Иегова монэ малпамелэсь но тросгес бакель кариз

Куке мон кышкамысь дугдӥ но пионер луыса ужаны-тыршыны кутски, улонэлэн выль тунсыко люкетэз усьтӥськиз, кудӥз сярысь мон малпаны но ӧй быгаты (Еф. 3:20). Нош мар мынэсьтым мылкыдме ӝутӥз сыӵе вамыш лэсьтыны? Ваелэ мон кутсконысеныз ик ваньзэ верало.

Мон вордӥськи Берлин карын (Германия) 1939-тӥ арын, Кыкетӥ дунневыл ож кутскем берегес ик. 1945-тӥ арын, куке ож йылпумъяськон пала вуэ вал ини, Берлин вылэ трос бомбаос куязы. Одӥг пол соосты куязы милям урамамы, но ми семьяеным бомбаослэсь пегӟон интые ватӥськыны быгатӥмы. Берлогес ми Эрфурт каре кошкимы, анаелэн вордӥськем караз. Отын ми кышкатэк улыны быгатӥмы.

Анаелэн туж потэ вал зэмлыкез шедьтэмез. Со философъёсын гожтэм книгаосты лыдӟиз но пӧртэм религиослэсь осконъёссэс эскериз. Озьы ке но юанъёсызлы валэктонъёс со ӧз шедьты. 1948-тӥ ар котырын ми доры Иеговалэн кык Адӟись-Ивортӥсьёсыз лыктӥзы. Анае соосты пырыны ӧтиз но туж трос юанъёс сётъяз. Час но ӧз ортчы, со мыным но сузэрелы вераз: «Мон зэмлыкез шедьтӥ!» Ӝоген ми анаеным но сузэреным Эрфурт карысь кенешлэн пумиськонъёсаз ветлыны кутскимы.

1950-тӥ арын ми Берлинэ берытскимы но «Берлин, Кройцберг» кенеше ветлыны кутскимы. Собере ми эшшо огпол улон интымес воштӥмы но «Берлин, Темпельхоф» кенеше ветлӥмы. Дыр ортчыса, анае пылатӥськиз, нош мон уг дӥсьтӥськы на вал. Малы?

КЫЗЬЫ МОН ВОЗЬДАСЬКОН СЯММЕ ВОРМИ

Мон Иеговалы ужан-тыршонэ трос ӧй пыриськы, малы ке шуоно возьдаськись вал. Мон тодытон уже пыриськылӥ, озьы ке но кык ар куспын ачим нокинэн вераськыны ӧй кутскы. Нош ваньмыз воштӥськиз, куке мон эшъяськыны кутски вын-агайёсын но сузэр-апайёсын, кудъёсыз азьвыл дыръёсы кышкасьтэм сямзэс но Иеговалы оскымон луэмзэс возьматӥзы. Кин ке но соос пӧлысь нацистъёслэн концлагерьёссы пыр потӥз но Шундыӝужанпал Германиысь пытсэтъёсын пукиз. Нош кин ке но пытсэтэ сюрыны быгатэ вал, Библия вылэ пыкиськыса гожтэм публикациосты Шундыӝужанпал Германие лушкемен вайылыкуз. Та христианъёслэн учыръёссы сюлмам ик пыризы. Мон малпаны кутски: «Соос Иегова но вын-агайёс понна улонзэс ыштыны но пытсэтэ сюрыны ӧз кышкалэ бере, мыным уката но возьдаськон сяменым нюръяськоно».

1955-тӥ арын мон нимысьтыз тодытон кампание пыриськи. Собере мон сокем ӧй кышка ини. «Информаторын»a гожтэмын вал Нейтан Норр агайлэн гожтэтэз. Отын вераськиз, та кампания тужгес но бадӟымез луыны кулэ шуыса, кудзэ куке но ортчытъяз организацимы. Агай вераз, та кампание вань ивортӥсьёс пыриськизы ке, «со луоз тужгес но вунэтонтэм толэзь, куке музъем вылын ӟеч иворез веразы». Озьы ик луиз. Мон Иеговалы сӥзиськи но 1956-тӥ арын атаеным но сузэреным ӵош пылатӥськи. Ӝоген мыным эшшо одӥг туж кулэ луись ужпум кутоно луиз.

