Библиез лыдӟон пайда мед ваёз

1. Кытысь адӟиськиз, Священной Гожтэм Иисуслэн улоназ бадӟым инты басьтэ вал шуыса?

ПУКТЭ син азяды, макем бадӟым пайда басьтӥзы адямиос, кудъёсыз Иисуслэсь дышетэмзэ кылзӥзы. Иисус ӵем дыръя Священной Гожтэмысь кылъёсты вера вал. Со, мае Иисус вераз пылатӥськемез бере но кулонэз азьын,— со Священной Гожтэмысь кылъёс (К. Зак. 8:3; Пс. 30:6; Лука 4:4; 23:46)b. Куинь но ӝыны ар ӵоже ужакуз-тыршыкуз, Иисус адямиослы Священной Гожтэмез ӵем лыдӟылӥз но сое валэктылӥз (Матф. 5:17, 18, 21, 22, 27, 28; Лука 4:16—20).

2. Мар юрттӥз Иисуслы Священной Гожтэмез умой тодыны? (Учке вылбамысь суредэз.)

² Иисус пичи дырысеныз ик Инмарлэсь Кылзэ ӵем лыдӟылӥз но сое кылӥз. Дораз со кылӥз, вылды, кызьы Мария но Иосиф огшоры вераськонъёссы дыръя Священной Гожтэмысь кылъёсты вераллязы (К. Зак. 6:6, 7)c. Иисус котькуд кӧснуналэ анай-атаеныз сӥнагогае ветлылӥз, луоз (Лука 4:16). Отын со сак кылзӥз, кызьы Священной Гожтэмез лыдӟизы. Дыр ортчыса, Иисус ачиз Священной Гожтэмез лыдӟыны быгатӥз ини. Соин ик Иисус Священной Гожтэмез умой тодӥз, сое яратӥз но соя улыны кутскиз. Кылсярысь, тодады вае, кыӵе учыр луиз храмын, куке Иисуслы 12 арес гинэ вал. Дышетӥсьёс, кудъёсыз Моисейлэсь законзэ туж умой тодӥзы, «солэн визьмызлы но, ответ сётэмъёсызлы но паймизы» (Лука 2:46, 47, 52).

3. Мае ми эскеромы та статьяын?

³ Ми но Инмарлэсь Кылзэ умой тодомы но яратомы, сое ялан лыдӟимы ке. Мар кароно, Библиез лыдӟон эшшо но тросгес пайда мед ваёз шуыса? Ойдолэ эскеромы, мар вераз Иисус соослы, кинъёс Моисейлэсь законзэ тодо вал, кылсярысь, законэз дышетӥсьёслы, фарисейёслы но саддукейёслы. Соос Священной Гожтэмез ӵем лыдӟизы, но отысь номырлы ӧз дышетске. Иисус вераз, малы соослы саклыксэс висъяно вал. Иисуслэн кылъёсыз милемлы но пайда ваёзы. Ми солэсь кылзӥськимы ке, соку: 1) эшшо но умойгес валаломы, мае лыдӟиськомы, 2) эшшо но тросгес духовной марӟанъёсты шедьтомы но 3) Инмарлэн Кылызлы лэзёмы милемыз тупатыны.

ЛЫДӞЕ, ВАЛАНЫ ТЫРШЫСА

4. Лукалэсь 10:25—29 лыдэ басьтоно ке, малы Инмарлэсь Кылзэ лыдӟоно?

⁴ Милемлы валаны кулэ, мае Инмарлэн Кылысьтыз лыдӟиськомы. Озьы ӧм лэсьтэ ке, со милемлы пайда уз вайы. Кылсярысь, тодады вае, кызьы Иисус вераськиз законэз тодӥсен. (Лыдӟе Лукалэсь 10:25—29.) Куке пиосмурт Иисуслэсь юаз, мар солы кароно, пырак улон понна, Иисус солы юрттӥз Инмарлэн Кылысьтыз валэктон шедьтыны. Иисус солэсь юаз: «Мар гожтэмын законын? Кызьы лыдӟиськод?» Та пиосмурт шонер валэктон сётыны быгатӥз — со Инмарез но матысьёсты яратон сярысь кылбуръёсты вераз (Лев. 19:18; К. Зак. 6:5). Но берло со юаз: «Нош кин бен мынам матысе?» Озьыен, та пиосмурт лыдӟемзэ рос-прос ӧз вала. Соин ик со ӧз тоды, кызьы та кылъёсты улоназ пыртоно.

