«Эскериське, сак улэ»

1. Мар Иисус дышетскисьёсызлы вераз со сярысь, ку пум вуоз, но мар карыны Иисус соослэсь мылкыдзэс ӝутӥз?

КУЛОНЭЗ азьын кӧня ке нуналъёслы азьлогес Иисуслэн дышетскисьёсыз солэсь юазы: «Дунне быронлэн кыӵе тодметэз луоз?» (Матф. 24:3). Дышетскисьёслэн тодэмзы потэ вал, дыр, кызьы валано, ку Иерусалим но храм быдтэмын луозы. Валэктон сётыкуз, Иисус Иерусалимлэн но храмлэн быронэз сярысь гинэ ӧз вера. Озьы ик со вераз, ку быдтэмын луоз дунне, кудаз ми улӥськомы. Ку пум вуыны кулэ вал? Иисус вераз: «Со нуналэз, со часэз, Атай сяна, Инмысь Кылчинъёс но, Пи но, нокин но уг тоды». Собере Иисус вань дышетскисьёсызлэсь мылкыдзэс ӝутӥз сак улыны (Марк 13:32—37).

2. Малы нырысетӥ даурын Иудеяын улӥсь христианъёслы сак луоно вал?

² Нырысетӥ даурын Иудеяын улӥсь христианъёслы сак луоно вал. Озьы гинэ соос быгатысалзы улэп кыльыны. Аслаз дышетскисьёсызлы Иисус вераз, кыӵе тодметъёсъя соос валаны быгатысалзы, ку Иерусалимлы но храмлы пум вуоз. Иисус шуиз: «Адӟиды ке солдатъёсын котыртэм Иерусалимез, соку тодэлэ, солэн тырттэм кылён дырыз матэ вуиз шуыса». Иисуслэн дышетскисьёсызлы солэсь кылзӥськоно но гурезьёсы пегӟоно вал (Лука 21:20, 21). Куке рим ожгарчиос Иерусалимез быдтӥзы, соос, кинъёс Иисуслэсь кылзӥськизы, улэп кылизы.

3. Мае ми эскеромы та статьяын?

³ Ӝоген та лек дунне быдтэмын луоз. Соин ик милемлы но сак луоно. Та статьяысь ми тодомы, кызьы эскериськоно, дуннеысь югдуръёс шоры учкыса. Озьы ик ми тодомы, кызьы асьмеды чаклано но мар кароно, дырмес юнме медам быдтэ шуыса.

ЭСКЕРИСЬКЕ, ДУННЕЫСЬ ЮГДУРЪЁС ШОРЫ УЧКЫСА

4. Малы милемлы тодыны кулэ, кызьы дуннеысь югдуръёс герӟаськемын Библиысь азьпалзэ ивортонъёсын?

⁴ Милемлы тунсыко чакланы дуннеысь югдуръёсты, малы ке шуоно соос Библиысь азьпалзэ ивортонъёслэсь быдэсмемзэс возьмато. Кылсярысь, Иисус вераз югдуръёс сярысь, кудъёсыз милемлы валаны юрттысалзы, Шайтанлэн дуннеезлы ӝоген пум вуоз шуыса (Матф. 24:3—14). Осконмы медаз лябӟы шуыса, апостол Пётр мылкыдмес ӝутӥз чакланы, кызьы азьпалзэ ивортонъёс быдэсмо (2 Пётр 1:19—21). Библиысь берпуметӥ книга таӵе кылъёсын кутске: «Иисус Христослэн усьтӥськонэз. Сое Солы Инмар сётӥз Аслаз ляльчиосызлы ӝоген мар луоноез возьматон понна» (Усьт. 1:1). Соин ик милям тодэммы потэ, кызьы дуннеысь югдуръёс герӟаськемын Библиысь азьпалзэ ивортонъёсын. Куддыръя та сярысь милям мукетъёсыныз но вераськеммы потэ.

5. Мар милемлы кароно, нош мар кароно ӧвӧл? (Озьы ик учке суредэз.)

⁵ Библиысь азьпалзэ ивортонъёсты эскерыкумы, милемлы верано ӧвӧл, мар, ми малпамъя, азьланяз луоз. Малы? Малы ке шуоно милям уг поты, кылъёсмы сэрен кенешын огкылысь улон мед сӧриськоз шуыса. Кылсярысь, ми кылыны быгатӥськомы, кызьы дуннеысь кивалтӥсьёс тыршо дунне вылэ тупаса но огкылысь улон вайыны. Кин ке соку ик малпаны быгатоз: тазьы быдэсме азьпалзэ ивортон, кудӥз гожтэмын 1 Фессалоникаослы 5:3. Но милемлы тодыны кулэ, мар та пумысен берло дыре вераз Иеговалэн организациез. Агайёсын но сузэръёсын вераськыкумы, ми талы саклыкмес висъямы ке, соку кенеш «одӥг духен, одӥг малпанъёсын» улоз (1 Кор. 1:10; 4:6).

6. Малы дышетскыны луэ, 2 Пётрлэсь 3:11—13 лыдӟыса?

