Кызьы шуг-секытъёсты сэрттоно-пертчоно

Куке кузпалъёс ӵош улыны кутско, соослэн выль шуг-секытъёссы кылдо. Малы? Малы ке шуоно кузпалъёслэн пӧртэмесь малпанъёссы, шӧдонъёссы но улон шоры учконзы. Озьы ик шуг-секытъёс кылдыны быгато малпамтэ шорысь луэм югдуръёс сэрен яке мукет мугъёс сэрен.

Зэм но, шуг-секытъёсты сэрттон-пертчон — со капчи уж ӧвӧл, нош озьы лэсьтыны мылкыдмес ӝутэ Библия (Матфей 5:23, 24). Тужгес но умой юрттэт милемлы сётыны быгато Библиысь возетъёс.

1 КЫЛДЭМ ШУГ-СЕКЫТ СЯРЫСЬ ВЕРАСЬКЕ

МАР ВЕРА БИБЛИЯ. «Вераськонлэн аслаз дырыз» (Екклесиаст 3:1, 7). Кылдэм шуг-секыт сярысь вераськон понна, дыр висъялэ. Кузпалдылы ватытэк вералэ, мар тӥ малпаськоды но шӧдӥськоды та юан пумысен. Ог-огдылы «шонер кылъёсты гинэ вералэ» (Ефесъёслы 4:25). Тӥледлы лякытэн вераськыны секыт ке но, тырше асьтэдыз кияды кутыны. Зӥбыт-востэм кылъёсын вераськон керетонлэсь уте (Мадёнъёс 15:4; 26:20).

Тӥ маин ке соглаш ӧвӧл ке но, кузпалэныды лякыт кылъёсын вераське, котьку но яратэмдэс но гажамдэс возьматыса (Колоссыослы 4:6). Ог-огды вискын валамтэос кылдо ке, соосты ӝоггес сэрттыны-пертчыны тырше но вераськытэк эн улэ (Ефесъёслы 4:26).

ПАЙДАЁ ВИЗЬ-КЕНЕШЪЁС

• Кылдэм шуг-секыт сярысь вераськон понна, тупась дыр шедьтэ

• Кузпалды вераськыку, кыл куспаз эн пыре. Тӥледлы но веран дыр вуоз

2 САК КЫЛЗЭ НО ВАЛАНЫ ТЫРШЕ

МАР ВЕРА БИБЛИЯ. «Агай-вынъёс кадь, гажаса ог-огеныды улэ; мукетъёссэ асьтэ сярысь умоесьгес луо шуыса лыдъялэ» (Римъёслы 12:10). Чаклалэ, кызьы тӥ кылзӥськоды. Кузпалдэс валаны тырше, гажась-жалясь но зӥбыт-востэм луыса (1 Пётр 3:8; Иаков 1:19). Шонер ӧй луысал, тӥ кылзӥськем амал гинэ карысалды ке. Быгатӥськоды ке, вань ужъёстэс палэнтэ но вань саклыктэс висъялэ солы, мар вера кузпалды, яке кылдэм юанэз берлогес эскерыны ӵектэ. Кузпалды тӥледлы тушмон ӧвӧл, нош эш луэ шуыса, тодады возиды ке, тӥледлы капчигес луоз та возетъя улыны: «Вождэ поттыны эн дырты» (Екклесиаст 7:9).

ПАЙДАЁ ВИЗЬ-КЕНЕШЪЁС

• Кузпалдылэн верамез тӥледлы уг кельшы ке но, солэсь кылъёссэ пеляды понэ

• Тырше валаны, мар верамез потэ вал кузпалдылэн. Висъялэ саклыктэс солэн ымныр тусызлы, выросъёсызлы но куараезлы

3 КУТЭМ УЖПУМЪЁСТЫЯ ЛЭСЬТЭ

МАР ВЕРА БИБЛИЯ. «Котькудӥз но уж табыш [пайда] сётэ, нош юнме супыльтон изъян гинэ вае» (Мадёнъёс 14:23). Шуг-секытэз сэрттон-пертчон сярысь вераськемды гинэ ӧжыт луоз. Кутэм ужпумъёстыя ик лэсьтыны кулэ. Со понна вань кужымдэ поныса тыршоно луиз ке но, со пайда ваёз (Мадёнъёс 10:4). Тӥ огкылысь, эшъёс кадь, тыршиськоды ке, ужамды понна «ӟеч мед-кузьым» басьтоды (Екклесиаст 4:9).

ПАЙДАЁ ВИЗЬ-КЕНЕШЪЁС

• Вераське, мар кароз котькудӥз, шуг-секытэз сэрттон-пертчон понна

• Дырын-дырын малпаське, мар карыны пӧрмиз