9-тӥ визь-кенеш. Малпаськы, кин тон

МАЕ СО ВОЗЬМАТЭ

Тынэсьтыд нимдэ тодыса но вылтусыд шоры учкыса гинэ, вераны уг луы, кин тон но кыӵе тон адями. Адямилэсь сямъёссэ, учконъёссэ, малпанъёссэ тодыса гинэ, вераны луэ кин со.

МАЛЫ СО КУЛЭ

Тынад аслад йырыд вань ке, тон уд лэзьы эшъёсыдлы вераны тыныд, мар тыныд карыны яра, нош мар карыны уг яра.

«Тросэз адямиос мунёос кадь. Соос асьсэос уг быръё, мар дӥсяны. Соосты мукетъёсыз дӥсяло» (Адриан).

«Мон дышетски лэсьтыны сое, мае мон шонерен лыдъясько, соку но, куке со капчи ӧвӧл. Зэмос эшъёс — со соос, кинъёсын тыныд капчи но кинъёс гажало тынэсьтыд учконъёстэ» (Кортни).

БИБЛИЫСЬ ВИЗЬ-КЕНЕШ: «Туала вапумысь улонлэн куронъёсызлы тупатскыны турттыса эн улэ. Нош тӥ асьтэлэсь лулдэс-сюлэмдэс выльдэ-воштэ» (Римъёслы 12:2).

МАР КАРЫНЫ ЛУОЗ

Малпаськы, кыӵе тон адями но кыӵе тынад луэмед потэ. Со понна малпаськы, кыӵе тынад умой сямъёсыд, нош кыӵе урод сямъёсыд. Озьы ик малпаськы со вылын, кыӵе тынад учконъёсыд. Со понна тыныд юрттозы улӥын гожтэм юанъёс.

Умой сямъёс. Мар мон карыны быгатӥсько? Кыӵе мынам умой сямъёссы вань? (Кылсярысь: мон котьку дырыз дыръя вуисько-а? Асме киям возьыны быгатӥсько-а? Ужез яратӥсько-а? Мон шырыт сямо адями-а?) Мае умойзэ мон карисько?

ВИЗЬ-КЕНЕШ. Тыныд секыт ке валаны, кыӵе тынад умой сямъёсыд вань, юа анай-атаедлэсь яке матысь эшедлэсь, кыӵе сямъёсыд соослы кельшо но малы.

БИБЛИЫСЬ ВИЗЬ-КЕНЕШ: «Котькудӥз аслэсьтыз ужъёссэ ачиз мед эскероз-чаклалоз, соку со, мукетъёсын ассэ ӵошатытэк, аслаз азинсконъёсыныз ушъяськыны быгатоз» (Галатъёслы 6:4).

Урод сямъёс. Кыӵе сямъёсме мыным нырысь ик воштоно? Кыӵе учыръёсы мынам ӵемгес шонертэм лэсьтэме потэ? Кыӵе учыръёсы мыным дышетсконо на асме киям возьыны?

БИБЛИЫСЬ ВИЗЬ-КЕНЕШ: «Сьӧлыкмы ӧвӧл шуиськомы ке, соку асьмемыз асьмеос ӧрекчаськомы» (1 Иоанн 1:8).

Учконъёс. Мае мон умоен, нош мае уродэн лыдъясько но малы? Оскисько-а мон Инмарлы? Малы мон оскисько, со вань шуыса? Мае мон шонертэм ужен лыдъясько но малы? Кыӵеен мон азьпал улонме адӟисько?

БИБЛИЫСЬ ВИЗЬ-КЕНЕШ: «Малпаськыса улон тонэ утёз, визь-нод возьмалоз тонэ» (Мадёнъёс 2:11).