Коринтлиқларға 1-хәт

15 Қериндашлар, мән силәргә җакалиған хуш хәвәрни әсләтмәкчимән, силәр уни қобул қилғандиңлар вә униңда туруватисиләр. 2 У арқилиқ силәр һәм қутқузулуватисиләр — мошу хуш хәвәрни мән силәргә җакалиған сөзләр түпәйли, әгәр силәр уни мәккәм тутуватсаңлар. Болмиса, силәр бекарға етиқатчилар болдуңлар.

3 Мән силәргә һәммидин авал өзәм қобул қилған нәрсини — Мәсиһ гуналиримиз үчүн Язмиларға мувапиқ өлгинини йәткүздүм. 4 У дәпин қилинди вә үчинчи күни Язмиларға мувапиқ тирилдүрүлди 5 вә Кифаға көрүнди, андин 12 әлчигә. 6 Андин 500дин ошуғирақ қериндашларға көрүнди, уларниң нурғунлири һазирғичә тирик, бәзилири болса өлүм уйқисида. 7 Андин иниси Яқупқа, униңдин кейин барлиқ әлчиләргә көрүнди. 8 Һәммисидин кейин вақти тошмай туғулғандәк болған маңиму намайән болди.

9 Мән әлчиләрниң арисида әң төвини һәм әлчи дәп атилишқиму лайиқсиз, чүнки мән Худаниң җамаитини тәқиплигән едим. 10 Амма Рәббимниң мол меһирлиги тупәйлидин мән һазир силәр көрүватқан дәриҗигә йәттим. Униң маңа билдүргән мол меһирлиги бекар болмиди, бәлки мән уларниң барлиғидин артуғирақ әмгәк қилдим, һалбуки, мән әмәс, бәлки мениң билән болған Худаниң мол меһирлигидур. 11 Ейтмақчи, мәйли мән болай яки улар — биз шундақ бир вәз ейтимиз һәм силәр шуниңға ишәндиңлар.

12 Әгәр Мәсиһ һәққидә у өлүмдин тирилди, дәп вәз қилиниватса, қандақларчә араңлардики бәзилири өлүмдин тирилиш йоқ, дәйду? 13 Чүнки әгәр өлгәнләрниң тирилиши йоқ болса, у чағда Мәсиһму тирилмиди. 14 Әгәр Мәсиһ тирилмигән болса, у чағда етиқатимиз бекар һәм вәзимизму бекар. 15 Униңға қошумчә, биз сахта гувачилар болуп қалимиз. Чүнки әгәр Пәрвәрдигар Мәсиһни тирилдүрмигән болса һәм әгәр һәқиқәтән өлгәнләр тирилмисә, биз Худаға қарши гувалиқ бәргән болимиз. 16 Сәвәви, әгәр өлүп кәткәнләр тирилмисә, Мәсиһму тирилмиди. 17 Әгәр Мәсиһ тирилмигән болса, у чағда силәрниң етиқатиңлар пайдисиз — силәр техичила гуналириңларға патқан һаләттә. 18 Шундақла Мәсиһ билән бирликтә болуп, өлүп кәткәнләрму мәңгүгә һалак болди. 19 Әгәр пәқәт мошу өмүрдила биз Мәсиһкә үмүтләнгән болсақ, биз барлиқ инсанларниң арисидики әң бечарә адәмләрмиз.

20 Амма һәқиқәтән Мәсиһ өлүмдин тирилди, у өлүм уйқисида болғанларниң арисидики дәсләпки мевә. 21 Чүнки өлүм инсан арқилиқ болғинидәк, инсан арқилиқ өлгәнләрниң тирилишиму болиду. 22 Адәм атида һәммиси өлгинидәк, Мәсиһтә һәммиси һаят болиду. 23 Лекин һәммиси өз новитидә: Мәсиһ — биринчи мевә, андин униң һазирлиниш вақтида — Мәсиһкә мәнсүпләр. 24 Андин у әң ахирида, йәни барлиқ һөкүмәтләр, һакимийәтләр һәм күчләрни йоқ қилғанда, Падишалиқни Худа вә Атисиға қайтуруп тапшуриду. 25 Чүнки Худа униң айиғи астиға барлиқ дүшмәнлирини қоймиғичә, у падишалиқ қилиши лазим. 26 Йоқитилидиған ахирқи дүшмән — өлүмдур. 27 Пәрвәрдигар «униңға барлиғини беқиндуриду». Лекин У: «барлиғи беқиндурулди» дегәндә, ениқки, Беқиндурғучидин башқа һәммиси униңға беқиндурулди. 28 Һәммә нәрсә униңға бойсундурулғандин кейин, Худа барлиғиға һәммә нәрсә болуши үчүн, Оғли өзиму Беқиндурғучиға беқиниду.

