Ог-огдылы оскымон луэ

Иегова куре, ми оскиськымонэсь мед луомы шуыса (Псалтирь 30:24). Тужгес но со кузпалъёс вискын кулэ, малы ке шуоно, оскиськымон луытэк, ог-огмылы оскыны ум быгатэ. Нош осконтэк яратон сӥя.

Туннэ ӵем дыръя пумиськыло кузпалъёс, кудъёсыз ог-огзылы оскымон луыны уг тыршо. Семьяез утён понна, кык пайдаё визь-кенешъёсты уже кутоно.

1 КУЗПАЛЪЯСЬКОНДЭС ДУНЪЯЛЭ

МАР ВЕРА БИБЛИЯ. Библия ӧте «ӟечсэ бырйыны быгатӥсесь» луыны (Филиппыослы 1:10). Кузпалъяськон — улондылэн тужгес но ӟеч люкетэз. Нырысь ик солы саклык висъяно.

Иеговалэн потэ, кузпалъёс, ог-огзы сярысь сюлмаськыса, шудо мед улозы шуыса (Екклесиаст 9:9). Со валамон вера, карт но кышно ог-огзылы тырмыт дыр висъяны кулэ но ог-огзэс шумпоттыны луонлыкъёс утчаны кулэ шуыса (1 Коринфъёслы 10:24). Тырше, кузпалды ассэ кулэен но яратоноен мед шӧдоз шуыса.

ПАЙДАЁ ВИЗЬ-КЕНЕШЪЁС

• Мукет ужъёстэс палэнэ кельтыса, дырдэс огазьын ортчытъялэ, кузпалды ассэ кулэтэмен медаз шӧды шуыса

• Дышетске, «мон» интые, «ми» вераны

2 СЮЛЭМДЭС УТЕ

МАР ВЕРА БИБЛИЯ. «Котькудӥз, кин кышномурт шоры ӝуатскем мылкыдын учкиз ке, со аслаз сюлмаз азон-калгон сьӧлыкез лэсьтэ ни» (Матфей 5:28). Адями азон-калгон сярысь малпаське ке, со кузпалызлы оскымон уг кыльы, шуыны луоз.

Иегова куре: «Сюлэмдэ уть» (Мадёнъёс 4:23; Иеремия 17:9). Со понна чакланы кулэ, мар шоры тӥ учкиськоды (Матфей 5:29, 30). Та ласянь умой адӟем карон возьматӥз Иов нимо оскись адями, кудӥз вашкала дыръёсы улӥз. Со юн кыл сётӥз, мукет кышномуртъёс шоры синъёссэ уз берыкъя шуыса (Иов 31:1). Юн мылкыдды мед луоз порнографиез учкытэк улыны. Кузпалды луисьтэм адями шоры синмаськыса эн учке.

ПАЙДАЁ ВИЗЬ-КЕНЕШЪЁС

• Мукетъёслы возьматэ, тӥ кузпалдылы быдэсак оскымон луиськоды шуыса

• Кузпалдылэсь шӧдонъёссэ лыдэ басьтэ. Кинэн ке кусып воземды кузпалдэс сюлмаськытэ ке, сыӵе кусыпез соку ик дугдытэ