Ибранийларға

11 Етиқат — бу үмүт қилған нәрсини асаслиқ күтүш, гәрчә көрүнмәйдиған болсиму, әсли моҗут нәрсиниң рошән испати. 2 Етиқати түпәйли қедимий заманда яшиғанлар өзлири һәққидә яхши гувалиқ алған еди.

3 Биз етиқатимиз түпәйли каинаттики һәммәйләнниң түзүлүшлири Худаниң сөзи билән орунлаштурулған екәнлигини чүшинимиз, шундақ қилип, көрүнидиған нәрсә көрүнмәйдиған нәрсидин пәйда болған еди.

4 Етиқати түпәйли Һабил Қабилниңкидин баһалиғирақ қурбанлиқни Пәрвәрдигарға әкәлгән. Етиқати түпәйли у өзиниң һәққаний екәнлиги тоғрисида гувалиқ алди вә Худа униң һәдийәлирини мақуллиди. Шундақла етиқатиға бола у өлүп кәткән болсиму, техила сөзлимәктә.

5 Етиқати түпәйли Һанух елип кетилгән еди, шу сәвәптин у өлүмни көрмиди вә уни һеч йәрдә тапқили болматти, чүнки Худа уни елип кәтти, лекин елип кетилиштин авал у Рәббигә яққини тоғрилиқ гува алған еди. 6 Етиқатсиз Худаға йеқиш әсли мумкин әмәс, чүнки Худаға йеқинлишиватқан киши Униң бар екәнлигигә вә Уни әстаидил издигәнләрни У мукапатлайдиғиниға ишиниши керәк.

7 Етиқати түпәйли Нуһ техи көрүнмигән нәрсиләр тоғрисида Худа тәрипидин агаһландурулғанда, итаәтчанлиқни көрситип, өйидикиләрниң аман қелиши үчүн, кемә ясиди. У етиқати арқилиқ дунияни әйиплиди вә етиқатиға бола һәққанийлиқниң мирасхори болди.

8 Етиқати түпәйли Ибраһим чақирилғанда беқинип, келәчәктә варислиққа алидиған зиминға йол тутти. У гәрчә қәйәргә кетиватқинини билмисиму, шу яққа маңди. 9 Етиқати билән у вәдиләнгән йәрдә ят йәрдики мусапирдәк қалди вә Исһақ һәм Яқуп, йәни шула вәдиниң мирасхорлири билән чедирларда яшиди. 10 Чүнки у мустәһкәм һули бар шәһәрни күтти, сәвәви униң Бәрпакари һәм Қурулушчиси  — Худа Өзи.

11 Етиқати түпәйлидин Сарәму, гәрчә униң вақти өтүп кәткән болсиму, әвлатқа һамилдар болуш күчини алди, чүнки вәдә Қилғучини ишәнчлик дәп саниди. 12 Шундақ екән, бирсидин, йәни өлгән адәмдәк болуп қалған Ибраһимдин асмандики юлтузлардәк һәм деңиз қирғиғидики қумдәк көп, санақсиз пәрзәнтләр туғулди.

13 Уларниң барлиғи вәдиләнгән нәрсини алмай, өлүп кәтти. Бирақ уни жирақтинла көрүп, қучақ йейип қарши алди һәм шу йәрдә улар өзлирини ят вә вақитлиқ турғунлар, дәп очуқ етирап қилип яшиди. 14 Мундақ сөзлигәнләр шуни көрситидуки, улар шәхсий өз җай-маканини әстаидил издимәктә. 15 Әгәр улар чиққан йерини һәқиқәтән әслигән болса, қайтип келишкә имканийити бар еди. 16 Лекин улар әвзәлгә — әршкә мунасивәтлик нәрсигә интилди. Шуңлашқа Тәңрини улар өз Худайидәк чақирғанда, У улардин иза тартмайду һәм У уларға бир шәһәрни тәйярлап қойди.

17 Етиқати түпәйли Ибраһим синақ вақтида Исһақни гоя қурбанлиққа әкәлди. Һә, хурсәнлик билән вәдиләрни алған киши өзиниң ялғуз оғлини қурбанлиққа әкәлмәкчи болған, 18 гәрчә униңға Худа мундақ ейтқан болсиму: «Саңа вәдә қилинған әвлат Исһақ арқилиқ келип чиқиду». 19 Амма у шундақ дәп ойлидики, Худа Исһақни һәтта өлүмдин тирилдүрүшкә қадир һәм у уни, рәмзләрчә ейтқанда, өлүмдин қайтуруп алди. Шундақ қилип, бу иш кәлгүси вақиәләрниң мисали болди.

