Мар вера Библия солэн Авторез сярысь

1. Малы тӥ Библия понна тау кариськоды?

МИ ТУЖ тау кариськомы Иеговалы Библия понна! Со пыр Инмар сётэ милемлы визь-кенешъёсты, кудъёсыз милемлы юртто нуналысь нуналэ шуг-секытъёсмес сэрттыны-пертчыны. Озьы ик Иегова кузьмаз милемлы вуоноезлы оскон. Нош тужгес но кулэез, Библия пыр Иегова милемлы ачиз сярысь вера. Инмарлэн паймымон сямъёсыз сярысь малпаськон сюлэммес бугыртэ но мылкыдмес ӝутэ Инмарлэн матысь эшъёсыз луыны (Пс. 24:14).

2. Кызьы Иегова адямиослы ачиз сярысь вералляз?

² Иеговалэн потэ, адямиос сое мед тодозы шуыса. Вашкала дыръя ачиз сярысь со вералляз уйвӧтъёс, адӟонъёс но кылчинъёс пыр (Лыд. 12:6; Ап. уж. 10:3, 4). Но ваньмыз та сярысь гожтэмын ӧй луысал ке, со милемлы пайда вайысал-а? Тӥни малы Иегова косӥз книгае гожтыны сое, мае ачиз сярысь верамез потэ вал (Иер. 30:2). Ми тодӥськомы, Инмарлэн сюресэз дун-шектэм шуыса (Пс. 17:31). Соин ик ми юн оскиськомы, милемын вераськон понна, Иегова самой умой амал бырйиз шуыса.

3. Мар кариз Иегова, солэн Кылыз ми дырозь мед вуоз шуыса? (Исаия 40:8).

³ Лыдӟе Исаиялэсь 40:8. Трос сюрс аръёс ӵоже ини Инмарлы оскымон пиосмуртъёс но кышномуртъёс Библиысь пайдаё визь-кенешъёс шедьто. Кызьы озьы луыны быгатэ? Библилэн люкетъёсыз туж кемалась гожтэмын вал ини. Сое ӝог уродмись материалъёс вылын гожъязы. Нырысь гожтэм одӥг рукопись но ми дырозь ӧз вуы. Но Иегова сюлмаськиз, Священной Гожтэмъёслэн туж трос копиоссы лэсьтэмын мед луозы шуыса. Копиосты гожъясьёс тырбыдэстэмесь вал ке но, соос туж тыршыса ужазы. Кылсярысь, тани мар вера Еврей Гожтэмъёс сярысь одӥг тодосчи: «Мукет вашкала книгаосын ӵошатыса, Еврей Гожтэмъёслэн копиоссы туж шонер гожтэмын». Соин ик, копиосты ӝог уродмись материалъёс вылын гожъязы ке но, туж трос дыр ортчиз ке но, озьы ик копиосты гожъясьёс тырбыдэстэмесь вал ке но, ми юн оскыны быгатӥськомы: туннэ Библиын гожтэмын солэн Авторезлэн, Иеговалэн, малпанъёсыз.

4. Мае ми эскеромы та статьяын?

⁴ «Котькудӥз ик ӟеч, дун-шектэм кузьым» Иегова бордысь потэ (Иак. 1:17). Библия — Инмарлэн одӥгез тужгес но умой кузьымез. Кузьымъя ӵем дыръя валаны луэ, макем умой тодо милемыз но сое, мар милемлы кулэ. Тае ик вераны луэ Инмарлэн Кылыз сярысь но. Соин умойгес тодматскыса, ми тросгес тодӥськомы Иегова сярысь: макем умой со тодэ милемыз но сое, мар милемлы кулэ. Та статьяын ми эскеромы, мар вера Библия Иеговалэн куинь сямъёсыз сярысь — визьлыкез, шонерлыкез но яратонэз сярысь. Нырысь ойдолэ эскеромы, мар вераське Библиын Инмарлэн визьлыкез сярысь.

БИБЛИЯ ВЕРА ИНМАРЛЭН ВИЗЬЛЫКЕЗ СЯРЫСЬ

5. Мар возьматэ, Библиын Инмарлэн визьлыкез вань шуыса?

⁵ Иегова тодэ, милемлы визь-кенешъёс кулэ шуыса. Библия Инмарлэсь визьлыко луэмзэ возьматэ. Солэн визь-кенешъёсыз адямиослы пайда ваё. Инмарлэн Кылыз адямиослэсь улонзэс воштыны быгатэ. Библилэсь нырысетӥ книгаоссэ гожтэм бере Моисей израиль калыклы шуиз: «Та юнме гинэ верам кылъёс ӧвӧл, та тӥляд улонды» (К. Зак. 32:47). Соос, кинъёс Священной Гожтэмъёсысь кылъёссэ кылзӥзы, азинлыкоесь но шудоесь вал (Пс. 1:2, 3). Кӧня гинэ аръёс медам ортче, Библия адямиослэсь улонзэс умой пала воштыны быгатэ. Куд-ог агайёс но сузэръёс сярысь лыдӟыны луэ jw.org сайтысь, «Библия улонэз воштэ» рубрикаысь. Соослэн учыръёссы возьмато, туннэ но Инмарлэн Кылыз «оскисьёс пушкын... ӟеч уж лэсьтэ» шуыса (1 Фес. 2:13).

