«Улон но ужан-тыршон» ужан тетрадьлы малпанъёс
3—9-ТӤ ТУЛЫСПАЛ
ИНМАРЛЭН КЫЛЫСЬТЫЗ УЗЫРЛЫК | УЛОН-ВЫЛОН 12—14
Духовной марӟанъёсты утчаськомы
(Улон-вылон 13:8, 9) Соку Аврам Лотлы шуиз: «Тон куспын но мон куспын тэрытэк улон медаз луы, мынам пудо возьмасьёсы но тынад пудо возьмасьёсыд куспын ченгешон медаз луы, асьмеос выжы-кумыос луиськомы ук. 9 Быдэс музъем тынад азяд ӧвӧл-а? Люкиськы ук мон бордысь: тон паллян пала мынӥд ке, мон бурпала кожытско; тон бурпала ке, мон паллян пала мыно».
w16.05 5 б., 12 абз.
Ченгешонъёс кылдо ке, кусыпъёстэс яратыса тупатэ
12 Ойдолэ эшшо одӥг пол тодамы ваёмы Библиысь учырез, ку Авраам но солэн агаезлэн Лот пиез, секыт югдуре шедьыса, кусыпъёссэс яратыса тупатыны быгатӥзы. Соослэн кыксылэн но пудо уллёоссы вал, но пудо возьмасьёссы куспын пудо возьман инты понна, вылды, ченгешон потӥз. Кусыпъёссы медаз сӧриське шуыса, Авраам ӵектӥз Лотлы аслыз улон инты бырйыны (Ул.-выл. 13:1, 2, 5—9). Кыӵе умой пример! Авраам аслыз пайда ӧз утча, со тупаса улыны тыршиз. Шырыт сямо луэмез солы изъян вайиз-а? Ӧз! Со учыр бере ик Иегова Авраамлы кылзэ сётӥз сое трос бакель карыны (Ул.-выл. 13:14—17). Инмарлэн ужась-тыршисьёсыз солэн возетъёсызъя уло но, ченгешонъёс кылдыку, яратыса кусыпъёссэс тупатыны тыршо. Иегова ноку но уз лэзьы, озьы улыны тыршемзы понна соослы бадӟым изъян мед луоз шуыса.
(Улон-вылон 14:18—20) Салимлэн эксэез Мелхиседек нянен вина поттӥз,— со Вылысь Инмарлэн священникез вал,— 19 сое бакель карыса шуиз: «Вылысь Инмар, инлэн но музъемлэн Кузёез Аврамез бакель мед кароз; 20 данлыко Вылысь Инмар, тушмонъёстэс тынад киулад Сётӥсь». Аврам, маиз вал, дасэтӥ люкетсэ солы сётӥз.
(Еврейёслы 7:4—10) Адӟиськоды-а, макем со быдӟым вал! Авраам патриарх ожын мар басьтӥз, самой ӟечъёсыз пӧлысь дасэтӥ люкетсэ солы сётӥз. 5 Моисей законъя Левий пиос пӧлысь священник ним басьтӥсьёслэн курон-косонзы вань — калыклэсь дасэтӥ люкет бичан — асьсэ агай-вынъёссылэсь, Авраамлэн кидыс бордысьтыз потэмъёслэсь ик. 6 Нош Мелхиседек соослэн выжыысьтызы потэмын ке но ӧй вал, Авраамлэсь дасэтӥ люкет басьтӥз но Инмарлэсь сӥзиськон басьтэм муртсэ (Авраамез) бакель кариз. 7 Меӵак вераны быгатӥськомы: бакель карись мурт вылӥынгес бакель кароно муртлэсь. 8 Татын кулоно адямиос дасэтӥ люкет басьто, нош отын Мелхиседек сярысь со ялан улэп шуыса тодытон вань. 9 Но, кызьы шуо, ачиз, дасэтӥ люкет басьтӥсь Левий, Авраам пыр Мелхиседеклы дасэтӥ люкет сётӥз: 10 Мелхиседек Авраамез пумитаку, Левий атаез пушкын на вал.
it «Священник», «В древности» подзаг., 2 абз.
