Малы ветлоно христиан пумиськонъёсы, кудъёсыз Эксэйлык юртын ортчытӥсько?

Арняяз кык пол Иеговалэн Адӟись-Ивортӥсьёсыз пумиськонъёссэс ортчыто Инмарлы йыбыртъян понна юртъёсын, кудъёссэ Эксэйлык юртъёс шуыса нимало. Кызьы ортчытӥсько та пумиськонъёс но малы тыныд отчы ветлыны кулэ?

• Кызьы Эксэйлык юртын христиан пумиськонъёс ортчытӥсько?

• Малы христиан пумиськонъёсы ветлыны кулэ?

• Мар верало огъёзъёсыд?

Кызьы Эксэйлык юртын христиан пумиськонъёс ортчытӥсько?

Эксэйлык юртъёсын дышето солы, кызьы Библиысь возетъёсты улонэ пыртоно. Христиан пумиськонъёсы ветлыса, тон быгатод:

• Инмар сярысь тодыны;

• валаны, малы дуннеын туж трос шуг-секытъёс;

• умой сямъёс будэтыны;

• зэмос эшъёс шедьтыны.

Тодӥськод-а тон? Юртъёсты, кудъёсаз Иеговалэн Адӟись-Ивортӥсьёсыз пумиськонъёссэс ортчыто, Эксэйлык юртъёс шуыса нимало, малы ке шуоно ӵем дыръя отын эскерисько юанъёс, кудъёсыз Инмарлэн Эксэйлыкеныз герӟаськемын (Матфей 6:9, 10; 24:14; Лука 4:43).

Малы христиан пумиськонъёсы ветлыны кулэ?

Эксэйлык юртын тон трос пайдаё малпанъёсты тодод. Иеговалэн Адӟись-Ивортӥсьёсызлэн пумиськонъёсазы эскерисько Библиысь возетъёс. Соос юрттозы тыныд визьлык люканы (Мадёнъёс 4:5). Тон валалод, Библия — со туж пайдаё книга шуыса, озьы ик дышетскод визьмо ужпумъёс кутыны. Со сяна, тон шедьтод тужгес но кулэ луись юанъёслы валэктонъёс, кылсярысь:

• Малы ми улӥськомы?

• Янгыш-а Инмар, ми курадӟиськомы шуыса?

• Мар луэ адямиен кулэмез бере?

Тани Библия вылэ пыкиськыса дасям куд-ог речьёс, кудъёссэ Эксэйлык юртын шутэтскон нуналъёсы кылыны луэ:

• Малы кивалтэт утчано Библиысь?

• Кытысь юрттэт шедьтоно шугадӟонъёс дыръя?

• Мар лэсьтэ Инмарлэн Эксэйлыкез туннэ ми понна?

«Огпол одӥгаз пумиськонэ лыктӥз ӵош дышетскисе. Со пуксиз семьяеным ӵош. Ми солы Библия но журнал сётӥмы. Пумиськон бере со вераз, солы тужгес но кельшиз шуыса пумиськонлэн со люкетэз, куке, киез ӝутыса, валэктон сётыны луэ вал. Озьы ик со вераз, солэн черказ Библиез сокем мур нокин уг эскеры шуыса» (Бренда).

Тодӥськод-а тон? Эксэйлык юртэ пырон понна, дун тыроно ӧвӧл, коньдон уг бичало.

Татын люкасько зӥбыт-востэм адямиос. Библиын гожтэмын, христианъёс огазе люкаськыны кулэ шуыса, вераськон но ог-огзэс юнматон понна (Еврейёслы 10:24, 25). Тросэз адямиос, кудъёсыз пӧлын ми улӥськомы, асьсэос сярысь гинэ малпасько. Нош куке ми адямиос котырын, кудъёсыз Инмарез но мукет адямиосты асьсэлэсь вылӥегес пукто,— со чылкыт омырен шокчем кадь!

«Куддыръя нунал пумын мон туж жадемын луисько, нош куке мон Эксэйлык юртэ лыктӥсько, мыным выль кужым пыре. Дорам мон бурдъяськыса кадь бертӥсько но выль нуналэз пумитаны дась» (Элайза).

Тодӥськод-а тон? Быдэс дунне вылын Иеговалэн Адӟись-Ивортӥсьёсызлэн 120 000-лэсь но тросгес кенешъёссы пумиськыло 60 000-лэсь но тросгес Эксэйлык юртъёсын. Соос, кинъёс христиан пумиськонъёсы ветло, тросгес но тросгес луо. Арлы быдэ ог 1 500 выль Эксэйлык юртъёс пуктӥськоa.