20 Етиқати түпәйли Исһақ Яқуп билән Әсавни кәлгүсидә болмақ ишларға бәрикәтлиди.

21 Етиқати түпәйли Яқуп аләмдин өтүватқанда, Йүсүпниң оғуллириниң һәрқайсини бәрикәтлиди вә һасисиға тайинип, Худаға тазим қилди.

22 Етиқати түпәйли Йүсүп өлүми алдида Исраил оғуллириниң Мисирдин чиқиши һәққидә ейтип, өз устиханлирини у йәрдин әкетишини әмир қилди.

23 Етиқати түпәйли Муса туғулғандин кейин үч ай ата-аниси тәрипидин йошурулди, чүнки улар бовақниң алаһидә чирайлиқлиғини көрүп, падишаниң пәрманидин қорқмиди. 24 Етиқати түпәйли Муса чоң болғандин кейин, пирәвн қизиниң оғли, дәп атилиштин ваз кәчти. 25 У Худа хәлқиниң қисмитини таллап, гуна билән вақитлиқ һөзүрлиништин көрә, вәһшиләрчә азаплинишни әвзәл көрди. 26 Чүнки у майланған кишидәк тартиватқан шәрмәндичиликни Мисирниң ғәзнилиридин артуқ байлиқ дәп саниди, чүнки униң көзи мукапатқа қаритилған еди. 27 Етиқати түпәйлидин у Мисирдин чиқип кәтти, лекин падишаниң ғәзивидин қорқуп әмәс, чүнки у Көрүнмәйдиғанни көргәндәк мәккәм еди. 28 Етиқати түпәйли һалак қилғучи уларниң тунҗилириға тәгмәслиги үчүн, у Песах мәйримини нишанлиди һәм қан билән ишикләр түврүклирини сәпти.

29 Етиқати түпәйлидин исраиллиқлар Қизил деңиздин қурғақлиқтәк өтүп кәтти, мисирлиқлар болса өтмәкчи болуп, су билән ғәриқ қилинди.

30 Етиқати түпәйли исраиллиқлар Ериха сепилини йәттә күн давамида айланғандин кейин, улар өрүлди. 31 Етиқати түпәйлидин паһишә Раһаб беқинмиғанлар билән биллә һалак болмиди, чүнки у пайлақчиларни течлиқ билән қобул қилди.

32 Йәнә немә дейишкә болиду? Маңа Гидион, Барақ, Шимшон, Йиптах, Давут, шундақла Самуил вә башқа пәйғәмбәрләр тоғрисида ейтишқа вақит йәтмәйду. 33 Улар етиқати түпәйлидин шаһларни йеңип, һәққанийлиқни тәстиқлигән, вәдиләрни алған, ширларниң еғизлирини япқан, 34 отниң күчини йәңгән, қиличниң бисидин қутулған, аҗизлардин қудрәтлик болған, урушларда җасурлуқ көрсәткән, дүшмәнләр қошунлирини вәйран қилған. 35 Аялларға өлгән йеқинлири тирилиш арқилиқ қайтурулған. Башқилар болса, әвзәлирәк тирилишкә йетиш үчүн, қандақту-бир төләм баһаси арқилиқ қутулуштин ваз кечип, өлтүрүлгән еди. 36 Бәзиләргә болса мәсхирилиништин, қамчилиништин вә һәтта кишәнләр һәм зинданлардин өтүшкә тоғра кәлди. 37 Уларни таш етип өлтүрди, синақларға тартти, уларни һәрдилиди, улар қилич билән чепилди, қой вә өшкә терилирини артип сәргәрдан болди, намратчилиқта, дәрт-һәсрәтләрдә яшиди, вәһшиләрчә хорланди. 38 Бу пүткүл дуния уларниң лайиғи әмәс болсиму, лекин улар чөлләрдә һәм тағларда, өңкүрләрдә вә гәмиләрдә мусапир болуп жүрди.

39 Гәрчә буларниң һәммиси өзлири тоғрилиқ етиқатиға түпәйли Худадин разилиқ гувалиғини алған болсиму, вәдиләнгәнни алмиди. 40 Чүнки улар бизниң қатнишишимизда камаләткә йәткүзүлүши үчүн, Худа бизгә нисбәтән яхши бир нәрсини ойлаштурған еди.