6. Малы вераны луоз, Библия — номырин ӵошатонтэм книга шуыса?

⁶ Библия — номырин ӵошатонтэм книга. Малы озьы вераны луоз? Малы ке шуоно солэн Авторез, Иегова,— котькинлэсь кужмо, ноку кулӥсьтэм но самой визьлыко Инмар. Куд-ог книгаос авторъёссылэсь кемагес уло ке но, ӵем дыръя соослэн визь-кенешъёссы, дыр ортчыса, пайда уг ваё ини. Но Библиысь визь-кенешъёс котьку пайда ваё. Та священной книгаез лыдӟыкумы но со вылын малпаськыкумы, солэн Авторез святой дух пыр милемлы валаны юрттэ, кызьы солэсь визь-кенешъёссэ улонамы пыртоно (Пс. 118:27; Мал. 3:16; Евр. 4:12). Зэм, Библилэн Авторез ноку уз кулы но солэн милемлы юрттэмез потэ. Тӥни малы Библиез ялан лыдӟыны кулэ!

7. Кызьы Библия вашкала дыръя Инмарлэсь калыксэ огазеяз?

⁷ Кызьы эшшо Библия возьматэ на Инмарлэсь визьлыко луэмзэ? Та визьлык адӟиське отысь, кызьы Инмарлэн Кылыз адямиосты огазея. Куке израиль калык Сӥзем музъеме пыриз, со та музъемлэн пӧртэм сэрегъёсаз улыны интыяськиз. Кин ке но чорыгаз, кин ке но музъемен ужаз, кин ке но пудо возьмаз. Израиль калыкысь адямиос, кудъёсыз шаерзылэн пӧртэм палъёсаз улӥзы, ог-огзы сярысь сюлмаськемысь дугдыны но быгато вал. Но Иегова аслэсьтыз калыксэ куриз огазе люкаськылыны но кылзыны, кызьы Инмарлэсь Кылзэ лыдӟо но валэкто (К. Зак. 31:10—13; Неем. 8:2, 8, 18). Малпалэ гинэ, мар шӧдӥз израиль калыкысь адями, кудӥз Иерусалиме лыктӥз но адӟиз Инмарлэсь трос миллион мукет ужась-тыршисьёссэ, кудъёсыз быдэс шаерысьтызы вуизы! Озьы Иегова аслаз калыкезлы огкылысь улыны юрттӥз. Берлогес, христиан кенеш кылдэм бере, отчы пыро вал пӧртэм пиосмуртъёс но кышномуртъёс, кудъёсыз пӧртэм кылъёсын вераськизы. Соос пӧлын куанеръёсыз но, узыръёсыз но вал. Но соос Священной Гожтэмъёсты яратӥзы. Соин ик зэмос Инмарлы огкылысь ужаны-тыршыны быгатӥзы. Соос, кинъёс христиан кенеше пыризы, Инмарлэсь Кылзэ валаны быгатӥзы, огъя оскисьёссылэн юрттэмзылы луыса но пумиськонъёсы ветлыса гинэ (Ап. уж. 2:42; 8:30, 31).

8. Кызьы туннэ Библия Иеговалэсь калыксэ огазея?

⁸ Визьлыко Инмармы Библия пыр аслэсьтыз калыксэ дышетэ но огазея. Библия пыр ми басьтӥськомы духовной сиён, кудзэ туж яратӥськомы. Ми ялан ветлӥськомы христиан пумиськонъёсы но конгрессъёсы, кытын кылзӥськомы, кызьы Священной Гожтэмъёсты лыдӟо но валэкто. Озьыен, Библия милемлы туж юрттэ Иеговалы огкылысь ужаны-тыршыны (Соф. 3:9).

9. Кыӵе сям кулэ, Библиез валан понна? (Лука 10:21).

⁹ Учкомы, мар эшшо возьматэ на Иеговалэсь визьлыко луэмзэ. Библилэн тросэз люкетъёсыз гожтэмын озьы, сое зӥбыт-востэм адямиос гинэ валаны мед быгатозы шуыса. (Лыдӟе Лукалэсь 10:21.) Ми тодӥськомы, Библиез котькытын лыдӟо шуыса. Одӥг тодосчи вераз: «Тросэз адямиос Библиез, мукет книгаосын ӵошатыса, ӵемгес лыдӟо. Нокыӵе мукет книгаез сокем сак уг лыдӟо ни». Но зӥбыт-востэм адямиос гинэ сое валало но басьтэм тодон-валанзэс улоназы пырто (2 Кор. 3:15, 16).

