Иеговалы ужан-тыршон улонме шудо кариз

Вуонояз аре веразы ялон, Лымшор Африкаысь филиалэ ужась-тыршисьёс кулэ шуыса. Отын малпало вал пуктыны ротационной печатлан машинаез. Мон верай, мыныны соглаш шуыса, но монэ бырйизы. Талы мон туж шумпотӥ! Со сяна, Канадаысь Вефильысь бырйизы на Деннис Лич, Билл Маклеллан но Кен Нордин агайёсты. Милемлы одӥг пала гинэ билетъёс басьтӥзы.

Мон жингыртӥ анаелы но верай: «Анай, мынам тыныд иворе вань. Мон Лымшор Африкае кошкисько!» Анае Иеговаез туж яратӥз, солэн юн осконэз вал. Со трос вераськыны ӧз яраты. Соку но со трос кылъёс ӧз вера, нош мон шӧдӥ, со быдэсак монэн соглаш шуыса. Анае но атае ноку но пумит луэмзэс ӧз вералэ мынам кутэм ужпуме пумысен. Нош земзэ вераса, соослы капчи ӧй вал, пизы туж кыдёке улыны кошке шуыса.

КОШКИСЬКО ЛЫМШОР АФРИКАЕ!

Нырысь милемыз, ньыль агайёсты, келязы куинь толэзьлы дышетскыны Бруклинысь типографие. Дышетскеммы бере ми пуксимы корабле, кудӥз Кейптаун каре мынэ вал. Мыным соку гинэ 20 арес тырмиз. Мон туж умой тодӥсько на со ӝытэз, куке ми пуксимы поездэ, кудӥз мынэ вал Кейптаун карысь Йоханнесбург каре. Сюресмы кема кыстӥськиз. Поезд нырысетӥзэ ӟардон дыръя дугдӥз пичи Кару каре, отын кыр инты вал. Куазь туж пӧсь но котыр тузон вал. Ми паймыса учкимы укное, малы ке шуоно валаммы потэ вал, кытчы ми сюримы. Аръёс ортчыса гинэ, выльысь отчы берытскеммы бере, ми валамы, макем чебересь вал со пичи каръёс. Улон отын огшоры но каллен мынӥз.

Кӧня ке аръёс ӵоже мон туж тунсыко ужез быдэсъяй. Та уж огшоры ӧй вал. Линотип машиналы мон дасяй букваослы чуръёс, кудъёссэ уже кутӥзы «Возьмаськон башня» но «Сайкалэ!» журналъёсты печатлан понна. Милям филиалмы Африкаысь трос калыкъёслэн кылъёсынызы журналъёс печатлаз, озьы ик Уйпал Африкаысь шаеръёслы но. Зэм, та выль ротационной машина, кудӥз понна мон ӝыны дуннеез ортчи, туж зол ужаз!

Берлогес мон офисын ужаны кутски. Мон пӧртэм ужъёсты быдэсъяй, кудъёсыз герӟаськемын вал литератураез печатланэн, келянэн но берыктонэн. Мынам улонэ туж тунсыко вал!

СЮАН НО ВЫЛЬ УЖ

1968-тӥ арын мон кышно басьтӥ Лоре Боуэн сузэрез, кудӥз соку Вефильлэсь кыдёкын ӧз улы. Со пионер луыса ужаз-тыршиз, озьы ик печатлан ужен юрттӥськиз берыктон ужъя ёзэтлы. Со дыре выль кузпалъёсты Вефиле ӧз кельтылэ, соин ик ми нимысьтыз пионеръёс луыса ужаны-тыршыны кутскимы. Мон кӧня ке сюлмаськи: кылем дас аръёс ӵоже мон Вефильын ужай-тырши, кытын мынам котьку но сиёнэ но улон интые вал. Нош быгатомы-а ми улыны со коньдонэн, кудзэ сёто вал нимысьтыз пионеръёслы? Котькуд толэзе милемлы сётыны кулэ вал 25 рэнд коньдон (соку со 35 доллар луэ вал). Нош сёто вал соку гинэ, куке ми тырмыт дыр тодытӥмы, тырмыт выльысь лыктонъёс лэсьтӥмы но литератураез вӧлмытӥмы. Та коньдон пӧлысь милемлы тыроно вал улон интылы, сиёнлы, транспортлы, озьы ик эмъяськонлы но мукет кулэяськонъёсмылы.

