Яритилиш
17 Ибрам 99 яшқа киргәндә, Йәһва униңға көрүнүп: «Мән Һәммигә Қадир Худадурмән. Мениң алдимда меңип, әйипсиз болғин. 2 Мән сениң билән келишим түзүп, саңа интайин көп әвлат беримән»,— деди.
3 Буни аңлап Ибрам йәргә дүм ятти, Худа болса униң билән сөзләшни давамлаштуруп, мундақ деди: 4 «Мән сениң билән келишим түздүм вә сән чоқум көплигән хәлиқләрниң атиси болисән. 5 Сени әнди Ибрам дәп атимайду, сениң исмиң Ибраһим болиду, чүнки Мән сени нурғун хәлиқләрниң атиси қилимән. 6 Мән саңа интайин көпсанлиқ әвлат беримән һәм сәндин хәлиқләрни бәрпа қилимән вә сениңдин падишалар чиқиду.
7 Сениң үчүн вә сениңдин кейинки әвладиң үчүн Худа болушқа, Мән Өзәмниң әбәдий келишимимни — сән вә сәндин кейинки кәлгүси әвлатлардики нәслиң билән келишимимни — орунлаймән. 8 Сән мусапир болуп яшаватқан йәрни, пүткүл Қанан зиминини, саңа вә сениңдин кейинки әвладиңға егидарчилиққа мәңгүгә беримән вә уларға Худа болумән».
9 Худа Ибраһимға: «Сән Мениң келишимимгә, сән вә кәлгүси әвлатлардики нәслиң әмәл қилиңлар. 10 Мана Мениң силәр вә келәчәктики әвладиңлар билән түзгән келишимим, уни силәр орунлишиңлар керәк: силәрдики һәрбир әр киши хәтнә қилинсун. 11 Силәр җинис әзайиңларниң учиниң терисини кесиветишиңлар керәк, бу Мән билән болған келишимиңларниң бәлгүси болиду. 12 Һәрбир әркәк бала: мәйли өйдә туғулған болсун, мәйли сениң әвладиңдин болмай, ятлардин пулға сетивелинған болсун, сәккиз күнлүк болғанда хәтнә қилинсун. Буни әвлаттин әвлатқа қилиш лазим. 13 Өйүңдә туғулған һәрбир әр киши вә пулуңға сетивелинған һәрбир әр киши чоқум хәтнә қилиниши керәк. Мениң келишимим, униң бәлгүси силәрниң тәнлириңларда, әбәдий келишим болиду. 14 Лекин җинис әзайиниң учи кесилмигән әр киши — шу җан өз хәлқидин йоқ қилиниду. У Мениң келишимимни бузған болиду»,— деди.
15 Андин Худа Ибраһимға: «Аялиң Сараһни әнди Сараһ дәп атимиғин, чүнки уни әнди Сарә дәп атайду. 16 Мән уни бәрикәтләп, униңдин саңа бир оғул беримән, уни бәрикәтләймән вә униңдин хәлиқләр төрилиду, хәлиқләрниң падишалириму униңдин чиқиду»,— деди. 17 Буни аңлап, Ибраһим йәргә дүм ятқач күлүп кетип жүригидә: «100 яшлиқниң балиси туғуларму һәм 90 яшлиқ Сарә бала туғарму?!»— деди.
18 Андин Ибраһим һәқиқий Худаға: «Исмаил болсиму алдиңда яшисикән!»— деди. 19 Буниңға Худа: «Аялиң Сарә җәзмән саңа оғул туғуп бериду вә сән униңға Исһақ дәп исим қойисән. Униң билән Мән келишимимни келәчәктики әвлатлири үчүн, мәңгү келишимдәк тәстиқләймән. 20 Лекин Мән Исмаил тоғрилиқму өтүнүшүңни аңлидим. Мән уни бәрикәтләп, униңға әвлат беримән вә у интайин көпийиду. Униңдин қәбилиләрниң он икки башчиси чиқиду вә Мән униңдин бүйүк хәлиқни бәрпа қилимән. 21 Амма Мениң келишимимни Исһақ билән тәстиқләймән, уни саңа келәрки жилниң дәл мошу вақтида Сарә туғуп бериду»,— деди.
22 Мошуниңдин кейин Худа Ибраһим билән сөзләшни аяқлаштуруп, униңдин кәтти. 23 Шунда Ибраһим оғли Исмаилни, өз өйидә туғулғанларни вә пулға сетивелинған барлиқ әрләрни — Ибраһимниң өйидики барлиқ әр кишиләрни шу күнила, Худа униңға ейтқандәк, хәтнигә олтарғузди. 24 Ибраһим хәтнә қилинғанда, у 99 яшта еди. 25 Униң оғли Исмаил хәтнә қилинғанда 13 яшта еди. 26 Шу күнила Ибраһим вә униң оғли Исмаил хәтнә қилинди. 27 Улар билән биллә Ибраһимниң өйидикиләрдин һәммә әрләр шундақла хәтнә қилинди: униң өйидә туғулғанлардин барлиғи вә ятлардин пулға сетивелинғанларниң барлиғи.