Күйләрниң күйи

5 «Қериндишим-сиңлим, мениң, той қизим,

Мән беғимға маңдим. Мүрмәккини

Хушпурақ гиялар билән тәрдим,

Әң есил һәсәлни йедим, шарап билән

Сүтни ичтим». «Достлирим, еғиз

Тегиңлар, һөзүрлинип ичиңлар һәм

Муһәббәтин мәс болуңлар!»

 2 «Мән ухлисамму, жүригим ухлимайду...

Сөйүмлүгимниң үнини аңлаватимән, у

Ишигимни чекип: “Маңа ичип бәргинә,

Достум, қериндишим, мениң таза

Кәптирим! Бешим шәбнәмдин һөл болди,

Чачлиримдин су тамчиватиду’’,— деди.

 3 Мән кийимимни йешивәткән едим, уни

Яңливаштин кийимәнму? Мән

Аяқлиримни жуюп ятқан, йәнә

Уларни паскина қилимәнму?

 4 Сөйүмлүгүм қолини ишиктин еливәтти,

Бар ичим буниңдин әндишигә чүшти.

 5 Мән ашиғимға ечип бериш үчүн орнумдин

Турдум, қоллиримдин мүрмәкки темип,

Бармақлиримдин у қулупниң тақиғиға ақти.

 6 Мән әзизимгә ачсам, амма у кетип қапту.

Шу чағда җеним мениңдин чиқти,

Мән паракәндиликкә чүштүм. Мән

Уни издидим, лекин тапалмидим.

Чақирсамму, у маңа җавап қайтурмиди.

 7 Мән шәһәрни арилап жүрүдиған

Күзәтчиләргә дучар болдум.

Улар мени уруп, җараһәтлиди.

Сепилниң күзәтчилири мениңдин

Ромалимни жулуп елип, ташлиди.

 8 Йерусалимниң қизлири, силәрдин қәсәм

Алимәнки, әгәр мениң сөйүмлүгимни

Учритип қалсаңлар, муһәббәт отида

Көйүватқинимни униңға ейтиңлар».

 9 «Сениң жигитиң башқа жигитләрдин

Немиси билән артуқ, аялларниң

Арисидики әң гөзили? Ашиғиң башқа

Ашиқлардин қандақ пәриқлиниду?

Немә үчүн сән биздин шундақ қәсәмни

Тәләп қиливатисән, ейтқина?»

 10 «Мениң достум чирайлиқ һәм салапәтлик,

У он миңлиған жигитләрдин әң есили.

 11 Униң беши — сап алтун, чачлири сәлкиндә

Йейилған палмидәк, улар қарғидәк қара.

 12 Униң көзлири сулар ериқлирида

Чөмүлүватқан кәптәрләрдәк. Улар сүттә

Чөмүлүп, көлчәкниң йенида олтириду.

 13 Униң мәңизлири — хушпурақ гүлзар.

Һиди димақ яридиған гиялар

Өскән чирайлиқ дөңләрдур.

Калпуклири — мүрмәкки пурайдиған

Гөзәл лалигүлләрдур.

 14 Қоллириниң бармақлири — алтундин,

Топазлар билән улар безәлгән. Қосақ-қарни

Силиқланған пил устиханлиридин болуп,

Яқут ташлар уни чөрәдигән.

 15 Униң путлири — сап алтун һуллирида

Турғузулған мәрмәр түврүклиридур.

Чирайи билән у Либанға қияс,

Кедрлардәк бүйүктин-бүйүк.

 16 Еғизлири — қәнт шекәрдәк татлиқ

Һәм өзи пүтүнләй гөзәлликтур.

Мана, мениң жигитим қандақ вә

Мениң достум мошундақ тартимлиқ.

Аңлаватамсиләр, Йерусалим қизлири!»