5. Кызьы вӧсяськон но дыртытэк лыдӟиськон юрттозы тӥледлы лыдӟемдэс эшшо но умойгес валаны?

⁵ Ми Инмарлэсь Кылзэ эшшо но умойгес валаломы, таӵе визь-кенешъёслэсь кылзӥськимы ке. Лыдӟиськыны кутскемдылэсь азьло вӧсяське. Священной Гожтэмез валан понна, милемлы Иеговалэн юрттэмез кулэ. Соин ик Инмарлэсь святой духсэ куре. Дыртытэк лыдӟиське. Та юрттоз тӥледлы лыдӟемдэс валаны. Тӥ быгатӥськоды шара лыдӟиськыны яке аудиогожтэмъёсты кылзыны, асьтэлэн Библияды учкыса. Озьы тӥ адӟоды но, кылоды но сое, мае лыдӟиськоды. Соку Инмарлэн Кылыз визьмады но, сюлмады но эшшо но мур пыӵалоз (Иис. Н. 1:8). Лыдӟиськемды бере нош ик вӧсяське. Иеговалы тау каре Библия понна, кузьымез понна. Солэсь юрттэт куре лыдӟемдэс улонады пыртыны.

6. Кыӵе пайда ваёз, Библиез лыдӟыкумы, ми асьмелы юанъёс сётъямы но валтӥсь малпанъёсты гожъямы ке? (Озьы ик учке суредэз.)

⁶ Тани эшшо кык пайдаё визь-кенешъёс. Лыдӟемды вылын малпаськон понна, асьтэлы юанъёс сётъялэ. Юалэ асьтэлэсь: «Кинъёс сярысь татын вераське? Кин вераське? Кинэн со вераське но малы? Кытын но ку луиз та учыр?» Таӵе юанъёс юрттозы тӥледлы валтӥсь малпанъёсты адӟыны но валаны, кызьы соос ог-огенызы герӟаськемын. Валтӥсь малпанъёсты гожтэ. Малпанъёстэс валамон кылъёсын гожъялэ. Та юрттоз эшшо но умойгес малпаськыны но лыдӟемдэс тодады возьыны. Тӥ быгатӥськоды гожтыны юанъёсты, сое, мае шедьтӥды эскерон ортчыкуды, валтӥсь малпанъёсты. Озьы ик гожтыны луэ, кызьы лыдӟемдэс улонады пыртоно яке мае тӥ шӧдӥськоды. Та юрттоз тӥледлы Библия шоры учкыны гожтэт шоры кадь, кудзэ Иегова тӥледлы ыстӥз.

7. Кызьы Библиез лыдӟоно но малы? (Матфей 24:15).

⁷ Иисус вераз, Инмарлэсь Кылзэ валаса лыдӟоно шуыса. (Лыдӟе Матфейлэсь 24:15.) Соку ми адӟомы, кызьы валтӥсь малпанъёс ог-огенызы герӟаськемын, маин соос пӧртэм луо, озьы ик мур малпанъёсты но адӟомы. Со сяна, Иисуслэн верамезъя, валаса лыдӟыны тыршимы ке, соку адӟомы, кызьы Библиысь азьпалзэ ивортонъёс быдэсмо. Озьы ик ми быгатомы Библиысь лыдӟеммес улонамы пыртыны.

8. Мар юрттоз Библиез валаса лыдӟыны?

⁸ Иегова ужась-тыршисьёсызлы юрттэ Библиез валаса лыдӟыны. Соин ик солы вӧсяське но юрттэтсэ куре Библиез валаса лыдӟыны (Мад. 2:6). Кызьы тӥ быгатӥськоды вӧсяськемдыя лэсьтыны? Малпаськыса лыдӟе. Пусъе, кызьы лыдӟемды герӟаськемын соин, мае тӥ тодӥськоды ини. Уже кутэ Библиез эскерон понна тӥрлыкъёсты, кылсярысь, «Иеговалэн Адӟись-Ивортӥсьёсызлэн публикациоссыя эскерыны юрттэтэз» (ӟуч). Талы луыса тӥ валалоды лыдӟем кылбуръёстэс но сое, кызьы соосты улонады пыртоно (Евр. 5:14). Ваньмыз та юрттоз тӥледлы Священной Гожтэмез эшшо но умойгес валаны.

