«Инмармылэн кылыз пумтэм вапумъёс ӵоже улоз»

1, 2. а) Кыӵе милям улонмы луысал Библитэк? б) Кыӵе учырын Инмарлэн Кылыз милемлы тросгес пайда ваёз?

МАЛПАЛЭ АЙ, кыӵе милям улонмы луысал, Библиямы ӧй луысал ке. Ми ӧй быгатысалмы шедьтыны пайдаё визь-кенешъёсты. Ӧй тодысалмы Инмар сярысь, улон сярысь но вуоноез сярысь зэмлыкез. Озьы ик, ми ӧй тодысалмы, кызьы Иегова вашкала дыръёсы адямиосын ассэ возиз.

² Шумпотоно, со озьы ӧвӧл шуыса. Иегова милемлы аслэсьтыз Кылзэ, Библиез, сётӥз. Со оскытэ милемыз, отысь ивор пырак дауръёс ӵоже улоз шуыса. Аслаз нырысетӥ гожтэтаз апостол Пётр святой духлэн кивалтэмез улсын вераз Исаиялэн 40:8 гожтэм кылъёсты, кудъёсыз та статьялэн валтӥсь кылбураз пыро. Вераны луоз, Пётр быдэс Библия сярысь со кылъёсты вераз шуыса. (Лыдӟы 1 Пётрлэсь 1:24, 25.) Библия милемлы тросгес пайда ваёз, ми сое лыдӟимы ке со кылын, кудзэ умой валаськомы. Инмарлэсь Кылзэ яратӥсьёс кемалась сое валазы ини. Трос дауръёс ӵоже адямиос трос кужымзэс понӥзы, Библиез берыктон но сое вӧлмытон понна. Соос Инмарлэн эрикезъя лэсьтӥзы, кудӥзлэн «вань адямиосты утиськытэмез, зэмлыкез тодытэмез потэ» (1 Тим. 2:3, 4).

3. Мае ми эскеромы та статьяын? (Учке статья кутсконысь суредъёсты.)

³ Та статьяын ми вераськомы со сярысь, кызьы Инмарлэн Кылыз асьме дырозь вуиз, солы люкетӥз ке но: 1) кыллэн воштӥськемез, 2) дуннеысь политика удысын воштӥськонъёс, кудъёсыз сэрен калыкъёс куспын вераськон кыл вошъяськиз, но 3) берыктон ужез дугдытыны тыршон. Та эскерон юрттоз милемлы Инмарлэсь Кылзэ эшшо но тросгес дунъяны но солэсь Авторзэ юнгес яратыны (Мих. 4:2; Рим. 15:4).

КЫЛЛЭН ВОШТӤСЬКЕМЕЗ

4. а) Кызьы дыр ортчемъя вераськон кылъёс воштӥсько? б) Кытысь адӟиське, Инмар котькыӵе калыкысь адямиос шоры одӥг кадь учке шуыса, но кыӵе шӧдонъёсты тӥляд кылдо, со сярысь тодыса?

⁴ Дыр ортчемъя вераськон кылъёс воштӥсько. Кылъёслэн но веранъёслэн валатонзы воштӥське но чылкак мукет луыны быгатэ. Тӥ но примеръёс вылын вераны быгатоды, дыр, кызьы тӥляд кылды воштӥськиз. Озьы ик воштӥськизы еврей но грек кылъёс, кудъёсыныз Библилэн бадӟым люкетэз гожтэмын вал. Туннэ еврей но грек кылъёс туж пӧртэм луо со еврей но грек кылъёслэсь, кудъёсыныз вераськизы Библиез гожъян дыръёсы. Соин ик котькинлы, кинлэн Инмарлэсь Кылзэ валамез потэ, солэсь берыктэмзэ лыдӟоно — соослы но, кинъёс туала еврей но грек кылъёсты тодо. Куд-ог адямиослэн вашкала еврей но грек кылъёсты дышетэмзы потэ, Библиез лыдӟон понна со кылын, кудӥныз со нырысь ик гожтэмын вал. Нош со сокем пайдаё луоз меда, кызьы соос малпало? Туннэ нуналлы Библия яке солэн люкетъёсыз 3 200 тросгес кылъёсы берыктэмын. Кызьы адӟиське, Иеговалэн потэ, солэн Кылыз «вань выжыослы, пӧртэм кылын вераськисьёслы, калыкъёслы» пайда мед ваёз шуыса. (Лыдӟы Усьтӥськонэз 14:6.) Сое тодӥськомы ке, со милесьтым мылкыдмес ӝутэ эшшо но матэгес кариськыны яратӥсь но вылтус шоры учкисьтэм Инмарен (Ап. уж. 10:34).