Милемыз ужаны-тыршыны ыстӥзы пичи группае Дурбан кар вӧзы, кудӥз интыяськемын вал Индийской океанлэн ярдураз. Отын уло вал Индиысь потэм адямиос. XIX даурлэн пумаз со интыысь сакыр поттон плантациосы лыктӥзы Индиысь трос ужасьёс. Зэм, со выжыысь потэмъёс отын ӧз ужалэ ни, нош соос утизы асьсэлэсь сям-йылолъёссэс но сиён пӧран амалъёссэс, озьы ик карри сиёнэз пӧранзэс но. Со сяна, соос вераськизы англи кылын, соин ик милемлы кулэ ӧй вал дышетыны выль кылэз, соослы тодытон понна.

Со дыре нимысьтыз пионеръёс толэзяз 150 час тодытыны кулэ вал. Соин ик ми Лораен малпамы нырысетӥ нуналаз 6 час ӵоже тодытыны. Куазь туж пӧсь но мускыт вал. Выльысь лыктонъёсмы но Библия дышетонъёсмы милям ӧй вал на, соин ик вань та дыр ӵоже милемлы коркась корка ветлыса тодытыны кулэ вал. Кӧня ке дыр тодытэммы бере мон малпай, ужан-тыршонмес йылпумъяны кулэ ини шуыса, но часэ шоры учки... 40 минут гинэ ортчем! Мон аслым юан сётӥ: кызьы ми нимысьтыз пионеръёс луыса ужаны-тыршыны быгатомы?

Ӝоген ми дышимы дырмес шонер радъяны. Котькуд нунал ми сьӧрамы басьтӥмы бутербродъёс но шыд яке термосын кофе. Куке милемлы шутэтскыны кулэ вал, ми пичи машинамес кыӵе ке писпулэн саюлаз интыямы. Куддыръя машинамы котыре люкасько вал пичиесь, мусо инди пиналъёс, кудъёсыз туж паймыса ми шоры учкылӥзы. Кӧня ке нунал ортчыса ини, ми валамы, туж кулэ 2—3 час чиданы, нош собере кылемез дыр туж ӝог ортче.

Кыӵе трос шумпотон вайиз милемлы та куно карись адямиослы тодытэммы! Инди калык туж лякыт, тау карись но Инмарлэсь кышкась. Тросэз индусъёс милесьтым ивормес кылзӥзы. Соослы кельше вал тодыны Иегова, Иисус, Библия, вуоно выль дунне но улӟытонлы оскон сярысь. Ар ортчыса ини, милям 20 Библия дышетонъёсмы вал. Котькуд нунал кыӵе ке но семья, кудӥныз ми дышетӥмы, ӧтьылӥз милемыз нуназезэ ӵош сиськыны. Милям выль улонмы туж шудо вал!

Нош кӧня ке дыр ортчыса, милемлы мукет уж сётӥзы — ёросэз чаклась луыса ужаны-тыршыны. Ми ужамы-тыршимы Индийской океанлэн туж чебер ярдураз. Котькуд арняе ми пӧртэм кенешъёсы ветлӥмы, ӵош ужамы пӧртэм тодытӥсьёсын но одӥгаз семьяын улӥмы. Милемлы соос ӵыжы-выжыос кадь луизы. Ми туж яратӥмы соослэсь нылпиоссэс но гурт пудо-животъёссэс. Кык ар ортчем бере милемлы Лымшор Африкалэн филиалысьтыз жингыртӥзы но веразы: «Ми малпаськомы тӥледыз берен Вефиле берыктыны». Нош мон верай: «Милемлы татын но умой». Зэмзэ вераса, ми дась вал ужаны-тыршыны котькытын, кытчы милемыз ыстысалзы.

НОШ ИК ВЕФИЛЬЫН

Мон ужаны кутски ужан-тыршонэз радъясь ёзэтын. Отын мон быгатӥсь но визьмо вын-агайёсын ӵош ужай. Со дыре котькуд кенешлы ёросэз чаклась ветлэм бере филиал юнматӥсь кылъёсын но кулэ луись визь-кенешъёсын гожтэтъёс ыстылӥз. Ужан-тыршонэз радъясь ёзэтысь секретарьёс асьсэды жалятэк ужазы. Нырысь соос берыктӥзы ёросэз чакласьлэсь отчётъёссэ коса, зулу но мукет африкан кылъёсысь англи кылэ, нош собере та кылъёсы ик соос берыктӥзы филиаллэсь гожтэтъёссэ. Мон туж тау карисько та тыршись берыктӥсьёслы, кудъёсыз мыным валаны юрттӥзы, кыӵе шуг-секытъёсын пумиськылӥзы Африкаысь сьӧд куо вын-агайёсмы но сузэр-апайёсмы.