Священник
Мелхиседек, Салимлэн эксэез, огшоры священник (кохе́н) ӧй вал. Библиын номыр гожтэмын ӧвӧл, кыӵе выжыысь со потэмын, солэн вордӥськемез но кулэмез сярысь но номыр верамын ӧвӧл. Священник луыны право солы вашкала атайёсызлэсь ӧз выжы. Тодмо ӧвӧл, кин солэсь азьло яке со бӧрсьы священник вал. Мелхиседек эксэй но, священник но вал. Левий Мелхиседеклы дасэтӥ люкет сётӥз шуыны луоз, малы ке шуоно со Авраамлэн выжыез кадь вордскемын ӧй вал на, куке Авраам Мелхиседеклы дасэтӥ люкет сётӥз но Мелхиседек сое бакель кариз. Озьыен Мелхиседек Левийлэсь быдӟымгес священник вал (Ул 14:18—20; Евр 7:4—10). Та возьматэ, Мелхиседек Иисус Христослэн прообразэз вал шуыса, кудӥз «Мелхиседеклэн чинэзъя пумтэм вапумлы... священник» луэ (Евр 7:17).
10—16-ТӤ ТУЛЫСПАЛ
ИНМАРЛЭН КЫЛЫСЬТЫЗ УЗЫРЛЫК | УЛОН-ВЫЛОН 15—17
Духовной марӟанъёсты утчаськомы
(Улон-вылон 15:13, 14) Соку Кузё-Инмар Аврамлы шуиз: «Тод: тынад вуоно выжыосыд мурт музъемын лыктэм калык луозы, соосты ляльчи-медо карозы, ньыль сю ар ӵоже соосты ултӥяса возёзы; 14 но соосты ляльчи-медо радын возись калыкез Мон судить каро; собере соос, трос ваньбур люкаса, потозы;
it «Хронология», «С 1943 г. до н. э. до исхода» подзаг., 3 абз.
Хронология
Иегова Аврамлы (Авраамлы) шуиз: «Тод: тынад вуоно выжыосыд мурт музъемын лыктэм калык луозы, соосты ляльчи-медо карозы, ньыль сю ар ӵоже соосты ултӥяса возёзы» (Ул 15:13; озьы ик учкы Ап 7:6, 7). Та кылъёс верамын вал сӥзем кидыс-выжы, Исаак, вордскемлэсь азьло ик. Асьме вакытлэсь азьло 1932-тӥ арын Авраамлы Агарь нимо египет ляльчи кышномурт Измаил нимо пи вайиз, нош а. в. азьло 1918-тӥ арын Сарра Исаак нимо пи вайиз (Ул 16:16; 21:5). Израиль калык Египетысь потӥз но, соку ултӥяса возён вакыт йылпумъяськиз (Ул 15:14). Египетысь потэмзы дырысен 400 ар лыдъяса, ми вуиськомы а. в. азьло 1913-тӥ аре; соку Исааклы ог 5 арес вал. Со дыре, вылды, Исаакез нонтэмысь дугдӥзы, но Измаил, кудӥзлы со дыре ог 19 арес вал, сое мыскылляса серекъяз. Озьы Исаак, «мурт музъемын улӥсь» кадь, нырысьсэ пумиськиз ултӥянэн, мар сярысь азьло ик верамын вал ини (Ул 21:8, 9). Туннэ Измаиллэн Авраамлэсь кидыс-выжызэ мыскыллямез нокыӵе ик уг поты ке но, патриархъёс улыку со шоры мукет сямен учко вал. Ми озьы малпаны быгатӥськомы, малы ке шуоно Сарра Агарез но солэсь Измаил пизэ улляны куриз, но Инмар солэсь куронзэ умойтэмен ӧз лыдъя (Ул 21:10—13). Со учыр сярысь пыр-поч гожтэмын Библиын. Со эшшо но оскытэ, азьло ик верам ултӥяса возён вакыт, кудӥз 400 ар кыстӥськиз, Египетысь потыку, йылпумъяськиз шуыса (Гл 4:29).
