«Кышкасьтэм лу, уж борды басьтӥськы»
«Кужмо лу, кышкасьтэм лу, уж борды басьтӥськы, эн кышка, эн куалекъя, уго Инмар Кузё-Инмар... тонэн» (1 ПАР. 28:20).
1, 2. а) Кыӵе бадӟым уж оскемын вал Соломонлы? б) Малы Давид сюлмаське вал Соломон понна?
СОЛОМОНЛЫ нимысьтыз уж сётэмын вал. Иегова бырйиз сое самой бадӟым пуктӥськон ужен кивалтыны: Иерусалиме храм пуктыны. Со юрт «бадӟым, учкымон, данъяськыны ярамон, вань музъемъёслы синмаськыны ярамон луыны кулэ» вал. Нош самой валтӥсез — со зэмос Инмарлы, Иеговалы, корка луыны кулэ вал (1 Пар. 22:1, 5, 9—11).
2 Давид эксэй оске вал, Иегова Соломонлы юрттоз шуыса. Нош ачиз Соломон «пинал на, кужымтэм» вал, улонэз адӟымтэ егит пи. Дӥсьтоз-а со храмез пуктон борды басьтӥськыны? Егит луэмез но улонэз тодымтэез уз люкетэ-а солы? Сётэм ужез быдэстон понна, Соломонлы кышкатэк уж борды басьтӥськоно вал.
3. Малы дышетскиз, луоз, Соломон аслаз атаезлэсь кышкасьтэм луон сярысь?
3 Соломон кышкасьтэм луон сярысь троссэ тодӥз, луоз, Давидлэсь. Егит дыръяз Давид атаезлэсь ыжъёссэ пӧйшуръёслэсь утьылӥз (1 Экс. 17:34, 35). Нош кышкасьтэм луэмез тужгес но яркыт адӟиськиз, куке со трос ожмаськем батырлы пумит потӥз. Соку Давид Инмарлы оскиськиз но Голиафез, вольыт изэн лэзьыса, вииз (1 Экс. 17:45, 49, 50).
4. Малы Соломонлы кышкасьтэм луоно вал?
4 Кызьы адӟиське, Давид быгатэ вал Соломонлэсь мылкыдзэ ӝутыны кышкасьтэм луыны но храмез пуктон уж борды басьтӥськыны. (Лыдӟы 1 Паралипоменонэз 28:20.) Соломон кышкась ке луысал, кышкаменыз со пуктӥськон уж борды ӧй басьтӥськысал. Нош со, ужез быдэстыны быгатымтэезлэсь, уродгес луысал.
5. Малы милемлы кышкасьтэм луоно?
5 Милемлы но, Соломонлы сямен ик, кышкасьтэм луон но оскем ужез быдэстон понна, Иеговалэн юрттэтэз кулэ. Соин ик ойдолэ эскеромы, кызьы вашкала дыръёсы Инмарлэн куд-ог ужась-тыршисьёсыз кышкасьтэм луэмзэс возьматъязы. Озьы ик малпаськомы со вылын, кызьы ми быгатомы кышкасьтэм луыны но оскем ужъёсты быдэсъяны.
СООС КЫШКАСЬТЭМ ЛУЭМЗЭС ВОЗЬМАТӤЗЫ
6. Маин тӥледлы кельше Иосифлэн ассэ воземез?
6 Тодамы ваёмы, кызьы ассэ возиз Иосиф, куке Потифарлэн кышноез сое ёртыса возиз, со вӧзаз мед выдоз шуыса. Иосиф тодэ вал, вылды, мар луоз, со соглаш ӧз кариськы ке. Озьы ке но, со кышканлы ӧз сётскы. Иосиф юн но кышкасьтэм луэмзэ возьматӥз (Ул.-выл. 39:10, 12).
7. Вералэ, кызьы Раав кышкасьтэм луэмзэ возьматӥз. (Учке статья кутсконысь суредэз.)
