Ибранийларға
7 Ушбу Мәлкисадиқ — Салим шәһириниң падишаси, Әң Алий Һөкүмранниң роһанийи, Ибраһим әҗдадимиз шаһлар үстидин ғалибә қазинип қайтиватқанда, уни қарши елип, бәрикәтлигән еди. 2 Униңға Ибраһим бар нәрсисидин онинчи қисмини бөлүп бәргән еди. Униң исминиң тәрҗимисигә мувапиқ, у — «һәққанийәт падишаси», андин Салимниң падишаси, йәни «течлиқ падишасидур». 3 Униң атиси, аниси, нәсәбнамиси, күнлириниң башлиниши вә һаятиниң ахирлишиши йоқ, бәлки у Худаниң Оғлиға охшитилип, башроһаний болуп мәңгү қалмақта.
4 Қарап көрүңлара, әвлат башчиси Ибраһим әң яхши олҗидин онинчи қисмини бәргән Мәлкисадиқ қанчилик улуқ болған! 5 Роһанийлиқни алған Ләвийниң оғуллириниң вәсийити бар — Қанун бойичә хәлиқтин, йәни өз қериндашлиридин, гәрчә улар Ибраһимниң нәсли болсиму, тапқининиң онинчи қисмини улар жиғатти. 6 Амма нәсәбнамиси улардин болмиған киши Ибраһимниң олҗисидин онинчи қисмини елип, вәдиси барни бәрикәтлиди. 7 Кичиги чоңи тәрипидин бәрикәтлиниши шүбһисиздур. 8 Бир тәрәптин онинчи қисимларни өлүп кетидиған адәмләр — ләвийләр, йәнә бир тәрәптин Язмиларда тирик, дәп гува берилгән киши алди. 9 Ибраһим арқилиқ һәтта онинчи қисимларни алидиған Ләвийму онлуқни униңға төлиди дейишкә болиду, 10 чүнки Мәлкисадиқ Ибраһимни қарши алғанда, у техи туғулмиған Ибраһимниң әвлади еди.
11 Демәк, әгәр мукәммәллик һәқиқәтән хәлиқкә берилгән Қанунниң айримчилиғи болған ләвийлик роһанийәт васитиси арқилиқ йетиштүрүлсә, у чағда немишкә йәнә бир Һарунға охшайдиған әмәс, бәлки Мәлкисадиққа охшайдиған роһаний пәйда болуши керәк еди? 12 Роһанийлиқ өзгәргәндә, Қанунни өзгәртиш һаҗити туғулиду. 13 Чүнки ейтиливатқан мәзкүр киши башқа қәбилигә мәнсүп еди, униңдин һечким қурбангаһ алдида хизмәт қилип бақмиған. 14 Рошәнки, Һакимдаримиз Йәһуда қәбилисидин чиққан, у қәбилә һәққидә Муса роһанийларға нисбәттән һечбир нәрсә ейтмиған еди.
15 Техиму бу иш рошән болдики, Мәлкисадиққа охшаш башқа роһаний пәйда болғанда. 16 Униң мундақ болғини келип чиқишиға бағлиқ әмирләр Қануни бойичә әмәс, бәлки пүтмәс-түгимәс һаятлиқниң қудритидиндур. 17 Чүнки бу һәқтә: «Сән — Мәлкисадиққа охшайдиған әбәдий Роһанийсән», дәп гувалиқ берилгән.
18 Шуңлашқа алдинқи вәсийәт униң аҗизлиғи һәм пайдисизлиғи түпәйли күчидин қалдурулди. 19 Қанун һечнәрсини мукәммәл қилалмиди. Камаләтни яхширақ үмүтниң киргүзүлүши елип кәлди, униң арқилиқ биз Худаға йеқинлишалаймиз. 20 Бу ишму қәсәм билән қилинди, 21 (чүнки қәсәмсиз роһанийлар болған кишиләр бар, лекин у Ейтқучиниң қәсими билән роһаний болди: «Йәһва қәсәм яд қилди һәм өкүнмәйду: “Сән — мәңгүгә роһанийсән”»). 22 Шундақ қилип, Әйса яхширақ келишимниң капалити болди. 23 Униңдин ташқири, көплири бир-бирсиниң орнини бесип роһанийлар болған, чүнки өлүм уларға қелишқа яр бәрмәтти. 24 Лекин Әйса мәңгү яшиғачқа, униң роһанийлиғи башқисиға өтмәйду. 25 Бу шуни билдүридуки, у Тәңригә униң арқилиқ йеқинлишиватқанларға қутқузушни беришкә қабил, чүнки у улар үчүн өтүнүшкә һәрдайим тириктур.
26 Башроһанийимиз дәл мошундақ болуши лазим: вападар, һелигәрликкә ят, булғанмиған, гунакарлардин айрим қилинған һәм асманлардин үстүн болған. 27 Униңға башқа башроһанийлардәк күндилик қурбанлиқларни — алди билән өз гуналири үчүн, андин хәлиқниң гуналири үчүн — әкелиш кериги йоқ. Чүнки у буни бир қетим һәм мәңгүгә өзини қурбанлиқ қилип, әкелип болди. 28 Қанун аҗизлиқлири бар адәмләрни башроһанийлар қилип бәлгүләйду, Қанундин кейин кәлгән қәсәм болса, әбәдий камил болған Оғлини бәлгүләйду.