Со дыре Лымшор Африкаын таӵе политика вал: пӧртэм расаосысь адямиос ог-огзылэсь палэнын улыны кулэ вал, озьы ик соослы уг яра вал ог-огенызы дырзэс ортчытъяны. Африкаысь сьӧд куо вын-агайёсмы вераськизы асьсэ кылын гинэ, тодытӥзы асьсэ кылын гинэ вераськись адямиослы но асьсэ кылын гинэ ортчытӥськись кенешъёсы ветлӥзы.

Солэсь азьло мон ужай-тырши англи кылын вераськись кенешъёсын, соин ик мынам ӧй вал тодмоосы сьӧд куо вын-агайёс пӧлын. Нош табере мон быгатӥ умойгес тодыны соосты но тодматскыны соослэн сям-йылолъёсынызы. Мон адӟи, кыӵе шуг-секытъёсын соос пумиськылӥзы но макем соослы кышкасьтэм луоно вал, Библилы пумит мынӥсь сям-йылолъёслэсь но дышетонъёслэсь куштӥськон понна. Нош макем соос вылэ зӥбизы семьяоссы но бускельёссы, куке периосын герӟаськем сям-йылолъёсы пыриськыны косо вал. Со сяна, гуртын улӥсь адямиос туж куанер улӥзы. Тросэз соос пӧлысь дышетскымтэ вал. Озьы ке но соос туж гажазы Библиез.

Мон юрттӥськи юридик ужъёсын вырись вын-агайёслы. Та ужъёс герӟаськемын вал эрико йыбырттонэн но нейтралитетэз утёнэн. Адӟись-Ивортӥсьёслэсь нылпиоссэс школаосысь поттылӥзы, малы ке шуоно соос пумит вал огъя вӧсяськонъёсы пыриськыны но гимнъёсты кырӟаны. Соослэн кышкасьтэм но Иеговалы оскымон луэмзы мынэсьтым осконме туж юнматӥз.

Эшшо одӥг шуг-секытэн пумиськизы вын-агайёсмы Африкаысь одӥг пичи шаерын, кудӥз соку Свазиленд шуыса нимаськиз. Куке Собхуза II эксэй кулӥз, та шаерын улӥсьёслы таӵе косон сётӥзы: пиосмуртъёслы — пилеш ӵышкиськыны, нош кышномуртъёслы — йырсизэс вакчи ӵышкыны. Та сям-йылол герӟаськемын вал кулэмъёслы йыбырттонэн. Вын-агайёсмы но сузэр-апайёсмы пумит луизы та сям-йылолэ пыриськыны, соин ик троссэ соос пӧлысь уйылӥзы-уллязы. Ми троссэ тодӥмы Африкаысь та вын-агайёсмылэн Иеговалы оскымон луэмзы но чидамзы сярысь. Та милесьтым осконмес юнматӥз.

ВЫЛЬЫСЬ ТИПОГРАФИЯ

1981-тӥ арын монэ нош ик ыстӥзы типографие, печатлан ужын компьютеръёсты уже кутон понна. Со туж тунсыко дыр вал! Печатлан амалъёс туж ӝог вошъяськизы. Со интыысь одӥг компания филиалмылы ӵектӥз фотонаборной машинаез дунтэк уж вылын эскерыны. Со милемлы туж кельшиз, соин ик укмыс линотипъёсты ми воштӥмы вить фотонаборной машинаослы. Нош эшшо ми пуктӥмы выль ротационной офсетной печатной машинаез. Ужмы эшшо но ӝоггес мыныны кутскиз!

Компьютеръёс юрттӥзы кылдытыны MEPS программаез («Трос кылъёсын электронной издательской системаез»), кудӥзлы луыса текстэз выль амалэн печатлан понна дасяны луэ. Ӟеч луэ, бадӟымесь, дыртытэк ужась линотипъёс, кудъёсыз понна ми, Канадаысь ньыль Вефильын ужасьёс, лыктӥмы Лымшор Африкае! (Ис. 60:17). Со дырлы ми ваньмы кышнояськемын вал ини пионер луыса ужась-тыршись сузэръёсын, кудъёсыз туж яратӥзы Иеговаез. Ми Биллэн азьланьтӥмы Вефильын ужаны-тыршыны, нош Кен но Деннис асьсэлэн семьяосынызы улӥзы филиал котырын.

