Вань улытозямы Быдӟым Дышетӥсьмылэсь дышетскиськомы

АНАЙ-АТАЕ УМОЙ АДӞЕМ КАРОН КЕЛЬТӤЗЫ

1950-тӥ аръёслэн пумазы анай-атае Италиысь Канадае кошкизы но улыны интыяськизы Ки́ндерсли каре (Саска́чеван провинция). Ӝоген соос зэмлыкен тодматскизы. Улонамы со валтӥсез луиз. Куддыръя ми ваньмы ӵош лумбыт тодытӥмы. Соин ик мон куддыръя серекъяса верасько, 8 аресысеным ик юрттӥсь пионер луыса ужасько-тыршисько ини шуыса!

Анай-атае узыресь ӧй вал. Но соос туж умой адӟем карон возьматӥзы, кызьы Иеговалы ужан-тыршонэз нырысетӥ интые пуктоно. 1963-тӥ арын атае но анае трос арбериоссэс вузазы, калыккуспо конгрессэ мынон понна. Со ортчытӥськиз Пасаде́на карын (Огазеяськем Штатъёс, Калифорния штат). 1972-тӥ арын ми кошкимы 1000 иськем кеме, Трейл каре (Канада, Британ Колумбия провинция), отын итальян кылын вераськись адямиослы тодытон понна. Атае одӥг магазинын утялске вал. Куке солы умойгес уж ӵекто вал, со соглаш ӧз кариськылы, уж Иеговалы ужаны-тыршыны медаз люкеты шуыса.

Мон туж тау карисько анай-атаелы. Пичи дыръям ик соос мыным валаны юрттӥзы, Эксэйлыкез нырысетӥ интые пуктӥ ке, Иегова мон сярысь сюлмаськоз шуыса (Матф. 6:33). Быдэс улонэ ӵоже мон сое трос пол ас вылам шӧдӥ.

КУТСКИСЬКО ВАНЬ ДЫРМЕ СЁТЫСА УЖАНЫ-ТЫРШЫНЫ

1980-тӥ арын мон кышно басьтӥ Де́бби нимо туж умой сузэрез, кудӥз Иеговалы ужан-тыршонэз нырысетӥ интые пуктэ вал. Милям вань дырмес сётыса ужаммы-тыршеммы потэ вал. Соин ик, кузпалъяськеммы бере куинь толэзь ортчыса, Дебби пионер луиз. Ар ортчыса, ми кошкимы пичи кенеше, кытын юрттэт кулэ вал. Соку мон но пионер луи.

Дыр ортчыса, милемлы отын туж ик ӧз кельшы ини. Соин ик ми малпамы отысь кошкыны. Нырысь ми малпамы вераськыны ёросэз чакласен. Со лякытэн, но шонерак милемлы шуиз: «Тӥ асьтэос югдурысьтыды уродзэ гинэ адӟиськоды. Тырше умойзэ шедьтыны — со одно ик вань». Та визь-кенеш дырыз дыръя сётэмын вал (Пс. 140:5). Ми соку ик сое уже кутӥмы но валамы, агай шонер вераз шуыса. Ми адӟимы, кенешын вань шуыса соос, кинъёслэн Иеговалы тросгес лэсьтэмзы потэ, кылсярысь, нылпиос но оскисьтэм картъёсын сузэръёс. Та учыр милемыз тросэзлы дышетӥз. Ми валамы, умойзэ адӟыны тыршоно но возьмано шуыса, ку Иегова шуг-секытэз сэрттоз-пертчоз (Мих. 7:7). Собере ми нош ик шумпотыса ужаны-тыршыны кутскимы.

Пионеръёсты дышетӥсь школаын нырысетӥзэ дышетскыкумы, милям туж умой дышетӥсьёсмы вал. Азьвыл соос мукет шаеръёсын ужазы-тыршизы. Соос милемлы слайдъёс возьматъязы но вераллязы, кыӵе соослэн шуг-секытъёссы но бакель каронъёссы вал. Соку милям мылкыдмы ӝутскиз миссионеръёс луыны. Озьы ми асьмелы выль ужпум пуктӥмы.