5. Маин пӧртэм луэ Яков эксэйлэн Библиез?

⁵ Со кылъёс но воштӥсько, кудъёсаз Библия берыктэмын вал. Библилэн берыктэмез, кудӥз нырысь валамон вал, дыр ортчемъя валантэм луыны быгатэ. Кылсярысь, англи кылэ берыктэм Библия. Яков эксэйлэн Библиез потӥз 1611-тӥ арын. Та Библия англи кылын тужгес но тодмоез берыктэм луиз но туж юн шӧдӥськиз англи кыл вылынa. Вераны кулэ, Яков эксэйлэн Библияз Инмарлэн нимыз туж шер пумиське шуыса. Берыктӥсьёс Иегова нимез Вуж Сӥзён шуыса нимаськись люкетлэн куд-ог кылбуръёсаз гинэ кельтӥзы. Еврей Гожтэмъёсысь мукет кылбуръёсын, кытын Инмарлэн нимыз нырысь ик гожтэмын вал, соос бадӟым букваосын «КУЗЁ-ИНМАР» шуыса гожтӥзы. Берлогес поттэм Библиосын «КУЗЁ-ИНМАР» кыл пумиське Христиан Грек Гожтэмъёслэн куд-ог кылбуръёсаз. Озьы Яков эксэйлэсь Библизэ поттӥсьёс валазы: Инмарлэн нимыз Выль Сӥзён шуыса нимаськись люкетын но луыны кулэ.

6. Малы ми «Выль дуннелэсь берыктэмзэ» дунъяськомы?

⁶ Озьы ке но, сю аръёс ӵоже Яков эксэйлэн Библиысьтыз тросэз веранъёс туж вужмизы. Озьы ик вераны луоз Библиез мукет кылъёсы берыктэмъёс сярысь но, кудъёсыз азьлогес поттэмын вал. Макем ми шумпотӥськомы, милям «Выль дуннелэн берыктэмез» вань шуыса — туала кылэ берыктэм Библия! «Выль дуннелэн берыктэмез», быдэсак яке солэн люкетъёсыз, 150 тросгес кылъёсын поттэмын, соин ик сое Музъем вылысь тросэз адямиос лыдӟыны быгато. Та шонер но валамон берыктэмлы луыса, Инмарлэн Кылысьтыз ивор милям сюлмамы ик пыӵа (Пс. 118:97). Пусйыны кулэ, «Выль дуннелэн берыктэмаз» Инмарлэн нимыз гожтэмын шуыса отын, кытын со луыны кулэ.

ДУННЕЫСЬ ПОЛИТИКА УДЫСЫН ВОШТӤСЬКОНЪЁС

7, 8. а) Малы а. э. азьло III даурын тросэз еврейёс Еврей Гожтэмъёсты уг валало вал? б) Мар со сыӵе Септуагинта?

⁷ Быдэс дунне вылысь политика удысын воштӥськонъёс ортчемен, куддыръя воштӥське вал кыл но, кудӥныз пӧртэм калыкысь адямиос куспазы верасько вал. Мар кариз Инмар, со воштӥськонъёс адямиослы солэсь Кылзэ валаны медаз люкетэ шуыса? Та юанлы валэктон шедьтыны юрттоз вашкала дыръёсысь пример. Библилэн нырысетӥ 39 книгаосыз израиль пиосмуртъёсын, яке еврейёсын, гожтэмын вал. «Нырысь ик, соослы Инмар кыл оскемын» вал (Рим. 3:1, 2). Но а. э. азьло III даурлы тросэз еврейёс асьсэ кылзэс вунэтӥзы. Малы? Малы ке шуоно Александр Македонский, трос музъемъёсты киултыса, Грециялэсь музъемзэ паськытатӥз но, тросэз адямиос грек кылын вераськыны кутскизы, озьы ик еврейёс но (Дан. 8:5—7, 20, 21). Соин ик тросэзлы Еврей Гожтэмъёсты валаны шуггес но шуггес луиз. Соослы кызьы ке юрттыны луэ вал-а?

