Огшоры улон шумпотон вае

ДАНЬЕЛЬ НО МИРИАМ 2000-тӥ арын куарусёнэ кузпалъяськизы но Барселонаын (Испания) улыны кутскизы. «Ми ӟеч улӥмы,— тодаз вае Даньель.— Трос коньдон басьтыса ужамы, ресторанъёстӥ, кунгож сьӧръёстӥ ветлӥмы но дуно дӥськут нуллӥмы. Озьы ик ми ӟеч иворез вераны ялан ветлӥмы». Нош одӥг пол ваньмыз воштӥськиз.

2006-тӥ арын конгрессын Даньельлэн сюлмаз пыӵаз речь, кудаз таӵе юан сётэмын вал: «Кариськомы-а ми ваньзэ, мае быгатӥськомы, „виыны дасям муртъёслы“ быронтэм улонэ нуись сюрес вылэ султыны юрттон понна?» (Мад. 24:11). Речын веразы, малы туж кулэ ӟеч иворез вераны, кудӥз адямиослэсь улонзэс утьыны быгатэ (Ап. уж. 20:26, 27). Даньель вера: «Соку Иегова мыным нимысьтыз вазиськиз кадь потӥз». Озьы ик речын верамын вал, ужан-тыршонэ тросгес пыриськыса, ми тросгес шумпотон басьтомы шуыса. Даньель тодэ вал: со озьы ик вань. Малы? Со дырлы Мириам пионер луыса ужа-тырше вал ини, но со солы трос шумпотон вае вал.

Даньель азьланьтэ: «Мон валай: мыным быдэсак улонме воштоно». Со озьы ик кариз. Со ӧжытгес ужаны кутскиз, пионер луиз но малпаськыны кутскиз отын ужан-тыршон сярысь, кытын ивортӥсьёс уг тырмо.

ШУГ-СЕКЫТЪЁС БАКЕЛЬ КАРОНЪЁСЛЫ БЕРЫТСКИЗЫ

2007-тӥ арын куартолэзе Даньель но Мириам, уж дорысьтызы кошкыса, Панамае мынӥзы, кытчы соос азьло ветлӥзы вал ини. Соослы Кариб зарезьысь Бокас-дель-Торо шормуӵъёс пӧлысь куд-огаз ӟеч иворез вераны кулэ вал. Отын улӥсьёс пӧлысь тросэз — со нгабе калык. Даньель но Мириам, коньдонзэс лыдъяса, тодӥзы, люкам коньдонзы тямыс толэзь пала Панамаын улыны тырмоз шуыса.

Шормуӵъёсын кузпалъёс велосипедъёсын ветлӥзы, нош одӥг шормуӵысен мукетаз — пыжен. Соос ноку уз вунэтэ, кызьы нырысетӥзэ велосипедъёсын ветлӥзы. Ог 32 иськем ӵушкась шунды ултӥ но гурезё интыостӥ мыныса, Даньель йырсазьзэ ӧжытак гинэ ӧз ышты. Шормуӵъёсын улӥсьёс кузпалъёсты туж шумпотыса пумиталлязы, тужгес но куке соослэсь нгабе кылын вераськыны турттэмзэс кылӥзы. Ӝоген кузпалъёс 23 Библия дышетонъёс ортчытъяло вал ини.

Куке Даньельлэн но Мириамлэн коньдонзы быриз, шумпотонзы кайгыронэн воштӥськиз. Даньель тодаз вае: «Испание берытскон сярысь малпаса гинэ милям синвуосмы пото вал. Милям туж уг поты вал кельтэммы со адямиосты, кудъёсыныз ми Библиез дышетӥмы!» Но тани, толэзь ортчыса, Даньельлы но Мириамлы витьымтэ ивор веразы — соослы нимысьтыз пионеръёс луыны ӵектӥзы. «Макем ми шумпотӥмы, азьланяз но Иеговалы ужаны-тыршыны быгатомы шуыса!» — шуэ Мириам.

КОТЬМАЛЭСЬ БАДӞЫМ ШУМПОТОН

Инмарлэн организацияз воштӥськонъёс ортчемен, 2015-тӥ арын Даньелез но Мириамез пионеръёс луыса ужаны-тыршыны куризы. Кызьы соос со шоры учкизы? Соос лэсьтӥзы озьы, кызьы гожтэмын Псалтирьын 36:5: «Аслэсьтыд сюрестэ Кузё-Инмар кие сёт, Солы оскиськы, Со быдэстоз». Даньель но Мириам шедьтӥзы уж, кудӥз соослы пионеръёс луыса ужаны-тыршыны юрттэ вал. Али соос Верагуас ёросын (Панама) ужало-тыршо.

Даньель вера: «Испаниысь кошкон азьын ми ум оскиське вал, улонмес воштыса, огшоры улыны быгатомы шуыса. Но ми быгатӥмы, милям али вань ваньмыз, мар зэмзэ ик кулэ». Мар соослы тужгес но бадӟым шумпотон вае? Даньель но Мириам верало: «Зӥбыт-востэм адямиослы юрттыны Иегова сярысь тодыны — со котьмалэсь бадӟым шумпотон!»