Ужпуммес быдэстон понна, 1984-тӥ арын ми кошкимы Британ Колумбиысь 4000 иськем кеме, Квебе́к провинцие. Отын француз кылын вераськись адямиос уло вал. Милемлы выль сям-йылолъёслы дышоно но выль кылэз дышетоно луиз. Со сяна, ӵем дыръя милям коньдонмы уг тырмы вал. Кӧня ке дыр ӵоже ми картошка гинэ сиыса улӥмы. Одӥг тодмомы милемлы лэзиз сое аслаз бусыысьтыз бичаны. Дебби дышиз картошкалэсь туж пӧртэм сиён пӧраны. Шуг-секытъёс шоры учкытэк, ми шумпотонмес ӧм ыштэ. Ми адӟимы, Иегова ми сярысь сюлмаське шуыса (Пс. 63:11).

Огпол милемлы жингыртӥзы но Канадаысь Вефиле ӧтизы. Ми туж паймемын вал, малы ке шуоно солэсь азьвыл Галаад школаын дышетскон понна заявление гожтӥмы вал. Озьы ке но ми соглаш кариськимы Вефиле мыныны. Отчы вуэммы бере ми филиаллэн комитетысьтыз Ке́ннет Ли́ттл агайлэсь юамы: «Нош мар кароно, милемыз Галаадэ ӧтизы ке?» Со шуиз: «Ӧтизы ке, соку ик вераськомы».

Арня ортчыса, монэ но Деббиез Галаадэ ӧтизы. Соин ик милемлы ужпум кутоно вал. Литтл агай милемлы шуиз: «Кыӵе гинэ сюрес тӥ медад быръе, куддыръя малпан кылдылоз, мукетсэ быръёно вал шуыса. Уг луы вераны, одӥгез мукетызлэсь умойгес шуыса. Иегова котькудзэ бакель карыны быгатэ». Ми ужпум кутӥмы Галаадэ мыныны. Берло аръёсы ми трос пол тодамы вайылӥмы Литтл агайлэсь кылъёссэ. Ми ӵем вераллямы солэсь кылъёссэ агайёслы но сузэръёслы, кудъёсызлы со выллем быръён лэсьтоно вал.

МИССИОНЕРЪЁС ЛУЫСА УЖАСЬКОМЫ-ТЫРШИСЬКОМЫ

Ми шумпотыса дышетскимы Галаад школалэн 83-тӥ классаз мукет 24 дышетскисьёсын ӵош. Дышетсконмы кутскиз 1987-тӥ арын, оштолэзе. Со ортчытӥськиз Бруклинын (Нью-Йорк). Ю́лиссис Гласс но Джек Ре́дфорд агайёс милям дышетӥсьёсмы вал. Вить толэзь туж ӝог ортчиз. 1987-тӥ арын, 6-тӥ куарусёнэ, дышетсконмы йылпумъяськиз. Милемыз ыстӥзы Гаити шаере Жо́н но Мари́ Гуд кузпалъёсын ӵош.

1962-тӥ арысен Галаадын дышетскемъёсты Гаитие ӧз ыстылэ. Со арын отысь берпуметӥ миссионеръёс кошкизы. Дышетсконмес йылпумъяммы бере куинь арня ортчыса, ми вуимы Гаитие, гурезё интые, пичи кенеше, кытын 35 ивортӥсь вал. Ми егитэсь на вал но огнамы миссионеръёслэн коркаязы улӥмы. Гаитиын адямиос туж куанересь вал. Тросэзлэн лыдӟиськемзы но уг луы вал. Мае гинэ ми ӧм адӟе, отын ужаны-тыршыны кутскыкумы! Бугыръяськонъёс, политикаен герӟаськем шуг-секытъёс, ӝуась баррикадаос но сильтӧлъёс.

