«Та Кузё-Инмарлэн ожмаськонэз»

Ваньмыз кутскиз 1999-тӥ арын, куке Франциысь кивалтӥсьёс выт тырыны куризы агайёслэн но сузэръёслэн ас мылкыд каремзыя сётэм коньдонзы понна, кудӥз филиалэ вуиз 1993—1996-тӥ аръёсы. Нырысь ми та ужез эскеримы француз судъёсын, но вормон ӧм басьтэ. Апелляция сётэммы бере но сыӵе ик ужпум кутэмын вал. Соин ик ми малпамы мыныны Адямилэсь правооссэ утёнъя Европаысь судэ. Судлэн куремезъя, ми, француз кивалтӥсьёслэн юристъёссы но ЕСПЧ-ысь ужась судлэсь азьвыл пумиськыны кулэ вал, быгатэммыя огкыл шедьтон понна.

Ми тодӥськомы вал, огкыл шедьтон понна, ЕСПЧ милемыз куроз шуыса француз кивалтэтлы кӧня ке коньдон тырыны. Но ми валаськомы вал, одӥг евро тырыса гинэ но, ми Библиысь возетъёсты тӥяломы шуыса. Малы ке шуоно агайёс но сузэръёс коньдонзэс сётӥзы Эксэйлыклэсь ужзэ нуон понна, соин ик кивалтӥсьёс соослэсь коньдонзэс асьсэлы карыны уг быгато вал (Матф. 22:21). Ми ваньзэ тае валаськомы вал ке но, судлы гажанмес возьматон понна, ми со пумиськонэ лыктӥмы.

Пумиськон ортчиз чебер залын. Кутсконаз ик ЕСПЧ-ысь ужась шуиз, милемлы француз кивалтӥсьёслы куроно коньдонзылэсь оглюкетсэ тыроно луоз шуыса. Малпамтэ шорысь ми со ужасьлэсь юамы: «Нош тодӥськоды-а тӥ, кивалтӥсьёс филиаллэсь ньыль но ӝыны миллионлэсь тросгес евро конфисковать каризы ини шуыса?»

Тае кылыса, ЕСПЧ-ысь ужась туж паймемын вал. Куке француз юристъёс веразы, кивалтӥсьёс зэм но коньдонмес конфисковать каризы шуыса, со ужась югдурмы шоры воксё мукет сямен учкыны кутскиз. Со француз юристъёсты тышкаськиз но пумиськонэз соку ик йылпумъяз. Мон валай, Иегова кивалтӥз, со ужын ми вормон мед басьтомы шуыса. Судысь ми бурдъяськыса потӥмы. Ваньмыз осконтэм потэ вал.

2011-тӥ арын 30-тӥ инвожое ЕСПЧ милемлы дур басьтӥз. Суд ужпум кутӥз, француз кивалтӥсьёс, катэз тӥяса, милемыз выт тырыны косӥзы шуыса. Озьы ик суд француз кивалтӥсьёсты косӥз конфисковать карем коньдонэз берыктыны но процентъёс тырыны! Со кутэм ужпум али но Франциысь чылкыт йыбырттонэз уте. Малпамтэ шорысь сётэм юанмы из кадь вал, кудӥз Голиафлэн йыраз сюриз. Малы ми со ужын вормон басьтӥмы? Малы ке шуоно, Давидлэн верамезъя, со — «Кузё-Инмарлэн ожмаськонэз» (1 Экс. 17:45—47).

Ми та ужын гинэ вормон ӧм басьтэ. Кужмо кивалтӥсьёслэн но религиозной организациослэн пумитъяськемзы шоры учкытэк, Иеговалэн Адӟись-Ивортӥсьёсыз 70 шаеръёсысь вылӥ судъёсын но куд-ог калыккуспо судъёсын 1225 ужъёсты вормизы. Та вормонъёс милесьтым правоосмес утё. Кылсярысь, кивалтӥсьёс организацимылы лэзё ужзэ нуыны, ми тодытыны быгатӥськомы, политикаен герӟаськем ужрадъёсы ум пыриськиське но, вирез уже кутытэк, эмъяськиськомы.

Мон Иеговалэн Адӟись-Ивортӥсьёсызлэн валтӥсь кивалтонниязы (Огазеяськем Штатъёс) ужасько-тыршисько ке но, кызьы мон вуи Европаысь со судэ?