ЛЫДӞЕ, ДУХОВНОЙ МАРӞАНЪЁСТЫ ШЕДЬТЫНЫ ТЫРШЫСА

9. Кыӵе туж кулэ луись дышетонлы ӧз оске саддукейёс?

⁹ Саддукейёс туж умой тодо вал Еврей Гожтэмъёсысь нырысетӥ вить книгаосты. Но соос ӧз оске туж кулэ луись зэмлыкъёслы, кудъёсыз сярысь та книгаосын вераськиз. Тодамы ваёмы, кызьы саддукейёс Иисуслы улӟытон сярысь кескич юан сётӥзы. Нош Иисус соослэсь юаз: «Инмарлэсь куак дорысен Моисейлы „Мон — Авраамлэн Инмарез, Исааклэн Инмарез, Иаковлэн Инмарез“ шуэмзэ Моисейлэн книгаысьтыз ӧд лыдӟе шат?» (Марк 12:18, 26). Валамон, саддукейёс тае трос пол лыдӟизы. Но Иисуслэн юанэз возьматӥз: соос ӧз оске Священной Гожтэмысь туж кулэ луись дышетонлы — улӟытон сярысь дышетонлы (Марк 12:27; Лука 20:38)d.

10. Мае адӟыны тыршоно, Библиез лыдӟыкумы?

¹⁰ Малы та милемыз дышетэ? Библиез лыдӟыкумы, адӟыны тыршоно ваньзэ, малы дышетскыны луэ лыдӟем кылбуръёсысь. Валтӥсь дышетонъёсты гинэ эскероно ӧвӧл, озьы ик шедьтыны тыршоно зэмлыкъёсты но возетъёсты, кудъёсыз, марӟанъёс сямен, мур ватскемын.

11. Кызьы 2 Тимофейлы 3:16, 17 кылъёс юрттозы тӥледлы Библиысь духовной марӟанъёсты шедьтыны?

¹¹ Мар кароно, Библиез лыдӟыку, духовной марӟанъёсты шедьтон понна? Учкомы, мар гожтэмын 2 Тимофейлы 3:16, 17 (лыдӟе). Татын вераське, «быдэс Священной Гожтэм... пайда вае» шуыса. Инмарлэн Кылыз: 1) дышетэ, 2) сьӧлыкъёсты шарае поттэ, 3) шонер сюрес вылэ султытэ но 4) Инмарлы ярамон улыны дышетэ. Тае ик вераны луэ Библиысь со книгаос сярысь но, кудъёссэ тӥ туж ик ӵем уд лыдӟиське. Малпаське, малы тӥледыз дышето лыдӟем кылбуръёс. Мае тӥ тодӥды Иегова сярысь но солэн эрикез сярысь яке кыӵе возетъёсты татысь шедьтыны луэ? Малпаське, кызьы та кылбуръёс юрттозы тӥледлы урод сямъёстэс шарае поттыны, соосты палэнтыны но Иеговалы оскымон ужаны-тыршыны. Эскере, кызьы лыдӟем кылбуръёс юрттозы тӥледлы, шонер сюрес вылэ султыны но палэнтыны шонертэм учконъёсты, кудъёссэ тӥ тодытыкуды пумитады, вылды. Озьы ик дышетске Иегова сямен малпаськыны но солы ярамон улыны. Та ньыль визь-кенешъёсты улонады пыртӥды ке, соку духовной марӟанъёсты шедьтыны быгатоды. Нош талы луыса Библиез лыдӟон эшшо но тросгес пайда ваёз.

ЛЫДӞЕ, ТУПАТСКЫНЫ ТЫРШЫСА

12. Малы Иисус фарисейёслэсь юаз: «Законысь лыдӟемды ӧвӧл шат?»

¹² Фарисейёслэсь но Иисус юаз: «Законысь лыдӟемды ӧвӧл шат?» Озьы Иисуслэн возьматэмез потэ вал, фарисейёс Священной Гожтэмез шонертэм валэкто шуыса (Матф. 12:1—7)e. Со вераськонын фарисейёс Иисуслэсь дышетскисьёссэ янгыше уськытӥзы, соос суббота нуналэз уг чаклало шуыса. Нош Иисус вераз соослы Священной Гожтэмысь кык учыръёсты но Осия пророклэсь кылъёссэ. Тазьы Иисус возьматӥз, фарисейёс шонертэм валало вал, малы суббота сярысь закон сётэмын, озьы ик соос гажан-жалянзэс ӧз возьматэ шуыса. Малы Инмарлэн Кылыз та пиосмуртъёсты тупатыны ӧз быгаты? Малы ке шуоно соос вылтӥяськисесь но тэргаськисесь вал. Соос шонертэм мылкыдын лыдӟиськизы, соин ик лыдӟемзэс валаны ӧз быгатэ (Матф. 23:23; Иоанн 5:39, 40).