Ми тросэзлы дышетскимы Гаитиысь агайёслэсь но сузэръёслэсь, кудъёсыз, номыр шоры учкытэк, шумпотыса уло вал. Улонзы секыт вал ке но, соос Иеговаез но ужан-тыршонэз яратӥзы. Одӥг арлыдо сузэр лыдӟиськыны уг быгаты вал ке но, со Библиысь 150 кылбуръёсты тодэ вал. Котырысьтымы югдур шоры учкыса, ми валаськомы вал, Инмарлэн Эксэйлыкез гинэ адямиослэсь улонзэс тупатоз шуыса. Милям туж потэ вал та сярысь мукетъёсызлы вераммы. Ми шумпотыса тодамы вайылӥськомы соосты, кинъёсын Библиез дышетӥмы. Берлогес соос пӧлысь куд-огъёсыз пионеръёс, нимысьтыз пионеръёс но тӧроос луизы.

Гаитиын мон тодматски Тре́вор нимо егит пиосмуртэн, кудӥз мормон миссионер вал. Ми соин кӧня ке пол Библия сярысь вераськимы. Аръёс ортчыса, мон солэсь гожтэт басьтӥ. Отын гожтэмын вал: «Вуоно конгрессын мон пылатӥсько. Мынам потэ Гаитие берытскеме но нимысьтыз пионер луыса ужаме-тыршеме отын, кытын куке но мон мормон миссионер вал». Треворлэн малпанэз быдэсмиз. Соос кышноеныз трос аръёс ӵоже Гаитиын тодытӥзы.

МЫНӤСЬКОМЫ ЕВРОПАЕ, НОШ СОБЕРЕ — АФРИКАЕ

Милемыз ыстӥзы Европалэн со люкетаз, кытын ужмес нуыны люкето вал. 1992-тӥ арын ми вуимы Любля́на каре (Словения). Со палъёсын анай-атае вордӥськизы но будӥзы. Соку со интыын, кытын азьвыл Югославия вал, ожмаськон мынэ вал. Со интыын тодытон уж понна кыл кутэ вал Австриысь филиал, кудӥз Ве́наын интыяськемын вал, озьы ик офисъёс, кудъёсыз интыяськемын вал За́гребын (Хорватия) но Белграды́н (Сербия). Нош табере агайёс малпало вал котькуд республикаын Вефиль усьтыны.

Озьыен, милемлы нош ик выль кыл дышетоно но выль сям-йылолъёслы дышоно луиз. Отын улӥсь адямиос шуо вал: «Е́зик е те́жик», мар «Милям кылмы секыт» шуэм луэ. Зэм но, со милемлы секытэн сётӥське вал. Но милемыз паймытэ вал агайёслэн но сузэръёслэн оскымон луэмзы. Соос дась вал кылзӥськыны организациын лэсьтэм воштӥськонъёслэсь. Ми адӟимы, Иегова соосты бакель каре шуыса. Ми эшшо огпол валамы, Иегова ваньзэ ас дыраз но яратыса тупатэ шуыса. Словениын улыкумы, ми тросэзлы дышетскимы.

Но азьланяз милемыз эшшо но трос воштӥськонъёс возьмазы. 2000-тӥ арын милемыз ыстӥзы Шундыпуксёнпал Африкаысь Кот-д’Ивуа́р шаере. Собере, 2002-тӥ арын, шуркынмонэ, граждан ож сэрен милемыз ыстӥзы Сье́рра-Лео́не шаере. Соку гинэ отын йылпумъяськиз 11 ар ӵоже кыстӥськись граждан ож. Кот-д’Ивуарысь малпамтэ шорысь кошкыны секыт вал. Но солы луыса, малы ми азьвыл дышетскимы, ми шумпотонмес ӧм ыштэ.

