ЕГИТЪЁСЛЭН ЮАНЪЁССЫ
Кызьы Библия мыным юрттыны быгатэ? 1-тӥ люкет. Дышетскы Инмарлэсь Кылзэ эскерыны
«Мон кутски вал Библиез эскерыны. Но со сыӵе бадӟым! Малпасько, мон сое пумозяз лыдӟыны уг быгаты шуыса...» (Бриана).
Вал-а тынад но сыӵе ик шӧдонъёсыд? Вал ке, та статья юрттоз тыныд.
Малы лыдӟоно Библиез?
Тыныд мӧзмыт луэ-а, куке тон малпаськод, быдэс Библиез лыдӟоно шуыса? Озьы ке, тонэ валаны луэ. Кин ке малпа, дыр: «Библиын сюрслэсь но тросгес бамъёс, со пичи букваосын гожтэмын но отын одӥг суредэз но ӧвӧл! Сое лыдӟем интые, мон фильм яке интернетысь видео учкысал».
Но малпа: тон марӟанъёсын вуж сандык шедьтысалыд ке, учкысалыд-а тон, мар солэн пушказ вань?
Библиез сыӵе сандыкен ӵошатыны луэ. Отын вань трос дуно визьмо кылъёс, кудъёсыз юрттозы тыныд:
шонер ужпумъёс кутыны,
анай-атайёсыныд огкылысь улыны,
зэмос эшъёс шедьтыны,
сюлмаськонъёстэ вормыны.
Но быгатэ-а сыӵе вашкала книга пайда вайыны асьме нуналъёсы улӥсь адямиослы? Быгатэ, малы ке шуоно «быдэс Священной Гожтэм Инмарлэн Духеныз вордскытэмын» (2 Тимофейлы 3:16). Озьыен, Библиын Инмарлэн визь-кенешъёсыз гожтэмын, нош солэсь но умой визь-кенешъёс нокин сётыны уг быгаты ни.
Библиез ӵошатыны луэ сандыкен, кытысь визьмо малпанъёс шедьтыны луэ
Кызьы умойгес луоз Библиез лыдӟыны?
Нырысетӥез амал: быдэс Библиез лыдӟыны. Со юрттоз тыныд валаны, мар сярысь та книгаын вераське. Библиез пӧртэм сямен лыдӟыны луэ, кылсярысь:
Тон быгатӥськод Библиысь 66 книгаосты огез бӧрсьы огзэ лыдӟыны, Улон-вылон книгаысен Усьтӥськон книгаозь.
Тон быгатӥськод Библиысь книгаосты лыдӟыны со радлыкъя, ку ортчизы отын гожтэм учыръёс.
Визь-кенеш. Кыӵе радлыкъя мынӥзы Иисус Христослэн улонысьтыз учыръёс, куке со музъем вылын улӥз, возьматэмын «Инмарлэн Кылыз мутусъёсын но схемаосын» брошюраысь 4-тӥ люкетын (ӟуч).
Кыкетӥез амал: лыдӟыны Библиысь кылбуръёсты, кудъёсыз юрттозы тыныд нимысьтыз учыре. Кылсярысь:
Потэ-а тынад умой, оскиськымон эшъёс шедьтэмед? Соку лыдӟы Ионафанлэн но Давидлэн эшъяськемзы сярысь (1 Эксэйлыкъёслэн книгазы, 18—20-тӥ люкетъёс). Собере «Кызьы зэмос эшъёс шедьтоно» ужез быдэсты но малпаськы, кызьы тон улонад пыртыны быгатӥськод сое, мае тодӥд лыдӟем кылбуръёсысь.
Потэ-а тынад шуг-секытъёс дыръя юн луэмед? Соку лыдӟы со сярысь, кызьы ассэ возиз Иосиф, визь сынаськонэн пумиськыкуз (Улон-вылон книга, 39-тӥ люкет). Собере быдэсты таӵе ужъёсты: «Кызьы шуг-секытъёс дыръя юн луоно. Иосиф (1-тӥ люкет)» но «Шонертэм янгыше уськытэмын. Иосиф (2-тӥ люкет)». Собере малпаськы, кызьы улонад пыртоно сое, мае тон тодӥд лыдӟем кылбуръёсысь.
Потэ-а тодэмед, кызьы вӧсяськон тыныд юрттыны быгатэ? Соку лыдӟы со сярысь, мар луиз Неемияен (Неемиялэн книгаез, 2-тӥ люкет). Собере быдэсты «Инмар вӧсяськонлы ответ сётӥз» ужез но малпаськы, кызьы улонад пыртоно сое, мае тон тодӥд лыдӟем кылбуръёсысь.
Визь-кенеш. Лыдӟы Библиез шыпыт интыын, кытын тыныд номыр уз люкеты.
Куинетӥез амал: Библиысь кыӵе ке кылбуръёсты яке псаломез лыдӟыны, нош собере малпаськыны, кыӵе пайда со тыныд вайыны быгатэ. Собере аслыд таӵе юанъёс сётыны луоз:
Малы Иегова сюлмаськиз, та кылбуръёс Библиын гожтэмын мед луозы шуыса?
Мае тодыны луэ та кылбуръёсысь Иегова сярысь но солэн сямъёсыз сярысь?
Кызьы та кылбуръёсты мон улонам пыртыны быгатӥсько?
Визь-кенеш. Аслыд ужпум пукты Библиез котькуд нунал лыдӟыны. Собере календарьын пусйы, кыӵе нуналысен тон сое лыдӟыны кутскод.