13. Кыӵе мылкыдын Библиез лыдӟоно но малы?

¹³ Иисуслэн кылъёсыз дышето милемыз Библиез шонер мылкыдын лыдӟыны. Фарисейёс кадь медам луэ шуыса, милемлы зӥбыт-востэмесь луыны тыршоно но дышетскыны дась луоно. Зӥбыт-востэм сям кулэ, Инмарлэн Кылызлы оскон понна (Иак. 1:21). Соку со сюлмамы мур пыӵалоз. Ми тэргаськыса но вылтӥяськыса ӧм улэ ке, Библия юрттоз милемлы гажан-жалянмес но яратонмес уж вылын возьматыны.

14. Кызьы валаны луэ, юрттэ-а милемлы Библия тупатскыны? (Озьы ик учке суредэз.)

¹⁴ Кызьы валаны луэ, юрттэ-а милемлы Библия тупатскыны? Со адӟиське отысь, кызьы ми асьмеды мукетъёсыныз возиськомы. Фарисейёс Инмарлэн Кылызлы сюлмазы пыӵаны лэзьысалзы ке, соку «янгыштэм муртъёсты судить» ӧй карысалзы (Матф. 12:7). Озьы ик милемын но. Библия милемлы тупатскыны юрттэ-а, уг-а, адӟиське отысь, кызьы ми мукетъёсыз шоры учкиськомы но кызьы асьмеды соосын возиськомы. Кылсярысь, мар сярысь ми ӵемгес вераськиськомы: адямиослэн умой сямъёссы сярысь яке тырмымтэоссы сярысь? Возьматӥськомы-а ми гажан-жалян сяммес но дась-а ми соосты простить карыны яке ми адямиосты пыкылӥськомы но куатаськиськомы? Таӵе юанъёс адӟыны юрттозы, лэзиськомы-а ми Библилы тупатыны милесьтым малпанъёсмес, шӧдонъёсмес но ужъёсмес (1 Тим. 4:12, 15; Евр. 4:12).

БИБЛИЕЗ ЛЫДӞОН ШУДО ЛУЫНЫ ЮРТТЭ

15. Кызьы Иисус учкиз Священной Гожтэм шоры?

¹⁵ Иисус яратӥз Священной Гожтэмез. Солэн шӧдонъёсыз сярысь азьпалзэ тодытыса, гожтэмын вал Псалтирьын 39:9: «Инмаре, мынам Тынэсьтыд эриктэ быдэсъяса улэме потэ, Тынад законэд мынам сюлмам». Соин ик Иеговалы ужан-тыршон Иисуслы шумпотон вайиз. Котькыӵе ужын со азинлыко вал. Ми но шудоесь но азинлыкоесь луомы, Библиез лыдӟимы но сое яратыны дышетскимы ке (Пс. 1:1—3).

16. Мар тӥ карыны тыршоды, Библиез лыдӟон эшшо но тросгес пайда мед ваёз шуыса? (Учке «Иисуслэн кылъёсыз юрттыны быгато лыдӟемдэс валаны» рамкаез.)

¹⁶ Иисуслэсь кылъёссэ но ужъёссэ эскерыса, Библиез лыдӟон милемлы эшшо но тросгес пайда ваёз. Ми Инмарлэсь Кылзэ эшшо но умойгес валаломы, вӧсяськимы ке, дыртытэк лыдӟиськимы ке, асьмелы юанъёс сётъямы ке но валтӥсь малпанъёсты гожъямы ке. Священной Гожтэмез ми тыршомы валаса лыдӟыны но публикациосмыя эскерыны. Ми эшшо но умойгес уже кутомы Библиез, озьы ик тодмотэм кылбуръёсты но, отысь духовной марӟанъёсты утчамы ке. Библия милемыз тупатыны быгатоз, ми шонер мылкыдын лыдӟиськимы ке. Ойдолэ тыршомы та статьяысь визь-кенешъёсты уже кутыны. Соку Библиез лыдӟон милемлы эшшо но тросгес пайда ваёз но Иеговаен кусыпъёсмес юнматоз (Пс. 118:17, 18; Иак. 4:8).