10. Кызьы эшшо Библия возьматэ на, Иегова визьлыко шуыса?

¹⁰ Кызьы эшшо Библия возьматэ на, Иегова визьлыко шуыса? Библия пыр Инмар аслэсьтыз калыксэ дышетэ. Со сяна, Библия пыр Иегова котькуд ужась-тыршисезлы кивалтэт сётэ но сое буйгатэ. Библиез лыдӟыку, ми пӧлысь котькудӥз шӧдыны быгатэ, Иегова со сярысь сюлмаське шуыса (Ис. 30:21). Вал-а тӥляд сыӵе учыръёсты, куке шуг-секыт дыръя тӥ Библиез лыдӟиды но шедьтӥды сыӵе кылбурез, кудӥз ӵапак тӥледлы гожтэмын вал кадь? Сыӵе учыръёсты трос вал, дыр. Но Библия трос миллион адямиослы гожтэмын ук. Кызьы отын луыны быгатэ кылбур, кудӥз ӵапак тӥледлы но ӵапак та дырлы гожтэмын? Озьы луыны быгатэ, малы ке шуоно солэн Авторез — самой визьлыко Инмар (2 Тим. 3:16, 17).

БИБЛИЯ ВЕРА ИНМАРЛЭН ШОНЕРЛЫКЕЗ СЯРЫСЬ

11. Кызьы Инмар возьматӥз вань адямиосты яратэмзэ, Библиез гожъяку?

¹¹ Иеговалэн эшшо одӥгез сямыз — шонерлык (К. Зак. 32:4). Иегова сямен, шонерлыко адями котькинэ гажаны тырше (Ап. уж. 10:34, 35; Рим. 2:11). Иеговалэн шонерлыкез адӟиськиз отысь, кыӵе кылъёсын Библия гожтэмын вал. Библилэн нырысетӥ 39 книгаосыз пӧлысь тросэз гожтэмын вал еврей кылын, кудзэ со дыре Инмарлэн ужась-тыршисьёсызлы валаны капчи вал. Но асьме вакытысь нырысетӥ даурын грек кыл вӧлмиз. Соин ик Библилэн кылем 27 книгаосыз пӧлысь тросэз та кылын гожтэмын вал. Иегова ӧз куры аслэсьтыз Кылзэ кыӵе ке одӥг кылын гожтыны. Туннэ музъем вылын уло ог тямыс миллиард адямиос, кудъёсыз туж пӧртэм кылъёсын верасько. Кызьы ваньзы соос Иегова сярысь тодыны быгато?

12. Кызьы азьпалзэ ивортон, кудӥз гожтэмын Данииллэн 12:4, асьме нуналъёсы быдэсме?

¹² Даниил пророк пыр Иегова кылзэ сётӥз, берпум дыръёсы «тросэз... [Библиысь зэмлыкез] лыдӟозы но тодонзы будоз», яке тросэз сое валалозы, шуыса. (Лыдӟе Данииллэсь 12:4.) Тодон-валан будэ, малы ке шуоно Библия но со вылэ пыкиськыса гожтэм публикациос трос кылъёсы берыктӥсько, печатласько но вӧлмытӥсько. Библия тужгес но трос кылъёсы берыктэмын. Музъем вылын со самой вӧлмем книга. Куддыръя организациос, кудъёсыз Библиез берыкто, ужзы понна туж трос коньдон басьто. Но Иеговалэн ужась-тыршисьёсыз Библиез яке солэсь люкетъёссэ 240-лэсь но тросгес кылъёсы берыктӥзы. Котькуд адями сое дунтэк басьтыны быгатэ. Талы луыса пум вуытозь вань калыкъёсысь адямиос Эксэйлык сярысь ӟеч иворез кылыны быгато (Матф. 24:14). Шонерлыко но котькинэ яратӥсь Инмармылэн потэ, Библиез тросгес адямиос мед лыдӟозы но соин мед эшъяськозы шуыса. Инмар милемлы таӵе луонлык сётэ, малы ке шуоно со ваньмес туж яратэ.

БИБЛИЯ ВЕРА ИНМАРЛЭН ЯРАТОНЭЗ СЯРЫСЬ

13. Малы вераны луоз, Библия Иеговалэсь яратонзэ возьматэ шуыса? (Иоанн 21:25).

