Кызьы ӵыжы-выжыосын тупаса улоно

Кузпалъяськем бере выль семья кылдэ. Тӥ анай-атайёстэс яратӥськоды но гажаськоды ке но, табере музъем вылын нырысетӥ интыын тӥляд кузпалды луэ. Куд-огезлы ӵыжы-выжыосты пӧлысь солы дышыны капчи уз луы, дыр. Нош Библиысь возетъёс юрттозы тӥледлы выль семья кусыпъёстэс тупатыны, со дыре ик, ӵыжы-выжыосыныды но тупаса улыны.

1 ӴЫЖЫ-ВЫЖЫОСТЫ ШОРЫ ШОНЕР УЧКЕ

МАР ВЕРА БИБЛИЯ. «Атайдэ но анайдэ сӥлы кар» (Ефесъёслы 6:2). Кӧня гинэ арес тӥледлы медаз луы, тӥледлы анай-атайёстэс гажано. Озьы ик тодады возёно, тӥляд кузпалды кинлэн ке нылыз яке пиез луэ но со анай-атайёсызлы саклыксэ висъяны кулэ шуыса. «Яратон уг вожъяськы», соин ик кузпалдэ солэн атаеныз яке анаеныз вожаны шонертэм луысал (1 Коринфъёслы 13:4; Галатъёслы 5:26).

ПАЙДАЁ ВИЗЬ-КЕНЕШЪЁС

• Тырше та выллем кылъёсты вератэк улыны: «Тынад анай-атайёсыд котьку монэ тэргало» яке «Тынад анаедлы ноку но номыр но уг яра»

• Тырше валаны кузпалдылэсь улон шоры учкемзэ

2 АНАЙ-АТАЙЁСТЫЛЭН СЕМЬЯ УЛОНАДЫ ПЫРИСЬКЕМЗЫ

МАР ВЕРА БИБЛИЯ. «Адями аслэсьтыз атайзэ, аслэсьтыз анайзэ кельтоз но кышноез борды лякиськоз: одӥг лулмугор луозы» (Улон-вылон 2:24). Кузпалъяськемды бере но анай-атайёсты малпаны быгато, азьло сямен ик тӥ понна кыл куто шуыса, соин ик тӥляд улонады мултэссэ пырисько, вылды.

Тӥледлы кузпалэныды малпано, кудъёсаз ужъёсады анай-атайёсты пыриськозы, нош кудъёсаз уз. Собере сое умоен валэктоно соослы. Но верано шонерак, со дыре ик, лякытэн (Мадёнъёс 15:1). Востэм, зӥбыт сям но кема чидан юрттозы тӥледлы ӵыжы-выжыосыныды тупаса улыны, озьы ик азьланяз но ваньзэ чиданы но ог-огдэс яратыны (Ефесъёслы 4:2).

ПАЙДАЁ ВИЗЬ-КЕНЕШЪЁС

• Ӵыжы-выжыосты семья улонады мултэссэ пырисько кадь потэ ке, со сярысь кузпалэныды каньылэн вераське

• Вераське, мар тӥ кароды но кызьы асьтэдыз возёды