Трос аръёс ӵоже мон валасько вал, пионер луыса ужан-тыршон — со тужгес но умой улон сюрес шуыса. Нырысь мон малпай Берлинын ужаны но дышетскыны солы, кызьы вузан-басьтон ужез нуоно мукет шаеръёсын. Собере мынам та удысын тросгес ужаме потэ вал. Соин 1961-тӥ арын мон уже пыри Гамбург каре — Германиысь тужгес но бадӟым каре, кудаз порт вал. Та уж мыным туж кельшиз, соин ик пионер луыны пуктэм ужпумме мон ялан палэнтылӥ. Мар мынэсьтым мылкыдме ӝутӥз интыысьтым вырӟыны?

Мон Иеговалы тау шуисько, яратӥсь вын-агайёс пыр со юрттӥз мыным валаны, солы ужан-тыршон улонын тужгес но кулэез луэ шуыса. Куд-ог эшъёсы пионеръёс луыса ужало-тыршо вал ини но мыным умой адӟем карон возьматӥзы. Со сяна, концлагерь пыр потэм Эрих Мундт агай мылкыдме ӝутӥз Иеговалы оскиськыны. Со вераз, агайёслэн, кудъёсыз лагерьын ас вылазы оскиськизы, дыр ортчемъя осконзы лябӟиз шуыса. Нош соосыз, кудъёсыз Иеговалы быдэсак оскиськизы, ваньзэ чидазы но Иеговалэн организациезлы юрттыны быгатӥзы.

Мартин Пётцингер агай, кудӥз берлогес Кивалтӥсь кенешын тыршиз, вын-агайёслы котьку но вералляз: «Кышкасьтэм сям — тужгес но умоез, мар тӥляд луыны быгатэ!» Солэн кылъёсыз вылын малпаськыса, мон ужме кельтыны малпай но 1963-тӥ арын, инвожо толэзе, пионер луыса ужаны-тыршыны кутски. Улонам со тужгес но умой кутэм ужпум вал. Кык толэзь ортчыса, куке мон выль уж утчаны ӧй кутскы на вал, мыным ӵектӥзы нимысьтыз пионер луыса ужаны-тыршыны. Нош кӧня ке ар ортчыса, Иегова монэ паймытӥз. Монэ ӧтизы Галаад школалэн 44-тӥ классаз дышетскыны.

ТУЖГЕС НО КУЛЭЕЗ, МАЛЫ МОН ДЫШЕТСКИ

«Укыр ӝог эн сётске!» — со вал тужгес но кулэез, малы мон дышетски Галаад школаын. Та кылъёсты вераны ярато вал Нейтан Норр но Лайман Суингл агайёс. Соос дышетӥзы милемыз ужан-тыршонмес азьланьтыны, со секыт луыны быгатэ вал ке но. Норр агай вералляз: «Малы тӥ саклыктэс висъялоды? Дэрилы, трос нымы-кибыослы, ёрмыса улонлы? Яке писпуослы, сяськаослы, котырысьтыды шумпотӥсь ымныръёслы? Дышетске адямиосты яратыны!» Одӥг пол, куке Суингл агай вераз, малы куд-ог вын-агайёс ужамысь-тыршемысь дугдӥзы, солэн синкылиосыз быгыльскизы но со мырдэм ассэ кияз возиз. Буйгатскон понна со речьсэ ик куспетӥ кариз. Со сюлэмме туж бугыртӥз. Соку мон ужпум кутӥ, Христосэз но солэсь оскымон вын-агайёссэ ноку но ӝоже уг уськытылы шуыса (Матф. 25:40).

Куке ми тодӥмы, кин кытчы ужаны-тыршыны мыноз, Вефильын куд-ог тыршисьёс милесьтым юалляськыны кутскизы, кытчы милемыз ыстӥзы шуыса. Соос туж шумпото вал, куке кин ке но аслэсьтыз мыноно интызэ вера. Нош куке мон верай, Конгое мынӥсько шуыса, соос соку ик шып кариськизы но шуизы: «Ой, Конго... Мед Иегова тыныд юрттоз!» Со вакытэ иворъёсын ӵем вераллязы адямиос сярысь, кудъёсыз Конгоын (Киншаса) ожмаськизы но ог-огзэс виылӥзы. Нош мон тодам вози, малы монэ Галаадын дышетӥзы. 1967-тӥ арын, куарусён толэзе, дышетсконмес йылпумъям бере мон, Генрих Денбостел но Клод Линдсей агайёс кошкимы Киншасае, Конголэн шоркараз.

