11-ТӤ УРОК
Мар кароно, Библиез лыдӟон тросгес пайда мед ваёз шуыса
Кышкаськоды-а тӥ бадӟым уж борды басьтӥськыны? Бадӟым ужез пичиен-пичиен быдэстӥд ке, со сокем секыт кадь уз поты ни. Озьы ик Библиез лыдӟонэн но. Оло нош, тӥ малпаськоды: «Мар бордысен кутсконо?» Та урокын ми вераськомы со сярысь, мар кароно, Библиез лыдӟон но сое дышетон тӥледлы шумпотон мед ваёз шуыса.
1. Малы Библиез котькуд нунал лыдӟоно?
Со, кин Библиез, Иеговалэсь законзэ, котькуд нунал лыдӟе, со шудо но азинлыко луоз. (Лыдӟе Псалтирез 1:1—3.) Нырысь тырше Библиез нуналаз кӧня ке минутэн лыдӟыны. Библиен матэгес тодматскыса, тӥледлы эшшо но кельшоз сое лыдӟыны.
2. Мар юрттоз Библиез лыдӟонэз пайдаё карыны?
Библиез лыдӟон тросгес пайда мед ваёз шуыса, милемлы кулэ дугдылыны но малпаськыны со вылын, мае ми лыдӟимы (Псалтирь 118:97). Лыдӟыкуды таӵе юанъёс вылын малпаське: «Мае мон али тодӥ Иегова Инмар сярысь? Кызьы лыдӟемме улонэ пыртоно? Кызьы мон мукетъёсызлы юрттыны быгато, та кылбуръёсты кутыса?»
3. Ку Библиез лыдӟоно?
Секыт-а тӥледлы дыр шедьтыны Библиез лыдӟыны? Тросэзлы секыт. Тырше дырез юнме быдтытэк улыны (Ефесъёслы 5:16). Котькуд нунал нимысьтыз дыр висъялэ Библиез лыдӟон понна. Куд-огъёсыз Библиез лыдӟо ӵукна. Мукетъёсыз — нуназе, кылсярысь, уж доразы вис карыкузы. Вань сыӵеосыз но, кудъёсыз Библиез изён азязы лыдӟо. Нош тӥ ку дыр шедьтыны быгатысалды?
МУРГЕС ЭСКЕРЕ
Тодэ, мар кароно, Библиез лыдӟон шумпотон мед ваёз шуыса. Озьы ик тодэ, кызьы Библиез дышетонлы дасяськоно, со пайдаё мед луоз шуыса.
Выль сиёнлы дышон но сое яратон понна, сое шӧмъяны кулэ. Озьы ик Библиез лыдӟонэн но
4. Библиез шумпотыса лыдӟе
Кутскыны Библиез лыдӟыны капчи уз поты, дыр,— со выль сиёнлы дышем кадь луэ. Нырысь выль сиён ческыт уг поты. Но, дыр ортчыса, тон солы дышиськод но сое яратыны кутскиськод. Лыдӟе 1 Пётрлэсь 2:2 но та юанлы валэктон сётэ:
Кызьы тӥ малпаськоды, Библиез котькуд нунал лыдӟиды ке, тӥ сое яратоды-а но сое лыдӟон тӥледлы шумпотон ваёз-а?
Учке ВИДЕОРОЛИКЕЗ но тодэ, мар юрттӥз та адямиослы Библиез лыдӟонлэсь шумпотон басьтыны. Собере улӥын сётэм юанъёслы валэктонъёс сётэ.
Мар люкетӥз та егит адямиослы Библиез котькуд нунал лыдӟыны?
Мар юрттӥз соослы кутскыны Библиез котькуд нунал лыдӟыны?
Мар юрттӥз соослы Библиез лыдӟонлэсь шумпотон басьтыны?
Мар бордысен кутсконо?
Быръе Библиез, кудӥз шонер берыктэмын но валамон кылын гожтэмын. Лыдӟе «Выль дунне» берыктэмез, со вань ке со кылын, кудзэ тӥ валаськоды.
Нырысь лыдӟе Библиысь со люкетъёсты, кудъёсыз тӥледлы тунсыко пото. Кызьы Библиез лыдӟыны луоз, учке «Кутске Библиез лыдӟыны» люкетысь.
Пусъе, мае тӥ лыдӟиды ини. Сое пусйыны луоз та книгаысь «Пусъе, мае Библиысь лыдӟиды ини» люкетын.
Уже кутэ JW Library® приложениез. Со юрттэ Библиез лыдӟыны но кылзыны, кытын гинэ тӥ медад луэ. Со понна та приложениез смартфонады яке мукет электрон тӥрлыкады скачать кароно.
Уже кутэ «Выль дунне» берыктэмысь приложениосты. Отын вань мутусъёс, таблицаос но кыллюкам. Соос Библиез лыдӟондэс тунсыкогес карозы.
5. Библиез дышетонлы дасяське
Лыдӟе Псалтирез 118:34 но та юанлы валэктон сётэ:
Малы Библиез лыдӟон азьын яке дышетсконлы дасяськон азьын вӧсяськыны кулэ?
Мар юрттоз тӥледлы Библия дышетонлэсь тросгес пайда басьтыны? Котькуд уроклы дасяськыкуды:
А. Уроклэсь нырысетӥ бамзэ лыдӟе.
Б. Усьтэ но лыдӟе Библиысь кылбуръёсты. Малпаське, кызьы соос уроклэн темаеныз герӟаськемын.
В. Пусъе кылъёсты, кудъёсыз юанлы валэктон сёто. Озьы тӥ дась луоды та урокез дышетӥсен эскерыны.
Тодӥськоды-а тӥ?
Иеговалэн Адӟись-Ивортӥсьёсыз Библилэсь пӧртэм берыктэмъёссэ лыдӟо. Нош тужгес но милемлы кельше «Выль дунне» берыктэм, малы ке шуоно со шонер но валамон берыктэмын. Озьы ик отын Инмарлэн нимыз гожтэмын. Учке jw.org сайтысь «Зэм-а Иеговалэн Адӟись-Ивортӥсьёсызлэн асьсэлэн Библизы вань?» статьяез.
КИН КЕ НО ВЕРАНЫ БЫГАТОЗ: «Библиез дышетыны трос дыр кулэ. Мынам солы дыры но, мылкыды но ӧвӧл».
Нош тӥ мар малпаськоды?
ТОДЭ ВАЁН
Малпалэ, ку тӥ Библиез лыдӟоды. Вӧсяське, лыдӟемдэс мед валалоды шуыса. Котькуд дышетонлы дасяське.
Мае тон тодӥд?
Мар юрттоз тӥледлы Библия лыдӟонэз тунсыкогес но пайдаёгес карыны?
Ку тӥ дыр шедьтыны быгатоды Библиез лыдӟыны но дышетыны?
Малы котькуд уроклы дасяськыны кулэ?
ТРОСГЕС ТОДЭ
Учке куд-ог визь-кенешъёсты, кудъёсыз юрттозы Библия лыдӟонэз тунсыкогес карыны.
«Кызьы Библиез лыдӟонэз тунсыкогес кароно» («Возьмаськон башня» № 1, 2017-тӥ ар)
Тодэ куинь амалъёсты, кызьы Библиез лыдӟыны луэ.
Мар кароно, Библия лыдӟон шумпотон мед ваёз шуыса?
Кылзэ, мар верало соос, кинъёс Библиез кемалась лыдӟо ини, но дышетске соослэсь.