Лыдӟисьёслэн юанъёссы

Кызьы Иеговалэн Адӟись-Ивортӥсьёсыз учко тодматскон понна сайтъёс шоры, кытысь кузпал шедьтыны луэ?

Иеговалэн потэ, кык адямиос, кудъёсыз кузпалъяськыны малпало, шудоесь мед луозы но ноку медаз люкиське шуыса (Матф. 19:4—6). Тӥляд семья кылдытэмды потэ ке, мар юрттоз тӥледлы тупамон кузпал шедьтыны? Иегова — милям Кылдытӥсьмы, соин ик со тае умойгес тодэ. Пумиськылыкуды тӥ солэсь возетъёссэ уже кутӥды ке, тӥляд семьяды зэмзэ ик шудо луоз. Ойдолэ эскеромы куд-ог возетъёсты.

Нырысетӥез, милемлы валаны кулэ валтӥсь зэмлыкез: «Адями сюлэм кадь кескич номыр ӧвӧл, со укыр сӧриськемын» (Иер. 17:9). Куке кык адямиос пумиськылыны кутско, соослэн шӧдонъёссы юнэсь луыны быгато, солы луыса соос визьмо малпаськыны уг быгато ни. Соос, кинъёс шӧдонъёссэс лыдэ басьтыса гинэ кузпалъясько, берлогес со сярысь ӵем дыръя жаляло. Соин ик ог-огеныды умой тодматскемдылэсь азьло умой ӧй луысал ог-огдылы мур шӧдонъёстэс возьматыны но кузпалъяськыны кылдэс сётыны.

Мадёнъёсын 22:3 верамын: «Визьнодо мурт шугадӟонэз адӟе но ватӥське; нош улонэз ляб тодӥсьёс азьлане мыно но вӧсь карон улэ сюро». Жаляса верано луэ, куд-огъёсыз ас вылазы шӧдӥзы, тодматскон понна сайтъёсысь но приложениосысь кузпал утчан куректон вае шуыса. Интернет пыр тодматскыса, куд-огъёсыз кинэн ке но пумиськылыны кутскизы, нош собере тодӥзы, со адями соосты пӧяз шуыса. Со сяна, сыӵе сайтъёсын пӧяськисьёс кылдыто шонертэм аккаунтъёс, ваньмызлы оскись адямиослэсь коньдонзэс кыскон понна. Куддыръя сыӵе пӧяськисьёс асьсэды Адӟись-Ивортӥсь шуыса нимало.

Вань эшшо одӥг кышкытлык. Адямилы тупамон кузпал шедьтон понна, куд-ог сайтъёс уже куто формулаосты. Нош номыр уг возьматы, соос кыӵе ке но пайда ваё шуыса. Лэзёды-а тӥ та кулэ луись юанын компьютерлы ужпум кутыны — тупамон кузпал шедьтыны? Компьютерысь программаос Библиысь возетъёс кадь оскымонэсь ноку но уз луэ (Мад. 1:7; 3:5—7).

Эшшо одӥгез возет гожтэмын Мадёнъёсын 14:15: «Укылтэм мурт котькыӵе но кыллы оске, нош визьнодо адями улон сюрес вылаз сак улэ». Зэм но, кинэн ке улондэ герӟан понна, умой луысал со адямиез умой тодыны. Тодматскон понна сайтъёсын тае лэсьтыны туж секыт. Интернет пыр тӥ со адямиен трос пумиськылӥды но адӟиськиды ке но, луоз-а вераны, тӥ ог-огдэс умой тодӥськоды шуыса? Ӵем дыръя соос, кинъёс малпазы, интернетысь яратонзэс шедьтӥзы шуыса, туж ӝоже усизы, куке соос та адямиен ваче ымныр пумиськыса вераськизы.

Псаломез гожъясь вераз: «Ӧрекчи адямиосын огазьын мон ӧй пукы, кескичъёсын но ӵош уг мыны» (Пс. 25:4). Тросэз номыр уродзэ уг адӟо, тодматскон понна сайтъёсын асьсэ сярысь пӧяса вераны. Умойгес адскон понна, соос асьсэ сярысь мае ке чеберъяса вераны быгато, яке мае ке ватыны. Озьы ик соос гожтыны быгато, Иеговалэн Адӟись-Ивортӥсьёсыз луо шуыса. Нош зэмзэ-а со озьы? Пылатӥськемын-а соос? Луоз-а вераны, соослэн Иеговаен юн кусыпъёссы шуыса? Кенешын соосты гажало-а? Яке соос умойтэм адӟем карон возьмато но урод эшъёс луыны быгато? (1 Кор. 15:33; 2 Тим. 2:20, 21). Быгато-а соос кузпалъяськыны, Библиысь возетъёсты лыдэ басьтыса? Та юанъёслы валэктонъёс туж кулэ луо. Нош тӥ та адямиез эшшо но умойгес тодыны быгатоды, вераськыса Адӟись-Ивортӥсен, кудӥз та адямиез умой тодэ (Мад. 15:22). Зэм но, Иеговалы оскымон адями котьку но лыдэ басьтэ таӵе возетэз: «Оскисьтэмъёсын одӥг кыткетэ йырдэс эн понэ» (2 Кор. 6:14; 1 Кор. 7:39).

Вераны луэ, тодматскон понна таӵе сайтъёсты уже кутыны кышкыт луэ. Соку кытысь шедьтоно адямиез, кудӥныз улондэ герӟаны луысал? Куке бадӟым пумиськонъёсты ортчытъяны лэзё, Иеговалэн Адӟись-Ивортӥсьёсыз ог-огенызы тодматскыны быгато кенешлэн пумиськонъёсаз, конгрессъёсын, яке эшъёсынызы пумиськыса.

Нош куке трос адямиосын ӵош люкаськыны уг яра (кылсярысь, COVID-19 пандемия дыръя кадь), кенешлэсь пумиськонъёссэ ми интернет пыр ортчытъяськомы. Таӵе амаллы луыса но Иеговалэн Адӟись-Ивортӥсьёсыз, кудъёсызлэн семья кылдытэмзы потэ, быгато тодматскыны мукет кузпалъяськымтэ христианъёсын. Ми адӟыны быгатомы, кызьы соос кенеш дыръя соослы сётэм ужез быдэсъяло но эскеронэ пырисько (1 Тим. 6:11, 12). Озьы ик пумиськон бере ми быгатӥськомы ог-огенымы вераськыны сессионной залъёсын пичиесь группаосын. Нош эшъёсын пумиськон дыръя, кудъёссэ Адӟись-Ивортӥсьёс озьы ик интернет пыр ортчытъяло, троссэ тодыны луэ адями сярысь, куке ми чакласькомы, кызьы со ассэ возе но кызьы со мукетъёсыныз вераське (1 Пётр 3:4). Дыр ортчыса, куке тӥ со адямиен умойгес тодматскоды, быгатоды валаны, тупало-а тӥляд ужпумъёсты но быгатоды-а тӥ ог-огдылы тупамон кузпалъёс луыны.

Асьсэлы кузпал утчакузы, христианъёс Библиысь возетъёсты уже куто ке, соослэн семьязы шудо луыны быгатэ. Библиын со сярысь тазьы верамын: «Ӟеч кышно [яке карт] шедьтӥсь мурт, ӟечлык шедьтӥз, Кузё-Инмар дорысь дэлет басьтӥз» (Мад. 18:23).