3-ТӤ ЛЮКЕТ
Кыӵе улон сётэмез потэ Инмарлэн адямиослы?
1. Малы Инмар адямиосты кылдытӥз?
ИНМАРЛЭН адямиос пумысен туж умой малпанэз вал. Со кылдытӥз нырысетӥ пиосмуртэз но кышномуртэз, Адамез но Еваез, но соосты туж чебер садэ улыны интыяз. Инмарлэн потэ вал, адямиос нылпи мед вордозы, быдэс музъемез райлы мед пӧрмытозы но пудо-животъёсты мед утялтозы шуыса (Улон-вылон 1:28; 2:8, 9, 15; учке 6-тӥ ватсам валэктонэз).
2. а) Кытысь ми тодӥськомы, Инмар аслэсьтыз малпанзэ одно ик быдэстоз шуыса? б) Мар верамын Библиын пумтэм вапумъёс ӵоже улон сярысь?
2 Кызьы тӥ малпаськоды, луоз на-а сыӵе дыр, куке адямиос выльысь райын улозы? Иегова кылзэ сётэ: «Мон верай ке, сое быдэсто, пусйи ке, лэсьто» (Исаия 46:9—11; 55:11). Со аслэсьтыз малпанзэ одно ик быдэстоз — солы номыр но, нокин но люкетыны уз быгаты. Иегова вераз, «музъемез... юнме ӧз лэсьты» шуыса. Озьыен, со сое нимысьтыз ужпумен кылдытӥз (Исаия 45:18). Инмарлэн потэ вал, музъем вылын адямиос мед улозы шуыса. Нош кыӵе адямиос музъем вылын мед улозы кадь потэ солы но макем кема? Библия валэктэ: «Шонер улӥсьёс [яке Инмарлэсь кылзӥськись адямиос] музъем басьтозы но со вылын пумтэм вапумъёс улозы» (Псалтирь 36:29; Усьтӥськон 21:3, 4).
3. Кыӵе юанъёс кылдо, куке ми музъем вылысь курадӟонъёсты адӟиськомы?
3 Но туннэ адямиос висё но куло, ожмасько но ог-огзэс виыло. Веранэз ӧвӧл, Инмарлэн уг поты вал, адямиос озьы мед улозы шуыса. Соку мар луиз? Малы Инмарлэн малпанэз ӧз быдэсмы? Библия гинэ та юанъёслы валэктонъёс сётыны быгатэ.
ИНМАРЛЭН ТУШМОНЭЗ
4, 5. а) Кин вераськиз Еваен кый пыр? б) Кызьы кин ке лушкаськись луыны быгатэ?
4 Инмарлэн тушмонэз вань. Библиын со «Шайтан» но «Дьявол» шуыса нимамын. Одӥг пол Едем садын Шайтан Еваен кый пыр вераськыны кутскиз (Улон-вылон 3:1; Усьтӥськон 12:9). Шайтан ачиз вераськиз, нош лэсьтӥз озьы, кый вераське кадь мед адӟиськоз шуыса. (Учке 7-тӥ ватсам валэктонэз.)
5 Кытысь потӥз Шайтан Дьявол? Оло нош, сое Инмар сыӵеен кылдытӥз? Ӧз! Нырысь со кылчин вал, нош собере уродэз пала воштӥськиз но Дьявол луиз (Иов 38:4, 7). Кызьы? Озьы ик, кызьы кин ке лушкаськись луэ. Адями лушкаськись луыса уг вордӥськы. Но кыӵе ке дыре солэн муртлэсь марзэ ке аслыз каремез потыны кутске. Адями со сярысь малпаськемысь уг дугды ке, умойтэм мылкыдыз кужмогес но кужмогес луэ. Но, тупась учыр кылдыку, со лушкаське. Табере со лушкаськись — со ачиз лушкаськись луиз, нокин но сое ӧз косы. (Лыдӟе Иаковлэсь 1:13—15; учке 8-тӥ ватсам валэктонэз.)
6. Кызьы одӥг кылчин Инмарлэн тушмонэз луиз?
6 Со кылчинэн но озьы ик луиз. Куке Иегова Адамез но Еваез кылдытӥз но соосты нылпи вордыны косӥз, со кылчин малпаз, луоз: «Вань та адямиос, Иеговалы интые, мыным йыбыртъяны быгатысалзы!» (Улон-вылон 1:27, 28). Макем тросгес со малпаськиз та сярысь, сокем юнгес пуромиз со мылкыдыз. Солэн потӥз басьтэмез сое, мар Иеговалэн вал. Со кылчинлэн потӥз, адямиос солы мед йыбыртъялозы шуыса. Соин ик со Еваен вераськыны кутскиз но пӧяз сое. (Лыдӟе Улон-вылонэз 3:1—5.) Озьы со Шайтан Дьявол луиз, Инмарлэн тушмонэз.