7 Эшшо одӥг кышкасьтэм адями — со Раав. Куке со доры израиль калыкысь Иерихон музъемез учкыны-чакланы лыктӥзы, со кышканы но юрттыны пумит луыны быгатысал. Но Раав Иеговалы оскиськиз. Со израиль пиосты ас дораз ватӥз но собере соослы пегӟыса кошкыны юрттӥз (Иис. Н. 2:4, 5, 9, 12—16). Раав оске вал, Иегова зэмос Инмар луэ шуыса, но со израиль калыклы сӥзем музъемзэ одно ик сётоз шуыса. Раав адямиослэсь кышканлы ӧз сётскы. Со ӧз кышка Иерихонлэн эксэезлэсь но, солэн ляльчиосызлэсь но. Озьы Раав ассэ но ӵыжы-выжыоссэ утиз (Иис. Н. 6:22, 23).
8. Малы дышетӥз апостолъёсты Иисуслэн ассэ кышкасьтэм воземез?
8 Озьы ик, Иисуслэн оскымон апостолъёсыз но кышкасьтэмесь вал. Иисуслэсь ассэ кышкасьтэм воземзэ адӟыса, соос асьсэос дышетскизы кышкасьтэм луыны (Матф. 8:28—32; Иоанн 2:13—17; 18:3—5). Апостолъёс Иисуслэн нимыныз дышетӥзы соку но, куке саддукейёс соослы пумит мынӥзы (Ап. уж. 5:17, 18, 27—29).
9. Кызьы 2 Тимофейлы 1:7 юрттэ милемлы валаны сое, мар юрттоз милемлы кышкасьтэм луыны?
9 Иосиф, Раав, Иисус но апостолъёс юн луэмзэс возьматӥзы но шонер лэсьтыны тыршизы. Уз луы вераны, соос ас кужымзы вылэ оскиськизы но соин асьсэды кышкасьтэм возизы шуыса, малы ке шуоно соос Иеговалы оскиськизы. Милям улонамы но сыӵе югдуръёс кылдыны быгато, куке кышкасьтэм сям кулэ луоз. Соку милемлы ас кужыммы вылэ оскиськоно ӧвӧл, нош оскиськоно Иегова вылэ. (Лыдӟы 2 Тимофейлы 1:7.) Ойдолэ эскеромы, кызьы кышкасьтэм луоно семья улонын но христиан кенешын.
КЫӴЕ УЧЫРЪЁСЫН КЫШКАСЬТЭМ ЛУОНО
10. Малы егит христианъёслы кышкасьтэм луоно?
10 Егит христианъёслы, Иеговалы оскымон кылён понна, ӵем дыръя кышкасьтэм луоно. Соос Соломонлэсь дышетскыны быгато. Солэн кышкасьтэм луэмез адӟиськиз отысь, кыӵе визьмо ужпумъёс со кутылӥз храмез пуктон дыръя. Зэм, егит христианъёслы анай-атайёссылэсь визь-кенеш куроно, но со дыре ик соослы асьсэлы быгатоно кулэ луись ужпумъёс кутыны (Мад. 27:11). Соослы кышкасьтэм луоно, визьмо ужпум кутон понна, кинэн эшъяськоно, кызьы шулдыръяськоно, кызьы Инмарлэн куронъёсызъя улоно но ку пылатӥськоно. Озьы лэсьтыса, егит пиос но нылъёс Шайтанлы пумит мыно, кудӥз утча, мар понна Инмар сярысь урод кылъёс вераны.
11, 12. а) Малы Моисейлэн кышкасьтэм луэмез адӟем карымон луэ? б) Кызьы егит христианъёс Моисейлэсь адӟем карыны быгатозы?
11 Егит христианъёслы малпано, кыӵе ужпумъёс соос пуктылозы улоназы. Куд-ог шаеръёсын егитъёслэсь мылкыдзэс ӝуто вылӥ образование басьтыны но трос коньдон поттыса ужаны. Нош куанер шаеръёсын егитъёс малпало, нырысь ик соослы семьязы сярысь сюлмаськоно но коньдон поттоно шуыса. Кыӵе гинэ югдуре тӥ медад шеде, малпаське Моисейлэн примерез вылын. Сое фараонлэн нылыз будэтӥз, соин ик со ужпум пуктыны быгатысал узыр но тодмо адями луыны. Ӵапак сыӵе ужпумъёс пуктыны Моисейлэсь мылкыдзэ ӝутӥз, вылды, солэн Египетысь семьяез, дышетӥсьёсыз но фараон юртысь кенеш сётӥсьёс. Но Моисей соослэсь ӧз кылзӥськы. Со ужпум кутӥз зэмос Инмарлэсь кылзӥськыса улыны. Египетын со азьын усьтӥськись луонлыкъёсты кулэ карытэк, со Инмарлы оскиськиз (Евр. 11:24—26). Иегова Моисеез туж бакель кариз, нош азьланяз сое эшшо но бадӟымесьгес бакель каронъёс возьмало на.