29 Өлүп кетиш үчүн чөмдүрүлгәнләргә немә болиду? Әгәр өлгәнләр һәргиз тирилмисә, у чағда улар өлүш үчүн немишкә чөмдүрүлиду? 30 Немә үчүн бизму һәр вақитта ховуп-хәтәргә дуч болуп жүримиз? 31 Мән һәр күни өлүм үзигә қарап жүримән. Бу шундақла, мән Һакимдаримиз Мәсиһ Әйсада силәр һәққидә, қериндашлар, пәхирләнгәнгә охшаш, дәрһәқиқәттур. 32 Әгәр мән башқилиридәк Әфәстә һайванлар билән күрәшкинимдә, униңдин маңа немә пайда? Әгәр өлгәнләр тирилмисә, у чағда «келиңлар, йәп-ичәйли, чүнки әтә өлүп кетимиз». 33 Алданмаңлар! Яман муамилиләр пайдилиқ адәтләрни бузиду. 34 Сәгиңлар һәм һәққаний иш қилип, гунадин қол үзүңлар, чүнки бирмунчилириңлар Худани тонумайдикәнсиләр. Буни силәрни уялдуруш үчүн ейтиватимән.

35 Бирақ кимду-бирси: «Өлгәнләр қандақ тирилиду? Һәм улар қандақ тәндә келиду?»— дәп сорайду. 36 Пәмсиз адәм екәнсән! Сән тәргән бир нәрсә авал өлмәй, үнәлмәйдиғу. 37 Сән тәргән нәрсә — бу тәрәққий әткән өсүмлүк әмәс, бәлки дан, мәсилән, буғдайниң яки башқа бир зираәтниң, 38 лекин Яратқучи униңға Өзи халиған җисим-тәнни бериду вә һәрқандақ данниң өзигә хас җисми бар. 39 Барлиқ җисимлар охшаш әмәс, бәлки адәмләрниң җисми бирхил, җаниварларниң — башқа, қушларниң — йәнә башқа вә белиқларниң техиму башқидур. 40 Асман җисимлири бар һәм йәр җисимлири бар, лекин асман җисимлириниң шәрипи башқичә, йәр җисимлириниң — башқичә. 41 Қуяшниң шан-шәрипи өзгичә, айниң шәрипи башқа һәм юлтузларниң шәрипи йәнә башқа. Қошумчә, бир юлтуз башқа юлтуздин шәрипи билән пәриқлиниду.

42 Өлгәнләрниң тирилишиму шуниңдәкла. Чирикликтә терилиду — чиримәсликтә тирилиду. 43 Шәрмәндичиликтә терилиду — шан-шәрәптә тирилиду. Аҗизлиқта терилиду — күч-қудрәттә тирилиду. 44 Җисманий тән терилиду — роһий тән тирилиду. Әгәр җисманий тән болса, у чағда роһий тәнму мәвҗут. 45 Шундақ йезилған: «Биринчи инсан Адәм ата тирик җан болди». Ахирқи Адәм һаятлиқ беридиған роһ болди. 46 Амма авал роһий тән әмәс, бәлки җисманий, андин роһий. 47 Биринчи адәм — йәр-зиминға мәнсүп һәм топрақтин яритилған, иккинчи адәм — асманға мәнсүп, шу йәрдин кәлди. 48 Топидин яритилған қандақ болса, топидин яритилғанлар шундақтур вә асмандики қандақ болса, асманға мәнсүпләр шундақ болиду. 49 Һәм биз топидин яритилғанға охшиғинимиздәк, шундақла кәлгүсидә асмандикигә охшаш болимиз.

50 Амма, қериндашлар, шуни ейтайки, чириклик чиримаслиқни мирас қилалмиғинидәк, тән һәм қан Худаниң Падишалиғини мирас қилалмайду. 51 Мана, силәргә муқәддәс сирни ейтай: биз һәммимиз өлүм уйқисида ухлап қалмаймиз, лекин һәммимиз өзгиримиз, 52 бир дәқиқидә, көзни бир жумуп ачқичә, ахирқи карнәй челинғанда. У чалидудә — һәм өлгәнләр чиримас болуп тирилиду вә биз өзгиримиз. 53 Бу чирик нәрсә чиримаслиққа вә бу өлүдиған нәрсә өлмәсликкә айлиниду. 54 Чирийдиған нәрсә чиримаслиққа вә өлүдиған нәрсә өлмәсликкә айланғанда, шунда йезилған: «Өлүм мәңгүгә йоқитилди», дегән сөз әмәлгә ашурулиду. 55 «Өлүм, қени сениң ғалибийитиң? Өлүм, қени сениң нәштириң?» 56 Өлүмни туғдуридиған нәштәр — гуна, гунаниң күчи болса — Тәврат қануни. 57 Амма бизгә Һакимдаримиз Әйса Мәсиһ арқилиқ ғәлибә бериватқан Худаға миң шүкүр!

58 Шуниң үчүн, әзиз қериндашлирим, чиң, тәврәнмәс болуңлар, әмгигиңлар Йәһваниң алдида бекар әмәслигини билип, һәрдайим Пәрвәрдигарниң хизмитидә көп ишләңлар.