмы ке? Инмарлэн организациез пыр Иисус сётэ милемлы трос духовной сиён. Озьы ик со дышетэ милемыз Иеговалы ужаны-тыршыны. Со сяна, со юрттэ милемлы «выль адями» луыны, ми Иеговаез мед шумпоттомы шуыса (Еф. 4:24).

14. Кызьы тӥ сярысь сюлмаськиз Иеговалэн организациез COVID-19 пандемия дыръя?

¹⁴ Иисус секыт дыръёсы но милемлы умой кивалтэт сётэ. Тае адӟыны луиз, куке COVID-19 пандемия кутскиз. Тросэз та дуннеын мар карыны ик ӧз тодэ. Нош Иисус умой кивалтэт сётӥз, милемыз утён понна. Милесьтым мылкыдмес ӝутӥзы маскаос нуллыны но адямиослэсь палэнынгес возиськыны. Тӧроослэсь мылкыдзэс ӝутӥзы чакланы, кенешысь агайёслэн но сузэръёслэн улон понна ваньмыз кулэез мед луоз но Инмарен кусыпъёссы юнэсь мед луозы шуыса (Ис. 32:1, 2). Озьы ик Кивалтӥсь кенеш интернет-телевиденимы пыр милемлы кивалтэт сётъяз но юнматон кылъёс вералляз.

15. Кыӵе кивалтэт сётӥз организацимы пандемия дыръя пумиськонъёс но тодытон уж пумысен? Кыӵе пайда со вайиз?

¹⁵ Озьы ик пандемия дыръя кивалтэт сётэмын вал, кызьы кенешлэсь пумиськонъёссэ ортчытъяно но ужан-тыршонмес азьланьтоно. Ми соку ик кутскимы пумиськонъёсмес интернет пыр ортчытъяны, нош тодытӥмы телефон но гожтэтъёс пыр. Иегова тыршеммес бакель кариз. Тросаз шаеръёсын тодытӥсьёслэн лыдзы будӥз. Ужан-тыршонзы дыръя тросэзлэн туж тунсыко учыръёссы вал. (Учке «Иегова тодытон ужез бакель каре» рамкаез.)

16. Кыӵе осконмы милям вань?

¹⁶ Кин ке но малпаз, вылды, организацимы мултэс чаклаське шуыса. Но ми выльысь но выльысь адӟимы, организацимылэн визь-кенешъёсыз визьмоесь вал шуыса (Матф. 11:19). Ми тодӥськомы: Иисус милемыз яратыса валтэ. Ми юн оскиськомы, мар гинэ милемын медаз луы, Иегова но солэн яратоно Пиез милемыз ноку уз кельтэ шуыса. (Лыдӟе Еврейёслы 13:5, 6.)

17. Мае тӥ шӧдӥськоды, куке малпаськиськоды, милемыз Иисус валтэ шуыса?

¹⁷ Ми туж шумпотӥськомы, Иисус — милям Эксэймы шуыса. Ми пыриськомы организацие, кудаз нокин уг учкы, кыӵе тон калыкысь но кыӵе кылын вераськиськод. Милям вань трос духовной сиёнмы. Озьы ик милям вань ваньмыз, Эксэйлык сярысь ӟеч иворез тодытон понна. Ваньмы ми дышетскиськомы христиан сямъёсмес будэтыны но ог-огмес вань сюлмысьтымы яратыны. Соин ик ми туж данъяськиськомы Иисусэн, милям Кивалтӥсенымы!