МЫНЫМ ПЫӴАЗ АНАЙ-АТАЕЛЭН ӞЫРДЫТ МЫЛКЫДЗЫ

Атае но анае, Джордж но Люси́ль, Галаад школалэн 12-тӥ классаз дышетскизы. Соосты ыстӥзы Эфиопие. Отын ик мон вордӥськи 1956-тӥ арын. Соос монэ нимазы Фи́лип — нырысетӥ даурысь христиан тодытӥсез сямен. 1957-тӥ арын Эфиопиысь кивалтӥсьёс ужмес нуыны ӧз лэзе ни. Мон пичи на вал ке но, тодӥсько на, кызьы ми лушкемен тодытӥмы но пумиськонъёсты ортчытылӥмы. Мыным ваньмыз туж тунсыко потэ вал. Но 1960-тӥ арын кивалтӥсьёс милемыз косӥзы шаерысь кошкыны.

Анай-атае кошкизы Уи́чито каре (Огазеяськем Штатъёс, Канза́с штат). Африкаысь кошкемзы бере соос ӟырдыт мылкыдзэс ӧз ыштэ. Зэмлык соослэн улоназы нырысетӥ интыын вал. Озьы ик улыны соос дышетӥзы монэ, Джу́ди апайме но Ле́сли вынме, кудъёсыз, мон сямен, Эфиопиын вордӥськизы. Мон пылатӥськи 13 арес дыръям. Куинь ар ортчыса, семьямы кошкиз Ареки́па каре (Перу), кытын ивортӥсьёс уг тырмо вал.

1974-тӥ арын, 18 арес дыръям, Перуысь филиал монэ но эшшо ньыль мукет вын-агайёсты ыстӥз нимысьтыз пионеръёс луыса ужаны-тыршыны. Милемлы тодытоно вал Анды гурезьёсын, кытын азьвыл нокин ӧз тодыты. Отын ми ӟеч иворез верамы адямиослы, кудъёсыз ке́чуа но аймара́ кылъёсын вераськизы. Ми улӥмы машинаын, кудаз улон понна ваньмыз кулэез вал. Со бадӟым ящиклы кельше вал, соин ик ми сое «ковчег» шуыса нималлямы. Мыным кельше вал со интыын улӥсь адямиослы вераны, ӝоген Иегова куанер улонэз, висёнъёсты но кулонэз быдтоз шуыса (Усьт. 21:3, 4). Тросэз Иеговалэн ужась-тыршисьёсыз луизы. Мон шумпотыса со дырез тодам вайылӥсько.

ДУННЕВЫЛ ВАЛТӤСЬ КИВАЛТОННИЫН УЖАНЫ-ТЫРШЫНЫ КУТСКИСЬКО

1977-тӥ арын Перуе лыктӥз Иеговалэн Адӟись-Ивортӥсьёсызлэн Кивалтӥсь кенешысьтызы А́льберт Шрёдер агай. Со мылкыдме ӝутӥз Вефильын ужан-тыршон понна заявление гожтыны. Мон озьы ик лэсьтӥ. Ӝоген, 1977-тӥ арын 17-тӥ инвожое, мон кутски Бруклинысь Вефильын ужаны-тыршыны. Ньыль ар мон пыриськи утялскон но эскерон-тупатъян ужъёсы.

1978-тӥ арын, инвожое, Выль Орлеа́н карын (Луизиа́на штат) калыккуспо конгресс ортчытӥськиз. Отын мон тодматски Эли́забет Авалло́н сузэрен. Солэн анай-атаез, мынам анай-атае сямен, зэмлыкез улоназы нырысетӥ интые пукто вал. Элизабет ньыль ар ӵоже ини пионер вал. Солэн потэ вал быдэс улонэз ӵоже Иеговалы вань дырзэ сётыса ужамез-тыршемез. Конгресс бере ми кусып воземысь ӧм дугдэ но ӝоген ог-огмес яратӥмы. 1979-тӥ арын 20-тӥ коньывуонэ ми кузпалъяськимы но, Элизабет монэн ӵош Вефильын ужаны-тыршыны кутскиз.

