Аюп
42 Аюп Йәһва Худаға бәргән җававида мундақ деди:
2 «Билимәнки, Сән Һәммигә Қадир
Вә ойлиған нийәтлириңниң
барлиғини орунлайсән.
3 Сән: “Ким һечнәрсини чүшәнмәй,
Мәслиһәтчиниң бәлгүлимилирини қараңғулаштурған?”— дәп соридиң.
Һәқиқәтән, мән чүшәнмигән екәнмән,
Мениң үчүн әҗайип, тонуш әмәс
нәрсиләрни изаһлашқа урунуптимән.
4 Өзәң ейттиң: “Сән тиңша Мән
саңа дәйдиғинимни,
Соаллиримға җавап бәргин”.
5 Мән бурун Сән һәққидә пәқәт
әпқачти сөз аңлаптимән,
Әнди болса, көзүм Сени көрмәктә.
6 Шуңа мән сөзлиримдин кечип,
топа һәм күлдә товва қилимән».
7 Андин Йәһва ушбу сөзләрни Аюпқа қилғандин кейин, Йәһва Худа теманлиқ Елипазға қарап:
«Мениң ғәзивим саңа һәм сениң икки ағинәңгә қайнимақта, чүнки силәр Мән тоғрилиқ Мениң қулум Аюптәк һәқиқәтни сөзлимидиңлар. 8 Әнди болса, өзәңлар үчүн йәттә буқа вә йәттә қойни елип, Мениң бәндәм Аюпниң алдиға берип, көйдүрүмиңларни әкелиңлар. Мениң хизмәткарим Аюп силәр үчүн дуа қилиду, чүнки пәқәт униң йүзинила Мән қобул қилимән. Болмиса, Мениң қулум Аюп ейтқандәк, силәр һәқиқәтни Мениң алдимда демигиниңлар үчүн аброюңларни төкүмән!»
9 Шуниң билән теманлиқ Елипаз, шувахлиқ Билдад вә наамалиқ Зопар, Йәһва Рәбб уларға әмир қилғандәк, иш қилди. Йәһва Аюпниң васитилиғини қобул қилди.
10 Аюп достлири үчүн дуа қилғандин кейин, Йәһва уни әсирдин қайтурди. Униңдин ташқири, Йәһва Аюпқа авалқи мүлүгидин икки һәссә артуқ байлиқ бәрди. 11 Униң барлиқ бурадәр-қериндашлири һәм уни билгәнләр келип, униң өйидә нан йеди. Улар униңға тәзийә билдүрүп, Йәһва Худаниң иҗазәт қилған азаплиридин кейин, униңға тәсәлли беришти. Улар һәрқайси униңға мәлум бир миқдарда ахчини вә бирдин алтун үзүк һәдийә қилишти.
12 Шуниң билән Йәһва Пәрвәрдигар Аюпниң ахирқи күнлирини авалқи күнлиридин көпирәк бәрикәтлиди. Униң әнди 14 000 ушшақ мели, 6000 төгиси, 1000 өкүзи вә 1000 ешиги болди. 13 Униң 7 оғли һәм 3 қизи туғулди. 14 Биринчи қизиға у Йәмима, иккинчи қизиға Кәзийә һәм үчинчи қизиға Кәрәнһаппух дегән исимларни қойди. 15 Пүткүл йәр-зиминда Аюпниң қизлиридәк гөзәл аяллар тепилматти. Уларниң атиси ака-инилири қатарида уларғиму мирас бөлүп бәрди.
16 Аюп пәйғәмбәр бу ишлардин кейин йәнә 140 жил яшиди вә оғуллирини, уларниң оғуллирини, нәврә-чәврилирини төртинчи әвлатқичә көрди. 17 Аюп яхши қерилиқта, өмригә қанаәтлинип яшап, ахири вапат болди.