4-тӥ люкет
Инмар вуоноез сярысь малпанъёссэ асьмелы ивортэ
1, 2. Кытысь тодӥськомы, Инмар зӥбыт сюлэмо адямиослэн юанъёссылы валэктонъёс сётэ шуыса?
ЯРАТӤСЬ Инмар вуоноез сярысь малпанъёссэ, зэмзэ ик, усьтэ зӥбыт сюлэмо адямиослы, кудъёсыз сое утчало. Со ваньзэ тодыны тыршись адямиослэн юанъёссылы валэктонъёс сётэ, кылсярысь, таӵе юанлы: малы со курадӟонъёсты уг быдты?
2 Библия вера: «Инмарлы матэ кариське, Со но тӥляд матады лыктоз». «Инмын вань Инмар, кудӥз ватӥськем лушкемлыкез усьтэ». «Кузё-Инмар Иегова номыр но уг лэсьты, аслэсьтыз ватӥськем лушкемлыксэ ляльчиосызлы, пророкъёсызлы, усьтытэк» (Иаков 4:8; Даниил 2:28, НМ; Амос 3:7, НМ).
Кытын со валэктонъёс?
3. Кытысь валэктон шедьтыны быгатомы таӵе юанлы: малы Инмар курадӟонъёсты уг быдты?
3 Малы Инмар курадӟонъёсты уг быдты? Мар карыны малпа со та пумысен? Та юанъёслы валэктонъёс шедьтыны быгатомы одӥг иворысь, кудӥз Инмарлэн духезлэн кивалтэмез улсын гожтэмын, асьмелы пайда ваён понна. Со ивор — солэн Кылыз, Священной Гожтэм. «Быдэс Священной Гожтэм Инмарлэн Духеныз вордскытэмын. Соин ик Священной Гожтэм дышетэ, сьӧлыкъёсты шарае поттэ, шонер сюрес вылэ султытэ, Инмарлы ярамон улыны дышетыса со пайда вае. Соин ик Инмар адями дун-шектэм мед луоз, ӟеч ужъёсты лэсьтыны дась мед луоз» (2 Тимофейлы 3:16, 17).
4, 5. Мар Библиез сокем паймымон каре?
4 Библия, зэмзэ ик, паймымон книга. Отын адями история сярысь шонер ивортэмын но озьы ик гожтэмын адями кылдытэмлэсь азьвыл улон сярысь. Со сяна, со туала книга луэ, малы ке шуоно отын гожтэм азьпалзэ тодытыса веранъёс асьме нуналъёсы ортчись но матысь дыре луоно югдуръёсын герӟаськемын.
5 Нокыӵе мукет книгалы сыӵе уг оско, кызьы Библилы, кудӥз история ласянь тужгес но шонер луэ. Кылсярысь, вашкала классикъёслэн кӧня ке гинэ рукописьёссы вань, нош быдэс Библилэн яке солэн люкетъёсызлэн трос гинэ рукописьёссы: 6 000 пала — Еврей кылын Гожтэмъёс («Вуж Сӥзёнысь» 39 книга) но 13 000 пала рукописьёс — Христиан Грек Гожтэмъёс («Выль Сӥзёнысь» 27 книга).
6. Малы ми оскыны быгатӥськомы, туала Библия сыӵе ик луэ, кыӵе вал нырысетӥ гожтэмез?
6 Ваньзэ быгатӥсь Инмар, кудӥз Библиез гожтонэн кивалтӥз, чаклаз, рукописьёслэн копиосазы гожтэм ивор воштӥськытэк мед кылёз шуыса. Соин ик асьмелэн туала Библиосмы луо сыӵеесь ик, кыӵе вал нырысь Священной Гожтэм. Озьы ик ми сое валаны быгатӥськомы, малы ке шуоно куд-ог Христиан Грек Гожтэмъёслэн рукописьёссылэн копиоссы, оригиналэз гожтэм дырысен, сю ар пала гинэ ортчыса гожтэмын. Нош вашкала гожъясьёслэн куд-ог рукописьёссылэн копиоссы кӧня ке сю аръёс ортчыса но гожтэмын уг луо на.
Инмарлэн кузьымез
7. Макем вӧлмемын Библия?
7 Библия — тужгес но вӧлмем книга. Со куинь миллиард пала печатламын. Нокыӵе мукет книга сомында печатламын ӧй вал на. Быдэсак Библия яке солэн люкетъёсыз 2 350-лэсь тросгес кылэ берыктэмын. Озьыен, Библиез быдэс музъем вылысь 90%-лэсь уногес калык лыдӟыны быгатэ.
8–10. Кыӵе мугъёс возьмато, Библиез эскерыны кулэ шуыса?
8 Ачиз Библия вера, со Инмарлэн книгаез шуыса. Кызьы Библиын, озьы ик трос мукет интыосын верамын, со, зэмзэ но, Инмарлэн книгаез луэ шуыса. Валамон, сое одно ик кулэ эскерыны. Со валэктэ, малы ми улӥськомы, мае возьмато дуннеын ортчись югдуръёс но мар ваёз вуоноез. Нокыӵе мукет книга уг быгаты сое валэктыны.
9 Библия — со Инмарлэн адямиослы вазиськемез. Инмарлэн кужымезлэн, яке духезлэн, кудзэ со уже кутэ, кивалтэмез улсын сое 40 пала адямиос гожтӥзы. Озьыен, Инмар асьмемын вераське аслаз Кылыз, Священной Гожтэм, пыр. Апостол Павел гожтӥз: «Тӥ, ми пыр Инмар кылэз кылыса, сое кабыл басьтӥды,— адями кылэз кадь ӧд, Инмар кылэз кадь сое кабыл басьтӥды, кудӥз зэмзэ ик сыӵе луэ» (1 Фессалоника карын улӥсьёслы 2:13).
10 Авраам Линкольн, Америкалэн 16-тӥ азьмуртэз, Библиез нимаз «ваньмызлэсь умой кузьымен, кудзэ Инмар адямиослы сётӥз . . . Сотэк асьмеос ӧм тодысалмы, мар умой, нош мар урод луэ». Соку мар вера асьмелы та ваньмызлэсь дуно кузьым со сярысь, кызьы кутскизы курадӟонъёс, малы Инмар соосты уг быдты но, мар карыны малпа со та пумысен?
[Суред, 10-тӥ бам]
Инмарлэн кивалтэмез улсын гожтэм Библия — со Инмарлэн адямиослы вазиськемез