МИССИОНЕРЪЁСТЫ КЫДАТОН ИНТЫ

Киншаса каре вуэммы бере ми куинь толэзь ӵоже француз кылэз дышетӥмы. Собере ми лобимы Замбия вӧзысь Лубумбаши каре (азьвыл сое Элизабетвиль шуо вал), кудӥз Конголэн лымшор люкетаз интыяськемын. Ми карлэн шораз миссионеръёслэн юртазы улыны пыримы.

Лубумбаши карлэн тросаз ёросъёсаз талэсь азьло одӥг Адӟись-Ивортӥсь но ӧз вуылы на вал. Соин ик ми туж шумпотӥмы, отын улӥсьёс ӟеч иворез нырысьсэ милесьтым кылозы шуыса. Ӝоген ми ум вуиське вал ини сокем трос Библиез дышетонъёсты ортчытъяны. Ми тодытӥмы кивалтэтын но полициын ужасьёслы. Тросэз соос пӧлысь гажаса учкизы Инмарлэн Кылыз шоры но милям ужмы шоры. Отын улӥсьёс пӧлысь тросэз суахили кылын вераськизы, соин ик ми Клод Линдсей агаен та кылэз дышетыны кутскимы. Кӧня ке дыр ортчыса, милемыз суахили кылын вераськись кенеше ыстӥзы.

Милям трос тунсыко учыръёсмы вал, озьы ке но шуг-секытъёсмы но тырмо вал. Ми ӵем пумиськылӥмы кудӟем солдатъёсын, кудъёсызлэн ожтӥрлыксы вал, но полициын ужасьёсын, кудъёсыз туж лекесь вал но милемыз шонертэм янгыше уськытъязы. Одӥг пол, кенешлэн пумиськонэз мыныку, шӧдтэк шорысь миссионеръёслэн юртазы полициысь кӧня ке ужасьёс пыризы. Милемыз полицие нуизы, но кырсь выж вылыны бер ӝытозь возизы. Собере милемыз лэзизы.

1969-тӥ арын мон ёросэз чаклась луыса ужаны-тыршыны кутски. Мынам ёросам Африкаысь саванна пыре вал. Куддыръя мыным нӧд сюрестӥ но ӝужыт турын пӧлтӥ кема дыр ӵоже мыноно луылӥз. Одӥг гуртын, кудаз мон кӧлыны кыли, изён инты улам чипыен курег интыяськиз. Ноку но уг вунэты, кызьы шунды ӝужамлэсь азьло ик со монэ, бадӟым куараен коткаменыз, сайкатылӥз. Мон шумпотыса тодам вайылӥсько, кызьы ӝытъёсы ми агайёсын тылскем котыре люкаськылӥмы но Библиысь зэмлыкъёс сярысь вераськылӥмы.

Одӥгез тужгес но бадӟым шуг-секыт, кудӥныз ми пумиськимы,— со «Китавала»b организацилы дурбасьтӥсь ӧрекчи вын-агайёс. Соос пӧлысь куд-огъёсыз кенеше пыризы, озьы ик кыл кутӥсь агайёс но луизы. Но Инмарлы оскымон вын-агайёс но сузэр-апайёс ӵем дыръя соосты тодманы быгатӥзы (Иуда 12, ВД). Дыр ортчемъя Иегова кенешъёсты чылкытатӥз, но солы луыса кенешъёс ӝог будыны кутскизы.

1971-тӥ арын монэ Киншасаысь филиалэ ӧтизы. Отын мон быдэсъяй туж пӧртэм ужъёсты: гожтэтъёсын ужай, публикациосты пӧртэм интыосы келяны дасялляй, учки, кинлы но кытчы ыстоно, озьы ик тодытон ужен герӟаськем юанъёсын выри. Вефильын мон дышетски солы, кызьы туж бадӟым но куанер шаерын ужмес радъяно. Куддыръя кенешъёсы ыстэм гожтэтъёсмы, кӧня ке толэзьёс ортчыса гинэ, вуылӥзы. Самолётэн ваем гожтэтъёсты пыжъёсы тыризы, кудъёсыз трос арня ӵоже кулэ интые вуыны уг быгато вал, вуын ӝог будӥсь сяськаос люкетэмен. Нош, та но мукет шуг-секытъёс шоры учкытэк, уж интыяз ӧз сылы.