7. а) Малы Адам но Ева кулӥзы? б) Малы ми пересьмиськомы но кулӥськомы?
7 Адам но Ева Инмарлэсь ӧз кылзӥське но сиыны лэзьымтэ емышез сиизы (Улон-вылон 2:17; 3:6). Озьы соос сьӧлыказы. Дыр ортчыса, кызьы Иегова вераз вал, соос кулӥзы (Улон-вылон 3:17—19). Адамлэн но Евалэн нылпиоссы сьӧлыкоесь вордӥськизы, соин ик соос но кулӥзы. (Лыдӟе Римъёслы 5:12.) Эскеромы одӥг примерез, кудӥз юрттоз валаны, малы Адамлэн но Евалэн нылпиоссы сьӧлыкоесь вордӥськизы. Пуктэ син азяды, тӥ нянь пыжиськоды шуыса. Нош нянь пыжон формадылэн паньгам интыез вань. Со формаын нянь пыжыса, тӥляд няньды но изъянэн пыжоз. Инмарлэсь кылзӥськымтэеныз, Адам сьӧлыко луиз. Ми ваньмы Адам бордысь потэмын бере, ваньмы сыӵе ик «изъянэн», яке сьӧлыко, вордӥськиськомы. Тӥни малы ми ваньмы пересьмиськомы но кулӥськомы (Римъёслы 3:23; учке 9-тӥ ватсам валэктонэз).
8, 9. а) Малы оскытэмез потэ вал Шайтанлэн Адамез но Еваез? б) Малы Иегова пумит ӝутскемъёсты соку ик ӧз быдты?
8 Шайтан Адамлэсь но Евалэсь мылкыдзэс ӝутӥз Инмарлэсь кылзӥськытэк улыны. Озьы со Иеговалы пумит ӝутскиз. Солэн Адамез но Еваез оскытэмез потэ вал, Иегова пӧяськись но урод кивалтӥсь шуыса, кудӥзлэн уг поты, соос шудоесь мед луозы шуыса. Шайтан вераз, адямиос Инмартэк но улыны быгатозы шуыса но асьсэос ужпум кутыны, мар ӟечез, нош мар уродэз. Мар кароно вал Иеговалы? Со быгатысал пумит ӝутскемъёсты быдтыны но озьы бугыръяськонэз дугдытыны. Но возьматысал-а со, Шайтан пӧяськись шуыса? Ӧз.
9 Иегова пумит ӝутскемъёсты соку ик ӧз быдты. Со интые, Инмар адямиослы асьсэлы кивалтыны дыр сётӥз. Дыр ортчыса, ваньзы адӟысалзы, адямиос Инмарлэн кивалтэмез улсын гинэ шудо луыны быгато шуыса, но валасалзы, Шайтан пӧяськись шуыса. Со сярысь тросгес вераськон мыноз та книгалэн 11-тӥ люкетаз. Кызьы тӥ малпаськоды, Адам но Ева шонер лэсьтӥзы-а? Вал-а соослэн мугзы, Инмарлэсь кылзӥськытэк, Шайтанлы оскыны? Иегова Адамлы но Евалы сётӥз ваньзэ, мар соослы кулэ вал. Со соослы туж чебер улон инты сётӥз, пудо-животъёсты утялтыны косӥз но пумтэм вапумъёс ӵоже улон кузьмаз. Нош Шайтан соослы номыр но ӧз сёты. Тӥ соос интыын луысалды ке, мае тӥ бырйысалды?
10. Кыӵе ужпум кутоно котькудмылы?
10 Туннэ но ми сыӵе ик югдуре сюремын. Котькудмылы ужпум кутоно: Иеговалэсь кылзӥськоно яке Шайтанлэсь. Ми Инмарлэсь кивалтӥсьмылэсь кадь кылзӥськимы ке, возьматомы, Шайтан пӧяськись шуыса. Нош Шайтанэз кивалтӥсе бырйимы ке, со кулонэ гинэ вуттоз (Псалтирь 72:28; лыдӟе Мадёнъёсты 27:11). Туннэ туж ӧжытэз адямиос Инмарлэсь кылзӥсько. Со сяна, та дуннеен Инмар уг кивалты. Соку кин та дуннеен кивалтэ?
КИН ТА ДУННЕЕН КИВАЛТЭ?