Сьерра-Леонеын вал трос адямиос, кудъёсызлэн Библиез дышетэмзы потэ вал. Ми солы саклыкмес висъямы. Со сяна, милемыз туж паймытэ вал ожмаськон пыр потэм агайёслэн но сузэръёслэн яратонзы. Куанер улэмзы шоры учкытэк, соос дась вал мукетъёсызлы сётыны сое, мар асьсэлэн вал. Одӥг сузэрлэн Деббилы кыӵе ке но дӥськут кузьмамез потэ вал. Нырысь Дебби уг басьты вал. Но сузэр туж куриз кузьымзэ басьтыны. Со шуиз: «Ожмаськон дыръя мукет шаеръёсысь агайёс милемлы юрттӥськизы, табере ми юрттыны быгатӥськомы». Ми Деббиен ужпум пуктӥмы соослэсь адӟем карыны.

Дыр ортчыса, ми Кот-д’Ивуаре берытскимы. Но политикаен герӟаськем шуг-секытъёсын сэрен отын нош ик бугыръяськонъёс вӧлмизы. Соин ик 2004-тӥ арын, шуркынмонэ, милемыз вертолётэн нуизы. Котькудӥз 10 килограмм секта гинэ сумка басьтыны быгатэ вал. Уйзэ ми ортчытӥмы француз ож базаын. Отын ми выж вылын изимы. Мукет нуналаз ми лобимы Швейцарие. Уйшор котырын ми Вефиле вуимы. Милемыз пумитазы филиаллэн комитетысьтыз агайёс, «Ужан-тыршонэз умоятон школаысь» дышетӥсьёс но соослэн кышнооссы. Ми та дырозь тодӥськомы на милемыз юн ӟыгыръямзэс, пӧсь сиёнэз но туж трос швейцар шоколадэз. Соослэн яратонзы милям сюлмамы ик пыриз.

Огдырлы милемыз ыстӥзы Ганае, нош собере, бугыръяськонъёс шипчем бере,— нош ик Кот-д’Ивуаре. Агайёс юрттӥзы милемлы ваньзэ чиданы, куке милемлы шаерысь шаере кошкылоно луиз. Ми тодӥськомы, Иеговалэн ужась-тыршисьёсыз ог-огзылы котьку яратонзэс возьмато шуыса. Ми Деббиен ужпум кутӥмы сое котьку дунъяны. Секыт вакытэ но ми тросэзлы дышетскимы.

БЛИЖНИЙ ВОСТОКЫН УЖАН-ТЫРШОН

2006-тӥ арын ми валтӥсь кивалтонниысь гожтэт басьтӥмы. Отын гожтэмын вал, ми Ближний Востокын ужаломы-тыршомы шуыса. Милемыз выль шуг-секытъёс, кылъёс но сям-йылолъёс возьмазы. Милемлы тросэзлы дышетсконо вал, малы ке шуоно отын политикаен но религиен сэрен трос шуг-секытъёс вал. Милемыз туж паймытэ вал, пӧртэм сям-йылолъёс шоры учкытэк, агайёс но сузэръёс огкылысь уло шуыса. Соос быгатӥзы озьы улыны, малы ке шуоно Иеговалэн организациезлэн кивалтэтэзлэсь кылзӥськизы. Ми данъяськиськомы вал агайёсынымы но сузэръёсынымы. Соос пӧлысь тросэз кышкатэк чидазы ӵыжы-выжыоссылэсь, ӵош дышетскисьёссылэсь, ӵош ужасьёссылэсь но бускельёссылэсь пумитъяськемзэс.

2012-тӥ арын ми ветлӥмы бадӟым нимысьтыз конгрессэ, кудӥз ортчытӥськиз Тель-Ави́в карын (Израиль). Со палан Инмарлэн калыкез сокем трос кузя ӧз люкаськылы асьме вакытысь 33-тӥ арын ортчем Витьтонэтӥ нуналысен. Со туж паймон вал!