Ми кутскимы ужаны-тыршыны «Бруклин, Испан» кенешын. Агайёс но сузэръёс милемыз туж шуныт пумитазы. Берлогес ми ужамы-тыршимы мукет куинь кенешъёсын. Ми котьку шӧдӥмы, милемыз ярато но Вефильын ужам-тыршеммес дунъяло шуыса. Ми тау кариськомы духовной семьямылы, озьы ик эшъёсмылы но ӵыжы-выжыосмылы, кудъёсыз милемлы юрттӥзы арлыдо анай-атайёсмы сярысь сюлмаськыны.

ВЫЛЬ УЖ: ЮРИДИК ЁЗЭТ

1982-тӥ арын, толшоре, малпамтэ шорысь монэ куризы ужаны-тыршыны юридик ёзэтын. Куинь ар ортчыса, монэ куризы вылӥ юридик образование басьтыны. Агайёслэн потэ вал, мон адвокат мед луом шуыса. Дышетскыкум мон туж пайми, куке тодӥ, Инмарлэн калыкез Огазеяськем Штатъёсысь но мукет шаеръёсысь адямиослэсь правооссэс утьыны юрттӥз шуыса. Классын ми пыр-поч эскеримы, Иеговалэн Адӟись-Ивортӥсьёсызлэсь судъёсын басьтэм вормонъёссэс.

1986-тӥ арын, 30 арес дыръям, мон юридик ёзэт понна кыл кутыны кутски. Мон туж шумпотӥ, мон егит на вал ке но, организация мыным сыӵе уж оскиз шуыса. Но мон туж сюлмаськисько вал, малы ке шуоно валасько вал, уже секыт, нош мон троссэ уг тодӥськы шуыса.

1988-тӥ арын мон диплом басьтӥ но адвокат луи. Но мон ӧй но вала, макем бадӟым изъян со дышетскон вайиз Иеговаен кусыпъёсылы. Вылӥ образование адямиез вылтӥяськись карыны быгатэ. Яратоно кышное мыным юрттӥз Иеговаен кусыпъёсме юнматыны. Мон валай: тодон-валанъёс улонын валтӥсез ӧвӧл. Зэмзэ ик шудо луон понна, Иеговалэн эшез луоно, озьы ик сое но солэсь калыксэ яратоно.

ӞЕЧ ИВОРЕЗ ТОДЫТЫНЫ ПРАВОЕЗ УТИСЬКО

Дышетсконме йылпумъяме бере мон вань саклыкме висъяны кутски, Вефильлы юридик удысын юрттон понна но ӟеч иворез тодытыны правоез судъёсын утён понна. Уж секыт но тунсыко вал, малы ке шуоно ялан кыӵе ке воштӥськонъёс луылӥзы. Кылсярысь, кема дыр ӵоже, адямиослы публикациосмес ӵектыкумы, ми соослэсь коньдон куриськомы вал. Но 1990-тӥ аръёслэн кутсконазы агайёс малпазы озьы лэсьтэмысь дугдыны. Соин ик соос юридик ёзэтлэсь та пумысен кивалтэт куризы. Воштӥськон улонэ пыртэмын вал. Со дырысен Иеговалэн Адӟись-Ивортӥсьёсыз публикациоссэс дунтэк ӵекто. Та воштӥськонлы луыса ивортӥсьёслы тодытыны капчигес луиз, Вефильын ужасьёслы ужаны каньылгес луиз но ӧз кылдылэ ни шуг-секытъёс, кудъёсыз выт тыронэн герӟаськемын вал. Куд-огъёсыз сюлмаськизы, та воштӥськонэн сэрен публикациосмес поттыны милям коньдонмы уз тырмы но ӟеч иворез вӧлмытыны секытгес луоз шуыса. Озьы ке но, 1990-тӥ арысен кутскыса, Иеговалэн Адӟись-Ивортӥсьёсызлэн лыдзы кык поллэсь тросгес луиз. Со сяна, туннэ котькуд адями Библия вылэ пыкиськыса гожтэм публикациосты нокыӵе коньдонтэк басьтыны быгатэ. Юридик ёзэтын ужаны-тыршыны кутскеме дырысен организациын мукет но бадӟым воштӥськонъёс лэсьтэмын вал. Мон валай: азинлыко луон понна, милемлы Иеговалэсь юрттэт куроно но оскымон ляльчилэн кивалтэтэзлэсь кылзӥськоно (Пот. 15:2; Матф. 24:45).

