Чиқиш

26 Муқәддәс чедирни 10 зәдивалдин ясиғин, улар әң яхши ешилгән зиғир жиптин, көк жиптин, сөсүн жуңдин, ярқин-қизил жуң жипидин қилинсун. Уларда хурабинларни кәштә басқин. Бу кәштичиниң иши. 2 Һәр зәдивалниң узунлуғи 28 җәйнәк, кәңлиги төрт җәйнәктур. Һәммә зәдиваллар бир өлчәмдә болуши лазим. 3 Бәш зәдивални бир-бири билән улап вә бәш башқа зәдивалниму бир йоған зәдивал қилғин. 4 Йоған зәдивалниң ахирқи зәдивалиниң четидә көк жиптин кирмәкләрни ясиғин, шунила йәнә бир йоған зәдивалниң ахирқи зәдивалиниң четидиму қилғин. Бу йоған зәдивалларниң қошулидиған җайи. 5 Бир зәдивалда 50 кирмәкни қилғин вә қошулидиған җайниң башқа тәрипидә болған зәдивалниң ахирида 50 кирмәкни қилғин, кирмәк кирмәккә уттур. 6 Зәдиваллар бирпүтүн муқәддәс чедир болуши үчүн, 50 алтун илмәкләрни ясиғин вә мошу илмәкләр билән зәдивалларни бир-биригә чатқин.

7 Муқәддәс чедирниң йопуғи үчүн өшкә жуңидин зәдивалларни ясиғин. 11 зәдивални ясиғин. 8 Һәрбир зәдивалниң узунлиғи 30 җәйнәк, кәңлиги болса төрт җәйнәктур. Барлиқ 11 зәдивал бир өлчәмдә болуши лазим. 9 Бәш зәдивални алайтән қошқин вә алтә зәдивални алайтән һәм алтинчи зәдивални чедирниң алдидики тәрәптә иккигә қатлиғин. 10 Йоған зәдивалниң ахирқи зәдивалиниң четидә 50 кирмәк вә башқа йоған зәдивалниң зәдивалиниң четидә 50 кирмә қилғин. Бу зәдивалларниң қошулидиған җайи. 11 50 мис илмәкләрни ясап, уларни кирмәкләргә киргүзгин вә зәдиваллар бир йопуқ болуши үчүн, уларни чатқин. 12 Йопуқниң зәдиваллириниң қалған қисми саңгилап турсун. Йопуқниң қалған қисми муқәддәс чедирниң арқа тәрипидә саңгилап турсун. 13 Йопуқ зәдиваллириниң узунлиғидин қалған бир қисми — бир тәрәптин бир җәйнәк вә башқа тәрәптин бир җәйнәк — муқәддәс чедирни иккила тәрәптин йепиши үчүн, униң тәрәплиридин саңгилап турсун.

14 Йопуқниң үстидин қизил рәңгә боялған қошқар терисидин йепинча ясиғин, униң үстидин тюлень терисидин йепинча болсун.

15 Акация яғичидин муқәддәс чедир үчүн тикләнгән рамиларни ясиғин. 16 Һәрбир раминиң узунлиғи 10, кәңлиги бир йерим җәйнәктур. 17 Һәрбир раминиң бир-биригә қатар турған иккидин путиғи бар. Муқәддәс чедирниң һәммә рамилирини әшундақ қилғин. 18 Муқәддәс чедир үчүн рамиларни ясиғин, җәнупкә, Нәгәвкә қаритилған тәрәп үчүн 20 рама қилғин.

19 20 рама үчүн тапанлар билән 40 күмүч тегиләрни яса: икки путақлиқ рама астиға тапанлар билән икки тегини вә кейинки һәрбир икки путақлиқ рама үчүн тапанлар билән иккидин тегини. 20 Шундақла муқәддәс чедирниң башқа, шималий, тәрипи үчүн 20 рама, 21 тапанлар билән 40 күмүч тегиләрни: рама астиға тапанлар билән икки тегини вә кейинки һәрбир раминиң астиға тапанлар билән икки тегини қойғин. 22 Муқәддәс чедирниң арқа, ғәрбий, тәрипигә алтә рамини яса. 23 Муқәддәс чедириниң арқа тәрипигә булуң таянчилири сүпитидә икки рамини қилғин. 24 Улар төвәндин башлинип, жуқурида биринчи һалқиниң йенида бир-бирси билән қошулидиған икки охшаш қисимлардин ибарәт болуши лазим. Улар иккилиси шундақ болуши керәк. Улар булуң таянчилири болуп хизмәт қилиду. 25 Һәммиси болуп сәккиз рама болуши керәк, улар үчүн тапанлар билән күмүч тегиләр — 16 тегә: бир рама астида тапанлар билән икки тегә вә кейинки һәрбир рама астиға тапанлар билән иккидин тегә болсун.

26 Акация яғичидин чәңзиләрни яса: муқәддәс чедирниң бир тәрипидики рамилар үчүн бәш чәңзә, 27 Муқәддәс чедирниң башқа тәрипидики рамилар үчүн бәш чәңзә вә кәйнидики, ғәрбий, тәрипидики рамилар үчүн бәш чәңзә. 28 Оттурисидики чәңзә рамиларниң оттурида бир тәрәптин йәнә бир тәрәпкә өтүдиған болуши лазим.

29 Рамиларни алтун билән қапла, уларға чәңзиләрни киргүзүш үчүн уларда алтун һалқиларни яса вә чәңзиләрни алтунға қапла. 30 Саңа тағда берилгән реҗигә мувапиқ муқәддәс чедирни турғузғин.

31 Көк жиптин, сөсүн жуңдин, ярқин-қизил жуң жипидин вә әң есил ешилгән зиғир жиптин пәрдә яса. Униңда хурабинлар болуши лазим. Бу кәштичиниң ишидур. 32 Пәрдини акациядин ясалған вә алтун билән қапланған төрт түврүккә қадиғин. Улар үчүн миқлар алтундин болуши лазим. Түврүкләр тапанлири бар төрт күмүч асаста туруши керәк. 33 Пәрдини илмәкләр астида орунлаштур вә гува сандуғини пәрдиниң кәйнигә әкиргин. Силәрдә пәрдә муқәддәс җайни әң муқәддәс җайдин бөлүп турсун. 34 Шундақла әң муқәддәс җайда гува сандуғиға қапқисини қойғин.

35 Пәрдиниң алдида үстәлни қойғин, үстәлгә уттур — муқәддәс чедирниң җәнуп тәрипигә — шамданни қойғин. Үстәлни болса шималий тәрәпкә орунлаштур. 36 Чедирға кириш үчүн көк жиптин, сөсүн жуңдин, ярқин-қизил жуң жипидин вә есил ешилгән зиғир жиптин пәрдә ясиғин. Бу тоқумичиниң иши. 37 Пәрдә үчүн акациядин бәш түврүкни ясиғин вә уларни алтун билән қаплиғин. Улар үчүн миқлар алтундин болуши лазим. Түврүкләр үчүн тапанлири бар бәш тегиләрни мистин қуйғин.