Инмарлэн визь-кенешъёсыз кузпалъёслы шудо луыны юртто

Нырысетӥ семьяез кылдытӥз Иеговаa Инмар. Библиын вераське, со нырысетӥ кышномуртэз кылдытӥз но «сое адями доры вайиз» шуыса. Адам шумпотыса вераз: «Тани, та лы мынам лыосы пӧлысь, та мугор но мынам мугорылэсь пӧрмытэмын» (Улон-вылон 2:22, 23). Со шудо луиз. Иеговалэн потэ, туннэ но кузпалъёс шудоесь мед луозы шуыса.

Кузпалъяськыкузы адямиос ӵем дыръя малпало, соослэн ӵош улонзы котьма ласянь туж умой луоз шуыса. Нош карт но кышно ог-огзэс зэмзэ ик ярато ке но, соос шуг-секытъёслэсь палэнскыны уз быгатэ (1 Коринфъёслы 7:28). Та брошюраын сётэмын Библиысь возетъёс, кудъёссэ улонэ кутыса, кузпалъёс но семьяос шудоесь луыны быгатозы (Псалтирь 18:9—12).

1 ЛЫДЭ БАСЬТЭ СОЕ, КЫӴЕ ИНТЫ ТӤЛЕДЛЫ ИЕГОВА ВИСЪЯЗ

МАР ВЕРА БИБЛИЯ. Карт — семьялэн йырыз (Ефесъёслы 5:23).

Иегова картлэсь вите, со кышноез сярысь яратыса сюлмаськоз шуыса (1 Пётр 3:7). Инмар сое картэзлы юрттӥсь карыса кылдытӥз. Солэн потэ, карт кышнозэ мед яратоз но мед гажалоз шуыса (Улон-вылон 2:18). Карт, кудӥз кышнозэ зэмзэ ик яратэ, нырысь ик малпаське со сярысь, мар кышноезлы кулэ (Ефесъёслы 5:25—29).

Кышнолэсь Иегова вите, со картсэ мур гажалоз но семьяын солы йыр луыны юрттоз шуыса (1 Коринфъёслы 11:3; Ефесъёслы 5:33). Кышнолы вань сюлмысьтыз юрттыны кулэ картэзлэсь кутэм ужпумъёссэ быдэсъяны (Колоссыослы 3:18). Озьы лэсьтыса, картэзлэн но, Иеговалэн но син азязы со туж умой кышно луоз (1 Пётр 3:1—6).

ПАЙДАЁ ВИЗЬ-КЕНЕШЪЁС

• Кузпалдылэсь юалэ, ма ласянь тӥледлы умойгес луоно. Сак кылзэ сое но лыдэ басьтыны тырше солэсь верамзэ

• Чидалэ. Ог-огдэс шудо карыны дышетскон понна, дыр кулэ луоз

2 КУЗПАЛДЫЛЭСЬ ШӦДОНЪЁССЭ ЛЫДЭ БАСЬТЭ

МАР ВЕРА БИБЛИЯ. Кузпалды сярысь сюлмаськыны кулэ (Филиппыослы 2:3, 4). Тодады возе, Иеговалэн ужась-тыршисезлы «ваньмыныз ассэ лякыт возьыны кулэ» шуыса. Озьы лэсьтӥды ке, кузпалды адӟоз, тӥ сое туж дунъяськоды шуыса (2 Тимофейлы 2:24). «Юнме кыл тэкшерись пуртэн кадь вандэ, нош визьмо муртлэн кылыз эмъя» (Мадёнъёс 12:18). Соин ик кылъёсты малпаськыса вераны кулэ. Иеговалэн духез юрттоз тӥледлы лякытэн но яратыса вераськыны (Галатъёслы 5:22, 23; Колоссыослы 4:6).

ПАЙДАЁ ВИЗЬ-КЕНЕШЪЁС

• Кузпалэныды кулэ луись юанъёс эскерон азяды вӧсяське, сюлмады каньыллык мед луоз шуыса но кузпалдылэсь малпанзэ лыдэ басьтыны мед быгатоды шуыса

• Умой малпаське, мар вералоды но кызьы

3 ОГКЫЛЫСЬ УЛЭ

МАР ВЕРА БИБЛИЯ. Кузпалъяськыса тӥ кузпалэныды «одӥг лулмугор» луиськоды (Матфей 19:5). Нош тӥ, азьло сямен ик, кык пӧртэм адямиос, но тӥляд пӧртэм малпанъёсты луыны быгато. Соин ик тӥледлы дышетсконо огмылкыдын улыны (Филиппыослы 2:2). Огкылысь улон туж кулэ, ужпумъёс кутыку. Библиын верамын: «Малпам ужрадъёс юнмало, соосты кенешыса лэсьтӥськод ке» (Мадёнъёс 20:18). Кулэ луись ужпумъёсты ӵош кутыкуды, Библиысь возетъёсты лыдэ басьтэ (Мадёнъёс 8:32, 33).

ПАЙДАЁ ВИЗЬ-КЕНЕШЪЁС

• Кузпалдылы малпанъёстэс но иворъёстэс верам сяна, шӧдонъёсты сярысь но вералэ

• Ас вылады кыӵе ке уж басьтон азяды ог-огеныды кенеше