(Улон-вылон 15:16) ньылетӥ выжы вуэм бере соос татчы берытскозы: уго аморрейёслэн законлы пумит улэмзылэн мертэтэз ӧз на пачылмы на».
it «Исход из Египта», «В четвертом поколении» подзаг., 1 абз.
Египетысь потон
«Ньылетӥ выжы». Иегова вераз Авраамлы, солэн нылпиосыз ньылетӥ выжы вуэм бере Ханаанэ берытскозы шуыса (Ул 15:16). Авраамен кутэм тупанкыл ужаны кутскем дырысен Египетысь потон дырозь 430 ар ортчиз. Со дыр куспын ньыльлэсь тросгес выжы воштӥськиз (со дыре, кызьы верамын Библиын, адямиос туж кема уло вал ке но). Но Египетын израиль калык 215 ар гинэ улӥз. Сое, кӧня выжы ортчиз, лыдъяны кутскид ке израиль калыклэн Египетэ улыны интыяськемез дырысен, ӵапак ньыль выжы луоз. Тае адӟыны луэ, Левий выжыез эскерыса: 1) Левий, 2) Кааф, 3) Амрам но 4) Моисей (Пот 6:16, 18, 20).
17—23-ТӤ ТУЛЫСПАЛ
ИНМАРЛЭН КЫЛЫСЬТЫЗ УЗЫРЛЫК | УЛОН-ВЫЛОН 18, 19
Духовной марӟанъёсты утчаськомы
(Улон-вылон 18:1) Нуназе ӟырдыт пӧсь вакытэ, Мамре тыпы сурд вӧзысь балаганаз пырон дорын пукыкуз, Кузё-Инмар Авраамлы возьматскиз.
(Улон-вылон 18:22) Отысь пиосмуртъёс берытскизы но Содоме мынӥзы; нош Авраам ялан Кузё-Инмар азьын сылӥз на.
w88 15/5 23 б., 4, 5 абз.
Инмарез кин ке адӟиз-а?
Табере валамон, малы Инмарен ыстэм кылчинлы, кудӥз адями кадь кариськыса Авраамлы возьматскиз, Авраам Иеговалы кадь вазиськиз шуыса. Та учырын кылчин Инмарлэн нимыныз вераськиз но вераз сое, мае Инмарлэн Авраамлы верамез потэ вал. Соин ик Библиын гожтэмын: «Кузё-Инмар Авраамлы возьматскиз» (Улон-вылон 18:1).
Инмар кылчин пыр сокем шонер вераны быгатэ, макем шонер ми телефон яке радио пыр ивор вераны быгатӥськомы. Тӥни малы Библиын верамын, Авраам, Моисей, Маной но мукет адямиос Инмарен вераськизы шуыса, зэмзэ вераса, соос адями кадь кариськем кылчинъёсын вераськизы ке но. Ваньмыз со адямиос адӟизы кылчинъёсты но Иеговалэсь пиштӥсь данлыксэ, кудъёссэ со кылчинъёс возьматӥзы, но ассэ Инмарез соос ӧз адӟе. Соин ик Библиысь со учыръёс пумит уг луо апостол Иоаннлэн кылъёсызлы: «Инмарез нокин но, ноку но ӧз адӟы» (Иоанн 1:18). Адямиослы ачиз Инмар ӧз возьматскы, нош возьматскылӥзы солэн ыстэм кылчинъёсыз.
(Улон-вылон 19:26) Нош Лотлэн кышноез, со бӧрсьы мынӥсь мурт, берланяз учкиз но,— сылал юболы пӧрмиз.