12 Озьы ик Иегова бакель кароз егит христианъёсты но, кудъёсыз кышкасьтэм луэмзэс возьмато, Иеговалы ужан-тыршонын ужпумъёс пуктыса но нырысь ик Инмарлэн Эксэйлыкез сярысь малпаськыса. Иегова юрттоз соослы семьязылэн кулэяськонъёсыз сярысь сюлмаськыны. Нырысетӥ даурын егит христиан пи Тимофей нырысетӥ интые пуктӥз Инмарлы ужан-тыршонэз. Тӥ но солэсь адӟем карыны быгатӥськодыa. (Лыдӟы Филиппыослы 2:19—22.)
Дась-а тӥ кышкасьтэм луыны котьку но котькытын? (Учке 13—17-тӥ абзацъёсты.)
13. Малы егит сузэрлы кышкасьтэм луоно вал, пуктэм ужпумъёссэ быдэстон понна?
13 Алабамаысь (США) одӥг сузэрлы кышкасьтэм луоно вал, Инмарлы ужан-тыршонын ужпумъёс пуктон понна. Со гожтэ: «Мон туж возьдаськись пинал вал. Мыным туж секыт вал вераськыны соосын, кинъёс Эксэйлык юртэ лыктӥзы, нош чик тодмотэм муртъёслэн ӧсъёсазы йыгаськон сярысь веранэз ик ӧвӧл ни». Озьы ке но, анай-атаезлэн но кенешысьтызы мукет христианъёслэн юрттэмзылы луыса, со пуктэм ужпумзэ быдэстӥз — со пионер луиз. Тани мар со вера: «Шайтанлэн дуннеез милемыз оскытыны тырше, вылӥ образование, дано луон, коньдон но выль арбериосты басьтон пайда вайись ужпум луэ шуыса. Но ӵемысь со ужпумъёс быдэстыны луонтэмесь но, сюлмаськонъёс но кӧтӝожъёс сяна, номыр но уг ваё ни. Нош Иеговалы ужан-тыршон мыным туж бадӟым шумпотон вае».
14. Кыӵе учыръёсын анай-атайёслы кышкасьтэм луоно?
14 Христианъёслы, кудъёсызлэн нылпиоссы вань, озьы ик кышкасьтэм луоно. Кылсярысь, уж дорысьтыды кузёды ялан курыны быгатоз тӥледыз ӝыт кыльыса ужаны яке шутэтскон нуналъёсы уже потаны, ӵапак со дыре, куке тӥ семьяен йыбырттон ортчытӥськоды, тодытон уже пыриськиськоды яке христиан пумиськонъёсы ветлӥськоды. Озьы ужаны соглаш луонтэм понна но нылпиослы умой адӟем карон возьматон понна, кышкасьтэм луоно. Яке, кылсярысь, кенешысьтыды куд-ог анай-атайёс нылпиоссылы лэзё карыны сое, мар карыны тӥ асьтэлэн нылпиостылы уд лэзиське. Соку соос тӥлесьтыд юаны но быгатозы, малы тӥляд нылпиосты соослэн нылпиоссы кадь уг лэсьто шуыса. Сое лякытэн валэктон понна, кышкасьтэм луоно.
15. Кызьы анай-атайёслы юртто Псалтирьысь 36:25 но Еврейёслы 13:5 кылъёс?
15 Озьы ик, кышкасьтэм сям кулэ, нылпиостылы Инмарлы ужан-тыршонын ужпумъёс пуктыны но соосты быдэстыны юрттон понна. Куд-ог анай-атайёс нылпиоссылэсь мылкыдзэс уг ӝуто пионер луыны, мыныны отчы, кытын тодытӥсьёс уг тырмо, Вефильын ужаны-тыршыны яке Эксэйлык юртъёсты но конгрессъёсты ортчытон юртъёсты пуктонын юрттӥськыны. Соос кышкало, дыр, пересьмизы ке, нылпиоссы соос сярысь сюлмаськыны уз быгатэ шуыса. Но визьмо анай-атайёс юн оско Иеговалэн кыл сётонъёсызлы. (Лыдӟы Псалтирез 36:25; Еврейёслы 13:5.) Кышкасьтэм но Иеговалы оскись христианъёс нылпиоссылэсь но мылкыдзэс ӝуто сыӵеесь луыны (1 Экс. 1:27, 28; 2 Тим. 3:14, 15).