¹³ Библиын вераське яратон сярысь — Авторезлэн валтӥсь сямыз сярысь (1 Иоанн 4:8). Малпаське, мае Иегова Библие гожтӥз, нош мае — ӧз гожты. Со вераз сомында, кӧня милемлы кулэ, соин эшъяськон понна, али шудо улон понна, нош вуонояз пырак улон понна. Иегова милемыз яратэ бере, укыр трос тодон-валан со милемлы ӧз сёты. (Лыдӟе Иоаннлэсь 21:25.)

14. Кызьы эшшо Библия возьматэ на, Инмар милемыз яратэ шуыса?

¹⁴ Библия пыр милемын гажаса вераськеменыз но Иегова возьматэ, милемыз яратэ шуыса. Библиын котькуд учырлы туж трос куронъёс гожтэмын ӧвӧл. Со интые, Иеговалэн потэ, ми малпаськыны мед дышетскомы шуыса. Соин ик солэн Кылаз гожтэмын улонысь учыръёс, азьпалзэ ивортонъёс но пайдаё визь-кенешъёс. Озьы Библия мылкыдмес ӝутэ Инмарез яратыны но вань сюлмысьтымы солэсь кылзӥськыны.

15. а) Кызьы Иегова сюлмаське соос сярысь, кинъёс Библиез лыдӟо? б) Учке суредэз. Библиысь кыӵе учыръёс сярысь малпаське нылаш, егит агай но арлыдо сузэр? (Ул.-выл. 39:1, 10—12; 4 Экс. 5:1—3; Лука 2:25—38).

¹⁵ Библия вера, Иегова ми сярысь туж сюлмаське шуыса. Кытысь со адӟиське? Солэн Кылаз гожтэмын трос учыръёс, кудъёсаз умой возьматэмын адямиослэн шӧдонъёссы. Ми со адямиосты валаськомы, малы ке шуоно соослэн милям кадь ик шӧдонъёссы вал (Иак. 5:17). Нош тужгес но валтӥсез: куке ми лыдӟиськомы, кызьы Инмар ассэ со адямиосын возиз, ми эшшо но умойгес валаськомы, Иегова «ӟеч сюлэмо, ваньзэ гажась-жалясь» шуыса (Иак. 5:11).

16. Мае тодыны луэ Иегова сярысь, куке Библиысь лыдӟиськомы адямиос сярысь, кудъёсыз янгышазы? (Исаия 55:7).

¹⁶ Кызьы эшшо Библия возьматэ на Иеговалэсь яратӥсь луэмзэ? Библия оскытэ, ми сьӧлыкамы ке но, Инмар милесьтым уз палэнскы шуыса. Израиль калык Иеговалы пумит выльысь но выльысь сьӧлыказ. Но куке соос ӧпкелизы, Инмар соосты простить карылӥз. (Лыдӟе Исаиялэсь 55:7.) Нырысетӥ даурын но христианъёс тодӥзы, Иегова соосты яратэ шуыса. Святой духлэн валтэмез улсын апостол Павел огъя оскисьёсызлэсь мылкыдзэс ӝутӥз «сьӧлыксэ куштыны но... буйгатыны» сое, кин секыт сьӧлыказ, но берлогес ӧпкелиз (2 Кор. 2:6, 7; 1 Кор. 5:1—5). Туж шумпотоно, янгышаменызы сэрен гинэ Иегова ужась-тыршисьёсызлэсь уг палэнскы шуыса! Со интые, Инмар соосты визьма но ас дораз берытскыны ӧте. Туннэ но Иегова кылзэ сётэ ассэ озьы ик возьыны соосын, кинъёс сьӧлыкало, но ӧпкелё (Иак. 4:8—10).

ДУНЪЯЛЭ БИБЛИЕЗ — ИНМАРЛЭСЬ ДУН-ШЕКТЭМ КУЗЬЫМЗЭ

17. Малы вераны луоз, Библия — Инмарлэн паймымон кузьымез шуыса?

¹⁷ Иегова милемлы паймымон кузьым кузьмаз. Малы солэн Кылыз туж паймымон? Кызьы ми эскеримы ини, Библия Инмарлэн визьлыкез, шонерлыкез но яратонэз сярысь вера. Та книга возьматэ, Иеговалэн потэ, ми соин мед тодматскомы но мед эшъяськомы шуыса.

18. Кызьы ми Библия понна, Иеговалэн дун-шектэм кузьымез понна, тау кареммес возьматыны быгатӥськомы?

¹⁸ Милям тодамы воземмы потэ, Библия — со инмысь Атаймылэн дун-шектэм кузьымез шуыса (Иак. 1:17). Кызьы ми со понна тау кареммес возьматыны быгатӥськомы? Иеговалэсь кылъёссэ лыдӟыса но соос вылын малпаськыса. Соку Библилэн быдӟым Авторез тыршеммес бакель кароз но, ми «Инмар сярысь тодонэз» шедьтомы (Мад. 2:5).