Вань эксэйлыкъёс Шайтанлэн ӧй луысалзы ке, быгатысал-а со соосты Иисуслы ӵектыны?
11, 12. а) Мар сярысь вера Шайтанлэн Иисуслы вань эксэйлыкъёсты ӵектэмез? б) Кызьы возьматэ Библия, та дуннеен Шайтан кивалтэ шуыса?
11 Иисус Христос тодэ вал, кин та дуннеен кивалтэ. Одӥг пол Шайтан солы «дунне вылысь вань эксэйлыкъёсты но соослэсь данзэс возьматӥз» но шуиз: «Пыдесъяськыса мыным йыбырттӥд ке, ваньзэ тае мон Тыныд сёто» (Матфей 4:8, 9; Лука 4:5, 6). Вань эксэйлыкъёс Шайтанлэн ӧй луысалзы ке, быгатысал-а со соосты Иисуслы ӵектыны? Ӧй быгатысал. Озьыен, вань кивалтэтъёс Шайтанлэн киулаз возисько.
12 Тӥ юалоды: «Кызьы Шайтан та дуннелэн кивалтӥсез луыны быгатэ? Ваньзэ Иегова ӧз кылдыты шат?» (Усьтӥськон 4:11). Зэм, ваньзэ кылдытӥз Инмар, но Иисус шонерак вераз, «та дуннелэн эксэез» Шайтан шуыса (Иоанн 12:31; 14:30; 16:11). Апостол Павел Шайтан Дьяволэз «та даурлэн „инмарез“» шуыса нимаз (2 Коринфъёслы 4:3, 4). Нош апостол Иоанн гожтӥз, «та дуннелэн адямиосыз шайтанлэн киулаз возисько» шуыса (1 Иоанн 5:19).
КЫЗЬЫ ШАЙТАНЛЭН ДУННЕЕЗ БЫДТЭМЫН ЛУОЗ?
13. Малы милемлы выль дунне кулэ?
13 Нуналысь нуналэ улон уродгес но уродгес луэ. Ожъёс но лек ужъёс, пӧяськон но чеберъяськон улонмес секыт каро. Адямиос туж тыршо ке но, уг быгато ваньзэ сое быдтыны. Но ӝоген Инмар та лек дуннеез Армагеддон ожын быдтоз но со интые выль, шонерлыко дуннеез кылдытоз (Усьтӥськон 16:14—16; учке 10-тӥ ватсам валэктонэз).
14. Кинэ Иегова аслаз Эксэйлыказ Эксэй луыны бырйиз? Мар со сярысь азьло ик верамын вал Библиын?
14 Нош кызьы Инмар шонерлыко выль дуннеез кылдытоз? Аслаз инмысь кивалтэтэз пыр. Со кивалтэт Инмарлэн Эксэйлыкез шуыса тодмо. Со Эксэйлыкын Эксэй луыны Иегова Иисус Христосэз бырйиз. Трос сюрс аръёс талэсь азьло Библиын верамын вал, Иисус «Тупаса улонлэн Эксэез» луоз но пумтэм вапумъёсы кивалтоз шуыса (Исаия 9:6, 7). Ӵапак та кивалтэт сярысь вераз Иисус, куке аслэсьтыз дышетскисьёссэ тазьы вӧсяськыны дышетӥз: «Тынад Эксэйлыкед мед лыктоз; Тынад эрикедъя мед луоз музъем вылын но инмын кадь ик» (Матфей 6:10). Та книгалэн 8-тӥ люкетысьтыз ми тодомы, музъем вылысь вань кивалтэтъёс интые Инмарлэн Эксэйлыкез луоз шуыса. (Лыдӟе Данииллэсь 2:44.) Собере Инмарлэн Эксэйлыкез музъемез райлы пӧрмытоз. (Учке 11-тӥ ватсам валэктонэз.)
ВЫЛЬ ДУННЕ МАТЫН ИНИ!
15. Мар со сыӵе «выль музъем»?
15 Библиын Инмарлэн таӵе кыл сётонэз гожтэмын: «Ми... выль инъёсыз, выль музъемез витиськомы, кудъёсыз вылын шонерлык улэ» (2 Пётр 3:13; Исаия 65:17). Куддыръя Библиын «музъем» шуыса верамын музъем вылын улӥсь адямиос сярысь (1 Паралипоменон 16:31). Соин ик «выль музъем» — со шонерлыко адямиос, кудъёсыз Инмарлэсь кылзӥсько но кудъёссэ Инмар бакель каре.
16. а) Мар кузьмалоз Инмар соослы, кинъёс выль дуннеын улозы? б) Мар милемлы кароно, со кузьымез басьтон понна?
