«Инмарлэн кылыз... ӝоглыко»

1. Мар милесьтым осконмес юнматэ, Инмар Кыллэн кужымез вань шуыса? (Учке статья кутсконысь туспуктэмъёсты.)

ИЕГОВАЛЭН ужась-тыршисьёсыз юн оско, Инмарлэн Кылыз, солэн адямиослы гожтэтэз, улэп но ӝоглыко шуыса (Евр. 4:12). Тросэз асьмеос пӧлысь вераны быгатозы, Библия адямиослэсь улонзэс воштыны быгатэ шуыса, малы ке шуоно ми сое ас выламы шӧдӥмы. Вын-агайёсмы но сузэр-апайёсмы пӧлысь кин ке но азьло лушкаськись вал, кин ке но наркотикъёсын выре вал, нош кин ке азыса-калгыса улэ вал. Мукетъёсыз та дуннеын азинлыкъёс лэсьтӥзы ке но, соослы мар ке но уг тырмы вал (Екк. 2:3—11). Трос учыръёс вань, куке адямиослэн нокыӵе осконзы ӧй вал ни, нош, Библиез дышетыса, соос выльысь оскыны кутскизы. Тӥ туж яратӥськоды, дыр, сыӵе учыръёсты лыдӟыны «Библия меняет жизнь» статьяосысь. Но адями, христиан мурт луэмез бере но, Библиез лыдӟыса, Инмарен кусыпъёссэ юнматэ на.

2. Вералэ пример, кызьы нырысетӥ даурын Инмарлэн Кылыз адямиослы воштӥськыны юрттылӥз.

² Библиез дышетыса, асьме дыре тросэз адямиос бадӟым воштӥськонъёс лэсьтӥзы. Со милемыз чик уг паймыты. Сыӵе учыръёс милемлы тодамы вайыто нырысетӥ даурысь христианъёс сярысь, кудъёсызлэн осконзы вал инмын улыны. (Лыдӟы 1 Коринфъёслы 6:9—11.) Гожтыса со сярысь, кыӵе адямиос «Инмар Эксэйлыке уз пыре», апостол Павел ватсаз: «Тӥ пӧлын но куд-огез сыӵеесь ик вал». Нош Библилэн но Инмарлэн святой духезлэн юрттэменыз, соос воштӥськыны быгатӥзы. Куд-огъёсыз христиан мурт луэмзы бере секыт сьӧлыказы, но соослы Инмарен кусыпъёссэс выльысь тупатоно луиз. Кылсярысь, Библиын верамын, нырысетӥ даурын вӧйын зырӟем христиан муртэ кенешысь поттӥзы шуыса. Нош берлогес, воштӥськонъёс лэсьтыса, со выльысь христиан кенешен ӵош луыны быгатӥз (1 Кор. 5:1—5; 2 Кор. 2:5—8). Ми туж шумпотӥськомы, Инмарлэн Кылыз вын-агайёсмылы но сузэр-апайёсмылы улонзэс быдэсак воштыны юрттӥз ини шуыса.

3. Мае ми эскеромы таяз статьяын?

³ Иегова кузьмаз милемлы аслэсьтыз Кылзэ, кудӥзлэн кужымез туж бадӟым, соин ик милям сое уже кутэммы потэ (2 Тим. 2:15). Ойдолэ эскеромы, кызьы сое уже кутыны луэ: 1) улонамы, 2) куке ӟеч иворез вераськомы но 3) куке сцена вылысен дышетӥськомы. Та эскерон юрттоз милемлы яратэммес но тау каронмес возьматыны сюлмаськись инмысь Атаймылы, кудӥз милемыз пайдаё ужлы дышетэ (Ис. 48:17).

УЛОНАМЫ

4. а) Мар кароно, Инмарлэн Кылыз милемлы мед юрттоз шуыса? б) Мар тӥ кариськоды, Библиез лыдӟыны дыр шедьтон понна?