Мон котьку но паймылӥ, кызьы вын-агайёс бадӟым конгрессъёсты радъязы, соослэн коньдонзы ӧжыт вал ке но. Сценаез соос лэсьто вал термитъёслэн улон интыоссылэсь, нош борддоръёсты но пукон интыосты — туж ӝужыт турынлэсь. Бамбуклэсь соос юбо пуктылӥзы, нош тростниклэсь липет но ӝӧкъёс лэсьтылӥзы. Кортӵог интые соос писпуослэсь сулзэс уже куто вал. Паймытэк кыльыны уг луы вал, кызьы вын-агайёс но сузэр-апайёс шуг-секытъёссэс сэрттыны-пертчыны быгатӥзы. Мон соосты вань сюлмыным яратӥ. Макем мон соослэсь мӧзмыса улӥ, куке мукет шаере ужаны-тыршыны кошки!

КЕНИЫН УЖАН-ТЫРШОН

1974-тӥ арын монэ Найроби карысь (Кения) филиалэ ыстӥзы. Милям трос ужмы вал, малы ке шуоно Кениысь филиал тодытон ужез радъя вал артысь дас шаеръёсын — куд-огъёсаз кивалтӥсьёс ужмес нуыны уг лэзё вал. Мон кӧня ке пол со шаеръёсы ветлӥ, ӵемгес Эфиопие, кытын вын-агайёсмы лек уйылон-уллянъёсын пумиськылӥзы. Троссэ соос пӧлысь туж вӧсь карылӥзы, пытсэтэ пуктылӥзы, озьы ик виылӥзы но. Но соос, юн кыльыса, ваньзэ чидазы, малы ке шуоно соослэн Иеговаен но ог-огенызы умой кусыпъёссы вал.

1980-тӥ арын мынам улонам шумпотон воштӥськонъёс луизы, куке мон Канадаын вордскем Гейл Матесон сузэрез кышно басьтӥ. Ми соин Галаад школаын одӥг классын ӵош дышетскимы, нош собере кема дыр ӵоже ог-огмылы гожтэтъёс гожъямы. Гейл миссионер луыса Боливиын ужаз-тыршиз. 12 ар ортчыса, ми нош ик пумиськимы Нью-Йоркын. Ӝоген ми Кениын кузпалъяськимы. Мон туж дунъясько кышноме: со котьма шоры Иегова сямен учке но шумпотэ солы, маиз вань. Туннэ ке но со мынам оскымон юрттӥсе но яратӥсь эше.

1986-тӥ арын мон ёросэз чаклась луыса ужаны-тыршыны кутски, но со дыре ик мон филиаллэн комитетаз но тырши. Ми вуылӥмы трос шаеръёсы, кудъёсыз сярысь филиалмы сюлмаськиз.

Мон шумпотыса тодам вайисько конгресслы дасяськонэз, кудӥз ортчытӥськиз 1992-тӥ арын Асмэра карын (Эритрея),— соку кивалтӥсьёс отын ужмес нуыны лэзё на вал. Жаляса верано луэ, ми амбар гинэ шедьтыны быгатӥмы, кудӥз пушласянь, вылласянь сярысь, эшшо но уродгес адӟиське вал. Конгрессэз ортчытон нуналэ мон пайми, макем вын-агайёс сое чебер карыны быгатӥзы — Иеговалы йыбыртъяны ярамон интылы пӧрмытӥзы. Трос семьяос сьӧразы чебер шобретъёс вайизы но та кышкыт интыез туж чебер каризы. Со паймымон конгрессын 1 279 адями вал.

Ёросэз чаклась луыса ужакум-тыршыкум, уг луы вал тодыны, мар луоз,— ми ноку но ӧм тодэ, кытчы милемыз улыны интыялозы. Одӥг пол милемыз интыязы океанлэн ярдураз чебер узыр корка. Мукет дыръя ми улӥмы корт листъёслэсь лэсьтэм коркан, кудаз педло потанзы коркалэсь 100 метр кемын вал. Ми трос саклыкмес ӧм висъялэ солы, кыӵе интыын ми улӥмы. Ми понна валтӥсез вал, ми лумбыт нуналъёсын ӟырдыт мылкыдо пионеръёсын но ивортӥсьёсын тодытӥмы шуыса. Нош куке милемыз мукет интые ужаны-тыршыны ыстӥзы, милемлы люкиськоно луиз тросэныз матысь эшъёсынымы, кудъёсызлэсь ми туж мӧзмыса улӥмы.