16. Кызьы куд-ог анай-атайёс нылпиоссылы Инмарлы ужан-тыршонын ужпумъёс пуктыны юрттӥзы? Кыӵе емышъёс со вайиз?
16 Огазеяськем Штатъёсысь одӥг семья нылпиосызлы Инмарлы ужан-тыршонын ужпумъёс пуктыны юрттӥз. Тани мар вера семьялэн йырыз: «Нылпиосмы ветлыны но вераськыны кутскемлэсь азьло ик ини ми вераллямы соослы, макем бадӟым шумпотон вае пионер луыса ужан-тыршон но кенешысь вын-агайёслы но сузэр-апайёслы юрттон. Табере соос асьсэос сыӵе ужпум пуктӥзы. Нылпиослэн пуктэм ужпумъёссы вань ке, со юрттэ соослы Шайтанлэн дуннеезлэн зӥбемезлы сётскытэк улыны но вань саклыксэс висъяны солы, мар зэмзэ ик кулэ луэ — Иеговалы ужан-тыршонлы». Эшшо одӥгез вын-агай, кудӥзлэн кык нылпиосыз вань, гожтӥз: «Тросэз анай-атайёс трос дырзэс но коньдонзэс быдто, нылпиоссы спорт, искусство удысын но дышетсконын азинлыко мед луозы шуыса. Нош визьмогес луысал юрттыны нылпиослы пуктыны но быдэстыны сыӵе ужпумъёсты, кудъёсыз юрттозы соослы Иеговаен эшъяськыны. Ми туж шумпотӥськомы, малы ке шуоно, нылпиосмылэсь пуктэм ужпумъёссэс быдэстэмзэс адӟем сяна, ми асьмеос но соосын ӵош со ужпумъёсты быдэстыны тыршимы кадь». Оскыны кулэ, Иегова бакель кароз шуыса анай-атайёсты, кудъёсыз юртто нылпиоссылы Инмарлы ужан-тыршонын ужпумъёс пуктыны но соосты быдэстыны.
КЕНЕШЫН КЫШКАСЬТЭМ ЛУОН
17. Кыӵе учыръёсы кенешын кышкасьтэм сям кулэ луэ?
17 Кенешын но кышкасьтэм сям кулэ. Кылсярысь, тӧроослы кышкасьтэм луоно, куке соос эскеро учыръёсты, кудъёсаз секыт сьӧлык лэсьтэмын вал, яке юртто соослы, кинъёслы эмъюрттэт кулэ луиз. Куд-ог тӧроос тюрьмаосы ветло, отын пукисьёслы Инмарен кусыпъёссэс юнматыны юрттон понна. Нош мар вераны луоз бызьымтэ сузэръёс сярысь? Тросэз соос пӧлысь ужпум куто Иеговалы тросгес ужаны-тыршыны, кылсярысь, пионер луыса ужало-тыршо, мыно отчы, кытын ивортӥсьёс уг тырмо, Эксэйлык юртъёсты но конгрессъёсты ортчытон юртъёсты пуктонын юрттӥсько но Эксэйлыкез тодытӥсьёслы школаын дышетско. Куд-огез сузэръёс Галаад школаын дышетскыны но быгато.
18. Кызьы арлыдо сузэръёс кышкасьтэм луэмзэс возьматыны быгато?
18 Арлыдо сузэр-апайёс кенешлы зэмос бакель карон луо. Макем ми яратӥськомы со дуно сузэр-апайёсмес! Зэмзэ но, куд-огъёсыз соос пӧлысь уг быгато ни Иеговалы азьло кадь ик ужаны-тыршыны. Озьы ке но, соос быгато кышкатэк кыӵе ке уж борды басьтӥськыны. (Лыдӟы Титлы 2:3—5.) Кылсярысь, арлыдо сузэрез курыны быгато вераськыны егит сузэрен солэн вылтусыз сярысь. Веранэз ӧвӧл, со понна кышкасьтэм луоно. Арлыдо сузэр егит сузэрез уз куареты со пумысен, кызьы со дӥсяське. Со сое малпаськыны косоз, дыр, со сярысь, кызьы солэн дӥськут быръемез мукетъёсыз вылын шӧдӥське (1 Тим. 2:9, 10). Арлыдо сузэрлэн егитэз сярысь озьы сюлмаськемез умой емышъёс вайыны быгатэ.