⁴ Инмарлэн Кылыз милемлы юрттыны мед быгатоз шуыса, сое котькуд нунал лыдӟыны тыршоно (Иис. Н. 1:8). Зэм, тросэзлэн асьмелэн туж трос ужъёсмы. Озьы ке но, тыршоно, милемлы номыр но медаз люкеты шуыса котькуд нунал Библиез лыдӟыны, туж кулэ ужъёс но. (Лыдӟы Ефесъёслы 5:15, 16.) Иеговалэн котькуд ужась-тыршисез, Библиез лыдӟон понна, нунал куспын дыр шедьтыны тырше. Кин ке но лыдӟе ӵукна, кин ке но нуназе, нош кин ке ӝытазе. Соослэн псаломъёсты гожъясьлэн кадь шӧдонъёссы кылдо, кудӥз гожтӥз: «Макем мон Тынэсьтыд закондэ яратӥсько! Нунал лумбыт со сярысь малпаськисько» (Пс. 118:97).

5, 6. а) Малы туж кулэ малпаськыны со вылын, мае ми Библиысь лыдӟиськомы? б) Мар кароно, лыдӟеммы вылын малпаськон тросгес пайда мед ваёз шуыса? в) Кыӵе пайда вае тӥледлы Библиез лыдӟон но со вылын малпаськон?

⁵ Библиез лыдӟем сяна, милемлы лыдӟеммы вылын малпаськоно на (Пс. 1:1—3). Соку гинэ ми улонамы кутыны быгатомы солэсь визь-кенешъёссэ, кудъёсыз ноку но уг вужмо. Печатламзэ-а, электрон форматэн-а Библиез лыдӟиськомы, милемлы тыршоно, лыдӟеммы сюлмамы мур мед пыӵалоз шуыса.

⁶ Кызьы дышетсконо Библиысь кылъёс вылын малпаськыны? Тросэз христианъёс, Библиез лыдӟыкузы, дырын-дырын дугдыло но таӵе юанъёс вылын малпасько: мае мон тодӥ Иегова сярысь? Уже кутӥсько-а мон возетэз, кудӥз та кылбуръёсын гожтэмын? Мар бордын мыным ужано на? Библиысь кылъёс вылын вӧсяськыса малпаськиськомы ке, со милесьтым мылкыдмес ӝутэ эшшо но юнгес тыршыны отысь визь-кенешъёсты улонамы кутыны. Соку ми шӧдомы, кызьы Инмарлэн Кылыз милемлы юрттыны быгатэ (2 Кор. 10:4, 5).

КУКЕ ӞЕЧ ИВОРЕЗ ВЕРАСЬКОМЫ

7. Кызьы Инмарлэсь Кылзэ ужан-тыршонын пайдаё уже кутоно?

⁷ Мар юрттоз милемлы, ӟеч иворез вераку, Инмарлэсь Кылзэ пайдаё уже кутыны? Нырысетӥез, сое ӵемгес уже кутоно, куке ми ӟеч иворез вераськомы но мукетъёссэ дышетӥськомы. Одӥг вын-агай вераз: «Тӥ Иеговаен ӵош ӟеч иворез вераса ветлысалды ке, мар тӥ карысалды: асьтэос гинэ вераськысалды яке солы кыл сётысалды?» Зэмзэ но, Библиысь кылбурез лыдӟыса, ми Иеговалы луонлык сётӥськомы адямиосын вераськыны. Ӵем дыръя умой малпаськыса быръем кылбур, верам кылъёсмы сярысь, тросгес пайда вае (1 Фес. 2:13). Юалэ асьтэлэсь: «Котьку-а, ку сыӵе луонлык кылдэ, мон тыршисько Библиысь кылбурез лыдӟыны солы, кинлы ӟеч иворез верасько?»

8. Малы, ӟеч иворез веракумы, Библиысь кылбуръёсты лыдӟыны гинэ тырмыт ӧвӧл?