⁶ Лыдӟе 2 Пётрлэсь 3:11—13. Апостол Пётр милемлы валаны юрттэ, малы Библиысь азьпалзэ ивортонъёсты эскероно. Со мылкыдмес ӝутэ «Инмарлэсь нуналзэ» возьманы. Малы? Милям уг поты лыдъяммы «нуналэз но часэз», ку Армагеддон вуоз (Матф. 24:36; Лука 12:40). Кылем дыре милям потэ асьмеды дун-шектэм воземмы но Инмарлы оскымон луэммы. Мукет кылъёсын вераса, милям потэ шонер ужъёс лэсьтэммы но вань сюлмысьтымы Иеговалы ужаммы тыршеммы, со милесьтым юн яратонмес мед шӧдоз шуыса. Нош со понна асьмеды чакланы кулэ.

МАР КАРОНО, АСТЭ ЧАКЛАН ПОННА?

7. Мар кароно, астэ чаклан понна? (Лука 21:34).

⁷ Иисус дышетскисьёсызлы вераз, соос дуннеысь югдуръёсты гинэ чакланы кулэ ӧвӧл шуыса. (Лыдӟе Лукалэсь 21:34.) Со шуиз: «Асьтэдыз асьтэос чаклалэ». Мае со возьматэ? Валаны тыршоно, мар Иеговаен кусыпъёсмес лябӟытыны быгатэ. Собере сыӵе кышкытлыкъёслэсь палэнскыны тыршоно. Соку Иегова милемыз азьланяз но яратоз (Мад. 22:3; Иуда 20, 21).

8. Мар карыны апостол Павел христианъёслэсь мылкыдзэс ӝутӥз?

⁸ Апостол Павел но христианъёслэсь мылкыдзэс ӝутӥз асьсэды чакланы. Кылсярысь, Ефес карын улӥсь вын-агайёслы со гожтӥз: «Чаклаське, сак улэ, укылтэмъёс кадь эн улэ, визьмо муртъёс кадь улэ» (Еф. 5:15, 16). Шайтан ялан тырше Иеговаен кусыпъёсмес лябӟытыны. Соин ик Библия ӧте милемыз: «Инмарлэсь эриксэ валаны тырше». Соку ми Шайтанлы пумит сылыны быгатомы (Еф. 5:17).

9. Мар юрттоз Инмарлэсь эриксэ валаны?

⁹ Библиын гожтэмын ӧвӧл ваньмыз, маин сэрен Иеговаен кусыпъёсмы лябӟыны быгато. Ӵем дыръя ужпумъёс, кудъёссэ ми кутоно луиськомы, герӟаськемын сыӵе юанъёсын, кудъёсыз сярысь Библиын пырак номыр гожтэмын ӧвӧл. Визьмо ужпум кутон понна, милемлы Инмарлэсь эриксэ валаны тыршоно. Со понна Инмарлэсь Кылзэ ялан эскероно но со вылын малпаськоно. Ми Инмарлэсь эриксэ валаны тыршимы ке но милям «Христослэн визьмыз» луиз ке, ми шонер ужпум кутомы, со пумысен нокыӵе курон-косон ӧвӧл ке но (1 Кор. 2:14—16). Куд-ог кышкытлыкъёсты адӟыны капчи, нош куд-огъёссэ — ӧвӧл.

10. Вералэ куд-ог кышкытлыкъёсты, кудъёсызлэсь милемлы палэнскыны кулэ.

¹⁰ Тани куд-ог кышкытлыкъёс, кудъёсызлэсь милемлы палэнскыны кулэ: флирт, мултэс трос вина юон но сиськон, кырсь кылъёсын вераськон, лек шутэтскон амалъёс, порнографиез учкон но мукетыз (Пс. 100:3). Милям тушмонмы, Шайтан, ялан тырше Иеговаен кусыпъёсмес лябӟытыны (1 Пётр 5:8). Ми сак ӧм луэ ке, Шайтан тыршоз, милям визьмамы но сюлмамы мед кылдозы шуыса вожъяськон, пӧяськон, тырмостэм луон, адӟемпотостэм карон, вылтӥяськон но куатаськон (Гал. 5:19—21). Нырысь малпан кылдыны быгатэ, таӵе шӧдонъёс номыр уродзэ уз вае шуыса. Но ми соосты соку ик выжыенызы валче ӧм ишкалтэ ке, соос бадӟым изъян ваёзы (Иак. 1:14, 15).

11. Кыӵе кышкытлыклэсь милемлы палэнсконо но малы?