⁸ Библилэн нырысетӥ вить книгаосыз а. э. азьло III даурлэн шораз еврей кылысь грек кылэ берыктэмын вал. Еврей Гожтэмъёслэн мукет книгаосыз берыктыса быдтэмын вал а. э. азьло II даурын. Грек кылэ берыктэм Еврей Гожтэмъёсты Септуагинта шуыса нимазы. Со нырысетӥез тодмо луись берыктэм, кудӥз гожтыса кельтэмын вал.

9. а) Кызьы Септуагинта но Библилэн мукет берыктэмъёсыз юрттӥзы адямиослы Инмарлэсь Кылзэ валаны? б) Еврей Гожтэмъёсысь кыӵе кылбуръёс тӥледлы тужгес но ярало?

⁹ Грек кылын вераськись еврейёс но мукет адямиос Еврей Гожтэмъёсты валаны быгатӥзы, нырысь ик Септуагинталы луыса. Малпалэ ай, мае соос шӧдо вал, куке Инмарлэсь Кылзэ кыло яке лыдӟо вал со кылын, кудӥз соослы матысь луиз! Дыр ортчемъя, кызьы быдэс Библия, озьы ик солэн люкетъёсыз но, мукет вӧлмем кылъёсы берыктэмын вал, кылсярысь, сири, гот но латин кылъёсы. Библиез валамон кылын лыдӟыса, адямиослэн, милям кадь ик, яратоно кылбуръёссы луо вал. (Лыдӟы Псалтирез 118:162—165.) Озьыен, Инмарлэн Кылыз асьме дырозь вуиз, калыкъёс куспын вераськон кыл вошъяськиз ке но.

БИБЛИЯ БЕРЫКТОН УЖЕЗ ДУГДЫТЫНЫ ТЫРШОН

10. Малы Джон Уиклиф улон нуналъёсы тросэз огшоры адямиос Библиен тодматскыны ӧз быгатэ?

¹⁰ Куддыръя кивалтӥсьёс люкетыны тыршизы огшоры адямиослы Библиез лыдӟыны. Но вал сыӵе адямиос, кудъёсыз соослы ӧз сётске. Одӥгез соос пӧлысь — Джон Уиклиф, кудӥз XIV даурын Англиын улӥз. Со малпа вал, Инмарлэсь Кылзэ котькуд адями лыдӟыны быгатыны кулэ шуыса. Но со дыре Англиысь огшоры калыклэн Библиен тодматскыны луонлыкез ӧй вал. Малы? Нырысетӥез, тросэзлэн адямиослэн Библиез басьтыны коньдонзы ӧй вал, малы ке шуоно Библилэсь копиоссэ киын гожъязы но соосты дасян понна, трос коньдон кулэ вал. Кыкетӥез, тросэз адямиос лыдӟиськыны ӧз быгатэ. Черке ветлӥсь огшоры адямиос Библиез латин кылын лыдӟемзэс кыло вал ке но, сое уг валало вал, малы ке шуоно со кыл вужмемын вал ини. Кызьы соку соос Библиысь тодон-валан басьтыны быгатӥзы? (Мад. 2:1—5).

11. Кыӵе емышъёс вайиз Уиклифлэн Библиез?