16 Иисус кылзэ сётӥз, выль дуннеын улӥсь адямиос «быронтэм улон» басьтозы шуыса (Марк 10:30). Мар милемлы кароно, со кузьымез басьтон понна? Та юанлы валэктон сётэ Библия. Лыдӟе Иоаннлэсь 3:16 но 17:3. Нош табере ойдолэ эскеромы, мар вера Библия вуоно рай музъем вылын улон сярысь.
17, 18. Кытысь ми тодӥськомы, музъем вылын тупаса улон луоз но милемлы номырлэсь кышканы луоз шуыса?
17 Сьӧлыклэсь кышкатэк улон, ожъёс, йыружъёс но лек ужъёс уз луэ ни. Музъем вылын уз луэ ни лек адямиос (Псалтирь 36:10, 11). Инмар «музъемлэн пумысеныз пумозяз ожмаськонъёсты» дугдытоз (Псалтирь 45:10; Исаия 2:4). Котькытын улозы Инмарез яратӥсь но солэсь кылзӥськись адямиос. Музъем вылын котьку тупаса улон луоз (Псалтирь 71:7).
18 Иеговалэн ужась-тыршисьёсызлы номырлэсь кышканы луоз. Вашкала дыръёсы, куке израиль пиос Инмарлэсь кылзӥськизы, соослы номырлэсь кышканы вал, малы ке шуоно Инмар соосты уте вал (Левит 25:18, 19). Райын ми нокинлэсь но номырлэсь ум кышкалэ ни. Ми котьку асьмеды утемын шуыса шӧдомы! (Лыдӟе Исаиялэсь 32:18; Михейлэсь 4:4.)
19. Малы оскыны луэ, выль дуннеын сиён тырмыт луоз шуыса?
19 Сиён тырмыт луоз. «Музъем вылын, гурезьёс йылын удалтэм нянь» луоз (Псалтирь 71:16). Иегова, асьмелэн Инмармы, асьмемыз бакель кароз но, музъем емышсэ сётоз (Псалтирь 66:7).
20. Кытысь ми тодӥськомы, музъем рай луоз шуыса?
20 Быдэс музъем рай луоз. Котькудӥзлэн аслаз чебер коркаез но садэз луоз. (Лыдӟе Исаиялэсь 65:21—24; Усьтӥськонэз 11:18.) Быдэс музъем сыӵе ик чебер луоз, кыӵе чебер вал куке но Едем сад. Иегова котьку асьме сярысь сюлмаськоз но улон понна ваньзэ кулэзэ сётоз. Библиын Иегова сярысь верамын: «Киыныд сётӥськод но вань улэп макеосты, ваньзэс тыр кариськод» (Псалтирь 144:16).
21. Кытысь ми тодӥськомы, адямиос пудо-животъёслэсь уз кышкалэ ни шуыса?
21 Адямиос пудо-животъёслэсь уз кышкалэ ни. Пудо-животъёс адямиослы ноку но кышкытлык уз вае ни. Нылпиос гинэ но уз кышкалэ пудо-животъёслэсь, кудъёсыз туннэ туж кышкытэсь. (Лыдӟе Исаиялэсь 11:6—9; 65:25.)
22. Малы висёнъёс уз луэ ни?
22 Висёнъёс уз луэ. Музъем вылын улыкуз, Иисус Христос трос адямиосты бурмытӥз (Матфей 9:35; Марк 1:40—42; Иоанн 5:5—9). Нош вуонояз, Инмар Эксэйлыкын Эксэй луыса, со вань адямиосты бурмытоз. «Улӥсьёс пӧлысь одӥгез но уз шуы: „Мон висисько“» (Исаия 33:24; 35:5, 6).
23. Мар луоз соосын, кинъёс кулӥзы?
23 Кулэмъёс выльысь улозы. Инмар кылзэ сётэ, трос миллион кулэм адямиосты улӟытоз шуыса. «Со шонер улэмъёсты но, шонер улымтэосты но кулэмысь улӟытыса султытоз». (Лыдӟе Иоаннлэсь 5:28, 29; Апостолъёслэн ужъёссы 24:15.)
24. Потэ-а тӥляд райын улэмды?
24 Милемлы ваньмылы быръёно: Иегова сярысь тодоно но солэсь эриксэ быдэсъяно яке улоно озьы, кызьы милям потэ. Ми Иеговалэсь эриксэ быдэсъянэз бырйимы ке, соку туж умой улонэз адӟомы. Ойдолэ тросгес тодомы со сярысь, кин со Иисус Христос но кызьы со Инмарлэсь кыл сётонъёссэ быдэстоз.