¹¹ Вань одӥг кышкытлык, кудзэ соку ик уд адӟы. Со Иеговалы оскисьтэм адямиосын матысь эшъяськон. Пуктэ син азяды таӵе учырез. Ӵош ужасьты Иеговалы уг оскы. Тӥляд потэ, Иеговалэн Адӟись-Ивортӥсьёсыз сярысь со умой мед малпалоз шуыса. Соин ик тӥ асьтэды соин лякытэн возиськоды. Солы котьку но юрттыны дась. Дырын-дырын тӥ соглаш кариськиськоды со адямиен нуназезэ сиськыны. Ӝоген тӥ соин ялан нуназе кариськоды ини. Ӵош ужасьты умойтэмез сярысь вераське ке, нырысь тӥ сыӵе вераськонъёсы уд пыриськиське. Берлогес тӥ дышиськоды но, соос тӥледлы нокыӵе ик уг пото ини. Эшшо берлогес со адями ӧте тӥледыз ужамды бере ӵош сиськыны. Тӥ соглаш кариськиськоды. Ӝоген тӥ, ӵош ужасьты сямен, малпаськыны кутскиськоды. Кӧня эшшо дыр ортчоз на, тӥ со кадь асьтэды возьыны мед кутскоды шуыса? Валамон, милям потэ вань адямиосын асьмеды лякытэн воземмы но соослы гажаммес возьматэммы. Но вунэтоно ӧвӧл: ми луомы соос кадесь, кинъёсын дырмес ортчытъяськомы (1 Кор. 15:33). Соин ик туж кулэ Иисуслэсь кылъёссэ тодамы возьыны но асьмеды чакланы! Соку ми Иеговалы оскисьтэм адямиосын матысь кусыпъёс ум возе (2 Кор. 6:15). Ми та кышкытлыкез адӟомы но солэсь палэнскыны тыршомы.

«ДЫРДЭС ЮНМЕ ЭН БЫДТЭ»

12. Мар кароно вал Иисуслэн дышетскисьёсызлы, Иерусалимлэсь но храмлэсь быронзэс возьмакузы?

¹² Иисуслэн дышетскисьёсыз, Иерусалимлэсь но храмлэсь быронзэс возьмакузы, тэк пукыны кулэ ӧй вал. Иисус соослы уж сётӥз. Со соосты косӥз шумпотон ивор вераны «Иерусалимын но, быдэс Иудеяын но, Самарияын но, быдэс музъемлэн пумысеныз пумозяз ик» (Ап. уж. 1:6—8). Со туж бадӟым уж вал! Та ужлы асьсэды быдэсак сӥзьыса, соос дырзэс юнме ӧз быдтэ.

13. Малы милемлы дырмес юнме быдтоно ӧвӧл? (Колоссыослы 4:5).

¹³ Лыдӟе Колоссыослы 4:5. Асьмеды чакласа, ми возьматӥськомы, дырмес юнме ум быдтӥське шуыса. Ми улӥськомы сыӵе дуннеын, кытын котькуд адями малпамтэ шорысь шудтэм учырен пумиськыны быгатэ (Екк. 9:11). Кылсярысь, ми улонмес но малпамтэ шорысь ыштыны быгатӥськомы.

14, 15. Мар кароно, дырмес юнме медам быдтэ шуыса? (Еврейёслы 6:11, 12). (Озьы ик учке суредэз.)

¹⁴ Ми дырмес юнме ум быдтэ, Иеговалэсь эриксэ быдэсъямы ке но соин кусыпъёсмес юнматӥмы ке (Иоанн 14:21). Милемлы кылзӥськоно апостол Павеллэн визь-кенешезлэсь: «Юнэсь, шонаськисьтэмесь луэ, Кузё-Инмарлы ужаны берекетты мед луоз» (1 Кор. 15:58). Инмарлы ужамы-тыршимы ке, соку, пум вуыку — улонмылы яке та дуннелы пум вуыку, ми номыр сярысь ум жалялэ (Матф. 24:13; Рим. 14:8).

¹⁵ Асьме нуналъёсы но Иисус аслаз дышетскисьёсызлы юрттэ быдэс дунне вылын Инмарлэн Эксэйлыкез сярысь иворез вӧлмытыны. Иисус аслэсьтыз сётэм кылзэ быдэстэ: Иеговалэн организациез пыр со милемыз тодытыны дышетэ но кулэ луись тӥрлыкъёсты сётэ (Матф. 28:18—20). Нош ми тыршиськомы тодытыны но дышетскисьёсты дасяны. Озьы ик ми сак улӥськомы но возьмаськомы со дырез, ку Иегова та лек дуннелы пум поноз. Ми быгатомы пумозяз юн осконэн улыны, уже кутӥмы ке визь-кенешез, кудӥз гожтэмын Еврейёслы 6:11, 12 (лыдӟе).

16. Кыӵе мылкыдмы милям вань?

¹⁶ Шайтанлэсь дуннезэ быдтон понна, Иегова нуналэз но, часэз но бырйиз ини. Соку Иегова одно ик быдэстоз выль дунне пумысен вань азьпалзэ ивортонъёсты, кудъёссэ со аслаз Кылаз гожтӥз. Милемлы куддыръя потэ, та дуннелэн пумыз ӝега шуыса. Но Иеговалэн нуналыз «уз воштӥськы» — со дырыз дыръя вуоз! (Авв. 2:3). Соин ик ойдолэ уломы сыӵе ик мылкыдын, кыӵе Михей пророклэн вал. Со шуиз: «Мон Кузё-Инмар шоры учкыса уло, монэ утись Инмар вылэ оскиськыса уло» (Мих. 7:7).