⁸ Адямилы, кудӥзлы ми ӟеч иворез вераськомы, Библиысь кылбурез лыдӟыны гинэ тырмыт ӧвӧл. Малы? Малы ке шуоно, нырысетӥ даурын сямен, туннэ тросэз адямиос туж секытэн валало сое, мар гожтэмын Библиын, яке чик уг валало (Рим. 10:2). Соин ик малпано ӧвӧл, ми кылбурез лыдӟимы ке, адями сое одно ик валалоз шуыса. Лыдӟыкумы кылбурысь висъяно со кылъёсты, кудъёсызлы саклык висъяны кулэ. Кылсярысь, валтӥсь кылъёссэ выльысь лыдӟыны но соослэсь пуштроссэс валэктыны луоз. Милям потэ ке, Инмарлэн Кылысьтыз ивор адямиослэн сюлмазы но визьмазы мед пыӵалоз шуыса, одно ик та сётэм визь-кенешлэсь кылзӥськоно. (Лыдӟы Лукалэсь 24:32.)

9. Мар вераны луоз Библиысь кылбурез лыдӟемлэсь азьло, адями Библиез гажаны мед кутскоз шуыса?

⁹ Милям потэ, адями Библиез гажаны мед кутскоз шуыса. Соин ик умой малпаны кулэ, мар ми вераломы Библиысь кылбурез лыдӟемлэсь азьло. Кылсярысь, вераны луоз: «Ойдолэ учкомы, мар со сярысь вера Кылдытӥсьмы». Адямилы, кудӥз христиан луисьтэм религие ветлэ, тазьы вераны луоз: «Учке, мар верамын Священной Гожтэмын». Нош ми пумитамы ке адямиез, кудӥзлы религия нокыӵе ик уг поты, солэсь юаны луоз: «Тӥляд кылэмды вань-а таӵе визьмо веранэз?» Ми валаськомы, адямиос туж пӧртэмесь шуыса. Соин ик ми бырйиськомы, мар верано адямилы, со солы тунсыко мед потоз шуыса (1 Кор. 9:22, 23).

10. а) Кыӵе учыр луиз одӥг вын-агаен? б) Вералэ, кызьы тӥ, Библиысь кылбурез лыдӟыса, адямилэсь сюлэмзэ бугыртыны быгатӥды.

¹⁰ Тросэз ивортӥсьёс асьсэос адӟизы, Библиысь кылъёс адямиослэсь сюлэмъёссэс бугыртыны быгато шуыса. Тани одӥгез учыр. Вын-агаймы трос аръёс ӵоже ини арлыдо пиосмуртлы журналъёс нуллэ. Одӥг пол, выльзэ «Возьмаськон башняез» вайыкуз, со малпаз журналлэн темаеныз герӟаськем кылбурез лыдӟыны. Со лыдӟиз 2 Коринфъёслы 1:3, 4, кытын Иегова сярысь верамын, со «гажан-жалянлэн Атаез, котькыӵе буйгатсконлэн Инмарез» луэ но «котькыӵе куректон-кайгуосмы дыръя Со асьмеды буйгатэ» шуыса. Пиосмуртлы туж кельшизы со кылъёс, но со соосты эшшо одӥг пол лыдӟыны куриз на. Со вераз, со дыре соослы кышноеныз буйгатон туж кулэ вал шуыса, соин ик солэн Библиысь ивор сярысь тросгес тодэмез потӥз. Кызьы адӟиськомы, Инмарлэн Кылыз зэмзэ ик ӝоглыко, куке ми сое ужан-тыршонын уже кутӥськомы (Ап. уж. 19:20).

КУКЕ СЦЕНА ВЫЛЫСЕН ДЫШЕТӤСЬКОМЫ

11. Мар понна кыл куто сцена вылысен дышетӥсь вын-агайёс?

¹¹ Ми ваньмы туж яратӥськомы кенешлэн пумиськонъёсаз но конгрессъёсы ветлыны. Отын ми Иеговалы йыбыртъяськомы. Со сяна, ми отын Инмар сярысь тодон-валан басьтӥськомы, нош со милемлы бадӟым пайда вае. Вын-агайёс, кудъёсыз сыӵе пумиськонъёсын сцена вылысен дышето, сыӵе луонлыксэс данэн лыдъяло. Со дыре ик соослы валано, соос со понна кыл куто шуыса (Иак. 3:1). Вын-агайёслы чаклано, ваньмыз, малы соос дышето, Инмарлэн Кылыныз соглаш мед луоз шуыса. Тӥледлы сцена вылысен дышетыны оскемын ке, кызьы тӥ Библиез уже кутыны быгатоды?