Вефильын уж тросгес но тросгес луиз. Библия вылэ пыкиськем литератураез берыктӥзы но печатлазы тросгес но тросгес кылъёсы, собере сое мукет филиалъёсы келязы. Дыр ортчыса, кулэ луиз выль Вефиль пуктыны. Сое пуктон понна быръемын вал чебер инты, кудӥз интыяськемын вал Йоханнесбург карлэн шундыпуксён палаз. 1987-тӥ арын выль Вефилез Иеговалы сӥзизы. Мон трос аръёс ӵоже Лымшор Африкаысь филиаллэн комитетаз ужай-тырши. Соку туж трос уж вал. Та дырез мон туж шумпотыса тодам вайисько.

НОШ ИК ВЫЛЬ УЖ!

Ми туж паймимы, куке 2001-тӥ арын монэ Огазеяськем Штатъёсысь филиаллэн али гинэ кылдэм комитетаз ужаны-тыршыны ӧтизы. Зэм но, милемлы Лораен туж секыт вал кельтыны Лымшор Африкаысь яратоно ужмес но эшъёсмес, нош со дыре ик ми чидатэк возьмамы дырез, куке Огазеяськем Штатъёсысь Вефильлэн семьяяз пыромы.

Озьы ке но ми сюлмаськимы, Лоралэсь анайзэ кельтоно луоз шуыса, малы ке шуоно солэн арлыдыз бадӟым вал ини. Нью-Йоркысен ми со сярысь сюлмаськыны ӧм быгатысалмы, дыр. Но шумпотыса вераны луэ, Лоралэн куинь сузэръёсыз анайзы сярысь сюлмаськыны мылкыд каризы. Соос веразы: «Ми асьмеос вань дырмес сётыса ужаны-тыршыны ум быгатӥське. Нош ми анаймы сярысь сюлмаськимы ке, солы луыса тӥ быгатоды асьтэлэсь уждэс азьланьтыны». Ми соослы туж тау кариськомы!

Нош мынам анае сярысь, кудӥз соку одӥгназ кылемын вал ини, мылкыд каризы сюлмаськыны агае но солэн кышноез. Соос Торонтоын уло вал. Анае соосын 20 арлэсь но кемагес улӥз. Ми туж тау кариськомы соослы, соос анае сярысь пумозяз яратыса сюлмаськизы шуыса. Но жаляса верано луэ, Нью-Йорке Лораен вуэммы берегес ик, со кулӥз. Куке вань сыӵе ӵыжы-выжыос, кудъёсыз дась юрттыны но малэсь ке но куштӥськыны, со Иеговалэсь зэмос кузьым, малы ке шуоно арлыдо анай-атайёс сярысь сюлмаськыны туж ик капчи ӧвӧл.

Огазеяськем Штатъёсы лыктэммы бере мон кӧня ке аръёс ӵоже Вефильысь типографиын ужай. Та дыр куспын литератураез поттон уж капчигес луиз. Нош берлогес мыным мукет уж сётӥзы — филиалын ваньмыз кулэез мед луоз шуыса сюлмаськыны. Мон туж шумпотӥсько, берло 20 аръёс ӵоже мон та бадӟым филиалын ужай-тырши шуыса. Татын ог 5 000 вын-агайёс но сузэр-апайёс ужало-тыршо, озьы ик ог 2 000 вын-агайёс но сузэр-апайёс татчы юрттӥськыны ветло.

60 ар талэсь азьло мон ӧй но малпа, кытын али луо. Вань та аръёс ӵоже Лора мыным юрттӥськыса улӥз. Милям улонмы туж шудо вал. Ми туж тау кариськомы Иеговалы пӧртэм ужъёс понна, кудъёссэ со милемлы сётъяз, вань паймымон адямиос понна, кудъёсыныз ми ӵош ужамы но кудъёсыныз тодматскимы, куке быдэс дуннеысь филиалъёстӥ ветлӥмы. Али мыным 80 ареслэсь тросгес но, мон ӧжытгес ужасько ини. Но кыӵе умой, милям филиаламы вань трос егит вын-агайёс, кудъёсыз тросгес лэсьтыны быгато.

Псаломез гожъясь вераз: «Шудо со калык, кинлэн Инмарез Кузё-Инмар [Иегова, ВД] луэ» (Пс. 32:12). Мон соин быдэсак соглаш. Тау Иеговалы, мон солэн шудо калыкеныз ӵош солы ужаны-тыршыны быгатӥсько шуыса!