19. а) Кызьы пылатӥськем вын-агайёс кышкасьтэм луэмзэс возьматыны быгато? б) Кызьы Филиппыослы 2:13 но Исаиялэн 12:2 кылъёс вын-агайёслы кышкасьтэм луыны юрттозы?
19 Кышкасьтэм луоно но уж борды басьтӥськоно озьы ик пылатӥськем вын-агайёслы но. Кышкасьтэм вын-агайёс, кудъёсыз дась асьсэ вылэ тросгес уж басьтыны,— кенешлы зэмос бакель карон (1 Тим. 3:1). Нош куд-огъёсызлэн тросгес карыны мылкыдзы ӧвӧл. Кин ке но со вын-агайёс пӧлысь куке но янгышаз вал, вылды, соин ик али со малпа, кенешлы юрттӥсь яке тӧро луыны со уг быгаты ни шуыса. Нош кин ке но малпалоз, вылды, со ужез нуыны уз вормы шуыса. Тӥляд но сыӵе малпанъёсты кылдо ке, Иегова юрттоз тӥледлы кышкасьтэм луыны. (Лыдӟы Филиппыослы 2:13; Исаиялэсь 12:2.) Тодады вае Моисеез. Со но нырысь малпаз вал, Иеговалэсь сётэм ужзэ быдэстыны уз быгаты шуыса (Пот. 3:11). Но Иегова юрттӥз солы кышкасьтэм луыны но сётэм ужзэ быдэстыны. Пылатӥськем вын-агай но кышкасьтэм луыны быгатоз, со Иеговалы ӟырдыт вӧсяськиз ке но котькуд нунал Библиез лыдӟиз ке. Озьы ик солы юрттоз Инмарлэн кышкасьтэм ужась-тыршисьёсызлэн примеръёссы вылын малпаськон. Со сяна, со лякытэн курыны быгатоз, тӧроос сое мед дышетозы шуыса, озьы ик, умой луоз, со аслэсьтыз юрттэтсэ ӵектӥз ке. Ми ӧтиськомы вань пылатӥськем вын-агайёсты кышкасьтэм луыны но мылысь-кыдысь кенешын тыршыны!
«КУЗЁ-ИНМАР... ТОНЭН»
20, 21. а) Мае Давид Соломонлы тодаз вайытӥз? б) Малы ми оскыны быгатӥськомы?
20 Давид эксэй Соломонлы тодаз вайытӥз, храмез пуктытозяз Иегова соин луоз шуыса (1 Пар. 28:20). Атаезлэн верам кылъёсыз Соломонлэн сюлмаз но визьмаз мур пыӵазы, но со ӧз лэзьы, егит луэмез но улонэз тодымтэез та уж борды басьтӥськыны мед люкетозы шуыса. Со туж кышкасьтэм луэмзэ возьматӥз, уж борды басьтӥськиз но, Иеговалэн юрттэменыз, сизьым но ӝыны ар куспын бадӟым храм пуктӥз.
21 Соломонлы сямен ик, Иегова милемлы но юрттоз кышкасьтэм луыны но пӧртэм ужъёсты нуыны, кызьы семьяын, озьы ик кенешын (Ис. 41:10, 13). Иеговалы ужан-тыршонын кышкасьтэм луиськомы ке, ми оскыны быгатӥськомы, Иегова милемыз али но вуонояз бакель кароз шуыса. Соин ик кышкасьтэм луэ но уж борды басьтӥське!
a Визь-кенешъёсты со сярысь, кызьы Инмарлы ужан-тыршонын пуктэм ужпумъёсты быдэстоно, луоз лыдӟыны 2004-тӥ арын 15-тӥ пӧсьтолэзь понна поттэм «Возьмаськон башня» журналысь, «Пусть твои духовные цели прославляют Создателя» статьяысь.