12. Кызьы речь верасьлы эскероно, солэн речез Библия вылэ пыкиськыса дасямын шуыса?

¹² Эскере, тӥляд речьты Библия вылэ пыкиськыса дасямын-а шуыса (Иоанн 7:16). Мар кароно со понна? Нырысь ик, тырше, ваньмыз — учыръёс, примеръёс, вераськон сямды — кылзӥсьёслэсь саклыксэс Библиысь кылбуръёслы висъяны мед юрттоз шуыса. Озьы ик, тодады возе: Библиысь кылбуръёсты лыдӟон но со вылэ пыкиськыса дышетон — со пӧртэм. Зэмзэ ик, ортчыт трос кылбуръёсты лыдӟид ке, одӥгез но соос пӧлысь кылзӥсьёслэн йыразы уз кыльы. Соин ик умой-умой малпалэ, кыӵе кылбуръёсты лыдӟоды, но висъялэ дыр соосты лыдӟыны, валэктыны, тупась пример вераны но возьматыны, кызьы соосты уже кутоно (Неем. 8:8). Речьтэс организациен сётэм планъя вераськоды ке, эскере со планэз но Библиысь кылбуръёсты, кудъёсыз отын сётэмын. Тырше валаны, кызьы куспазы герӟаськемын планысь малпанъёс но Библиысь кылбуръёс. Собере быръе кылбуръёсты, кудъёсыз со малпанъёсты усьтозы. Нош нырысь ик Иеговалы вӧсяське но куре, со тӥледлы Аслаз Кылысьтыз дуно малпанъёсты вераны мед юрттоз шуыса. (Лыдӟы Ездралэсь 7:10; Мадёнъёсты 3:13, 14.)

13. а) Кызьы одӥг сузэрлы юрттӥзы Библиысь кылбуръёс, кудъёссэ со кенешлэн пумиськоназ кылӥз? б) Кызьы тӥледлы юрттӥз со, кызьы Библиысь кылбуръёс кенешлэн пумиськоназ валэктэмын вал?

¹³ Австралиысь одӥг сузэрлэн сюлмаз мур пыӵазы христиан пумиськонын верам Библиысь кылбуръёс. Пичи дыръяз со трос кышкыт учыръёсын пумиськиз. Библиысь иворез кылыса, со солы оскиз но аслэсьтыз улонзэ Иеговалы сӥзиз. Но солы туж секыт вал оскыны, Иегова сое яратэ шуыса. Озьы ке но, дыр ортчемъя солэн осконэз юнмаз. Мар солы юрттӥз? Одӥгаз пумиськонын Библиысь кылбуръёс эскериськизы, кудъёсыз вылын сузэр малпаськыны кутскиз. Со герӟаз соосты Библиысь мукет кылбуръёсынa. Нош тӥляд вал-а учыръёсты, куке кенешлэн пумиськоназ яке конгрессын верам Библиысь кылъёс тӥляд сюлмады мур пыӵазы? (Неем. 8:12).

14. Кызьы ми Иеговалэн Кылыз понна тау кареммес возьматыны быгатӥськомы?

¹⁴ Ми туж тау кариськомы Иеговалы солэн Кылыз, Библия, понна! Со сое адямиослы кузьмаз но аслэсьтыз сётэм кылзэ быдэстӥз, Библия пумтэм дауръёс улоз шуыса (1 Пётр 1:24, 25). Милемлы Инмарлэсь Кылзэ ялан лыдӟоно, отын гожтэм визь-кенешъёслэсь кылзӥськоно но сое уже кутоно, мукет адямиослы юрттон понна. Озьы ми возьматомы, Иеговалэсь Кылзэ дунъяськомы но яратӥськомы шуыса, нош со сяна, возьматомы, солэсь Авторзэ яратӥськомы но солы тау кариськомы шуыса.