Юрттэ соослы, кинлы секыт
3 Лот шонертэм ужпум кутӥз: со улыны интыяськиз Содом каре, кытын туж азыса-калгыса улӥзы. (Лыдӟе 2 Пётрлэсь 2:7, 8.) Содом узыр кар вал, нош Лот, отчы улыны мыныса, трос шуг-секытъёсын пумиськиз (Ул.-выл. 13:8—13; 14:12). Лотлэн кышноезлы со карысь ваньбур но адямиос сокем кельшо вал, вылды, со Иеговалэсь но ӧз кылзӥськы. Со кулӥз, куке Иегова со интыез тылын но сераен быдтӥз. Озьы ик малпаське Лотлэн кык нылъёсыз сярысь. Пиосмуртъёс, кудъёсызлы соос бызьыны дасясько вал, Содомын быризы. Лот ыштӥз корказэ, ваньбурзэ, нош тужгес но кышкытэз, кышнозэ (Ул.-выл. 19:12—14, 17, 26). Кызьы Иегова ассэ возиз та учырын?
24-ТӤ ТУЛЫСПАЛ — 1-ТӤ ЮЖТОЛЭЗЬ
ИНМАРЛЭН КЫЛЫСЬТЫЗ УЗЫРЛЫК | УЛОН-ВЫЛОН 20, 21
Духовной марӟанъёсты утчаськомы
(Улон-вылон 20:12) зэмзэ ке верано, со мынам сузэре, со атаелэн нылыз, но анаелэн нылыз ӧвӧл со; со мыным кышно луиз;
wp17.3 12 б., сноска
«Тон тусбуйын туж чебер кышномурт луиськод»
Сарра Авраамлэн сузэрез вал. Соослэн атайзы одӥг вал — Фарра, нош анайёссы пӧртэм (Улон-вылон 20:12). Туннэ сыӵе ӵыжы-выжыосын кузпалъяськыны уг яра, но тодамы возёно, со дыре югдур чылкак мукет вал шуыса. Адам но Ева тырбыдэс луэмысь дугдэм бере трос дыр ортчемын ӧй вал на, соин ик соку адямиослэн тазалыксы юнгес вал. Тӥни малы матысь ӵыжы-выжы луись муртэн кузпалъяськем адямиослэн нылпиоссылы со нокыӵе кышкытлык уг вайы вал. Но ог 400 ар ортчыса, адямиос уло ни вал сомындагес гинэ, кӧня туннэ уло. Соку Инмар Моисей закон пыр матысь ӵыжы-выжыослы ог-огенызы кузпалъяськыны ӧз лэзьы ни (Левит 18:6).
(Улон-вылон 21:5) Исаак пиез вордӥськыку, Авраамлы сю арес вал.
w16.08 22 б., 9, 10 абз.
Валаськоды-а тӥ, макем кулэ Инмарлы матэгес кариськыны?
9 Пуктэм ужпумез быдэстон понна куддыръя «оскиськыса улоно» луэ (Мих. 7:7). Иегова котьку юнматэ аслэсьтыз оскымон ужась-тыршисьёссэ, куддыръя соослы возьмано ке но луэ, ку соослы нимысьтыз уж оскозы яке ку соослэн югдуръёссы воштӥськозы. Инмар Авраамлы кылзэ сётӥз, солэн пиез вордӥськоз шуыса, но Авраамлы осконэн улоно но чидано вал (Евр. 6:12—15). Исааклэсь вордӥськемзэ солы кема аръёс ӵоже возьмано луиз ке но, солэн мылкыдыз ӧз куашка. Но Иегова сётэм кылзэ быдэстӥз (Ул.-выл. 15:3, 4; 21:5).
10 Возьманы котьку ик капчи ӧвӧл (Мад. 13:12). Ялан уродэз сярысь малпаськыса улӥд ке, мылкыд куашканы быгатоз. Умойгес луоз дырез пайдаё ортчытыны: азьланяз но тыршоно сямъёстэ умоятыны, Инмарлэн организацияз оскем ужъёсты быдэстон понна куронъёслы ярамон мед луод шуыса. Учкомы куинь амалъёсты, кызьы сое лэсьтоно.