ЭФИОПИЫН БАКЕЛЬ КАРИСЬ УЖАН-ТЫРШОН

1987-тӥ арысен 1992-тӥ арозь кивалтӥсьёс лэзизы ужмес нуыны куд-ог шаеръёсын, кудъёсыз сярысь Кениысь филиал сюлмаськиз. Солы луыса отын кылдӥзы филиалъёс но офисъёс. Аддис-Абеба карын (Эфиопия) дасо аръёс ӵоже ватӥськыса ужан-тыршонмес нуэммы бере, кивалтӥсьёс пумитъяськемысь дугдӥзы. 1993-тӥ арын милемыз та карысь офисэ ужаны-тыршыны ыстӥзы.

Иегова Эфиопиын ужан-тыршонэз бакель кариз. Тросэз вын-агайёс но сузэр-апайёс пионеръёс луыса ужаны-тыршыны кутскизы. 2012-тӥ арысен кутскыса, котькуд аре вань ивортӥсьёс пӧлысь 20 процентлэсь тросэзгес пионеръёс луыса ужазы-тыршизы. Ортчытъяськыны кутскизы Библейской школаос, озьы ик 120-лэсь но тросгес Эксэйлык юртъёс пуктэмын вал. 2004-тӥ арын Вефильын ужасьёс выль юртэ потӥзы, но со интыын ик конгрессъёсты ортчытон выль юрт пуктэмын вал.

Ми матысь эшъёс шедьтӥмы Эфиопиын улӥсь вын-агайёс но сузэр-апайёс пӧлысь. Соослэн яратонзы но ӟеч сямо луэмзы сюлмамы ик пыриз. Тазалыкенымы герӟаськем шуг-секытъёсын сэрен милемыз Германиысь филиалэ ыстӥзы. Отын милемыз умой утялто ке но, ми туж мӧзмиськомы дуно эшъёсмылэсь.

ИЕГОВА ЗЭМЛЫКЛЭСЬ КИДЫСЪЁССЭ БУДЭТӤЗ

Ми адӟимы, кызьы Иегова зэмлыклэсь кидысъёссэ будэтӥз (1 Кор. 3:6, 9). Кылсярысь, куке мон нырысьсэ тодытӥ Руандаын улӥсьёслы, кудъёсыз вуизы Конгое ыргонэз утчан понна, Руандаын одӥг ивортӥсь но ӧй вал на. Нош табере отын 30 000-лэсь но тросгес вын-агайёс но сузэр-апайёс. 1967-тӥ арын Конгоын (Киншаса) ог 6 000 ивортӥсьёс вал. Али со шаерын ог 230 000 вын-агайёс но сузэр-апайёс, нош Тодэ ваён ӝытанэ 2018-тӥ арын миллионлэсь но тросгес адямиос лыктӥзы. Шаеръёсын, кудъёсыз сярысь Кениысь филиал сюлмаське, али 100 000-лэсь но тросгес ивортӥсьёс ужало-тыршо.

50 арлэсь но тросгес талэсь азьвыл Иегова пӧртэм вын-агайёс пыр мынэсьтым мылкыдме ӝутӥз вань дырме сётыса ужаны-тыршыны. Мон та дырозь возьдаськон сяменым нюръяськисько ке но, мон дышетски быдэсак Иегова вылэ оскиськыны. Африкаын ужан-тыршон юрттӥз мыным чидась луыны но шумпотыны солы, маи мынам вань. Ми кышноеным туж тау кариськомы дуно вын-агайёсмылы но сузэр-апайёсмылы, кудъёсыз туж тыршизы милемыз куно карыны, шуг-секытъёссы пыр потыны но Иегова вылэ оскиськыны. Мон Инмарлы туж бадӟым тау карисько солэн паймымон ӟечлыкез понна! Иегова монэ малпамелэсь но тросгес бакель кариз (Пс. 36:4).