¹¹ 1382-тӥ арын потӥз англи кылэ берыктэм Библия, кудӥз Уиклифлэн Библиез шуыса тодмо луиз. Со туж яраз Джон Уиклиф сьӧры мынӥсьёслы. Инмарлэсь Кылзэ огшоры адямиос но тодыны мед быгатозы шуыса, Джон Уиклиф сьӧры мынӥсьёс, одӥг гуртысь мукет гуртэ ветлыса, быдэс Англиез пыдын котыртӥзы. Ӵемысь соос Уиклифлэн Библиысьтыз кылбуръёсты лыдӟылӥзы но киын гожтэм копиосты кельтылӥзы. Соослэн тыршеменызы, адямиос Инмарлэн Кылыныз выльысь тунсыкъяськыны кутскизы.

12. Кызьы учкиз Черк Уиклифлэн Библиез шоры но Уиклиф сьӧры мынӥсьёслэн тыршемзы шоры?

¹² Кызьы Черк со шоры учкиз? Со адӟемпотостэм кариз Уиклифез, солэсь Библизэ но со сьӧры мынӥсьёсты. Священникъёс туж лекомыса уйылӥзы-уллязы Уиклиф сьӧры мынӥсьёсты но быдтылӥзы Уиклифлэн Библиезлэсь вань копиоссэ, кудъёссэ шедьтыны быгатӥзы. Уиклиф кулэм бере сое еретик шуыса ялӥзы. Нош кызьы кыл кутытод сое, кин кулӥз ини? Озьы ке но, священникъёс косӥзы Уиклифлэсь лыоссэ музъемысь поттыны, сутыны соосты но пеньзэ Свифт шуре куштыны. Но Черк ӧз быгаты люкетыны Инмарлэн Кылызлы вӧлмыны соос пӧлын, кинъёслэн сое лыдӟемзы но валамзы потэ вал. Бератаз Европаын но мукет шаеръёсын тросэз адямиос Библиез берыктыны кутскизы со кылъёсы, кудъёссэ валало вал огшоры адямиос, нош озьы ик печатланы соосты.

«ТЫНАД ИНМАРЕД, ТОНЭ ПАЙДАЁ УЖЛЫ ДЫШЕТӤСЬ»

13. Кыӵе кыл сётонзэ быдэстӥз Иегова но кызьы со милесьтым осконмес юнматэ?

¹³ Кулэ ӧвӧл малпаны, Септуагинта, Уиклифлэн Библиез, Яков эксэйлэн Библиез но мукет берыктэмъёс Инмарлэн духеныз вордскытэмын вал шуыса. Озьы ке но, малпаськыса со вылын, кызьы Библиез берыктӥзы, ми адӟиськомы, Иегова сётэм кылзэ быдэстӥз шуыса — солэн Кылыз асьме дырозь вуиз. Со милесьтым осконмес уг юнматы-а, Иегова мукетъёссэ но кыл сётонъёссэ быдэстоз шуыса? (Иис. Н. 23:14).

14. Кызьы Инмарлэн Кылыз милесьтым мылкыдмес ӝутэ Инмарез эшшо но юнгес яратыны?

¹⁴ Озьы ик, малпаськыса со сярысь, кызьы Библия асьме дырозь вуиз, милям Иеговаез яратонмы юнмаb. Малы со милемлы Библиез сётӥз но вераз, со асьме дырозь вуоз шуыса? Малы ке шуоно Инмар милемыз яратэ но солэн милемыз пайдаё ужлы дышетэмез потэ. (Лыдӟы Исаиялэсь 48:17, 18.) Солэн яратэмез понна тау каронмес возьматыны быгатомы, сое яратыса но солэсь курон-косонъёссэ быдэсъяса (1 Иоанн 4:19; 5:3).

15. Мар сярысь верамын луоз вуоно статьяын?

¹⁵ Тӥ соглаш луоды, дыр, Библиез дунъяськомы ке, со ӝажы вылын тузонӟыса уз улы шуыса. Мар кароно, Инмарлэсь Кылзэ лыдӟон милемлы тросгес пайда мед ваёз шуыса? Мар юрттоз милемлы Библиен тунсыкъяськытыны адямиосты, кудъёсызлы ми ӟеч иворез вераськомы? Кызьы кенешысь вын-агайёс валаны быгатозы, ваньмыз, малы соос сцена вылысен дышето, Библиысь басьтэмын шуыса? Та юанъёслы валэктонъёсты ми вуоно статьяын эскеромы.