Куке куректон вуэ

Кузпалды но семьяды шудо мед луоз шуыса, тӥ троссэ лэсьтӥськоды ке но, улонын куддыръя сыӵе учыръёс луо, кудъёсыз сюлэм каньыллыкез быдто (Екклесиаст 9:11). Шуг-секытъёс кылдыку, яратӥсь Инмар юрттэт сётэ. Та люкетын Библиысь возетъёс сётэмын, кудъёсыз юрттозы тӥледлы но тӥляд ӵыжы-выжыостылы сыӵе учыръёсы но, куке тӥ шӧдтэк шорысь бадӟым куретонэн пумиськоды.

1 ИЕГОВАЛЫ ОСКИСЬКЕ

МАР ВЕРА БИБЛИЯ. «Вань сюлмаськонъёстэс Со доры вае, уго Со тӥ сярысь сюлмаське» (1 Пётр 5:7). Эн вунэтэ, Инмар тӥляд куректонъёсты понна янгыш ӧвӧл шуыса (Иаков 1:13). Солы матэгес кариське но, со тӥледлы ваньмызлэсь умой юрттэт сётоз (Исаия 41:10). «Со азьын аслэсьтыд сюлэмдэ усьты» (Псалтирь 61:9).

Озьы ик тӥледыз буйгатоз котькуд нунал Библиез лыдӟон но сое дышетон. Тӥ шӧдоды, Иегова «котькыӵе куректон-кайгуосмы дыръя... асьмеды буйгатэ» шуыса (2 Коринфъёслы 1:3, 4; Римъёслы 15:4). Со кылзэ сётэ кузьманы тӥледлы аслэсьтыз каньыллыксэ, кудӥз «котькыӵе визьлэсь но вылӥын» (Филиппыослы 4:6, 7, 13).

ПАЙДАЁ ВИЗЬ-КЕНЕШЪЁС

• Вӧсяське Иеговалы асьтэдыз кияды возьыны быгатон сярысь но сазь йырвизь сярысь

• Малпаське, мар карыны луэ тӥляд учырады, но быръе, мар тӥледлы тупа

2 АСЬТЭ СЯРЫСЬ НО СЕМЬЯДЫ СЯРЫСЬ СЮЛМАСЬКЕ

МАР ВЕРА БИБЛИЯ. «Визьмо-нодо муртлэн сюлмыз тодонлык шедьтэ, визьлыко муртъёслэн пельзы тодонлык утча» (Мадёнъёс 18:16). Тросгес тодыны тырше семьяысьтыды котькудӥз сярысь. Озьы тӥ адӟоды, кыӵе соослы юрттэт кулэ. Вераське соосын но сак кылзэ (Мадёнъёс 20:5).

Нош матысьёсты пӧлысь кин ке кулӥз ке? Эн возьдаське асьтэлэсь шӧдонъёстэс возьматыны. Та выллем учырын Иисуслэн но «синкылиосыз потӥзы» (Иоанн 11:35; Екклесиаст 3:4). Озьы ик туж кулэ тырмыт шутэтскыны но изьыны (Екклесиаст 4:6). Со кужым сётоз куректонэз чиданы.

ПАЙДАЁ ВИЗЬ-КЕНЕШЪЁС

• Семьяын умоесь кусыпъёс тупатыны тырше. Со юрттоз семьядылы капчиен тӥледлы вазиськыны, шӧдтэк шорысь шугадӟон луиз ке

• Вераське соосын, кинъёс сыӵе учырен пумиськылӥзы ни

3 ЮРТТЭТ БАСЬТЫНЫ СОГЛАШ КАРИСЬКЕ

МАР ВЕРА БИБЛИЯ. «Эш эшсэ котькыӵе дыре но яратэ, шуге-леке сюрыку, агай-вын кадь со юрттыны лыктэ» (Мадёнъёс 17:17). Эшъёс котьку дась юрттыны, но куддыръя уг тодо кызьы. Эн возьдаське вераны соослы, мар тӥледлы кулэ (Мадёнъёс 12:25). Со сяна, духовной юрттэт курыса вазиське соослы, кинъёс Библиез умой тодо. Инмарлэн Кылысьтыз малпанъёс, кудъёссэ соос тӥледлы вералозы, одно ик тӥледлы юрттозы (Иаков 5:14).

Кулэ луись юрттэт тӥ басьтоды, эшъяськыса соосын, кинъёс Инмарлы но солэн кыл сётонъёсызлы юн оско. Юрттыса соослы, кинъёслэсь мылкыдзэс ӝутыны кулэ, тӥляд асьтэлэн но мылкыдды ӝутскоз. Вералэ соослы Иеговалы но солэн кыл сётонъёсызлы осконды сярысь. Вань кужымдэс поныса, юрттэ мукетъёсызлы, кинъёс шуг-секытъёсын пумиськизы, но эн палэнтӥське соослэсь, кинъёс тӥледыз ярато но тӥ сярысь сюлмасько (Мадёнъёс 18:1; 1 Коринфъёслы 15:58).

ПАЙДАЁ ВИЗЬ-КЕНЕШЪЁС

• Матысь эшеныды вераське но солэсь юрттэтсэ басьтыны соглаш кариське

• Эн возьдаське вераны, мар тӥледлы кулэ