Адвокатъёслэн тыршемзылы луыса гинэ ми вормонъёс ум басьтылӥське. Ӵем дыръя судьяос но мукет кивалтӥсьёс милемлы дур басьто, малы ке шуоно Иеговалэн ужась-тыршисьёсыз асьсэды шонер возё. Кылсярысь, 1998-тӥ арын Кубаын конгрессъёс ортчытӥськизы, кудъёсаз Кивалтӥсь кенешысь куинь агайёс кышноосынызы ӵош лыктӥзы. Солэсь азьвыл ми кивалтӥсьёсын пумиськылӥмы но соослы валэктыны тыршимы, Иеговалэн Адӟись-Ивортӥсьёсыз политика удысын нокин пала уг карисько шуыса. Но куке кивалтӥсьёс адӟизы, Кивалтӥсь кенешысь агайёс асьсэды лякытэн но гажаса возё шуыса, соос сое эшшо но умой валазы.

Озьы ке но куддыръя, ӟеч иворез тодытыны правомес утён понна, милемлы судъёсы вазиськылоно луэ (Флп. 1:7). Кылсярысь, Европаысь куд-ог шаеръёсысь но Лымшор Кореяысь кивалтӥсьёс милемлы уг лэзё вал армиын служить карем интые альтернативной амалэн службаез ортчыны. Соин ик Европаысь 18 000 котыр агайёс но Лымшор Кореяысь 19 000-лэсь тросгес агайёс, армие мынымтэзы понна, пытсэтэ пуктэмын вал.

Нош 2011-тӥ арын 7-тӥ пӧсьтолэзе «Баятян Арменилы пумит» ужъя ЕСПЧ ужпум кутӥз. Со кутэм ужпумъя, Европаысь вань шаеръёс ас калыкъёссылы луонлык сётыны кулэ альтернативной амалэн службаез ортчыны. Берлогес, 2018-тӥ арын 28-тӥ инвожое, со выллем ужпум кутӥз Лымшор Кореяысь Конституционной суд. Егит агайёс пӧлысь куд-огъёсыз политика удысын кин ке пала кариськысалзы ке, ми та вормонъёсты басьтыны ӧм быгатысалмы.

Валтӥсь кивалтонниысь но быдэс дунне вылысь филиалъёсысь юридик ёзэтъёс ялан тыршо Иеговалы йыбыртъяны но Эксэйлык сярысь тодытыны правомес утьыны. Ми понна бадӟым дан юрттыны агайёслы но сузэръёслы, кудъёсыз уйылон-уллянъёсын пумиськыло. Ми судын вормомы-а, ум-а, судъёс дыръя кивалтӥсьёс но мукет адямиос ӟеч иворез кылыны быгато (Матф. 10:18). Судьяослы, кивалтӥсьёслы, журналистъёслы но эскериськись ужен тунсыкъяськись адямиослы лыдӟоно но кылзоно луэ Библиысь кылбуръёсты, кудъёсыз ужлэн материалъёсаз пыртэмын но кудъёссэ ми заседаниос дыръя вераськомы. Соос тодыны быгато, кинъёс со Иеговалэн Адӟись-Ивортӥсьёсыз но мар вылэ пыкиськемын милям осконмы. Соос пӧлысь куд-огъёсыз милям агайёсмы но сузэръёсмы луо.

ТАУ, ИЕГОВА!

40 арлэсь кемагес ини мон быдэс дунне вылысь филиалъёсысь юридик ёзэтъёсын ужасько. Мон трос судъёсы пыриськи но кӧня ке пол вылӥ кивалтӥсьёсын пумиськылӥ. Мон яратӥсько но дунъясько агайёсме но сузэръёсме, кудъёсыз валтӥсь кивалтонниын но мукет шаеръёсысь юридик ёзэтъёсын ужало-тыршо. Мынам улонэ туж тунсыко но шудо.

Ми Элизабет кышноеным 45 ар ӵоже кузпалъяськемын ини. Умой дыръя но, секыт дыръя но, секыт висёнэз шоры учкытэк, со мыным котьку яратыса юрттӥське. Со понна мон солы туж бадӟым тау шуисько.

Ми валамы, быгатонлыкъёсмы — валтӥсез ӧвӧл шуыса. Кужым но вормон сётэ Иегова. Давид озьы ик шуиз: «Кузё-Инмар — Ас калыкезлэн кужымез» (Пс. 27:8). Зэм но, «та Кузё-Инмарлэн ожмаськонэз»!