Чиқиш
11 Йәһва Мусаға: «Мән пирәвнгә һәм Мисирға йәнә бир апәтни әвәтимән. Шуниңдин кейин у силәрни қоюп бериду. Пәқәтла бар нәрсәңлар билән қоюп бериду әмәс, бәлки бу йәрдин қоғлаветиду. 2 Һәрбир әр кишиниң вә һәрбир аял кишиниң өз хошнилиридин күмүч һәм алтун затларни сорап еливелишини хәлиқкә ейтқин»,— деди. 3 Шуниң билән Йәһва хәлиқкә мисирлиқларниң көзидә илтипат тапқузди. Униңға қошумчә Муса Мисир елидә улуқ киши еди — пирәвнниң хизмәткарлириниң көзидиму һәм хәлиқниң көзидиму.
4 Муса сөз қилип: «Йәһва мундақ дәйду: “Мән йерим кечигә йеқин Мисирни кезип чиқимән. 5 Шуниң билән Мисир елидә бар тунҗилар, йәни пирәвниң тәхтидә олтарған тунҗисидин башлап, қол түгмәндә ишләватқан аял хизмәткарниң тунҗисиғичә һәммиси өлүп кетиду, шундақла һайванларниң тунҗилириму. 6 Вә пүтүн Мисир йеридә зор жиға чиқиду, униңдәк жиға илгири болмиған вә буниңдин кейинму болмайду. 7 Амма Исраил оғуллириға һечбир ишт һавшумайду вә силәр Йәһваниң мисирлиқлар билән Исраил оғуллири арисида пәриқ әткинини билишиңлар үчүн, йә адәмгиму, йә һайванғиму һавшумайду”. 8 Шу сәвәптин һәммә хизмәткарлириңиз алдимға келип, тизлинип, йәргичә тазим қилип: “Өзәңму кәт вә сени әгәшкән барлиқ хәлиқ кәтсун”, дәйду. Мошуниңдин кейин мән кетимән»,— деди. Мошу сөзләрни ейтип, қаттиқ аччиқта у пирәвндин чиқип кәтти.
9 Андин Йәһва Мусаға: «Мениң мөҗүзилирим техиму көпирәк Мисир йеридә көрситилиши үчүн, пирәвн силәргә қулақ салмайду»,— дәп ейтти. 10 Муса билән Һарун барлиқ мошу мөҗүзиләрни пирәвнниң алдида көрсәтти, лекин Йәһва пирәвн жүригигә тәрса болушқа йол бәрди вә у өз елидин Исраил оғуллирини қоюп бәрмиди.