Огпол милемыз куризы мыныны шаере, кудаз ужмес нуыны люкето вал. Ми сьӧрамы кӧня ке публикациосмес басьтӥмы, отысь агайёсын но сузэръёсын тодытӥмы но пичи конгрессъёсы ветлӥмы. Котькытын ожтӥрлыкен солдатъёс но блокпостъёс вал. Но ми ӧм кышкалэ, малы ке шуоно чакласькыса ветлӥмы но милемын ӵош котьку кӧня ке ивортӥсьёс вал.

АФРИКАЕ БЕРЫТСКИСЬКОМЫ

2013-тӥ арын милемлы выль уж сётӥзы — ужаны-тыршыны филиалын, кудӥз интыяськемын Киншаса карын (Конго Демократической Республика). Конго — чебер инкуазен бадӟым шаер. Но отын адямиос туж куанер уло но трос бугыръяськонъёсын сэрен курадӟо. Нырысь ми малпамы: «Африкаез ми тодӥськомы, соин ик ми дась!» Но милемлы тросэзлы дышетсконо на вал. Кылсярысь, кызьы кулэ интые вуоно, сюресъёс но выжъёс ӧвӧл ке. Со интыысь агайёс но сузэръёс милемлы туж умой адӟем карон возьматӥзы! Коньдонэн герӟаськем шуг-секытъёс шоры учкытэк, соос шумпотыса улӥзы, ужан-тыршонэз яратӥзы но туж тыршизы кенешлэн пумиськонъёсаз но конгрессъёсы ветлыны. Ми туж умой адӟимы Иеговалэсь юрттэмзэ но бакель каремзэ, малы ке шуоно тросгес но тросгес адямиос зэмлыкен тодматскизы но Инмарлы ужаны-тыршыны мылкыд каризы. Конгоын улыса, ми тросэзлы дышетскимы но выль эшъёс шедьтӥмы, кудъёсыз милемлы семья кадь луизы.

2017-тӥ арлэн пумаз ми нош ик мукет интые кошкимы, табере Лымшор Африкаысь Вефиле. Азьвыл Вефильёсын ӵошатыса, таиз трослы бадӟымгес вал. Милемлы сётӥзы сыӵе уж, кудзэ азьвыл ми ноку ӧм быдэсъялэ. Соин ик милемлы нош ик вылезлы дышетсконо луиз. Милемлы туж юрттӥз со, малы ми азьвыл дышетскимы. ЮАР-ын ми тодматскимы агайёсын но сузэръёсын, кудъёсыз 20, 30, 40 но тросгес аръёс ӵоже Иеговалы ужазы-тыршизы. Ми ваньзэс туж яратӥмы. Кыӵе умой, Вефильын пӧртэм калыкъёсысь адямиос огкылысь ужало шуыса. Зэм но, Иегова выль адями луыны но Библиысь возетъёсъя улыны тыршемзэс бакель каре.

Вань дырмес сётыса ужан-тыршонмы куспын милям трос тунсыко учыръёсмы вал. Милемлы выль сям-йылолъёслы дышоно но выль кылъёсты дышетоно луиз. Со котьку ик капчи ӧй вал. Но организацилэн, озьы ик агайёслэн но сузэръёслэн юрттэмзылы луыса ми котьку шӧдӥмы, Иегова милемыз яратэ шуыса (Пс. 143:2). Ми оскиськомы, трос аръёс ӵоже дышетскеммылы луыса али ми Иеговалы эшшо но трос пайда вайыны быгатӥськомы шуыса.

Мон тау карисько анай-атаелы монэ дышетэмзы понна. Мон туж дунъясько дуно кышноелэсь юрттэмзэ. Озьы ик мон туж тау карисько пӧртэм шаеръёсысь агайёслы но сузэръёслы умой адӟем карон возьматэмзы понна. Мае ми возьмаськомы азьпал улонлэсь? Ми дась, Быдӟым Дышетӥсьмы милемыз эшшо малы ке дышетоз шуыса!